यूहन्ना 1
1
आदि दा वचन थिया
1इयौं सारै दुनिया कै बाणणौ दै औगौड़ियौ ऐजौ थियु, जैसी वचन बौल़ै जांव, सैजा पौरमेशवर कै साथै थिया, औरौ सैजा पौरमेशवर थिया। 2सै शुरुआत शै ही पौरमेशवर कै साथै थिया। 3पौरमेशवरे सौबै ठुँ तैसी लैई बाणौ, औरौ जू किछै बाणै राए, तिनुमुंजी शै कुणजै बै चीज़ तैसकै बिना ना बाणै रैई। 4सै सौबी जिन्दगीयों का स्रोत औसौ, औरौ सै सैजाई औसौ, जू सौबी लोगौ कै पेयाशो दैंव। 5औरौ पेयाशो इनारै दो चमको, औरौ इनारौ तिथु हिशोए ना सौकौ।
6पौरमेशवरे ऐक यूहन्ना नांव कै आदमी कै भैजा। 7सै पेयाशै कै बारै मुंजी बौताणौ कारिए ओऊवा, ताकि सौबै लोग तैसी पेयाशै दा बिशवाश कौरौ। 8यूहन्ना आपी पेयाशो तौ थी नी, पौरौ सै तैसी पेयाशै कै बारै मुंजी गवाही दैंदा आए रौआ थिया।
9सैजौ जू साचौ पेयाशो औसौ जू हरेक आदमी खै पेयाशो दैंव, सै दुनिया दो आणौवाल़ौ थियु। 10सै दुनिया दा थिया, पौरौ दुनिया तैसकै दवारा बौणै औरौ दुनिया कै लोगै तैसीखै ना पोछैयाणी। 11सै आपणै लोगौ कै बीच मुंजी ओऊवा औरौ तैसीखै आपणै लोगै ठुकराए दिया। 12पौरौ जैतरै लोगै तैसी अपनोऊवा, तैणै तिनु पौरमेशवर कै सन्तान हौणौ का औधिकार दिया, यानी तिनु जू तैसी पांदी बिशवाश कौरौ। 13सै ना तौ माँ-बापू शै, ना ही आदमी की इछा शै, ना ऐक आदमी कै संतान पाणौ कै इछा शै, पौरौ पौरमेशवर शै पौयदा हौए रौआ।
14औरौ वचन ऐक आदमी बौणा, औरौ अनुग्रह औरौ सौचाई शै परिपूर्ण हौयौ अमारै बीच मुंजी डैरा कौरा, औरौ तैसकै महान दया ऐशणै थी, जैशैखै पौरमेशवर की ढौबौशै आएयौंदे इकलोतै बैटै कै महिमा।
15यूहन्नाए तैसकै बारै दै गवाही दै, औरौ जोर सै बौल़ौ, “ऐजा सैजाई औसौ, जैसकै बारै दौ मोऐं बौताए राए थियु, कै जू मैरै बाद आए रौआ, सै मुं दा बै बौड़ैबा औसौ, जिथुकै सै मुं दा औगौड़ियौ बजूद दा थिया।”
16जिथुखै तैसकै महान दया की परिपूर्णता शै आमु सौबी खै अनुग्रह पांदी अनुग्रह#1:16 आशीष पांदी आशीष भैटी रौआ। 17इथकारिए कै कानून तौ मूसा कै दवारा दैय राए, पौरौ महान दया औरौ सौचाई तौ यीशु मसीह कै दवारा आए। 18पौरमेशवर कै कोसीए कौलोंई ना दैखै रैई, सिरफ तैसकै इकलोतै बैटै दैखी राए जू सौथी कै पौरमेशवर औसौ, औरौ पिता पौरमेशवर कै सौबिदा नेड़िक औसौ, तैणै आमु दिखाए राए, कै पौरमेशवर कैशणा औसौ।
यूहन्ना बपतिस्मा दाता कै गवाही
(मत्ती 3:1-12; मर 1:1-8; लूका 3:1-9,15-17)
