Genesis 12
12
1Ïki oidakatadai ïmo kïïrhi Abram tïgidukami dai ïmo imidagai Gïr Nukadakami aataga ïmadï daidi potïtïdai,
—Abram. Dagitoñi gï kii dai gï aaduñi dai aanï gï tïïgidamu ïmai dïbïrai xibhïako pai ami oidaka aapi. 2Aanï kïï muidatulda iñagai gï piipixara— itïtïdai. —Kabami muidamu ïgai dai bïïxkïrï mos ïr ïmo odamikamu ïgai tomaxi apia bamioma muidamu ïgai. Dai aapi ïr ogadï ka agai ïgai. Aanï gï maakimu ïmo bhai ïrhiaragai gï abhana xi gï aatagadamu óídakami aipakoga dai aapi ïr soikïdakami ka agai mui odami— itïtïdai.
3Bhodïrï Gïr Nukadakami itïtïdai,
—Aanï soiñamu xorai kïï gï buidadagi dïï daitudamu aanï soi ïrhiaragai abhana xorai mai kïï gï buidadagi. Dai xorai gï buidïrï surhigiagi aanï aadïrï daitudamu soi ïrhiaragai buidïrï ïpï. Dai aapikïdï urhiñamu aanï soiñi bïïxi oidigi dama oidakami bïïtarï— itïtïdai Gïr Nukadakami go Abram.
4-5Abram ka biakatadai baikobhai dan bhaibuxtama dan taama umigi. Dai ïïgida kaï ïgai Gïr Nukadakami dai ka dagito go kii xako oidakatadai ïgai. Dai bhïiyi boi mïkaxi xako gïï kaatï oidigi Kanaan tïgidukïdï. Abram oñigadï Saraí tïgidu dai Abram baidaja go Saraí ïmadï ïmo kïïrhi Lot tïgidukïdï. Go Lot ïr akitadï Abram. Bïïxi kusubaka ïgai buxtuidadï abhiadïrï Haranañdïrï xako óídagatadai ïmadï pipioñigadï ïpï ix makïdï ami biatu ïgai. Dai iji ïgai Haranañdïrï dai mui tasai mos iimïi ïgai boiyamu dai bhodïrï ka ayi mïï Kanaanïrï. 6Dai bhodïrï Kanaanïrï ïraan sïïrhi dïgabusai ïgai dai ayi ïmo gïï tuayi uta xako Moray aagai oidakami. Go tuayi ïgai sonoana kïïka go aarhi bhaabhaki Xikem tïgidukïdï. Kia óídakatadai go Kananeo aagaikïdï ami dai ami tuayïrï ukami ayi ïgai.
7Dai Gïr Nukadakami kïkiba Abram buitapi daidi potïtïdai,
—Idi ïr go dïbïrai ix makïdï maakimu aanï gï maamara ïmadï gï piipixara maigobai— itïtïdai.
Dai bhodïrï amaxi kïi Abram ïmo daxdakarui dai mua ïmo buxtaki dai daaxi Gïr Nukadakami. Ami gï maaxitu Gïr Nukadakami Abram buitapi xi kaxkïdï ami kïi ïgai go daxdakarui. 8Dai Abram baida jii aaduñdï abhiadïrï dai ayi go aarhi bhaabhaki Betelañdïrïï xarhiapako xako giidiga oidigi. Dai ami gï urhi ïgai lachi. Ami ïmo padïrï kaatï Betel uruñiapako dai ajadïrï kaatï Ayi xarhiapako. Ïraana kaatï xako gï urhi ïgai. Ami kïi Abram ïpï ïmo daxdakarui dai ïpamu xadutudai Gïr Nukadakami. 9Bhodïrï kïï dukai bhaitï jii ïgai suramakoga dai mui tasaikïdï ayi baasonioma ugidïrï Kanaan xako Negebïrï tïgidu oidigi lïïchi.
Aktualisht i përzgjedhur:
Genesis 12: NTP
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Copyright: Ethnos360 Sanford, Florida