लूका 22
22
यीशु कै मारणौ कै साजिश
(मत्ती 26:1-5; 14-16; मर 14:1-2,10-11; युहन्ना 11:45-53)
1अखमीरी रोटी कौ तैयार जू फसह कौ तैयार थियु, सै आणौवाल़ौ थियु। 2औरौ मुख्य यहूदी पुरोहितो औरौ यहूदी शास्त्री इयौं बातौ कै ताको दै थिए कै तैसी कैशैकै मौरेंई, पौरौ सै लोगौ दै डौरौ थिए।
यहूदा इस्करियोती का धौखा
3तोबै शैतान यहूदा दा सोमाए गौआ, जैसी यहूदा इस्करियोती बौल़ौ, औरौ बारौ चैलो मुंजीदा ऐक थिया। 4तैणै जाऐबा मुख्य यहूदी पुरोहितो औरौ मन्दिर कै रोखवाल़ै कै ठोगड़े कै साथै बात कौरे, कै तैसी कैशै तिनकै हाथौ दा पोकड़ैईं। 5सै खुशी होवे, औरौ तैसी पौएसै दैणौ का वादा कौरा। 6तैणै बै मानै पोऊ, औरौ ताको दा थिया, कै जौल़ौ भीड़ ना हौलै तौलौ सै धौखै दा तैसीकै तिनकै हाथौ दा थोमाए दैन्दा।
फसह की तैयारी
(मत्ती 26:17-25; मर 14:12-21; युहन्ना 13:21-30)
7तोबै अखमीरी रोटी कै तैयारो को दूस ओऊ, जिथमुंजी फसह का मेम्ने कै बल़ि कौरणा जौरुरी थी। 8यीशुए पतरस औरौ यूहन्ना कै ऐजौ बौलेयौ कै छाड़ै, कै, “जाऐबा अमारै खाणौ कारिए फसह की तैयारी कौरौ।” 9तिनुऐ तैसीयांदो पूछु, “तू आमुखै कुकै भैजणै चांए, कै आमै फसह कै खाणौ की तैयारी कौरु।” 10तैणै तिनु बौल़ौ, “दैखैया, यरूशलेम शहर दा जांदै बैई ऐक आदमी पाणी का घोड़ा टिपेबा तुऔं भैटदा, जैसी घोरे सै जांव तुऐं तैसकै पौछौड़ियौ जाया, 11औरौ तैसी घोरे कै मालिको बौलेया, ‘गुरु, ताखै बौल़ौ; कै इथै पोऊंणै को घोर कुकै औसौ जिथै हांव आपणै चैलो कै साथै फसह खोऊं?’ 12सै तुऔं खै शोहे-लैबेंयौंदा उपला बौड़ा कमरा दिखाला, तिथी तैयारी कौरेया।” 13तिनुऐ जाऐबा जैशैखै तैणै तिनुखै बौल़ै राए थियु, तैशैखैई पोऊ, औरौ तिनुऐ फसह का खाणौ तैयार कौरा।
प्रभु का आखरी खाणौ
(मत्ती 26:16-30; मर 14:22-26)
14जोबै सौमय ओऊवा, तौ यीशु बारौ चोणेयौंदे चैलै कै साथै खाणौ खांदा बोठा। 15औरौ तैणै तिनु बौल़ौ, “मुखै बौड़ै इछा थै, कै दुख सैयौ मौरणौ दै औगौड़ियौ ऐसी फसह कै तैयारो को खाणौ तोंवारै साथै खोऊं। 16जिथुकै हांव तुऔं कै बुलू, कै हांव फसह कै तैयार को खाणौ तांव तौड़ी औटेयौ ना खांदा, जांव तौड़ी पौरमेशवर कै राज्य दा पूरा ना हौए जांव।” 17तोबै यीशुए अंगूर कै रस का छाना कौरेयौ पौरमेशवर का धन्यवाद कौरा औरौ बौल़ौ, “इथु लौ औरौ आपी मुंजी बांडै दैंव। 18जिथुकै हांव तुऔं कैंई साचौ बुलू, कै जौल़ौ तौड़ी पौरमेशवर का राज्य ना आंव तौलौ तौड़ी हांव अंगूरो का रस इबी दा ऊबा कौलोंई ना पींदा।”
19तोबै तैणै रोटी कौरी, औरौ पौरमेशवर का धन्यवाद कौरेयौ तुड़ी, औरौ तिनुखै एजो बौलेयौ दी, “ऐजा मैरा शोरीर औसौ, जू तुऔं कारिए दैय जांव: मैरै याद कारिए ऐशैखैई कौरेया।” 20ऐशैखैई तैणै खाणौ कै बाद अंगूर कै रसो का भौरेयौंदा छाना ऐजौ बौलेयौ दियु, “ऐजा अंगूर कै रसो का छाना मैरै तैसी लोऊ कै जैशणा औसौ जू तुऔं कारिए बोवाए जांव, जू नोऐं कौरार औसौ।
21पौरौ दैखैया, मैरै थोम्वाणौ वाल़ै का हाथ मैरै साथै मेजो पांदी औसौ। 22जिथुकै मुं आदमी कै बैटै कारिए जैशै ठोहराए राए, पौरौ तैसी आदमी कै सख्त सौजा भैटदै जू मुखै धौखै शा थोमाला। 23तोबै सै आपी मुंजी पूछदै लागै कै आमु मुंजीदा कुण औसौ जू ऐजा काम कौरला?”
