Yohanes 12
12
Kel nhondi Yesusag song wali mag ikto pelaghaogha
(Matius 26:6-13; Markus 14:3-9)
1Wameka aneko, “Ik no'opbare wameberi, Paskah sum seneragto ul palamukap,” aro wamek sum enekoag Yesus as Betania piog. As Betania anekona, Lazarus el teptoba agha kamag nembaogne poneko wamoghag Yesus piog. 2“Yesus nunag yal,” senenne sembe, sindi el toro pibekpa, Martari kwaneng yoro yeplamsiog. Sin Yesusap pulingkina kwaneng nikag telamekne nhon Lazarus babe wamog. 3Yesusap kwaneng nhon telamekpa, Maria kel enekori mag song walinge kelang purunne nhon payaog. Payaog nena, kamna kaptoba alikin sirik uro toropne nongag pelagtop mag song walinge payaogti, Yesusti yan sangag ikto pelagto eldi usog hong agha lubog. Ikto pelaghaogpa, mag song walinge enekori song ae lom eneko song pangkaog.
4Undo uaog aghana, Yesusti yubu ka'ero neleptopne nhon Yudas Iskariotne Yesus pan khebanepne nenekori yubu lelamogti, 5“Song wali mag anena, nimiri hengkun nhon awe welamnaba, kamna elag tatnepne saog uro kamna kapto tomnep mag wamla. Kel eneri nimiag kamna kapto topsori, nimi saeagha orog nimiag tatsinep. Wene ualne sa'a sembe ual?” aro wabaog.
6Eldi wene seog nena, “Nimi saeagha orogne tatsisene,” aro lebog kom aghana, el haogha toropne wamogti, “Topsene,” aro lebog. Eldi haogha tomnep nena, nimiri yepsinne tatsiroba eldi saeag nenelamekpa, paia unne wamog aghana, haogha toro telamog.
7Aghana Yesusti yubu lelamogti, “Kel eneri ualne lipsut. Na tebaneba so'oag siknukangne sembe ual. 8Nimi saeagha orog nimina, a'unap sop-sop ua ulamukang aghana, na sop-sop a'unap wamnun kom,” seog.
“Lazarus obukap” aro yubu saekag lebeka
9Yahudi nimi maiknori ka'elamekpa, “Yesus as Betania wamla,” seeka ka'ebaekti, Betania aneko piek. Piek nena, Yesus aghabog kemel piek kom aghana, eldi nimi teptoba agha kamag nembaogne poneko babe, “Lazarus kembaukap,” aro piek. 10-11Ot Lazarus poneko sembena, Yesusti el kamag nembaogha sembe nimi maiknori Yahudi nimi nubunang lilobi agha Yesusag sikne aro seneraglamek. Ane sembe, memnang Allah sembe palirop nang sikini yabori, “Lazarus babe obukap,” sembaek.
Yesus nimiri kiplamekne toman agha as Yerusalem wa'iogha
(Matius 21:1-11; Markus 11:1-11; Lukas 19:28-40)
12Yahudi nimiri ik nubu sum Paskah ul pinepne sembe nimi maikno as Yerusalem yingkina wamekti ka'elamekpa, “Yesus ‘Yerusalem pinun,’ aro ulamlari, inaag yalamla,” alameka ka'ebaek. 13Ka'ebaekti tol ko ma'alap tobekti, Yesus yalamnep inaag la'iniro sekel ingkina yubu mikip uro kiplamekti,
“Nu Taulba Uhiropne kiplamsut!
Nu Saelba Uhiropneri poglaba, el siag kekhaekto yalamlange poneko
nu Israel nimi sembe yubu sia lenne paliag uropne omeklamsut!”
aro haum aro kiplamek.
14Yesus pham keledai me nhon ibogti, pham alibag waelbaogti pulingkiog. Pham alibag pulingkiogha aneko Allahri Yubu mome toro pairopneag sunsunum uro taog nena,
15“A'un Sion wamlom nimi nari kelme saog wamlom#12:15 Sion wamlom nimi nari kelme saog wamlom - “Sion” aneko as Yerusalem peramag yim nhon si wamla. “Sion” alamek tanena, as Yerusalem sembe lebek sembanep. nimi log sembaheng kom!
A'un sembe yubu sia lenne poneko a'unag yalamlange kembahut!
Pham keledai me nhon alibag pukamlari yalamla,”
aro mome toro pibog.#Zakharia 9:9
16Undo Allah Yubu sunsunum uro yabalamogne sembe Yesusti yubu ka'ero neleplamek nimi tanekori samenag olog seneraghamek kom. Ot Yesus amik tebaogti, kamag tangom agha paliag taog taneogna, sindi babe seneraghek. Amik sum el taek nena, “Ni uro yabalamonge neneko Allahri yubu silimu tiptopneri anamag mome toro pibogpa, amik sum elag undo unuao,” aro amik sum el taek.
