यूहन्ना 5
5
अठत्ती साल रे बिमार जो ठीक करणा
1इन्हा गल्लां रे बाद यहूदियां रा इक्क त्योहर होया, ते यीशु यरुशलेम सहर बिच गे। 2यरुशलेम सहर अन्दर भेड्डू-फाटक रे नेड़े इक्क पाणी रा तला है, जिस जो इब्रानी भाषा अन्दर बैतहसदा बोल्दे इसेरे कनारे पर पंज्ज बरांड़े बणे रे हिन। 3इस बिच मते सारे बिमार, अन्ने, लट्टे, सूक्के अंगा वाले पेई रैह्ंदे थिये, 4किजोकी ठैहराये रे समय पर परमेश्वर रे स्वर्गदूत कुण्ड बिच उतरी करी पाणी जो हिलाया करदे थिये। पाणी हिलदे ही जे पैल्ले कुण्ड बिच उतरी जादां थिया तिसेरी कोई भी बीमारी ठीक होई जादीं थी। 5तित्ते इक्क मणू थिया जे अठ्ठती साला रा बीमारी अन्दर पेरा थिया 6यीशु ने तिसजो पे रा दिख्खी करी ए समजी गे कि से बड़े दिना रा इस्सी हालत बिच पेरा है तिसने पुछया, “क्या तू ठीक होणा चाह्ंदा?” 7तिस बिमार मणू ने तिसजो जवाब दित्ता, “ओ प्रभु, मेरी मदद करणे वाला कोई भी नी है कि जां से पाणी हिलाया जाए तां मेरे जो तिस तलां बिच उतारे, पर मेरे पुजदे-पुजदे कोई दुज्जा मेरे का पैल्ले उत्तरी जांदा।” 8यीशु ने तिसजो बोल्लेया, “उठ अपणा मन्जा चुक्क, ते चल फिर!” 9तिस यहूदी मणू रा अधरंग तिस्सी बेल्ले ठीक होई गेया ते से उठी करी चलणा-फिरणा लग्गी पेया, पर ए सब किच्छ विश्राम दिन पर होया थिया, 10यहूदी अगुवे तिस मणू जो टोकणा लग्गी पये, “विश्राम दिन पर इय्यां अपणी पन्द लेई करी मूसा रे नियम रे हिसाब कने चलणा-फिरणा मना है।” 11तिसने तिन्हा जो जवाब दिता, “जिन्नी मेरे जो ठीक कित्ता तिसी ने मेरे जो बोल्लेया कि अपणा मंजा चुक ते चल फिर।” 12तिन्हा ने तिसका पुछया, “से कुण मणू है जिनिये तिज्जो बोल्लेया, मंजा चुक कने चल फिर?” 13पर जे ठीक होए रा थिया से नी जाणदा थिया कि से कुण है, किजोकी यीशु तित्ते का इक्क भीड़ बिच तिन्हेरी नजरां का ओझल होई गे थिये। 14इन्हा गल्लां रे बाद से मणू यीशु जो मन्दिर रे अंगण बिच मिल्लेया, यीशु ने तिसजों बोल्लेया, दिख्ख, तू ठीक होई गे रा है: फिरी पाप मत करदा, इय्यां न हो कि इसेरे का भी कोई बड्डी मुसीबत तेरे पर आई पे। 15तिस मणू ने जाई करी यहूदियां अधिकारियां जो बोल्ली दित्ता कि जिनिये मेरे जो ठीक कित्ता से यीशु है। 16इसेरी वजह कने यहूदी यीशु जो सताणा लगे किजोकी से इदेय कम्म विश्राम दिन पर करदा थिया। 17इस पर यीशु ने तिसजो बोल्लेया, मेरे पिता परमेश्वर ने हल्ले कम्म करेया करदे हिन, ते मैं भी कम्म करेया करदा है। 18इस वजह कने यहूदी होर भी बधी करी तिसजो मारणे री कोसीस करणा लगे किजोकी सेह न सिर्फ विश्राम दिन रे रीति रीवाज जो तोडदा थिया पर परमेश्वर जो अपणा बाबा बोल्ली करी अप्पु जो परमेश्वर रे बराबर करदा थिया।
पुत्तर रा हक्क
19इस पर यीशु ने तिन्हा जो बोल्लेया, मैं तुसा जो सच-सच बोलदा, पुत्तर अपणी मर्जी कने किच्छ नी करी सकदा, पर सिर्फ से ही, जे परमेश्वर पिता जो करदे दिखदा, किजोकी जिन्हा-जिन्हा कम्मां जो “पिता” करदा, तिसजो पुत्तर भी तिसी तरिक्के करदा।
20किजोकी परमेश्वर पिता पुत्तर कने प्यार करदा कने जे-जे कम्म से करदा, से सारे तिसजो दिखांदा है कने से इसका का भी बड्डे-बड्डे कम्म तिसजो दिखांगा ताकि तुसा हैरान न हो। 21जिय्यां पिता, मरे रे लोक्कां जो जिन्दा करदे, तिय्यां ही पुत्तर भी जिन्हा जो चाह्ंदा तिन्हा जो फिरी जिन्दा करदा। 22परमेश्वर पिता कुसकी रा हिसाब-किताब नी करदा, पर हिसाब-किताब करणे रा सारा कम्म पुत्तर जो सौंपी दित्तेया गे रा है, 23ताकि सब जणे जिय्यां परमेश्वर पिता री बड़ाई करदे तिय्यां ही पुत्तर री भी बड़ाई करेया करण। जे पुत्तर री बड़ाई नी करदा, से पिता री, जिन्हा ने तिसजो भेज्जे रा है, बड़ाई नी करदा। 