यूहन्ना 14
14
ईशु चो आपलो चेलामन के दिलासा देतोर
1“तुमचो मन बाय बिकाल नी होओ; माहापुरू थाने बिश्वास संगाहा आउर मोचो उपरे बले बिश्वास संगाहा। 2मोचो बुआ चो घर ने खुबे असन रतोर जगा आसे, अगर नी होती तेबे मय तुमके बोलुन देते; कसनबल्लोने मय तुमचो काजे जगा तिआर करूक जायें सें। 3आउर अगर मय जाऊन भाती तुमचो काजे जगा तिआर करें दें, तेबे फेर ऐऊन भाती तुमके आपलो थाने धरून जायें दें कि जोन थाने मय रयें दे हुता तुमी बले राआ।”
बाट सत आउर जीवना
4“जोन थाने मय जाऊ आय तुमी हुता चो बाट जानास।” 5थोमा हुनचो ले बल्लो, “हे परबु, आमी नी जानु कि तुय काहां जाय सीस; तो बाट कसन जानु दें?” 6ईशु हुनचो ले बल्लो, “बाट आउर सत आउर जीव मय ची आंय; बिना मोचो नाहालो कोनी बुआ चो लगे नी पहुँचुक सके। 7अगर तुमी मोके जानु रतास, तेबे मोचो बुआ के बले जानतास; आउर अदायं हुनके जानास, आउर तुमी हुनके दकला साआस बले।”
8फिलिप्पुस हुनचो ले बल्लो, “हे परबु, बुआ के आमके दकान देस, ऐई आमचो काजे खुबे आय।” 9ईशु हुनचो ले बल्लो, “हे फिलिप्पुस, मय ईतलो दिन ले तुमचो संगे आंसे, आउर काय तुय मोके नी जानीस? जोन मोके दकलो से हुन बुआ के बले दकलो से। तुय केंव बोल सीस कि बुआ के आमके दकाव? 10काय तुय बिश्वास नी करीस कि मय बुआ ने आंसे आउर बुआ मचो थाने आसे? ऐ गोठमन जोन मय तुमके बलें सें, आपलो बाटले नी बोलें, मान्तर बुआ मोचो थाने रऊन भाती आपलो कामकरू आय। 11मोचो बिश्वास करा कि मय बुआ ने आसे आउर बुआ मोचो थाने आसे; नी होले काममन ची चो लागुन मचो बिश्वास करा।
ईशु चो नाव ले पारथना
12“मय तुमचो ले सत-सत बलें सें कि जोन मोचो उपरे बिश्वास संगाऊ आय, ऐ काम जोन मय करू आंय हुन बले करे दे, मान्तर ऐचो ले बड़े काम करे दे, कसनबल्लोने मय बुआ चो लगे जायें सें।” 13जोन बले तुमी मोचो नाव ले मांगा से, हुनी मय करें दें कि बेटा चो बाटले बुआ चो महिमा होओ। 14अगर तुमी मोचो ले मोचो नाव ले काई मांगा से, तो मय हुनके करें दें।
पवितर आत्मा चो बायदा
15“अगर तुमी मोचो ले मया संगाऊ आस, तेबे मोचो हुकुममन के माना से। 16मय बुआ ले गुहार करें दें, आउर हुन तुमके गोटक आउर सायक देये दे कि हुन हरमेशा तुमचो संगे रये दे। 17बल्लोने सत चो आत्मा, जेके संवसार गरहन करूक नी सके, कसनबल्लोने हुन ना हुनके दकु आय आउर ना हुनके जाने से; तुमी हुनके जानास, कसनबल्लोने हुन तुमचो संगे रऊ आय, आउर हुन तुमचो ने होये दे।” 18“मय तुमके परटा नी छांडे दे; मय तुमचो लगे ऐयें से। 19आउर खिन्डिक समया बाचली से, कि फेर संवसार मोके नी दके दे, मान्तर तुमी मोके दका से; ऐईकाजे कि मय जीव आंसे, तुमी बले जीव राहा से। 20हुन दिने तुमी जाना से कि मय आपलो बुआ ने आंसे, आउर तुमी मोचो ने, आउर मय तुमचो ने। 21जेचो लगे मोचो हुकुममन आसे आउर हुन हुनमन के मानु आय, हुनी मोचो ले मया संगाऊ आय; आउर जोन मोचो ले मया संगाऊ आय हुनचो ले मोचो बुआ मया संगाय दे, आउर मय हुनचो ले मया संगायें दें आउर आपन खुद के हुन थाने उजागर करें दें।” 22हुन यहूदा जोन इस्करियोती नी रये, हुनचो ले बल्लो, “हे परबु, काय होली कि तुय आपन खुद के आमचो थाने उजागर करूक मन कर सीस आउर संवसार थाने नाई?” 23ईशु हुनके जबाप दिलो, “अगर कोनी मोचो ले मया संगाय दे, तेबे हुन मोचो बचन के माने दे, आउर मोचो बुआ हुनचो ले मया संगाय दे, आउर आमी हुनचो लगे ऐऊ दें आउर हुनचो संगे वास करूं दे।” 24जोन मोचो ले मया नी संगाये, हुन मोचो बचन नी माने; आउर जोन बचन तुमी सुनु आहास हुन मोचो नुआय मान्तर बुआ चो आय, जोन मोके पठालो। 25“ऐ गोठमन मय तुमचो संगे रते-रते तुमचो ले बल्ले। 26मान्तर सायक बल्लोने पवितर आत्मा जेके बुआ मोचो नाव ले पटाये दे, हुन तुमके सपाय गोठमन सिकाये दे, आउर जोन काई मय तुमचो ले बल्ले से, हुन सपाय तुमके सुरता कराये दे।”
ईशु चो शान्ति उपहार
27“मय तुमके शान्ति देऊन जायें सें, आपलो शान्ति तुमके देंयें से; जसन संवसार देऊ आय, मय तुमके नी देंयें: तुमचो मन बाय बिकाल नी होओ आउर नी डरो। 28तुमी सुनलासास कि मय तुमचो ले बल्ले, ‘मय जायें सें, आउर तुमचो लगे फेर ऐयें दें।’ अगर तुमी मोचो ले मया संगातास, तेबे ऐ गोठ ले हरिक होतास कि मय बुआ चो लगे जायें सें, कसनबल्लोने बुआ मोचो ले बड़े आय। 29आउर मय अदायं ऐचो होतोर ले पयले तुमचो ले बोलुन दिले से, कि जिदलदाय हुन होऊन जाय दे, तेबे तुमी बिश्वास करा। 30मय अदायं तुमचो संगे आउर खुबे गोठमन नी करें दें, कसनबल्लोने ऐ संवसार चो सरदार ऐये से। मोचो उपरे हुनचो काई निआय; 31मान्तर ऐ ऐईकाजे हऊ आय कि संवसार जानो कि मय बुआ ले मया संगाऊ आंय, आउर जसन बुआ मोके हुकुम दिलो मय असने ची करू आंय। उठा, ऐथा ले जो।
Aktualisht i përzgjedhur:
यूहन्ना 14: HLBNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Halbi Bible by The Love Fellowship is licensed under Creative Commons Attribution-ShareAlike 4.0 License.