कुण बौड़ा सौमझा जांदा?
24तोबै चैलै मुंजी बैहस हौए कै आमु मुंजी बौड़ा कुण सौमझा जांव? 25तैणै तिनु बौल़ौ, “बैगानै यहूदियों कै राजा तिनुकै दबायो राखौ औरौ जू तिनु पांदी औधिकार राखौ, सैजै लोगौ शै आपणी तारीफ चांव। 26पौरौ तुऔं मुंजी ऐशै नै हौणौ चैंई, औरौ जू तुऔं मुंजी बौड़ा औसौ, सै नानड़ै कै जैशणा औसौ औरौ जू प्रधान औसौ, सै सेवक कै जैशणा बौणौ। 27जिथुकै बौड़ा कुण औसौ, सैजा जू खाणौ खांदा बौठै रौआ या सैजा जू सेवा कौरौ? हां सैजाई जू मैजौ पांदी खाणौ खांदा बौठै रौआ सै खास औसौ पौरौ हांव तोंवारै बीच दा सेवक कै जैशणा औसौ।”
28“तुऐं सैजै औसौ, जू मैरी परीक्षाओं मुंजी लगातार मैरा साथ दैंदै रौंव, 29औरौ जैशै मैरै बापूए मुखै ऐक राज्य दैय राए, तैशैखैई हांव बै तुऔं कै ऐक राज्य दुं। 30ताकि तुऐं मैरै राज्य दै मैरी मेजो पांदी खांव पीयों, पौरौ सिंहासन पांदी औरौ बोठेयो इस्राएल देश कै बारौ गोत्रो का न्याय कौरौ।”
पतरस कै भाजणौ कै बारै मुंजी बौताणौ
(मत्ती 26:31-35; मर 14:27-31; युहन्ना 13:36-38)
31“शमौन, ओए रै शमौन! शुण, शैतानै पौरमेशवर शै तुऔं लोगौ कै परीक्षा लोणो कारिए इजाज़त मांगै राए कै आछै औरौ बुरै लोगौ कै जौई कौरौ, जैशैखै ऐक किसान गियुँ शै भूसो कै जौई कौरौ। 32पौरौ मोऐं तांव कारिए प्रार्थना कौरे राए कै तू बिशवाश कौरणा छोड़े ना दैय, औरौ जोबै तू मैरै धोरे पाछु आए रौआ, तौ तू आपणै भाईड़ी कै मजबूत कौरेया कै सै मुं पांदी बिशवाश कौरौ।” 33पतरसे तैसीखै बौल़ौ, “ओए रै प्रभु हांव तैरै साथै ज़ेलो जाणौ औरौ मौरणौ कै बै तैयार औसौ।” 34तैणै बौल़ौ, “ओए रै पतरस हांव ताखै बुलू, कै ऐलो कुकड़ै कै, बांक दैणौ दै औगौड़ियौ तू तीन बैई भाजै जाला, कै तू मुखै ना जाणै।”
तानै शुणणौ खै तैयार रौया
35यीशुए चैलै खै बौल़ौ, “जोबै मोऐं तुऔं बोटुए, औरौ झोल़े, औरौ जूते बिना सुसमाचार प्रचार कौरदै छाड़ै राए थिए तौ का तुऔं कोसी चीज़ौ कै कमी हौए थी?” तिनुऐ बौल़ौ, “कियौंई चीज़ौ कै कमी ना होई।” 