લુક 23
23
પિલાતા હામ્મે ઈસુલ સાવાલ
(માથ્થી 27:1-2,11-14; માર્ક 15:1-5; યોહા. 18:28-38)
1એને ચ્યાહા આખી સોબા ઉઠીન, ચ્યાલ પિલાતાપાંય લેય ગીયા. 2એને ચ્ચે ચ્યા હુમે એહેકોયન ફિરાદી કોઅતા લાગ્યા કા, “આમહાય ખાત્રી કોઅયી કા ઈ માઅહું રોમી સરકારા વિરુદમાય લોકહાન ચોડવેહે, કૈસરાલ કર દેયના મોનાય કોઅહે, એને પોતે ખ્રિસ્ત, રાજા આખતા વોનાયાહા.” 3પિલાત રાજાય ચ્યાલ પુછ્યાં, “કાય તું યહૂદીયાહા રાજા હેતો કા?” ઈસુય પિલાત રાજાલ જાવાબ દેનો, “તું પોતેજ આખતોહો.” 4પિલાત રાજાય મુખ્ય યાજકાલ એને લોકહાન આખ્યાં, “યા માટડામાય કાય ગુનો નાંય દેખાય.” 5બાકી ચ્યા ચ્યાહા ફિરાદી આજુ જોરમાય આખતા લાગ્યા, ઈહીં બોદા યહૂદીયા વિસ્તારમાય લોકહાન પોતાના હિકાડનાથી ભડકાવેહે, “એને બોદા ગાલીલ ભાગામાઅને સુરુ કોઇન ઈહીં લોગુ તો યેય ગીયહો.” 6ઈ વોનાઈન પિલાત રાજાય પુછ્યાં, “કાય ઓ ગાલીલ ભાગા માઅહું હેય કા?” 7એને ઈસુ હેરોદ રાજા રાજ્ય કોઅહે ચ્યા ભાગામાઅને હેય, તી જાયને, ચ્યે ચ્યાલ હેરોદા રાજાપાય દોવાડયો, ચ્યે સમાયે હેરોદ રાજા યેરૂસાલેમ શેહેરામાય આતો.
ઈસુવાલ હેરોદ રાજા હામ્મે
8ઈસુવાલ એઅયન હેરોદ રાજા ખુશ જાયો, કાહાકા તો ચ્યાલ બોજ સમાયા થી એરા માગે, કાહાકા ચ્યા વાત તો વોનાયેલ એને તો ઈસુપાયને ચમત્કારા કામ કોઅતા એઅના બોજ આશા આતી. 9ચ્યાહાટી હેરોદ રાજાય ઈસુવાલ બોજ વાતહેબારામાય પુછ્યાં, બાકી ઈસુવે કાય જાવાબ નાંય દેનો. 10એને મુખ્ય યાજક એને મૂસા નિયમ હિકાડનારા ગુરુ તાં ઉબા રોયન દોષ થોવતા રિયા. 11બાકી હેરોદ રાજાય ચ્યા સિપાડાહા આરે ઈસુવા અપમાન કોઇન મશ્કરી કોઅયી, એને નિંદા કોઅયી, ચ્યાલ યોક રાજા ફાડકા પોવાડયા એને પાછો પિલાત રાજાપાય દોવાડયો. 12ચ્યે સમાયે લોગુ હેરોદ રાજા એને પિલાત રાજા યોકા-બિજા દુશ્માન આતા, બાકી તોદિહી ચ્યા દોસ્તાર બોની ગીયા.