19जोबै यहूदी नेताए यरूशलेम शहर शै यहूदी पुरोहित औरौ लेवी मौरदो खै यूहन्ना कैंईदौ ऐजौ पूछणो कारिए भैजै, “तू कुण औसौ?” तौ यूहन्ना कै गवाही ऐजै थी, 20औरौ तैणै तिनु साफ औरौ सीधी बात बौल़ै दै, “कै हांव मसीह ना आथी।” 21तोबै तिनुऐ यूहन्ना कैईंदु पूछु, “तौ तोबै तू कुण औसौ? का तू एलिय्याह पौरमेशवर कै बातौ बौताणौवाल़ा औसौ?” तैणै बौल़ौ, “हांव ना आथी।” “तौ का तू सैजा पौरमेशवर कै बातौ बौताणौवाल़ा औसौ?” तैणै जोवाब दिया, “ना।” 22तोबै तिनुऐ यूहन्ना शै पूछु, “तोबै तू कुण औसौ? ताकि आमै आपणै भैजणौवाल़ै खै जोवाब दियु। तू आपणै बारै मुंजी का बौल़ै?” 23यूहन्नाए बौल़ौ, “जैशैखै यशायाह पौरमेशवर कै बातौ बौताणौवाल़ै बौल़ौ कै, ‘उजाड़ जौगैह दै ऐकी धाव दैणौवाल़ै कै धाव रौए शौणै, कै तुऐं प्रभु कै खातीरदारी कारिए आपणै मनो कै तैयार कौरौ, औरौ तैसकै आणौ कारिए आपी खै सुधारौ।’”
24किछै लोग फरीसी लोगौ कै गुटो मुंजीदै भेजेयोंदे थिए। 25तिनुऐ यूहन्ना कैईंदा ऐजा सवाल पूछा, “जै तू मसीह ना आथी, औरौ ना एलिय्याह, औरौ ना ही पौरमेशवर कै बातौ बौताणौवाल़ा औसौ, तौ तू तोबै किथुखै बपतिस्मा दैय।” 26यूहन्नाए तिनुखै जोवाब दिया, “हांव तौ पाणी लैई बपतिस्मा दियु, पौरौ तोंवारै बीच मुंजी ऐक ऐशणा आदमी खौड़ा औसौ जैसीखै तुऐं ना जाणौ। 27यानी जू मैरै बाद आणौवाल़ा औसौ, हांव तौ तैसकै जूते कै तशमै खौलणौ कै लायक बै ना आथी।”
28ऐजी बातौ यरदन नोंदी पार बैतनिय्याह गांव दी होई, जिथै यूहन्ना लोगौ खै बपतिस्मा दैंव थिया।
पौरमेशवर का मेम्ना
29ओकी दूसै यूहन्नाए यीशु खै आपणै ढौबौ आन्दै बैई दैखैयो बौल़ौ, “दैखौ, ऐजा पौरमेशवर का मेम्ना औसौ जू (आपी खै बलिदान कौरेयौ) दुनिया का पाप उठाणौ वाल़ा औसौ। 30ऐजा सैजाई औसौ जैसकै बारै मुंजी मोऐं बौल़ै राए थियु, ऐक आदमी मैरै पाछैदा आणौवाल़ा औसौ, जू मुं दा महान औसौ, जिथुकै सै मुं दा औगौड़ियौ बजूद दा थिया। 31औरौ हांव तौ तैसीखै पौछेयाणु ना थिया कै सै मसीह थिया पौरौ इथकारिए हांव पाणी लैई बपतिस्मा दैंदा ओऊवा की इस्राएल देश कै लोगौ खै ऐजौ बौताए सौकु कै सै कुण औसौ।”
32औरौ यूहन्नाए ऐजी गवाही दी, “मोऐं पवित्र आत्मा खै कबूतर कै जैशणा स्वर्ग शै उतरदै बैई दैखा, औरौ सै तैसी पांदी ठोरा। 33औरौ हांव तौ तैसीखै पौछेयाणु नै थिया कै सै मसीह औसौ, पौरौ जैणै मौखै पाणी लैई बपतिस्मा दैंदा भैजा, तैणै मौखै बौल़ौ, ‘जैसी पांदी तू पवित्र आत्मा खै उतरदै बैई औरौ ठोरदे बैई दैखला; सैजाई पवित्र आत्मा लैई बपतिस्मा दैणौवाल़ा औसौ।’ 34मोऐं आपी दैखौ, औरौ हांव तुऔं कैई साचौ बुलू, की ऐजाई पौरमेशवर का बैटा औसौ।”
यीशु कै आगलै चैलै
