Matayo 14
14
Ufu lwa Yohane Mwiibatisa
(Mar 6:14-29; Luk 9:7-9)
1Fyeeri efi fyeni mangyi ilya Herode kaita kilya kishaambawaa kya Yesu. 2Naasa kavia vasero va efo poo kwakwe, “Ate yeto mmbwe Yohane mmbatisi? Mmbwe muni aleruka auka kwa vafu. Nkyo kimaruma findo efyo fya wiidimi fikatanyika efo kwakwe.” 3Nyeelyi Herode entira Yohane, kamfinga kandemweera efo mmba ya vafinge kimaruma kya Herodia ekee nka wa mwana-maye, we Filipo. 4Mashika Yohane emmbya, “Nkutiri mumu weenrwaa-fo.” 5Nawe kaamba nammbwae, kawuya iiryaa vandu vashekuumbaa, neelyi vaishi Yohane ni nndu nkisuku. 6Naasa elyi kwanfika nkonu weekummbwa llya Herode alewonika mwana ulya wa kyeny we Herodia kafina yoo nnang'ani yaawo, kasennya Herode. 7Nalyo kanteerya kyaasa elyaa mboo nanniinge kindo ankitereva na kyikava-kyi. 8Nawe kasha nau akee mwaaye mmaye kaamba, “Shiniinga nrwe wa Yohane mmbatisi wekerwa yaa ndeeveny.” 9Na mangyi ilya kating'wa. Indi kimaruma kya valya akee nawo rembo alya shoongeny, naasa kavavasya nandeniingwa. 10Karuma Yohane nanderumbuwa nrwe kulya kifinngyony. 11Naasa nrwe wakwe ukeendwa ukee nndeeveny ukaniinngyo mwana ulya wa kyeny. Nawe keenda ariiye maye. 12Nalyo valya vakiloshyony kyakwe vakasha nang'u vakaipoo nnying'a ulya vakandeurika. Vakaenda vakafitya Yesu mbony tilya.
Yesu awutisa vandu fiku firaanu
(Mar 6:30-44; Luk 9:10-17; Yoh 6:1-14)
13Na Yesu ekiita kakwiipoo-fo warya kaenda na ngalava. Kafika kundo kulalelwa ekee kyaanya kyakwe muni. Na vandu valya vakuummbye-fo mamwiingyi vakakiita, vakansora-fo vesheendaa na marende vauka kulya miriny yaawo. 14Naasa eekifika mbai ya nruva, kooka ngalaveny, kalollya vandu vasheye ikuumbya-u nkuka. Kavavyo m muu, kashiisa vandu yewo vawo valwee. 15Naasa elyi kwamiila valya vakiloshyony vakasha na yoo akai vakaamba, “Kunu lukai ni kasa koomu, nalyo kwammiila. Naasany tauwany mamwiingyi yeu wa vandu vakweengye efo miriny yaawo; vandekuurya-fo fyeelya.” 16Nawe kavavia, “Mmbatiri kimaruma kya yeenda-fo, yeni vaniingeny fyeelya.” 17Nawo vakaamba, “Nta llutiri kindo yaa-fo kulaore ni mikate iraanu na makunga avii nsi.” 18Nawe kavavia, “Sheengyeny findo efyo na yaa!” 19Naasa, kavavasya vandu valya vakuummbye-u vavikwa rembo yoo mareny. Kawarya mikate ilya iraanu, na makunga alya avii. Kalla efo iruveeu kaana Iruva. Kaifisha-fisha fyenga. Kaniingya vakiloshyony kyakwe mikate ilya. Na vakiloshyony vakandeavya vandu. 20Vakalya woose vakawuura. Vakaveipoo fipereshu filya fyasaa, ikaishwa mikusha ikumi na ivii. 21Na valya valelya ni womi vafye sha fiku firaanu kuuta-fo vaka na vana.
Yesu eenda yoo uwe ya mura
(Mar 6:45-52; Yoh 6:16-21)
22Naasa karika valya vakiloshyony kyakwe vandesaama neefo ngalaveny vandesongwa iruuka vafike kulya kwa kulya, nawe natani asamana na vandu valya vakuummbye-u. 23Na elyi ansama mamwiingyi ulya kandesaama na kulya ifumbuny, nandeterevya-fo Iruva ekee kyaanya kyakwe muni. Kukafika kweela ekee-fo we muni. 24Naasa na ngalava ilya yamfika efo nnang'ani ya yeeve ilya, yeefo ishaatarwaa m matundulu mashika uraato lweesumani nawo. 25Naasa elyi kukee kufii ikya, kasha na alya vakai asheendaa yoo uwe ya yeeve ilya. 26Vekilolya ashendaa indo uwe ya yeeve vakasavaa. Vakaamba, “Ni nndu wa kwa vafu.” Vakairyaa vakafua wui-wui. 27Nalyo yeni karera nawo, kaamba, “Wuiyony muu, ni yeny, nta mulairyae-fo.” 28Naasa Petro karouwa kaamba, “Nndumi kwakooya ni yewe shivavasyaany shishe na yefo kukai shisheendaa yo uwe ya mura.” 29Nawe kammbia, “Kusheye!” Petro kooloka efo ngalaveny kaenda efo uwe ya mura, kasha na alya Yesu akai. 30Naasa elyi alollya uraato lwaira-u na finya kawuya iryaa. Kapooka irekya kafua, kaamba, “Nndumi shaauwa!” 31Nalyo yeni Yesu kaorwa woko kantira kammbia, “Kukee nndu wa kikusiryo kidu! A nkikyi elyi kwatirwa nnyiinyira?” 32Vakasaama na efo ngalaveny uraato lukamalallya. 33Na valya va efo ngalaveny vakasha na yoo akai; vakamoolokya si. Vakaamba, “Ni kya dede yewe ni Mwana wa Iruva.”
Yesu ashiisa vandu valwee kulya Genesareti
(Mar 6:53-56)
34Naasa elyi valemaa iruuka kwa kulya vakafika uruka lulya lwa Genesareti. 35Naasa vasero va ando alya vekimanya mmbwe, vakaruma kulya kundevaangwa vandu va muungony kwawo woose. Vandu vakasha nang'u ishemweengye vandu valwee woose. 36Vakamooshora nta vakupaanyi naakwa ni nse wa soori yakwe ya yeerya. Na valya vaiyo vapaana woose vakaveshia.
Aktualisht i përzgjedhur:
Matayo 14: MASNT00
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
New Testament in Kimashami © Bible Society of Tanzania, 2000.