પિલાતાથી ઈસુવાલ માઆઇ ટાકના આગના
(માથ્થી 27:15-26; માર્ક 15:6-15; યોહા. 18:39-19:16)
13પિલાત રાજાય મુખ્ય યાજકાહાલ એને આગેવાનાહાન એને લોકહાન હાદિન આખ્યાં. 14“તુમા યા માઅહાન માયેપાંય લેય યેના, એને આખ્યાં કા ઓ દુમાલ કોઆડાં હાટી લોકહાન ચોડવેહે, બાકી એઆ, માયે તુમહે હોમ્મે ચ્યા બારામાય જાંઅયા, બાકી જ્યેં વાતહેબારામાય તુમા ચ્યાવોય દોષ લાવતેહે, ચ્યે વાતહો બારામાય માન ચ્યામાય કાયજ દોષ નાંય મિળ્યહો. 15એને હેરોદ રાજાલ બી ચ્યામાય દોષ નાંય દેખાયો, કાહાકા હેરોદ રાજાય ચ્યાલ માયેપાંય પાછો દોવાડયો, યા માઅહાલ મોતા ડોંડ બોગવાં પોડે ઓહડો ચ્યે કાયબી જુઠા નાંય કોઅયાહાં. 16ચ્યાહાટી ચ્યાલ ચાપકા માર દેયન આંય છોડી દેતહાવ.” 17પિલાત રાજા પાસ્કા સણા સમાયે યહૂદીયાહાહાટી યોકા કૈદ્યાલ છોડી દેતો આતો. 18તોવે બોદહાય બોજ બોંબલીન આખ્યાં કા, “ચ્યાલ માઆઇ ટાકાં, એને આમહાન બારાબ્બાસ દેય દે.” 19બારાબ્બાસે શેહેરામાય દુમાલ કોઅયેલ એને ખૂન કોઅયેલ, ચ્યાહાટી જેલેમાય ટાકલાં યોક માઅહું આતા. 20બાકી પિલાત રાજાય ઈસુવાલ છોડી દાં માગે ચ્યાહાટી આજુ ચ્યાહાન હોમજાડેહે. 21બાકી ચ્યાહાય બોંબલ્યા, “હુળીખાંબાવોય ચોડવી દે, ચ્યાલ હુળીખાંબે ચોડવી દે.” 22આજુ તીજેદા ચ્યે ચ્યાહાન આખ્યાં, “બાકી એલે કાય જુઠા કોઅયાહાં? મોતા ડોંડ બોઅરા પોડે ઓહડા ચ્યામાય કાય નાંય મીળે ચ્યાહાટી ચ્યાલ ચાપકા માર દેવાડીન ચ્યાલ છોડી દેતહાવ,” 23બાકી ચ્યા મોઠેરે બોંબાલતા લાગ્યા એને માગતા લાગ્યા, “ચ્યાલ હુળીખાંબાવોય ચોડવી દાં જોજે” એને ચ્યાહા બોંબાલના નાંય ગાઠ્યા. 24પિલાત રાજાય આગના કોઅયી કા ચ્યાહા માગણી માન્ય કોઅરા જોજે. 25એને બારાબાસાલ જ્યાંય શેહેરામાય દુમાલ કોઅયેલ એને ખૂન કોઅયેલ ચ્યાહાટી જેલેમાય ટાકલાલ ચ્યાહાય માગ્યાં, તોવે ચ્યાલ પિલાત રાજાય છોડી દેનો, એને ઈસુવાલ ચ્યાહા ઇચ્છા નુસાર ચ્યાહાલ હોઅપી દેનો.
ઈસુલ હુળીખાંબાવોય ચોડાવના
(માથ્થી 27:32-44; માર્ક 15:21-32; યોહા. 19:17-19)
26જોવે ચ્યા શેહેરા બાઆ જાય રીયલા આતા, તે સિમોન નાંવા યોક માટડો ગાવા ભાગામાઅને યેરૂસાલેમ શેહેરામાય યી રિઅલો આતો. સિમોન, કુરેની ગાવામાઅનો આતો, એને તો સિકંદર એને રૂફસા આબહો આતો, સીપાડાહાય ચ્યાલ આખ્યાં કા તો હુળીખાંબલીન ચ્યા જાગા હુદી લેય જાય જાં ચ્યા ઈસુલ હુળીખાંબે ચોડાવનારા આતા. 27ચ્યા પાહલા માઅહા મોઠી ગીરદી જાય એને બોજ બાયો ચ્યાહાટી રોડત્યો આત્યો, એને દુઃખ કોઅત્યો આત્યો. 28ચ્યેહે એછે વોળીન ઈસુવે આખ્યાં, “ઓ યેરૂસાલેમ શેહેરામાય રોનાર્યો બાયહીય, તુમા મા હાટી મા રોડહા, તુમહે પોતાના એને તુમહે પાહાહા હાટી રોડા. 29કાહાકા પીડા બોગવુના દિહી યેય રોયહા, એને લોક આખરી, ધન્ય હેય ચ્યો બાયો, જ્યેહે પોહેં નાંય હેય, જ્યેહેય પોહહાલ જન્મો નાંય દેનહો, જ્યેહેય કોદહી ચ્યાહાન દુદ નાંય પાજ્યાં. 30ચ્યે સમાયે, લોક ડોગાલ આખરી, આમહા ઉપે પોડ એને ડોગાલિયેહેન આખરી, આમહાન દુબાડ.