35ओकी दूसै हौजौ यूहन्ना औरौ तैसकै चैलै मुंजीदै दो जोणे खौड़ै हौए रौवै थिए। 36औरौ तैणै यीशु कै जांदै बैई दैखा औरौ बौल़ौ, “ऐजा पौरमेशवर का मेम्ना औसौ।” 37तोबै सैजै दुईनै चैलै तैसी शौणैबा यीशु कै साथै हौटै गौवै। 38यीशुए फेरेबा औरौ तिनुखै पाछु आन्दै बैई दैखैयो तिनुखै बौल़ौ, “की तुऐं कोसके तलाश दै औसौ?” औरौ तिनुऐ तैसीखै बौल़ौ, “ओए रै गुरुजी, तू कुकै रौए?” 39यीशुए तिनुखै बौल़ौ, “चालौ, तौ दैखलै।” तोबै तिनुऐ आयौ तैसकै रौणौ का ठाँव दैखा, औरौ तैसी दूसै सैजै तैसीआरी रौवै; तैसी सौमय बैल़खै कै चार बोजे रौवै थिए।
40तिनु दु चैलै मुंजीदै, जू यूहन्ना कै बात शौणैबा यीशु कै साथै आए रौवै थिए, तिनुमुंजी ऐक शमौन पतरस का भाई अन्द्रियास थिया। 41तैणै आगै आपणै सौरे भाई शमौन आरी भैटीबा तैसीखै बौल़ौ, “आमुखै मसीह यानी पौरमेशवर का अभिषिक्त भैटी गौआ।” 42अन्द्रियासे शमौन खै यीशु कै धोरे लियोऊवा, यीशुए तैसीखै ध्यान शै दैखा औरौ बौल़ौ, “तू यूहन्ना का बैटा शमौन औसौ, तू कैफा यानी पतरस बौला जाला।”
फिलिप्पुस औरौ नतनएल कै बोईदणै
43ओकी दूसै यीशुए गलील जिले खै जाणौ चोऊ, औरौ फिलिप्पुसआरी भैटेयो बौल़ौ, “मुं साथी चाल।” 44फिलिप्पुस तौ अन्द्रियास औरौ पतरस कै बैतसैदा शहर का रौणौवाल़ा थिया। 45फिलिप्पुसे नतनएल आरी भैटेयो तैसीखै बौल़ौ, “आमु कै सैजा आदमी भैटी गौआ, जैसकै बारै मुंजी मूसा कै कानून दो औरौ पौरमेशवर कै बातौ बौताणौवाल़ै लैखै राए। सै यूसुफ का बैटा यीशु औसौ जू नासरत गांव शै औसौ।” 46नतनएले तैसीखै बौल़ौ, “का कुणजै आछी चीज़ौ बै नासरत गांव शी निकल़ै सौकौ?” फिलिप्पुसे तैसीखै बौल़ौ, “जाऐबा दैख कौर।”
47यीशुए नतनएल खै आपणै ढौबौ खै आन्दी बैई दैखैयो तैसकै बारै मुंजी बौल़ौ, “दैखौ ऐजा अमारै पुराणिया इस्राएल देश का ऐक साचा वंशज औसौ: जू पूरी तरह शै ईमानदार औसौ।” 48नतनएले तैसीखै बौल़ौ, “तू मुखै कैशैखै जाणै?” यीशुए तैसीखै जोवाब दिया, “इदा औगौड़ियौ फिलिप्पुसे ताखै बौईदा जौल़ौ तू अंजीरो कै डाल़ो तौड़ी थिया, तौलौ मोऐं ताखै दैखा थिया।” 49नतनएले तैसीखै जोवाब दिया, “ओए रै गुरुजी, तू पौरमेशवर का बैटा औसौ इस्राएल देश का महाराजा औसौ।” 50यीशुए तैसीखै जोवाब दिया, “मोऐं जू ताखै बौल़ै राए थियु की मोऐं ताखै अंजीरो कै डाल़ो तौड़ी दैखा, का तू इथकारिए बिशवाश कौरे? तू इदै बै बौड़ै-बौड़ै काम दैखला।” 51हौजौ तैसीखै बौल़ौ, “हांव तुऔं खै साचौ-साचौ बुलू कै तुऐं स्वर्गो खै खुलू औरौ पौरमेशवर कै स्वर्गदूतौ कै ऊबै जांदै औरौ मुं आदमी कै बैटै कै उपरोशे उरतदै बैई दैखदै।”
Aktualisht i përzgjedhur:
यूहन्ना 1: SRXNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.