BOTHUBO 7
7
1Tithiu Ampeu no Noah vilo pi, “No eno o kibolomi kümtsü ashuka lo ilove lo, kughengu hipa tiqheli lo no ye I zülo amikucho ipi I no ithuluvae. 2Mqhamqhi keu lhoxü kümtsü, atsü-aqu atüna tsünini o gholo pewulo, mithekumo lhoxü kinini atsü-aqu, 3eno atsütsü lo aghau ghi atüna tsünini adu aqu, ayeghi kümtsü lo tipaqo ti kughuko nike pewuni. 4Kughengu atsala tsüni dolono I no ayeghi lo putho tsala lhobidi eno pucho tsala lhobidi tsütsüghu puwuni, eno aküxüküa lhoxü I no lhophe keu kümtsü ayeghi hipau lono I no pühaveni.” 5Ampeu no azah Noah tsükeu kümtsü pa no shive.
6Ayeghi lo züqozü ighike ghuloki lo Noah ye ampe 600 shiae. 7Noah eno pa nuli, pa nipu eno pa nuli nipuqo ye züqozü lono pokalu niye pa gholono ashuka lo ilove. 8Mqhamqhi keu eno mithekumo lhoxü, aghau eno ayeghi lo itikiche lhoxüqo, 9Alhou no Noah azah tsüke toi kinini no, atüna shi Noah gholono ashuka lo ilove. 10Eno atsala tsüni thiu züqozü no ayeghi shou ighive.
11Noah küxü mpe 600, aqhi akiniu, atsala chighiakütsüniu, tipani no akuthoku aghiu lono azüpuki kümtsü vephe ipeghi, eno atsütsü lasheqo kümtsü khaqhive. 12Eno putho pucho atsala lhobidi tsütsüghu ayeghi shou ighive. 13Tipa tsala lono Noah eno pa nuli, Shem, Ham eno Japheth, Noah nipu eno pa nuli nipu pano küthü ishi ashuka lo ilove, 14panongu eno tüghashi tikishi kümtsü ajeli kiqi lono, ayeghi lo itikiche lhoxüqo ajeli kiqi lono, aghau kümtsü ajeli kiqi lono, eno achishibo kupu lhoxü kümtsü pa gholono ashuka lo ilove. 15Lhoxü jeli khipaqo lolo aküxü tuthu akeno tipaqo kümtsü kinini shi panongu no Noah gholono ashuka lo ilove. 16Lhoxü jeli khipaqo atsü-aqu kiqi lono ilo keno tipaqo kümtsü Alhou no azah Noah tsükeu kiqi lonoke. Tishino Ampeu no pa khatha süve.
17Züqozü ye tamono atsala lhobidi ayeghi lo ighi. Azü no alau shive no ashuka yimi ikughive, eno tipau ye ayeghi kunguu ikuve. 18Azü no alau ayeghi shou shishe ikughi kitheve, eno ashuka ye azü shou ngove. 19Ayeghi shou azü no alau ikughive kehu atsütsü kupuju qholo naghutoqo ye yimive. 20Naghutoqo shou auxakuchho tsüni azü no yimive. 21Ayeghi lo pokiche yekiche, itikiche lhoxü aghau, tikishi tüghashi, ayeghi lo tahu tawo chekeqo eno timi kümtsü thive. 22Qhaike yeghi lo aküxüpu tuthu akeqo kümtsü thive. 23Pa no aküxüküa lhoxü, timi, tüghashi, itikiche lhoxü eno atsütsü lo aghau kümtsü ayeghi lono pühave. Panoqo ye ayeghi lono pühave. Noah eno pa gholo ashuka lo akeqo likhi qhive. 24Azü no ayeghi shou atsala 150 ae.
Aktualisht i përzgjedhur:
BOTHUBO 7: SUMRVBSI
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
The Bible Society of India
© 2023, Used by permission. All rights reserved. More