Yohanes 11
11
Lazarus poneko mali taogha
1Nimi naiktopne nhon sina Lazarus as Betaniange wamog. Eldo'elabo Mariaap Martaap babe as enekoag kelabo wamdekti, elap nhon wamek. 2Maria kel enena, nu Saelba Uhiropne Yesusti yanag mag song walinge likto eldi hong agha luptop kel wamog.#Yohanes 12:3 Maria kel eneko ilipsae Lazarus naikna salero mabog. 3Naikna salero mabogpa, eldo'elabo abenekori Yesusag yubu palilamdekti, “Nai, nu Saelbamsilamne. El talulam nena, andi o'ona senelamlamne poneko naiklamla,” aro nimi pogtekpa, Yesus ambarel piog.
4Ambarogpa Yesusti ka'ebaogti, “Naikna neneri el tebanepne sembe salelamla kom. Naikna elag ulamla andarina, nimiri Allah paliag uropne kiplamukang. Uro yabalamlenge toman, ‘Allah Elme babe paliag uropne kiplamukang,’ aro naikna salelamla,” seog.
5-6Yesusti Martaap, ilipsa'el Mariaap, Lazarus ponekoap o'ona sembahiog. Lazarus naiklamogne sembe yubu ka'ebaogti, o'ona senelamsiogne agha ta'ap seogti, el wamoghag aneko nen ik phende wamog. 7Undo wamogha eldi yubu ka'ero neleptop nimiag yubu lelamogti, “Nu nen samoro Yudea so'oag pukap,” seog.
8Wene seogpa, eldi yubu ka'ero neleptop nimi tanekori Yesusag samoro yubu lelamekti, “Nai, yubu amohinne nubunge wamlamne. Weneog Yahudi nimi nubunangdi anokoa an, ‘Kirikti opkukap,’ aro uagheong. Apna wene an nen samoro anoko sip pululam te?” aro wene seek.
9Wene seekpa, Yesusti sinag samoro, “Ae kweleklamlari, tibin warea ulamlange neneko tibin mo sembe heng ko'o aobare ulamla. Nimi nhon ae tibin mog so'o eneag wareropne toman yabalamla tanena, nimi eneko tibin uro ililamlari, yabiropne toman puri tikto phukul ingkirop kom. 10Aghana nimi inipnag yabirop tanena, tibin aneko elag urop kom ane sembe, puri tikto phukul ingkirop,” aro ambatsiog.
11Wene aro ambatsiogne Yesusti nen tipto lelamogti, “Nungkae wanaagne Lazarus poneko maamla aghana, na pineri el kamol pinun,” seog.
12Wene seogpa, eldi yubu ka'ero neleptop nang tanekori Yesusag, “Nai, nu Saelbamsilamne, el malamla pagha tanena, el wali talul tiog,” seek. 13Yesusti sinag, “Lazarus maamla,” seog nena, Lazarus tebaogne sembe likipto lebog aghana, eldi yubu ka'ero neleptop nimiri sembaek nena, “Lazarus kwahingdi malamlange sembe lepla,” sembaek.
14Wene aro lebekpa, Yesusti tibin nenero ambarelamsiogti, “Lazarusna tebao.
15El tebaoa anekoag na wamno komne a'un yepsinepne wamla. A'un yepsinep ane sembe, na awi wamnel nena, elag piberi, a'undi nanag sikne aro wana pimnepne sembe awi ulamnel. Ot wene a'unap nanap elag pukap,” aro ambatsiog.
16Wene aro ambatsiogpa, Tomas si nhon Didimus ponekori elkabo sin Yesusti yubu ka'ero neleptop nang wamek nimi tanekoag ambarelamsiogti, “Nu babe pibe andarina, elap nhon tebaukap,” seog.
Yesusti teptop nimi kamag nenehiropneap, kamag unne tatsiropneap sembe ambatsiogha
17Yesus aneko piogpa, nimiri elag, “Lazarus ya'ag tebaoba, kirik lomag pail wa'ionga ik tom sum wamap,” seekpa Yesusti ka'ebaog. 18As Betania aneko anabi as Yerusalem anabiag ina aneko we kom.#11:18 we kom - Kilometer wilindi saog wamog. Ina we komdina, 19sikinipsae Lazarus tebaogne sembe Yahudi nimi maiknori Martaap Mariaap o'ona paibatto aro yingkina wamek. 20Martari ka'elamogpa, “Yesus yalamla,” seeka ka'ebaogti, Marta lambom agha, “Yesusap haiptanunam,” aro piog aghana, Maria aeag wamog.
