यूहन्ना 9
9
जनम चो काना के दकातोर
1जाते-जाते हुन गोटक माने के दकलो जोन जनम ले काना रये। 2हुनचो चेलामन हुनचो ले पचारला, “हे रब्बी, कोन पाप करू रये कि ऐ काना जनम लो, ऐ माने नाहले ऐचो आया-बुआमन?” 3ईशु जबाप दिलो, “ना तो ऐ पाप करू रलो, ना ऐचो आया-बुआमन; मान्तर ऐईकाजे होली कि माहापुरू चो काम हुनचो थाने उजागर होओ। 4जोन मोके पठालो से, आमके हुनचो काम दिन ची दिन ने करतोर जरूरी आय; हुन रात ऐतो बिती आय जोन थाने कोनी काम नी करूक सकोत। 5जिदलदाय ले मय जगत ने आंसे, तेबे तक जगत चो उजर आंय।” 6ऐ बोलुन भाती हुन भुईं थाने थुकलो, आउर हुन थुक ले माटी चटकलो, आउर हुन माटी हुन काना चो आँईकमन ने लगाऊन भाती 7हुनचो ले बल्लो, “जा, शीलोह चो कुण्ड ने धोऊन देस” (शीलोह चो अरत पठालो बिती आय)। हुन जाऊन भाती धोहलो, आउर दकते फिरून ईलो। 8तेबे पड़ोसी आउर जोनमन पयले हुनके भीक मांगते दकु रला, बोलुक मुरयाला, “काय ऐ हुनी नुआय, जोन बसुन भाती भीक मांगते रलो?” 9कितलो लोगमन बल्ला, “ऐ हुनी आय,” दुसरमन बल्ला, “नाई, मान्तर हुनचो असन आय।” हुन बल्लो, “मय हुनी आय।” 10तेबे हुनमन हुनचो ले पचारूक मुरयाला, “तुचो आँईक कसन खुलुन गेली?” 11हुन जबाप दिलो, “ईशु नाव चो गोटक मनुक माटी चटकलो, आउर मोचो आँईक थाने लगाऊन भाती मोचो ले बल्लो, ‘शीलोह ने जाऊन भाती धोऊन देस,’ आउर मय गेले आउर धोहले आउर दकुक मुरयाले।” 12हुनमन हुनचो ले पचारला, “हुन काहां आसे?” हुन बल्लो, “मय नी जाने।”
फरीसीमन चो बाटले चेंगा चो जाच-पड़ताल
13लोग हुनके जोन पयले ले काना रये फरीसीमन चो लगे नीला। 14जोन दिने ईशु माटी चटकुन भाती हुनचो आँईक खोलुन रलो, हुन सब्त चो दिन रली। 15फेर फरीसीमन बले हुनचो ले पचारला कि हुनचो आँईक कसन रीति ले खुलली। हुन हुनमन ले बल्लो, “हुन मोचो आँईक थाने माटी लगालो, फेर मय धोहले, आउर ऐबे दकें सें।” 16ऐ थाने कितलो फरीसी बोलुक मुरयाला, “ऐ माने माहापुरू चो बाटले नुआय, कसनबल्लोने हुन सब्त चो दिन के नी माने।” दुसरमन बल्ला, “पापी मनुक असन चिना कसन दकाऊक सकु आय?” आउर हुनमन ने फुट पड़ली। 17हुनमन हुन काना ले फेर बल्ला, “हुन तुचो आँईक खोललो से। तुय हुनचो बारे ने काय बोले सीस?” हुन बल्लो, “हुन अगम गिआनी आय।” 18मान्तर यहूदीमन के बिश्वास नी होली कि हुन काना रये आउर अदायं दके से, जिदलदाय ले हुनमन हुनचो, जेचो आँईक खुलु रये, आया-बुआ के हाग देऊन भाती 19हुनमन ले नी पचारला, “काय ऐ तुमचो बेटा आय, जोन के तुमी बोलु आहास कि काना जनमु रये? फेर अदायं हुन कसन दके से?” 20हुनचो आया-बुआ जबाप दिला, “आमी तो जानु से कि ऐ आमचो बेटा आय, आउर काना जनमु रये; 21मान्तर आमी ऐ नी जानु कि ऐबे कसन ने दके से, आउर ना ऐ जानु कि कोन ऐचो आँईक खोललो। हुन सियान आय, हुनचेई ले पचारा; हुन आपलो बारे ने खुद बोलुन देये दे।” 