लूका 23
23
पिलतुसा जेह यीशु
(मत्ती 27.1,2,11-14; मरकुस 15.1-5; यूहन्ना 18.28-38)
1तेबा सारी सभा उठी करे यीशु पिलातुसा सेटा वै निऊ। 2होर त्याहा एडा बोली करे तेऊ पैंदे दोषा लाऊदे लागे; हामे यह लोका वडकाऊन्द हेरू, होर कैसरा वै कर नांई दिणा होर आपणे आपा वै मसीहा रअ राजा बोल्दअ शुन्णु। 3पिलातुसे तेऊका पुछु, कैह तुह यहूदी रअ राजा साहा? तेऊ उतर दिना, तुह आपे ही बोला। 4तेबा पिलातुसे प्रधान याजका होर लोका वै बोलू, हाऊं एउ मणशा में किछे दोष नांई पाऊंदअ। 5पर त्याह होर जोरे संघे बोलदे लागे, यह गलीला कअ अखे तणी, सारी यहूदी में उपदेशा देई करे लोका भडकाउंद लागदअ। 6एडा शुणी करे पिलातुसे पुछु, कैह यह मणश गलीली साहा? 7होर एडा जाणी करे कि सह हरोदेसा रे राज्य रअ साहा, सह हेरोदेसा सेटा वे भेजू, किबेकी त्याह धयाडी सह भी यरूशलेमा में तेऊरा अधिकार थी।
हरोदेसा जेह यीशु
8हेरोदेस यीशु हेरी करे बखे खुश होऊ, किबेकी सह बहु धियाड़े ओरी तेऊ हेरणा चांहदा थी, किबेकि तेऊरे बारे में शुन्णुदा थी, होर तेऊका एखा चिन्हा हेरने री आशा चांहदा थी। 9सह तेऊका बहू गल्ला पुछदअ रहू, पर तेऊ किछे उतर नांई दिना। 10प्रधान याजक होर शास्त्री तेऊ पैंदे दोषा लाऊदे लागे। 11तेबा हेरोदेसे आपणे सिपाई संघे तेऊरे ठठे करदे लागे होर तेऊकी सह झिकड़े भी पिलातुसा जेह भेजी 12तेसा धियाड़ी पिलातुस होर हेरोदेस आपु में दोस्त बणी; एता पहिले त्याह आपु में दुश्मण थी।
पिलतुसे यीशु वै मृत्यु दण्ड दीना
(मत्ती 27.15-26; मरकुस 15.6-15; यूहन्ना 18.39-40; 9.16)
13पिलातुस प्रधान याजक होर सरदार होर लोका शादी करे त्याह का बोलू 14तमे एउ मणशा लोका भडकाऊण आल़े ठहराई करे, महा सेटा वै आणू, होर हेरा मांई तमा सेटा एउरी जाँच करी, जासू गल्ला रा तमे एउ पैंदे दोष लाऊंदा त्याह गल्ला में मांई किछे दोष नांई पाऊ। 15ना हेरोदेसे, किबेकी तेऊये यह हामा सेटा वै भेजूदअ साहा होर हेरा, एडा किछए नांई होऊ कि एउ वै मृत्यु दीण्ड दे। 16तेबा हाऊं एउ चिकि करे छाडा। 17पिलातुसे पर्वा री धियाड़ी त्याह वै एकी कैदी छाड़ने वै मजबूर थी। 18तेबा त्याहे सभी मीली करे बोलू, एउ नांई छाडे एउरी जागा बरअब्बा छाड़ा। 19सह कासु झगड़े रे कारण जोह नगरा में होऊदा थी, होर हत्या रे कारण जेला पाउदअ थी। 20पर पिलातुसे यीशु छाड़ने री तणी लोका भी भिया का समझाई। 21पर त्याह जोर-जोर बोलू एउ क्रुसा में चढ़ा एउ क्रुसा में चढ़ा। 22तेऊ चिऊणी बारी त्याह का बोलू, किवै तेऊ कैह बुराई करी दी साहा? मांई तेऊमें मरने री तणी किछे गल्ला नांई पाई। तेबा हाऊं तेऊ चिकि करे छाडदा। 23पर त्याहे जोरे-जोरे बोली करे तेऊ पीछे पड़ी की तेऊ क्रुसा पैंदे चढा होर त्याहा रा चिलाऊणा बडू। 24तेबा पिलातुसे आज्ञा दिनी कि जेहड़ा या चाहंदा तेहडा ही होऊ लोडी। 25तेऊये सह मणश जोह बलवा होर हत्या री बजहा का जेला मे पाउदअ थी, होर जासू त्याहा मांगा थी, सह छाडी दिनअ; होर यीशु त्याह री इच्छा पैंदे छाड़ी दिनअ।
यीशु कृसा पैंदे चड़ाउणा
(मत्ती 27.32-44; मरकुस 15.21-32; यूहन्ना 19.17-27)
