यूहन्ना 4
4
यीशु होर सामरी बेटड़ी
1फिरी ज़ैबै प्रभु बै पता लागा, कि फरीसियै शुणु सा कि यीशुऐ यूहन्ना न बोहू च़ेले बणा सा होर तिन्हां बै बपतिस्मा देआ सा। 2अगर यीशु आपु नैंई पर प्रभु यीशु रै च़ेले बपतिस्मा देआ ती। 3तैबै यीशु आपणै च़ेले सैंघै यहूदिया देशा बै छ़ौड़िआ फिरी गलीला ज़िला बै वापस आऐ, 4होर यीशु बै सामरिया इलाकै न होईया ज़ाणा ज़रूरी ती। 5तैबै यीशु सुखार नगर सामरिया इलाकै तैंईंयैं आऊ, ज़ो तेसा ज़मीना रै नेड़ ती, ज़ुण याकूबै आपणै बेटै यूसुफा बै धिनी ती। 6होर याकूबा रा कुँआ भी तौखै ती, ज़ो तेइयै कोतू ती, यीशु बौता रा थकू होंदा तेई कुँऐ हागै ऐण्ढै बेठा, ऐ गैल लगभग धयाडी हुई।
7ऐतरै न एक सामरी बेटड़ी पाणी भौरदी आई। प्रभु यीशुऐ तेसा बै बोलू, “मुँभै पाणी पिया।” 8किबैकि प्रभु यीशु रै च़ेले ता नगरा बै रोटी लेंदै नौठै ती। 9तेसै सामरी बेटड़ियै यीशु बै बोलू, “तुसै यहूदी होईया मूँ सामरी बेटड़ी न पाणी किबै मौंगा सी?” (किबैकि यहूदी सामरी सैंघै कैण्ढै भी तैरहै रा मेल ज़ोल नैंई डांहदे।)
10यीशुऐ ज़वाब धिना, “अगर तू परमेश्वरै रै वरदाना बै ज़ाणा सा, होर ऐ भी ज़ाणा सा कि सौ कुण सा ज़ुण तौभै बोलदा लागा सा, मुँभै पाणी पीया, ऐ तू तेईन मौंग होर तेई तौभै ज़िन्दगी रा ज़िन्दा पाणी देणा, ज़ो ज़िन्दगी देआ सा।”
11बेटड़ी ऐ यीशु बै बोलू, “ओ प्रभु, तुसा हागै पाणी भौरनै री तैंईंयैं किछ़ भी नी ऑथि, होर कुँआ डूग्घा सा; तैबै भी सौ ज़िन्दगी रा पाणी तुसा हागै कौखै न आऊ? 12कि तुसै आसरै बुज़ुर्ग याकूबा न बडे सी, ज़ुणियै आसाबै ऐ कुँआ धिना सौ; होर आपु आपणै बाल बच्च़ै, होर आपणै गोरु समेत ऐथा न पिऊ?”
13यीशुऐ तेसा बै ज़वाब धिना, “ज़ो कोई ऐई पाणी बै पिला तेई होरी घेरै शोखिणा सा। 14पर ज़ो कोई तेई पाणी बै पिला ज़ो मूँ तिन्हां बै देणा, तेई फिरी होरी घेरै हमेशे रै ज़िन्दगी तैंईंयैं नी शोखिणा सा, बल्कि ज़े पाणी मूँ तेइबै देणा, तेइयै तौईंन एक जाईरू बनाणा सा, होर तेई हमेशा रै ज़िन्दगी तैंईंयैं निकल़दै रोहणा सा।” 15बेटड़ियै प्रभु यीशु बै बोलू, “ओ प्रभु, तेई पाणी मुँभै दै ताकि हांऊँ शोखि नी बणनु होर न पाणी भौरनै री तैंईंयैं ऐतरी दूर ऐनु।” 16मसीह यीशुऐ तेसा बै बोलू, “ज़ा, आपणै लाड़ै बै औखै शाधा।”