36तोबै यीशुए तिनुखै बौल़ौ, “पौरौ ऐबै लोग अमारै खिलाफ औसौ, तौ जैसिया बोटुआ औसौ सै तैसी उंढा कौरौ, औरौ तैशैखैई झोल़ा बै कौरौ, औरौ जैसिया तलवार ना आथी सै आपणै सदरी बिकैयो ऐक तलवार खोरीदै पाव। 37जिथुकै हांव तुऔं बुलू, कै ऐजौ पवित्र शास्त्र दो मैरै बारै मुंजी जू लैखै राए सैजौ पूरु हौंव। तिथपांदी लैखै रैई कै, ‘तैसी कानून तौड़णे वाल़ौ कै साथै शामिल कौरा।’ ऐजी बातौ मैरै बारै मुंजी लैखै राए औरौ तावल़ी ही पूरी हौणै वाल़ी औसौ।”
38तिनुऐ बौल़ौ, “ओए रै प्रभु इथै दो तलवारों औसौ।” तैणै तिनु बौल़ौ, “बोहिती औसौ।”
जैतून धारो पांदी यीशु कै प्रार्थना
(मत्ती 26:36-46; मर 14:32-42)
39तोबै यीशु बायरै निकल़ैयो आपणै भोवार कै हिसाब शै जैतून कै धारो पांदी हौटा, औरौ चैलै तैसकै साथै हौटै गौवै। 40तैसी ठाँव दै पोहचेयो तैणै तिनु बौल़ौ, “प्रार्थना कौरौ, कै जोबै तोंवारै परीक्षा हौलै तोबै तुऐं मुं पांदी बिशवाश कौरणा बंद ना कौरौ।” 41औरौ सै आपी तिनुदा जौई हौयौ शौ फूट दूर हौटै गौआ, औरौ घुंडू नियुड़ाऐबा प्रार्थना कौरदा लागा। 42“ओए रै पिता, जै तू चांए तौ ऐसी दुख कै छानै कै मैरै धोरे दा हौटाए दै, तोबै बै मैरी नी पौरौ तैरै मोरजी पूरी हौंव।”
43तोबै स्वर्ग शै ऐक स्वर्गदूत तैसकै दैखिया जू तैसी शौकतै दैंव थिया। 44सै जादा बैचैन हौयौ हौजौ बै जादा प्रार्थना कौरदा लागा; औरौ तैसका पसीना मानौ लोऊ की बौड़ै-बौड़ै टिपू साए धोरती पांदी छुटदा लागै रौवा थिया। 45तोबै सै प्रार्थना कौरेयौ बिज़ा औरौ आपणै चैलै कै धोरे आयौ औरौ तिनु उदासी कै मारै सौतेयौंदै दैखै। 46औरौ तिनु बौल़ौ, “काए सोतै रौवै? ऊबै बिज़ो, प्रार्थना कौरौ कै जोबै तोंवारै परीक्षा हौलै तोबै तुऐं मुं पांदी बिशवाश कौरणा बंद ना कौरौ।”
यीशु का बन्दी बोणणा
(मत्ती 26:47-56; मर 14:43-50; युहन्ना 18:3-11)
47यीशुए ऐजौ बौल़ै ही लौ थियु, कै दैखौ ऐक भीड़ आए, औरौ तिनु बारौ मुंजी ऐक जैसकौ नांव यहूदा इस्करियोती थियु, जू तिनकै औगौड़ियौ-औगौड़ियौ आए रौआ थिया। सै यीशु कै धोरे ओऊवा कै यीशु खै खौपटेयांव। 48यीशुए तैसी बौल़ौ, “ओए रै यहूदा इस्करियोती, का तू हौंगटै लायो मुं आदमी कै बैटै कै थोम्बाणा चांए?”