17Sum eneko longoro kiplamek nimi nusamag wamek nimina, samenag Yesusti Lazarus kamag nembaog sum elap nhon wamekti ibek. Sin nimi tanekori ora nimi sikne lag nenero ambarelamsiekti, “Lazarus tebaoba, kirik lomag wirikil piong aghana, Yesusti elag, ‘Lambae,’ aro yobonge toman agha kamag nembao. Kamag nembaoba, lambaoa ibobo,” aro ambarelamsiek. 18“Yesusti Allah mikibari uanepne kekneba nene uao,” alameka ka'ebaekne sembe nimi maikno, “El kemel pukap,” aro elag longoro yalamek. 19Ane sembe Farisi nimiri sin mamun yubu lelamekti, “Kembamsut! Wene ulamapneri nundam nimi yebel dalamap kom. Mog so'oag nimi ni elag nelepto nunag agha lanalamang,” aro wene alamek.
Yunani nimi nhon-nhondi, “Yesusap haiptahabe,” aro elameka
20Sin waelbaek nimi, “Ik nubu sum Paskah ulameberi, Allah omeklamukap,” aro wamek nimi nusamag nimina, Yunani nimi etpare babe waelbaek. 21Waelbaekti Filipus ibek. Filipus Galilea so'oag wamogne as Betsaidange ponekoag yingkina mololamekti, “Nai, nu Yesusap haiptahabe senelamap,” aro molbaek.
22Wene aro molbaekpa, Filipusti yubu eneko poa lebogti, Andreas ambarel piog. Ambarogpa sin phenderi yubu eneko poa leptekti, Yesusag ambattek.
23Ambattekpa ka'ebaogti Yesusti sin phendeag ambarelamsiogti, “Wene na mog so'oag nimi tangtopne paliag nembaneika wene uro yabinual. 24Nari yubu sikne agha ambatnuahin. Gandum wana nhon tebanep kom tanena, nhonog wamnep. Aghana gandum wana nhon so'oag togna agha tebale taneogna, pongkaleri maikno yabinep. 25Eldamne kamag wamnepne o'omne senerop nimiri kamag uro unne neneko loba nenelamla. Apna eldamne mog so'o eneag kamag wamnepne o'omne senerop kom nimina, kamag uro unne elag wamlange amik ka'eseptan koma ya'ag uro elag wamlul. 26Nimi etne na sembe, ‘Yeplamnun,’ sembale tanena, nanag neleplamnelul. Apna na wamneag aneko na arukna yepnerop nimi eneko babe wamlul. Na yeplamnele nimi eneko sembe na Naniri el kipto kamna tatlul,” aro ambatsiog.
Yesus el tebanepne sembe ambatsiogha
27Yesusti nen tipto yubu lelamogti, “Wene na wana samsamolamnelba, nari sa'a yubu agha lemnep? Nari Naniag, ‘Nanag uro yabilulne nene angkitlulam,’ aro lenne babe sunsunum kom. Aghana na yahingena, nanag uro yabinep ko'o ene, ‘Uro yabilul,’ aro yahi. 28Nai, andi si nubunge paliag uropne lag nembalulam,” seog.
Wene seogpa, imag agha yubu lelamogti, “Nari si nubunge paliag wamlange lag nembanoba, nen babe lag nembanun,” alamogha ka'ebaek. 29Nimi maikno taneko wamek nimiri yubu wene alamog yubu lilim eneko ka'ebaekti, sindi yubu lelamekti, “Limang yubu agha lepla,” alamek. Aghana nenneri lelamekti, “Limang yubu kom. Allah arukna imagne malaikatti elag yubu lepla,” alamek.
30Sindi wene alamekpa, Yesusti sinag yubu lelamogti, “Yubu lilim ka'ebalomne nene na sembe lepla kom aghana, a'un el talulom aro lepla. 31Wene wamap ko'o enena, mog so'oag nimiri ul piropne sembe tam karebanepne wamla. Mog so'oag nimi saelbamsil phia neneko Allahri wene luknuro yag lambalul. 32Na mog so'o eneag agha alikinag nembaneik tanena, nari nimi niag, ‘Nanag yalulom,’ aro kiliro yoplamsinun,” seog. 33Eldi wene, “Alikinag nembanukang,” seog nena, nimiri el kalag sipto omnaba, tebanepne sembe lebog.
34Wene seogpa, nimi maikno longolamek nimi tanekori elag samoro yubu lelamekti, “Allahri aruksirop yubu lelamlonga ka'eamapne sunsunum uro Kristus ponekona, ‘Ya'ag wamlul,’ alamonga ka'eamap. Undop pagha tanena andi, ‘Mog so'oag nimi tangtopne poneko alikinag nembanepneog wamla,’ selamne neneko sa'ange agha leplam? ‘Mog so'oag nimi tangtopne,’ selamne poneko etne sembe leplam?” aro haibaek.