17बेटड़ियै ज़वाब धिना, “हांऊँ बिना लाड़ै री सा।” मसीह यीशुऐ तेसा बै बोलू, “तू सच़ बोला सा, हांऊँ बिना लाड़ै री सा।” 18किबैकि तैं पौंज़ लाड़ै पूरै केरै सी, होर ज़ुणी हागै तू ऐबै सा सौ भी तेरा लाड़ा नी ऑथि; ऐ तैं सच़ै बोलू। 19बेटड़ियै मसीह यीशु बै बोलू, “ओ गुरू, मुँभै लागा सा कि तुसै भविष्यवाणी केरनु आल़ै सी। 20आसरै बुज़ुर्गै ऐई ढौगा पैंधै परमेश्वरा री आराधना नैंई केरनी, होर तुसै बोला सी कि ऐ ज़ैगा ज़ौखै आराधना न केरनी ज़रूरी सा बोला सी सौ ज़ैगा यरूश्लेम शैहरा न सा।” 21यीशुऐ तेसा बै बोलू, “ऐ बेटड़ियै, मेरी गैला रा बशाह केर कि तेई बोक्त ऐणा सा कि तुसा न ता ऐई ढौगा पैंधै बापू री आराधना केरनी न ता यरूश्लेम शैहरा न। 22तुसै सामरी लोक ज़ुणिबै नी ज़ाणदै, तेइरी आराधना केरा सी; होर आसै यहूदी ज़ुणिबै ज़ाणा सी, तेइरी महिमा केरा सी, किबैकि उद्धार यहूदी मौंझ़ै न सा। 23पर तेई बौगत ऐणा सा, ज़ुण ऐबै भी सा, ज़ुणीन सच़ै भक्त बापू री आराधना आत्मा होर सच़ाई सैंघै केरनी, किबैकि बापू आपणी तैंईंयैं ऐण्ढै सच़ै भक्ता बै तोपा सा। 24परमेश्वर आत्मा सा, होर ज़रूरी सा कि तेइरी आराधना केरनु आल़ै आत्मा होर सच़ाई सैंघै तेइरी आराधना केरलै।” 25बेटड़ियै प्रभु यीशु बै बोलू, “हांऊँ ज़ाणा सा कि मसीह ज़ुण प्रभु ज़ाणिया सा, ऐणु आल़ा सा, ज़ैबै सौ ऐला, ता आसाबै सारी गैला दसणी।” 26प्रभु यीशुऐ तेसा बै बोलू, “हांऊँ तोबै बोलदा लागादा सा, हांऊँ सौऐ सा।”
च़ेले री वापसी
27ऐतरै न यीशु रै च़ेले आऐ, होर बड़ै हेरान हौन्दे लागै कि यीशु बेटड़ी सैंघै गैला केरदै लागेदें सी; तैबै भी कोइयै नी पुछ़ु, “कि तुसै कि चाहा सी?” होर “किज़ी री तैंईंयैं तेसा सैंघै ढुणिदै लागै सी?” 28तैबै सौ बेटड़ी आपणा गड़ोलू छ़ौड़िआ ग्राँ बै नौठी, होर लोका बै बोलदी लागी, 29“एज़ा एकी मांहणु बै हेरा, ज़ुणियै सैभ किछ़ ज़ो मैं केरू मुँभै दसु सा: कोइँछ़ै ऐ ता मसीह नी ऑथि?” 30तैबै ते ग्राँ न निकल्लिया यीशु बै हेरदे ऐन्दै लागै। 31ऐसा मौंझ़ै तेइरै च़ेले प्रभु यीशु बै ऐ विनती केरी, “ओ गुरू, किछ़ ता खा।”
32पर यीशुऐ तिन्हां बै बोलू, “मूँ आगै खाँणै री तैंईंयैं ऐण्ढा खाँणा सा, ज़ुणिबै तुसै नी ज़ाणदै।”
33तैबै च़ेले आपु न बोलू, “कि कोइयै इन्हरी तैंईंयैं किछ़ खाँणै बै आंणु सा?”