26जेबा त्याह यीशु नींदे लागे थी, तेबा त्याहे शिमोन ना रअ एकी कुरेनी वै जोह ग्रा का ईंदअ लागदअ थी, त्याहे तेऊवै क्रुसा चुआकणे वै दिनअ की सह यीशु रे पीछे-पीछे हांडे। 27लोका री बडी भीड़ तेऊ पीछे हांडदी लागी, होर त्याह में बहू बेटड़ी जोह तेऊ संघे होर छाती टोकदी होर लेरदी लागीदी थी, 28यीशुये त्याह फेरा वै फिरी करे बोलू, हे यरूशलेमा री वैटियों मेरी तणी नांई लेरे आंधी; पर आपणी होर आपणे बालका री तणी लेरा। 29किबेकी त्याह धयाडी इछणी, जासू में लोका बोलणा, धन्य साहा सह बांझ होर सह गर्भ जोह नांई जन्मी होर त्याह स्तन जासू दूध नांई पिलाऊ। 30तेऊ वक्ते त्याह पहाडा का बोलणा कि हामा पैंदे पड़ होर टीले का हामा ढोप। 31किबेकि जेबरे हर बूटे संघे एडा करे तेबा कैह शुकी झुका संघे किछे नांई करणा? 32त्या होर दुई मणशा भी जोह कुकर्मी थी, त्याह संघे नीई। 33जेबा त्याहे तेसा जागा पूजे जासू वै खोपड़ी बोलदा, तेबा त्याह तेऊ तखे होरा त्याह कुकर्मी भी एक दांए होर दूजअ बांए तरफा क्रुसा पैंदे चढ़ाई। 34तेबा यीशु बोलू, हे बापू याह क्षमा कर, कीबकी या नांई जाणदे की या कैह करना लाऊदा साहा। होर त्याह चिट्ठी पाई करे तेऊरे झिकड़े बांडी। 35लोका खड़े-खड़े हेरदे लागे, होर सरदार भी ठठा करी करे बोलदे लागे, एउय दूजे बचाई, अगर यह परमेश्वरा रअ शोहरू मसीह साहा होर तेऊरअ चुनीदे साहा, तेबा आपणे आपा वै बचे 36सिपाई भी नेड इछी करे होर सिरका देई करे तेऊरा ठठा करी करे बोला थी। 37अगर तुह यहूदी रअ राजा साहा तेबा आपणें आप वै बचा! 38होर तेऊ पैंदे एक दोष पत्र भीं लाऊ, यह यहूदी रअ राजा साहा।
मन फिराऊण आले कुकर्मी
39जोह कुकर्मी तखे लटकाई दे थी, त्याह में एकी तेऊरी निंदा करी करे बोलू, कैह तुह मसीहा नांई? तेबा आपणे आपु होर हामा बचा। 40एता पैंदे तेऊ दूजे डांटी करे बोलू, कैह तुह परमेश्वर का नांई डरदअ? तुह भी तअ तेऊ दण्डा पाऊदअ लागदअ साहा, 41होर हामे तो न्याय रे साभे दण्डा पाउदे लागदे, किबेकि हामा आपणें कामा रे साबे फल्ल पाऊंदे लागेदे; पर एऊ किछे एडा गलत काम नांई करू। 42तेबा तेऊ बोलू, हे यीशु जेबा तुह आपणे राज्य में इछे तेबा मेरी सुधी लए। 43तेऊये त्याह का बोलू, हाऊं तमा का सची बोल्दा कि आज तुह मांई संघे स्वर्गा में हुणअ।
यीशु रा मरणा
(मत्ती 27.45-46; मरकुस 16.1-8; यूहन्ना 20.1-10)
44होर लगभग दोपहरा का चिउणे दोपहर तणी देशे नयारा होऊ, 45होर धिहाडी रा प्रियाषा नांहदा रहू, होर देहुरे रा परदा बीचा का फुटअ। 46होर यीशु जोरे बोलू, हे बापू हाऊं आपणी आत्मा तेरे हाथे दिंदा। होर एता बोली करे आपणे प्राण शोटी। 47सुबेदारे जोह होऊ, हेरी करे परमेश्वरा री बड़ाई करी करे बोलू, जरुर यह मणश धर्मी थी। 48होर जोह भीड़ हेरने वै कठी होई, एता हेरी करे लेरदे-लेरदे बापिस नाठी। 49पर तेऊरे सारे जाणन आले, होर जोह बेटड़ी गलीला का तेऊ संघे आई थी, दूर खड़ी होई करे हेरदी लागीदी थी।
यीशु रा दवाऊणा
50होर तखे यूसुफ ना रअ महासभा रअ एक सदस्य थी, जोह भला होर धर्मी मणश थी। 51होर त्याह री एसा गला का होर एउ कामा का खुश नांई थी;। होर सह यहूदी रे नगरा अरिमितिया रअ रहण आल्ल़अ होर परमेश्वरा रे राज्य निहालण आल थी। 52तेऊ पिलातुसा जेह नाशी करे यीशु री शव मागू; 53होर तेऊ शव काहडी करे मलमला री चादरी में पल़ेटू, होर एकी कब्रा में डाहु, जोह पत्थरा में बणाइदी थी; होर तेता में कोहे नांई डाहुदअ थी। 54सह तैयारी री धियाड थी, होर सब्ता री धयाडी शुरू होई। 55त्याह बेटड़ी जोह गलीला का आई थी, पीछे-पीछे नाशी करे कब्रा हेरी होर यह भी हेरू कि यीशु रअ शव कैहडे सावे डाही दी साहा। 56तेबा त्याह इच्ही करे बडिया खुशबू आली चिजा होर इत्र तैयार करू; होर सब्ता री धियाड़ी त्याह आज्ञा रे सावै आराम करू।
Aktualisht i përzgjedhur:
लूका 23: ISJNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.