31કાહાકા જોવે નિર્દોષ માઅહા આરે એહેકોય બોને, તે વિચાર કોઆ માઅહું દોષી હેય ચ્યાઆરે કાય ઓઅરી?” 32ચ્યાઆરે બેન ગુનેગારીયાલ માઆઇ ટાકાંહાટી લેય ગીયા. 33જોવે “ખોપરી” નાંવા જાગા ઉપે યેના તોવે ચ્યાહાય તાં ચ્યાલ હુળીખાંબાવોય ચોડવી દેનો, એને બેન ગુનેગારીયાલ બી, યોકાલ જમણે આથે એને યોકાલ ડાબે આથે હુળીખાંબાવોય ચોડવ્યા. 34તોવે ઈસુવે આખ્યાં, “આબા, ચ્યાહાન માફ કોઓ, કાહાકા ચ્યા કાય કોઅતા ચ્યા જાંએત નાંય” ચ્યા ફાડકે વાટી લા હાટી ચ્યાહાય ચિઠ્ઠી ટાકી.
35એને બોદા લોક ઉબા રોયન એઅયા કોએત, બાકી લોકહા આગેવાન મશ્કરી કોઅઈન આખે કા, “ચ્યાય બીજહાન તો હારાં કોઅયા, જો એલો પોરમેહેરા ખ્રિસ્ત હેય એને ચ્યા નિવુડલો હેય, તો પોતાલ બોચાવી લેય.” 36સિપાડાબી ચ્યા મશ્કરી કોઅતા ચ્યાપાય યેયન ચ્યાલ ખાટા પાજેત. 37એને આખે, “તું યહૂદીયાહા રાજા ઓરી તોવે તું પોતાનો બોચાવ કોઓ?” 38સીપાડાહાય ઈસુવા ટોલપી વાયજ ઉચે યોક દોષા પાટી લાવી દેની, ચ્યામાય એહેકોય લિખલાં આતા, “ઓ યહૂદીયાહા રાજા હેય.”
હુળીખાંબાવોય ઈસુવાવોય બોરહો કોઅનારો બાંડ
39શિક્ષા બોગાવનારહા એને ચ્યાઆરે જ્યા બાંડ હુળીખાંબાવોય ચોડાવલા આતા ચ્યાહાય બી ચ્યા નિંદા કોઇન આખ્યાં, “તું ખ્રિસ્ત હેતો, તોવે પોતાલ એને આમહાન બોચાવ.” 40બાકી બીજે પેલ્લાલ ઠોપકાડીન આખ્યો, “તું પોરમેહેરાલ બી નાંય બિઅયા કા, તુલબી હારકી શિક્ષા મિળી ગીયી. 41એને આપા તે ન્યાયા નુસાર સજા બોગવી રીયહા, કાહાકા આપહાય જુઠા કોઅયા તી બોગવાં પોડહે, બાકી યે જુઠા કાય નાંય કોઅયાહાં.” 42પાછે ચ્યે આખ્યાં, “ઈસુ, રાજા હારકો રાજ્ય લેયને યેહે, તોદિહી માન યાદ કોઅજે.” 43ઈસુવે ચ્યાલ આખ્યાં, “તુલ હાચ્ચાં આખતાહાવ આજેજ તું મા આરે હોરગા લોકહામાય રોહે.