21Martari Yesusag yubu lelamogti, “Nai nu Saelbamsilamne, an ane wamsombana, naipsae tebaonge sik uro tebaho kom. 22Aghana na el wamnangena, wene ane babe sa'a-sa'a Allahag molona molbamenba, anag tatkelul,” seog.
23Wene seogpa, kel enekoag Yesusti yubu lelamogti, “Anipsae nen kamag talul,” seog.
24Yesusti wene seogpa, Marta kel enekori samoro, “Komoptop sum Allahri teptop nimi kamag nenelamsile sum eneko naipsae babe kamag nembalulne na el wamna,” seog.
25Wene seogpa, Yesusti Marta kel enekoag, “Nana nimi kamag uro unne tatsiropneap, nimi teptop nimi kamag nenehiropneap wamna. Nanag sikne aro wana palirop nimi tebalea babe, el nen kamag wamlul. 26Nimi etneri nanag sikne aro wana palilamleri, kamag wamle nimi ni taneko ya'ag tebaukang kom. Lemnange nene sik senelamlam to, kom to?” aro haibaog.
27Wene aro haibaogpa, Marta kel enekori, “Nai nu Saelbamsilamne, sikne leplam semban. Samenag agha nari seneraglamnonge, ‘An Kristus Allah Elme Allahri wepto pogkeogpa, an mog so'oag yingkiropne wamlam,’ aro seneraglamna,” seog.
Yesus hail mag pelengero engkaogha
28Wene seogti, Marta saombaogti, ilipsa'el Maria enel pina yubu aoag kurukto ambarelamogti, “Nuni nimi amolamsilne poneko tane wamlari, an sembe nanag haibanel,” aro ambarog.
29Wene aro ambarogne Maria kel enekori ka'ebaogti, men phea sekom agha Yesusag piog. 30Yesus anam asag wa'al ingkiamna kom aghana, elna Martaap haiptarekag aneko wamogpa, Maria elag piog. 31Maria ae lomag wamoghag aneko Yahudi nimi babe Maria sembe o'ona paibatto aro yingkina aeag wamek. Aeag wamek nimi taneko Maria lambom agha men phea lanaloghogha ibek. Ibekti sembaek nena, “Maria kirik lomag ilipsae teptoba pail wa'iongag aneko engel pil,” sembaekti sin babe nelepto piek. 32Maria kel eneko Yesus wamoghag aneko piogti, el wamogha ibogti, Maria kel eneko Yesus yanag yabu sanukto pulingkiog. Eldi yanag pulingkina yubu lelamogti, “Nai nu Saelbamsilamne, an ane wamsombana, naipsae tebaonge sik uro tebaho kom,” aro wene seog.
33Yesusti kemelamogpa, Maria engelamogpa, Yahudi nimi yaek nimi taneko babe engelameka ipsiogti, Yesus lulpulukto wana pot-porolamog. 34Yesusti yubu lelamogti, “El tala sip wirikil piom?” seog.
Wene seogpa sindina, “Nai nu Saelbamsilamne, ane yamendi kembalulam,” seek.
35Wene seekpa, Yesus hail mag pelengero engelamog. 36Ane sembe Yahudi nimi tanekori lelamekti, “El o'ona nubu sirik senelamlange kembamun,” alamek. 37Aghana Yahudi nimi nenneri yubu lelamekti, “El haing uropne haing kwelekao. Undop pagha tanena, el nenekori nimi eneko, ‘Tebalul kom,’ aro wali nembanep kom te?” alamek.
Yesusti Lazarus kamag nembaogha
38Wene alamekpa, Yesus nen lulpulukto yabiog abeneko pere kirik lomag nimi teptoba pail wa'iekag aneko piog. Nimi teptoba selenga lomag pail wa'ina ina siramag kirik nubungeri marukamekag aneko Yesus piog. 39Yesus piogti, yubu lelamogti, “Ina siramag maruktop kirik ane toro kolbitlulom,” seog.
Wene seogpa, mali taogne poneko eldo'el Marta kel enekori, “Nai nu Saelbamsilamne, wene selam aghana, el wirikilaonga ik tom sum wamaptina, wene teptoba poloro song tao,” seog.
40Wene seogpa, Yesusti Marta kel enekoag yubu lelamogti, “Nari anag yubu ambatkenongena, ‘Nanag sikne aro wana palilamnemen tanena, Allah paliag uropne kiptoba iplulam,’ seno kom te?” aro Yesusti wene seog.