34यीशुऐ तिन्हां बै बोलू, “मेरा खाँणा,” परमेश्वरा री इच्छा बै मनणा सा, ज़ुणियै हांऊँ भेज़ू सा, होर सौ कोम पूरा केरनै री तैंईंयैं ज़ो तेइयै मुँभै धिनुदा सा। 35कि तुसै नी बोलदै, लुणने री तैंईंयैं हाज़ी च़ार मीहने सी? हेरा हांऊँ तुसाबै बोला सा, आपणी औछ़ी फेरिया छेता पैंधै हेरा कि तेआ काटणै री तैंईंयैं पोकेंदे सी। 36काटणू आल़ा ध्याड़ी पा सा होर हमेशा री ज़िन्दगी री तैंईंयैं फ़ौल़ कठा केरा सा; किबैकि वाहणु आल़ा होर काटणू आल़ा दुहे मिलिया खुशी मनालै। 37किबैकि औखै ऐ पड़ाउण खरी बैशा सा: “वाहणु आल़ा होर सा होर काटणू आल़ा कोई होर सा। 38मैं तुसाबै सौ छेत काटणै री तैंईंयैं भेज़ै, ज़ुणीन तुसै खेऊ नी केरू होरिये खेऊ केरू होर तुसै तिन्हरै खेऊ रै फ़ौल़ा न भागी हुऐ।”
सामरी रा बशाह केरना
39तेई नगरा रै बोहू सारै सामरी लोकै तेसा बेटड़ी रै बोलणै न यीशु पैंधै बशाह केरू; किबैकि तेसै ऐ गुआही धिनी ती, यीशुऐ सैभ किछ़ ज़ो मैं केरू ती, मुँभै दसु। 40तैबै ज़ैबै ऐ सामरी प्रभु यीशु आगै बै आऐ, ता प्रभु यीशु हागै अर्ज़ा केरदै लागै, कि आसरै औखै रौहा। तैबै प्रभु यीशु दुई रोज़ तौखै रौहै। 41तेई रै सन्देशा री बजहा सैंघै बोहू लोकै बशाह केरू। 42होर तेसा बेटड़ी बै बोलू, “ऐबै आसै सिर्फ़ तेरै बोलणै पैंधै बशाह नैंई केरदै; किबैकि आसै आपुऐ शूणु, होर ज़ाणा सी कि ऐ मांहणु सच़िऐ दुनिया रा मुक्तिदाता सा।” 43तिन्हां दुई रोजा न बाद प्रभु यीशु तौखै न गलील ज़िलै बै नौठै। 44किबैकि प्रभु यीशुऐ आपुऐ गुआही धिनी कि भविष्यवाणी केरनु आल़ै री आपणै देशा न इज्ज़त नी होन्दी। 45ज़ैबै प्रभु यीशु गलीला न आऊ, ता गलीला रै लोका खुशी सैंघै प्रभु न मिले; किबैकि ज़ेतरै कोम प्रभु यीशुऐ जाचा ध्याड़ी यरूश्लेम शैहरा मौंझ़ै केरै ती, तिन्हैं सौ सारै भाल़ै ती, किबैकि ते आपुऐ भी जाचा बै नौठै दै ती।
राज़ा हागै कोम केरनु आल़ै रै शोहरू बै ठीक केरना
46तैबै प्रभु यीशु भी गलीला रै काना ग्राँ न आऊ, ज़ौखै तिन्हैं पाणी रा अँगूरा रा रस बणाऊ ती। तौखै एक राज़ा रा नोकर ती ज़ुणिरा शोहरू कफरनहूम शैहरा न बीमार ती। 47तेइयै ऐ शुणिया कि प्रभु यीशु यहूदिया रै गलीला न आऊदा सा, प्रभु यीशु हागै नौठा होर तिन्हां आगै अर्ज़ा केरदा लागा कि मूँ सैंघै एज़िया मेरा शोहरू बै ठीक केरा किबैकि सौ मौरनु आल़ा ती।
48यीशुऐ तेइबै बोलू, “तुसै मेरै सन्देशा पैंधै तैबै बशाह केरना ज़ाँ तैंईंयैं तुसै कोई नशाणी होर चमत्कारा कोम नी हेरले।” 49राज़ा रै नोकरै प्रभु यीशु बै बोलू, “ओ प्रभु मेरै शोहरू रै मौरने न पैहलै चौला।”
50यीशुऐ तेइबै बोलू, “ज़ा, तेरा शोहरू ज़िन्दा सा।” तेई मांहणुऐ प्रभु यीशु री गैला पैंधै बशाह केरू, होर नौठा। 51सौ हाज़ी बोता न ती, कि तेइरै नोकर तेई हागै आऐ होर बोलदै लागै, “तेरा शोहरू ज़िन्दा सा।” 52तेइयै तिन्हां न पुछु, “कुणी बौगता न सौ ठीक होंदा लागा?” ती तिन्हैं तेइबै बोलू, “हिज़ लगभग धयाडी एक बज़ै तेइरा जौर उतरु।” 53तैबै बापूऐ ज़ाणु कि ऐ तेई बोगता न हुआ, ज़ुणी बौगता न यीशुऐ तेइबै बोलू, “तेरा शोहरू ज़िन्दा सा,” तैबै तेइयै होर तेइरै सारै घौरा आल़ै बशाह केरू। 54ऐ दुज़ा चमत्कारा रा कोम ती ज़ो यीशुऐ यहूदियै देशा वापस एज़िया गलील ज़िलै बै नौठा।
Aktualisht i përzgjedhur:
यूहन्ना 4: KFX-NT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
This work is licensed under Creative Commons Attribution-ShareAlike 4.0 License.