ઈસુવે જીવ ટાક્યો
(માથ્થી 27:45-56; માર્ક 15:33-41; યોહા. 19:28-30)
44એને લગભગ બોપરેહે પાછે બોદા દેશામાય આંદારાં ઓઅઇ ગીયા, એને તીં તીન વાગ્યા લોગુ રિયા. 45કાહાકા દિહી ઉજવાડો નાંય દેતો લાગ્યો, એને દેવાળા વોચમાય લોટકાડલો પોડદો આતો, જો બોદહાલ પોરમેહેરા હજર્યેમાય જાંહાટી રોકતો આતો, ઉપેરે તે નિચે લોગુ બેન ભાગ ઓઇન ફાટી ગીયો. 46એને ઈસુ મોઠેરે બોંબલીન આખ્યાં, ઓ આબા, તો આથામાય મા જીવ આંય હોઅપી દેતહાવ” એહેકોય આખીન મોઅઇ ગીયો. 47જીં બોન્યા તી જોવે સુબેદારાય એઅયા, તોવે ચ્યે પોરમેહેરા સ્તુતિ કોઅયી, એને આખ્યાં, “નોક્કી ઓ માઅહું ન્યાયી આતો.” 48એને જ્યેં માઅહે ખીયાલ એરા ટોળો વોળલે, ચ્યે ઈ બોદા ઓઅતા દેખીન બોજ દુઃખ થી છાતી બાહાટતે પાછે ગોઓ વોળી ગીયે. 49એને ઈસુ બોદે વોળખાત્યે, એને જ્યો બાયો ગાલીલ ભાગામાઅને ચ્યાઆરે યેનલ્યો આત્યો, દુઉ ઉબ્યો રોઇન ઈ બોદા એય રિઅલ્યો આત્યો.
ઈસુવાલ કોબારેમાય દાટી દેનો
(માથ્થી 27:57-61; માર્ક 15:42-47; યોહા. 19:38-42)
50યોસેફ નાંવા યોક માટડો આતો, જો અરીમતિયા શેહેરામાઅનો આતો, તો યહૂદી મોઠી સોબાયે યોક બોજ ઈજ્જતદાર માઅહું આતો. 51એને ચ્યાહા યોજના એને ચ્યાહા ચ્યા કામહાથી તો રાજી નાંય આતો, એને તો યહૂદીયા ભાગા અરીમતિયા લોકહામાઅનો યોક આતો જો પોરમેહેરા રાજ્ય જલદી યેયના વાટ જોવી રિઅલો આતો. 52તો બિક વોગાર પિલાત રાજાપાય ગીયો એને ઈસુ શરીરાલ હુળીખાંબાવોયને ઉતાડીન ચ્યાલ કોબારેમાય થોવાંહાટી પરવાનગી માગી. 53એને ઈસુ શરીરાલ હુળીખાંબાવોયને ઉતાડીન યોકા હારાં મોઅગા ફાડકામાય ચોંડાળીન એને ખોલકાડામાંય કોચીન તિયારી કોઅલી યોક કોબારેમાય થોવી દેના, ચ્યે કોબારેમાય પેલ્લા કાદાલ નાંય થોવ્યેલ. 54તો આરામા દિહા તિયારી કોઅના દિહી આતો, એને શાબાથ દિહી સુરુ ઓઅનારો આતો. 55એને ગાલીલ ભાગામાઅને યેનલ્યો બાયો, આરે જાયને કોબારેલ દેખ્યાં એને ઈ બી કા ઈસુ શરીર કેહેકેન થોવલાં હેય. 56એને પાછયો ગોઓ જાયને, ઈસુ શરીરાલ લાવના અત્તાર તિયારી કોઅયા, એને આરામા દિહા લીદે મૂસા નિયમશાસ્ત્ર નુસાર આરામ કોઅયો.
Aktualisht i përzgjedhur:
લુક 23: GBLNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Gamit Bible (ગામીત), by The Love Fellowship is licensed under Creative Commons Attribution-ShareAlike 4.0 License.