49तैसकै साथीए जोबै ऐजौ दैखौ कै का हौणौवाल़ौ औसौ, तौ बौल़ौ, “ओए रै प्रभु, का आमै तलवार चोलांव?” 50औरौ तिनुमुंजी शै ऐकीए महायहूदी पुरोहित कै नोकर पांदी तलवार चौलायौ तैसका सोंवा कान काटै दिया। 51इथपांदी यीशुए बौल़ौ, “ऐबै बस कौरौ।” औरौ तैसका कान छौयौ तैसीकै ठीक कौर दिया।
52तोबै यीशुए मुख्य यहूदी पुरोहित औरौ मन्दिर कै रौखवाल़ै का ठोगड़ा औरौ बुड़ेईको शै, जू तैसकै धोरे थिए बौल़ौ, “का तुऐं मुखै थामणो कारिए डाकू सौमझेयौ तलवारों औरौ लाठी लोयो निकल़ी रौवै? 53जौल़ौ हांव मन्दिर दा रौज तोंवारै साथै थिया, तौ तुऐं मुं पांदी हाथ ना पाई, पौरौ ऐजा तोंवारा सौमय औसौ औरौ इनारै का औधिकार औसौ।”
पतरस कौ भाजणौ
(मत्ती 26:57-58,69-75; मर 14:53-54,66-72; युहन्ना 18:12-18,25-27)
54तोबै सै तैसी पाकड़ेयो लोए गौए, औरौ महायहूदी पुरोहित कै घोरे लियोऊवा। औरौ पतरस दूरकै-दूरकै दा तैसकै पौछौड़ियौ-पौछौड़ियौ हांडदा रौआ। 55औरौ जोबै सै आँगणो दै आग बाल़ेयौ कौठै बौठै, तौ पतरस बै तिनकै धोरे बौठै गौआ। 56तोबै ऐक नोकरानी आगी कै पेयाशै दै बौठेयोंदे थी औरौ तैसकै ढौबौ टकटकी लायौ बौलदै लागै, “ऐजा बै तौ ऐसकै ही साथै थिया।” 57पौरौ पतरस ऐजौ बौलेयौ भाजै गौआ, “ओए रै भाएटी हांव तैसी ना जाणु।” 58बिस्तौड़ी तिनुऐ कोसी ओकीए तैसी दैखैयो बौल़ौ, “तू बै तिनु लोगौ मुंजीदा औसौ।” पतरसे बौल़ौ, “ओए रै भाई साब हांव ना आथी।” 59कैई घंटे कै बाद ऐक आदमी होजो निशोंक हौयौ बौलदा लागा, “पाका ऐजा बै तैसकै साथै थिया; जिथुकै ऐजा गलील जिले का औसौ।”
60पतरसे बौल़ौ, “ओए रै भाई साब, हांव ना जाणु कै तुऐं का बौल़ै लो?” तैणै ऐजौ बौल ही लौ थियु कै तौलोंई कुकड़ै बांक दै। 61तोबै प्रभु यीशुए पाछु फेरेयो कै पतरस कै ढौबौ दैखौ औरौ पतरस कै प्रभु की सैजै बात याद आए जू तैणै बौल राए थै, “ऐलो कुकड़ै कै बांक दैणै दै आगै तू तीन बैई मुखै भाजै जांदा।” 62औरौ सै बायरै निकल़ैयो हिणकै-हिणकियौं रुन्दा लागा।
यीशु का ठाटा
(मत्ती 26:67-68; मर 14:65)
63जिनु आदमीए यीशु कै पाकड़ी राए थिया, सै तैसकै ठाटै पाड़ियो पीटदै लागै 64औरौ तैसकी आखी बंद कौरेयौ तैसीयांदो पूछु, “पौरमेशवर शै बातौ कौरेयौ बोता कै ताखै कुणै मारा?” 65औरौ तिनुऐ हौजौ बै बौहिती नेंदैया की बातौ तैसकै खिलाफ दी बुली।
बुड़ेईको औरौ महासभा कै सामणै यीशु
(मत्ती 26:59-66; मर 14:55-64; युहन्ना 18:19-24)
66जोबै दूस हौ तौ लोगौ कै बुड़ेईक औरौ मुख्य यहूदी पुरोहित औरौ यहूदी शास्त्री कौठै हुवे, औरौ तैसी आपणै महासभा दै लोए गौवै औरौ पूछु, 67“का तू पौरमेशवर का बैटा मसीह औसौ। तौ आमुखै बौल़ै दै!” यीशुए तिनु बौल़ौ, “जै हांव तुऔं बुलू तौ तुऐं बिशवाश ना कौरदै। 68औरौ जै हांव तुआंदो पूछु, तौ तुऐं जोवाब ना दैलै। 69पौरौ ऐबै शै हांव आदमी का बैटा सौबिदा शौकतीशाली पौरमेशवर कै सोऐं ढौबौ राज कौरणौ कै बौठेयौंदा रौंदा।” 70इथपांदी सौबीए बौल़ौ, “तौ का तू पौरमेशवर का बैटा औसौ?” तैणै तिनु बौल़ौ, “तुऐं आपी बौल़ै लो कै हांव औसौ।” 71तोबै तिनुऐ बौल़ौ, “ऐबै आमु गवाही कै का जौरुरत औसौ जिथुकै आमुए ऐसकी मुँओं शौ आपी ही शुण पोऊँ।”
Aktualisht i përzgjedhur:
लूका 22: SRXNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.