22ऐ गोठमन हुनचो आया-बुआ ऐईकाजे बल्ला कसनबल्लोने हुनमन यहूदीमन ले डरते रवत, कसनबल्लोने यहूदी गोटक मत होऊन चुकुन रवत, कि अगर कोनी बोल दे कि हुन मसीह आय, तो आराधना घर ले निकराया जाओ। 23ऐई लागुन हुनचो आया-बुआ बल्ला, “हुन सियान आय, हुनचेई ले पचारा।” 24तेबे हुनमन हुन मनुक के जोन काना रये, दुसरहार हाग देऊन हुनचो ले बल्ला, “माहापुरू चो स्तुति कर। आमी तो जानु से कि हुन मनुक पापी आय।” 25हुन जबाप दिलो, “मय नी जाने कि हुन पापी आय कि नाई; मय गोटक गोठ जाने कि मय काना रले आउर अदायं दकें सें।” 26हुनमन हुनचो ले फेर बल्ला, “हुन तुचो संगे काय करलो? आउर कसन ने तुचो आँईक के उगाढ़लो?” 27हुन हुनमन ले बल्लो, “मय तो तुमके सांगुन चुकले से, आउर तुमी नी सुनलास; अदायं दुसरहार केंव सुनतोर चाहायेसास? काय तुमी बले हुनचो चेला होऊक चाहायेसास।” 28तेबे हुनमन हुनके गलत-सलत बोलुन बल्ला, “तुय ची हुनचो चेला आस, आमी तो मूसा चो चेला आंव। 29आमी जानु से कि माहापुरू मूसा ले गोठमन गोठयालो; मान्तर ऐ माने के नी जानु कि काहां चो आय।” 30हुन हुनमन के जबाप दिलो, “ऐ तो अकचकित चो गोठ आय कि तुमी नी जानास कि हुन काहां चो आय, तेबले बले हुन मोचो आँईक के खोलुन दिलो। 31आमी जानु से कि माहापुरू पापीमन चो नी सुने, मान्तर अगर कोनी माहापुरू चो भक्ति होओ आउर हुनचो इच्छा थाने चलो, तेबे हुन हुनचो सुनु आय। 32जगत चो मुर ले ऐ केबीई सुनतोर ने नी इली कि कोनी जनम चो काना चो आँईक के उगाढ़लो। 33अगर ऐ मनुक माहापुरू चो बाटले नी होतो, तेबे काई बले करूक नी सकतो।” 34हुनमन हुनके जबाप दिला, “तुय तो बिलकुल पापमन ने जनमली सीस, तुय आमके काय सिकाय सीस?” आउर हुनमन हुनके बाहरे निकराऊन दिला।
आत्मिक काना
35ईशु सुनलो कि हुनमन हुनके बाहरे निकराऊन दिला, आउर जिदलदाय हुनचो ले भेट होली तेबे बल्लो, “काय तुय माहापुरू चो बेटा उपरे बिश्वास करी सीस?” 36हुन जबाप दिलो, “हे परबु, हुन कोन आय, कि मय हुनचो उपरे बिश्वास करें दें?” 37ईशु हुनचो ले बल्लो, “तुय हुनके दकली सीस बले, आउर जोन तुचो संगे गोठया से हुन हुनी आय।” 38हुन बल्लो, “हे परबु, मय बिश्वास करें से।” आउर हुनके पाँय पढ़लो। 39तेबे ईशु बल्लो, “मय ऐ जगत ने नियाय करतो काजे ईले से, बल्ले जोनमन नी दकोत हुनमन दकोत, आउर जोनमन दके सोत हुनमन काना होऊन जाओत।” 40जोन फरीसी हुनचो संगे रवत हुनमन ऐ गोठमन सुनुन भाती हुनचो ले बल्ला, “काय आमी बले काना आंव?” 41ईशु हुनमन ले बल्लो, “अगर तुमी काना होतास तेबे पापी नी ठेबतास; मान्तर अदायं बलेसास कि आमी दकु से, ऐईकाजे तुमचो पाप बनुन रऊ आय।
Aktualisht i përzgjedhur:
यूहन्ना 9: HLBNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Halbi Bible by The Love Fellowship is licensed under Creative Commons Attribution-ShareAlike 4.0 License.