24मैं तुसा रे कने सच-सच बोलदा, जे मेरा वचन सुणी करी मेरे भेजणे वाले पर विश्वास करदा हमेसा री जिन्दगी तिसका है, कने तिस पर सजा रा हुकम नी हुन्दा पर से मौत #5:24 इत्ते मौत रा मतलब नरक री सजा मिलणा है।जो टप्पी करी हमेसा री जिन्दगी बिच जाई चुके रा है। 25ते मैं तुसा जो सच-सच बोलदा कि से बेल्ला आया करदा है बल्कि अब्बे ही है कि जां मरे रे लोक्कां ने मेरी यानी परमेश्वर रे पुत्तर री अवाज जो सुनणा अते जिन्ने जणेया ने सुनणा तिन्हा ने हमेसा तिकर जीणा। 26किजोकी जिस तरिक्के बाबा अप्पु अन्दर जिन्दगी रखदा तिसी तरिक्के तिसने पुत्तर जो भी ए हक्क दितेरा है कि अप्पु बिच जिन्दगी रखे 27ते परमेश्वर ने मेरे जो हर इन्सान पर, तिन्हेरा हिसाब-किताब करणे रा भी हक्क दित्ते रा है, किजोकी मैं मणू रा पुत्तर है। 28इस बिच हैरान मत हो, किजोकी से वक्त आया करदा है कि मरे रे लोक्कां ने तिन्हेरी अवाज सुणी करी वापिस जिन्दे होई जाणा ते अपणी कब्रां का बाहर निकली आणा। 29जिन्हा ने भलाई जिन्दगी बिताए री है, तिन्हा जो हमेसा री जिन्दगी पाणे तांइ मरे रे लोक्कां बिच का फिरी जिन्दा कित्तेया जाणा, ते जिन्हा ने पाप री जिन्दगी बिताए री है, तिन्हा जो हमेसा री सजा भूगतणे तांइ जिन्दा कित्ता जाणा।
यीशु रे बारे गवाई
30मैं अप्पु का किच्छ नी करी सकदा, जदेया मेरे जो “पिता” करणे तांइ बोलदे से ही करदा। मैं हिसाब-किताब करदा कने मेरा हिसाब-किताब सच्चा है किजोकी मैं अपणी मर्जी नी पर अपणे भेजणे वाले री मर्जी पूरी करणा चाहन्दा। 31जे मैं अपणी ही गवाई अप्पु देयां तां मेरी गवाई सच्ची नी ए। 32पर “पिता” मेरे बारे बिच गवाई दिंदे ते मैं जाणदा जेडी मेरी गवाई दिन्दा से सच्ची है 33तुसा यूहन्ना का पुछवाणे तांइ अपणे मणू भेज्जे थिये ते तिनिये सच्चाई री गवाई दित्ती। 34पर मैं अपणे बारे बिच मणू री गवाई नी चाहन्दा तां भी ए गल्लां इस तांइ बोलदा कि तुसा जो छुटकारा मिल्ले। 35से तां बलदा कने चमकदा होया दीया है कने तुसा जो थोड़ी देर तक तिसेरी रौसनी बिच मस्त होणा ठीक लग्गेया 36पर मेरे का जेड़ी गवाई है से यूहन्ना री गवाई का बड्डी है, किजोकी जेडा कम्म “पिता” ने मेरे जो पूरा करणे जो दित्ते रा है, से ही कम्म मेरी गवाह है, कि “पिता” ने मेरे जो भेज्जे रा है। 37कने “पिता” जिनिये मेरे जो भेज्जे रा है, तिसी ने मेरी गवाई दित्ती री है तुसा न कदी तिन्हा जो सूणेया ते न तिन्हा जो दिख्खेया। 38ते परमेश्वर रा बसेख तुसा रे मन बिच नी है, किजोकी परमेश्वर ने मेरे जो भेज्जे रा है ते तुसा मेरा विश्वास नी करदे। 39तुसा पवित्रशास्त्र जो पढ़दे किजोकी सोचदे कि तिस बिच तुसा जो हमेसा री जिन्दगी मिलदी ते ए ही है जे मेरी गवाई दिंदा। 40फिरी भी तुसा हमेसा री जिन्दगी पाणे तिकर मेरे का आणा नी चाह्ंदे। 41मैं मणूआं का बड़ाई नी चाहन्दा। 42पर मैं जाणदा कि तुसा परमेश्वर जो दिल कने प्यार नी करदे। 43“पिता” ने मेरे जो अधिकार देई करी तुसा का भेज्जे रा है, ते तुसा मेरे जो नी अपणांदे, पर जे अगर होर कोई अपणे ही अधिकार #5:43 इत्ते इसेरा मतलब ए है कि से मणू जे परमेश्वर रे अधिकार रे बगैर अप्पु रा दावा करे।कने आए तां तिसजो अपणाई लिंदे। 44तुसा इक्क-दुजे का बड़ाई चाह्ंदे, कने से बड़ाई जे इक्क मात्र परमेश्वर रे पासे का है, नी चाहंदे, कुस तरिक्के कने मेरा विश्वास करी सकगे? 45इय्यां मत समझो कि मैं बाबे रे सामणे तुसा पर दोष लगांगा, तुसा पर दोष लगाणे वाला तां मूसा है जिस पर तुसा आस लाई करी बैठ्ठे रे हिन। 46किजोकी जे अगर तुसा मूसा रा विश्वास करदे तां मेरा भी विश्वास करदे, इस तांइ की तिसने मेरे बारे बिच लिखेरा है 47पर जे तुसा मूसा रे कानून बिच लिख्खे री गल्लां पर विश्वास नी करदे तां मेरी गल्लां पर विश्वास किय्यां करी करगें।
Aktualisht i përzgjedhur:
यूहन्ना 5: CDHNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.