41Wene seog ane sembe, kirik ina siramag maruktop kirik aneko toro ko'obirek. Toro ko'obirekpa, Yesusti imag tiwalengkia yubu lelamogti, “Nari yubu ka'ebanelamne sembe, ‘Naba Naniong walinge,’ aro kiplangken. 42Na el wamnangena, nari mololangkenne sop-sop ka'elamnelam aghana, sin tane longoro sekang nimi el taheng. Andi na sik uro pognelumne sembe el taikti, sik senelamukang aro lemna,” aro Allahag yubu lebog.
43Wene aro lebogti, Yesusti yubu mikip uro yubu lelamogti, “Lazarus lamba yae,” aro yobog.
44Wene aro yobogpa, tebaog nimi eneko whingag marukaek ag maruktoba wamogpa, yan saeag, usoghag kelepsirop ag agha keleptoba lamba yaog. Keleptoba lamba yaogpa, Yesusti nimi wamek nimi maikno tanekoag yubu lelamogti, “Yan sae, whingag keleptoba tane lobarekitmunba, wali lamba pilul,” seog.
Nimiri, “Yesus obukap,” aro saekag lebeka
(Matius 26:1-5; Markus 14:1-2; Lukas 22:1-2)
45Yahudi nimi Maria sembe o'ona paibatto aro yaek nimi maikno tanekori Yesusti uaogne sembe ibekti, Yesusag sikne aro seneraglamek. 46Aghana sin nimi nhon-nhondi yubu poa lebekti, Yesusti uaogne sembe Farisi nimiag ambarel pihiek. 47Ambarel pihiek yubu ka'ebaekne sembe, Farisi nimiap, memnang Allah sembe palirop nang sikini yaboap tanekori Yahudi nimi sembe yubu tam kareptop nang Mahkamah Agama poloro wimbahiek. Wimbahiekti yubu lelamekti, “Nimi neneri Allah mikibari uanepne kekneba ulamla. Ulamlange nene sembe nuri huroba uanep? 48Eldi undo ulamlange nene nuri liamsebe tanena, nimi niri elag sikne aro wana paiamnep saog wamla. Undop pagha tanena, Roma nimi sale-sale paiamsiang nimi yingkina lebikti, nuri Memag aneko kwerekto pabalamikti, nu Yahudi nimi loba nembahukang,” aro wene seek.
49Wene seekpa, sin wamek nimi nhon sina Kayafas hengkun anekoag memnang Allah sembe palirop nang sikini nubunge wamog. Kayafas ponekori sinag yubu ambarelamsiogti, “A'un ekon uro wamlom. 50A'undi seneraglamlom kom nena, nu Yahudi nimi sisa ni loba tananne nene mali aghana, nimi ni sembe nimi nhon tebale tanena, a'un sembe wali,” aro ambatsiog.
51Kayafasti wene seog nena, eldi wana mori seneraghi agha lebog kom. Aghana hengkun nenekoag el memnang Allah sembe palirop nang sikini nubunge wamogne agha, Yesus Yahudi nimi sembe tebanepne Allahri yubu silimu tipto lebog. 52Yesus tebanepne Yahudi nimi sembe aghabog kom. Aghana Allah elmabo tala-tala nenep tang-tang yabiekne ni nikag wimbahinepne sembe ekonneag agha Allahri yubu silimu tipto Yesus tebanepne sembe yubu lebog. 53“Yesus tebalul,” aro lebog ane sembe, sum eneko sin nubunang tanekori alniro, “Yesus obukap,” aro saekag lebekti, seneragto ulamek. 54“Obukap,” aro ulamekne sembe Yesus Yahudi nimi whingag agha lag uro yabalamog kom aghana, Yudea so'o laplobi agha pai aldesag peramag so'oag piog. Anekoa as soro kalurop as nhon sina Efraim eldi yubu ka'ero neleptop nangap ua ulamek.
55Pina wamekpa, Yahudi nimiri ik nubu sum Paskah seneragto ul palamekne peram taog. Paskah sum anam uro yabin komag as paiag ubu paiamek as nimi maikno, “Allah omeklamukapti, malinge nanag wamlange yagnun,” aro as Yerusalem walelamek. 56Yesus ero wameka Allahri Mem Ae aramag aneko longoro sekamekti, sin mamun yubu lelamekti, “Andi welaro sembalam? Nuri ik nubu sum tero ulamebenge ene Yesus poneko wa'alalul to, kom to,” aro hail dalamek.
57Sindi wene alamek aghana, anamag memnang Allah sembe palirop nang sikini yaboap, Farisi nimiapti arukto ambarelamsiekti, “Yesus wamlea ipmun tanena, ambatsimunba saelbaukap,” aro ambatsiekpa, aneko wamek.
Aktualisht i përzgjedhur:
Yohanes 11: kklKOS
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2023 (Active), Wycliffe Bible Translators, Inc. All rights reserved.