35Wene aro haibaekpa Yesusti, “Ae tibin aneko a'unag warerop ko'o we koma wamnual. Nimi inibinag yabirop nimi eneko, ‘Tala pinun?’ aro ina erop. Ane sembe ae tibin aneko a'unag wene warelamlange abeneko a'undi, ‘Inibinne nenekori nunag niknibahileag,’ aro yabalamlulom. 36Tibin a'unag wareropne abeneko tibin anekoag sikne aro wana palilamlulom andarina, a'unag tibin wareropne neneri a'un Allah elmabo nembahilul,” aro ambatsiog.
Yesusti wene seogti, el la'imbom agha anekoa piogti, “Sin whingag wamnun kom,” aro tognop taog.
Yahudi nimiri sik senelamek komne
37Yesusti samenag Allah mikibari uanepne kekneba maikno sindi whingag agha ulamog aghana, sindi elag sikne aro seneraglamek kom. 38Sindi sik senelamek komne uro yabinep andarina, Allahri yubu silimu tiptopne Yesayari samenag mome toro pibog yubu sunup tanep. Eldi samenag mome toro pibog yubuna,
“Nai, nu Saelba Uhiropne, nuri ambatsibo yubu sikne aro seneragtop nimi nhon babe wamla te?
Apna nu Saelba Uhiropneri sae mikipne neneko andi nimiag lag nembatsiom kom te?”
aro mome toro samenag pibog.#Yesaya 53:1 39Ane sembe sindi sikne aro seneragnep kom uro wamek. Nen nhon babe Yesayari tam nene sembe mome toro pibog nena,
40“Allahrina, ‘Nanag samoro yahengpa, wali nembahisene,’ seog aghana,
eldi sindi haing ulopsiori, sindi wana kas nenelopsio.
Andarina sindi haingdi imnepne babe,
wanaag seneragnepne babe orogti,
elag samoro yanep kom,”
aro Yesayari mome toro pibog.#Yesaya 6:10 41Wene seog nena, Yesus amik paliag nenero kipnepne Yesayari ibogti, Yesus mog so'o eneag anam mangap tan komag el sembe lebog.
42-43Undop aghana, Yahudi nimi maiknori babe, sin nubunang nhon-nhondi babe Yesusag sikne aro seneraglamek. Ot sin nimi maiknori Allahri paliag nenero kipsinepne semban koma, “Nimiri na paliag nenero kipnukang,” senenne agha o'omne nenelamek. Ane sembe Farisi nimi sembe sin logti, “Allah omekto winirop aeag agha na yag lambaneikag,” aro nimi maikno tanekori Yesusag sik senelamekne lag phoro lelamek kom.
Yesusti ambarelamsiog yubu toman agha tam karebatsilula
44Yesusti nen yubu mikip uro ambarelamsiogti, “Nanag sikne aro seneragtop nimi nanag mo sikne aro seneragtop kom aghana, na pogneogne ponekoag sikne aro seneraglamla. 45Nimi enekori na kemelamnelne toman agha na pogneogne poneko babe ililamla. 46Na mog so'oag yahingena, ‘Tibin warebahinun,’ aro yahi andarina, nanag sikne aro seneragtop nimi ni inibinag wamukang kom.
47Nimi nhondina, nari ambarelamsin yubu ene ka'ebi agha saelban koma wamnep. Na mog so'oag nimiag, ‘Tam karepto pelengkatsinun,’ aro yahi kom aghana, ‘Mog so'oag nimi taulbahinun,’ aro yahi. Ane sembe nari yubu saelban koma wamnep nimi enekoag tam karepto pelengelamsin kom. 48Nari yubu saelban koma wa'epto epnele nimi eneko sembe elag tam karepto pelengkimnepne nhon wamla. Nari lelamna yubu eneri nimi eneko sembe ik komopnag sum tam karebaleri, elag pelengkiplul. 49Nari wanaag senenne agha yubu mo ambatsin kom aghana, na Naniri na pogneogne ponekori arukamneogne agha ambarelamsin. Eldi nanag, ‘Yubu ene agha lepmendi, undop yubu agha ambatsululam,’ aro ambarelamneog. 50Apna na el wamnangena, eldi aruksirop yubu eneko nimi ya'ag uro kamag nenehinne wamla. Ane sembe nari lelamna yubu eneko ot Naniri nanag ambareamneo yubu sunsunum uro lelamna,” aro Yesusti ambatsiog.
Aktualisht i përzgjedhur:
Yohanes 12: kklKOS
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2023 (Active), Wycliffe Bible Translators, Inc. All rights reserved.