मात्ति 4
4
दियाबालासङा येसु जाच चोगुना
(मार्कुस १:१२-१३; लुका ४:१-१३)
1न्हाङा दियाबालासङा येसुगा जाच चोगुनिभोङ् पाबित्तारा आत्माङा येसु इसा चा मेॽनिङ्ना सुन्नेना ठोङ्बे खेतु॥#हिब्रु २:१८; ४:१५ 2न्नाबे येसु नाखेङ् लेन सोम्मा लेॽनिसेॽनि उपाबास युङाब्याहोङ् तुक्नुङ् साक्ङास्या॥ 3ङ्खिङ्बेला दियाबालास तायाहोङ् खाॽला लु, “जेप्पा न्दा निङ्वाफुमागा उच्यागान भोङ् खा लुङ्खाकचि ‘चालेप्पा लेक्सानि’ भोङ् आग्गे पिचि॥”
4येसुङा पोलोवा पि, “धार्मासाप्लाबे खाॽला छेप्तामा, ‘याॽमि चाम्योङ्बाङा से ङ्हिङ्मेन्ना, ङ्खाॽनिङ्गो निङ्वाफुमागा उयाभाङ् लोन्दाहा घाक चेॽयाङा हिङ्मेॽना॥’”#ब्यावास्था ८:३
5न्हाङा दियाबालासङा येसु पाबित्तारा साहार यारुसालेमबेॽना निङ्वाफुमापाङ्गा ओछोमबे येप्मेतुहोङ् खाॽला लु, 6“न्दा जेप्पा निङ्वाफुमागा उच्यागान भोङ् नाभाङ् मो पुक्ता, इजाङ्बाङ्निङ् धार्मासाप्लाबे खाॽला छेप्तामा–
‘निङ्वाफुमाङा न्दा जोगाचोक्मागा उका वालोक्दुतचि पाक्स्वाचि,
न्हाङ् ङ्खाचिङा न्लाङ्चि लुङ्खाकपे न्लुङ्सिॽनिन्निभोङ् उङ्चि मुकमुकपे न्दाम्सिमेकाना॥’”#छेम ९१:११-१२
7येसुङा लु, “धार्मासाप्लाबे खाॽला चा छेप्तामा– ‘न्दा ङ्गा हाङ्बा निङ्वाफुमागा जाच न्जोगुन॥’”#ब्यावास्था ६:१६
8फेरि दियाबालासङा येसु एको चान्चान्ना चोम्कोङ्बे खेतुहोङ् ताम्दाङ्फुमाबेॽहा घाक राज्या नुङ् न्नाबेॽहा माम्माहा, उचुन्हा-उचुन्हा चेॽया सोॽमेसाङ् लु, 9“न्दा फोप फोप्ताघोङ् का सेमेताङ्गा भोङ्, खा घाक थोक न्दा पिमेॽनेन्हा॥”
10येसुङा लु, “साइतान, न्दा आयुम्भाङ् खेब्या, इजाङ्बाङ्निङ् धार्मासाप्लाबे खाॽला छेप्तामा– ‘न्दा ङ्गा हाङ्बा निङ्वाफुमा से सेमेतु, न्हाङ् उका से सेवा चोगु॥’”#ब्यावास्था ६:१३
11न्हाङा दियाबालासङा येसु नाओहोङ् ख्या, न्हाङ् वालोक्दुतचि न्दायाहोङ् येसुगा सेवा न्जोगु॥
येसुङा गालिलबे काम तारोक्तुहा
(मार्कुस १:१४-१५; लुका ४:१४-१५)
12युहान्ना छेक्पाङ्बे न्छेक्तुक्सुना बाङ्ना चेॽया येसुङा खेप्सुहोङ् उङ् गालिल लिङ्खाम पोटि लासा॥#मात्ति १४:३; मार्कुस ६:१७; लुका ३:१९-२० 13येसु ओन्दाङ् गालिल लिङ्खामगा नासारात साहारबे ख्या, न्हाङ् न्ना साहार नाओहोङ् काफार्नाहुम साहारबे वासे ख्या॥ काफार्नाहुम साहार च्हेन गालिल तालगा उयुम्बे जाबुलुन नुङ् नाप्तालिचिगा लिङ्खामबे आमे॥#युहान्ना २:१२ 14खाॽला निङ्वाफुमाभाङ् चेक्खुबा यासाइयाङा चेक्तुहा खा चेॽया खाॽला पुरा लेक्सा–
15“खेप्सानुम, यार्दान होङ्मागा योप्पारिक गालिल तालगा उयुम्बेॽहा नाप्तालि नुङ् जाबुलुनबेॽहा याॽमिचि,
गालिल लिङ्खामबे वाखुबा हेकोहा जातिगा याॽमिचि!
16कुइम्नाबे वाखुबाचिङा माडा जोति न्निसुक्सु॥
कालगा उयाबे तासिचिहा याॽमिगा उलुम्बे,
एको माडा जोति चाम्काचोगामाना॥”#यासाइया ९:१-२
17ङ्खिङ्बेला नाहाङ्तोमाङ् येसुङा पार्चार चोक्मा तारोक्तु॥ उङा खाॽला लुचि, “पास्चाताप चोगानि, इजाङ्बाङ्निङ् निङ्वाफुमागा राज्या तायाब्यामाना॥”#मात्ति ३:२
येसुङा नासा लाप्खुबाचि चेला लेङ्से काचिहा
(मार्कुस १:१६-२०; लुका ५:१-११)
18इलेन येसु गालिल तालगा#४:१८ ना गालिलगा सामुन्दारा चा लुमेॽना॥ उलाप्पे लाम्मास्यानिङ् उङा हिप्पाङ् नासा लाप्खुबाचि जाल लेप्मास्याचिहा निसुचि॥ ङ्खाचि पात्तुरुस बाङ्ना सिमोन नुङ् उका उनुन्छा आन्दिरियास सायाचि॥ 19येसुङा ङ्खाचि लुचि, “कानुङ् लामाचि, का न्जिङ्दा नासा लाम्दारामेचुचिघा लोॽवा याॽमिचि काबे इमिन ताॽमाहाचि ङ्खा चिम्मेॽनेन्चिन्हा॥” 20खा चेॽया खेप्साचुहोङ् सोलोक ङ्खाचिङा उङ्चि जाल नाॽयाचुचिहोङ् येसुगा हेक्साङ् लाचोगाचि॥
21न्हाङा मियोरोक उङा जाब्दियागा हिप्पाङ् उच्या बाबुचि याकुब नुङ् उका उनुन्छा#४:२१ याकुबका उनुन्छा॥ युहान्ना तुप्सुचि॥ ङ्खाचिङा उङ्चि पा जाब्दियानुङ् डुङ्गाबे युङाचिहोङ् जाल थुॽमास्याचि॥ येसुङा ङ्खाचि चा काचि॥ 22न्हाङा ङ्खिङ्बेलामाङ् उङ्चिगा डुङ्गा नुङ् उङ्चि पा नाॽयाचुचिहोङ् येसुगा हेक्साङ् लाचोगाचि॥
गालिलबे येसुङा चोगुहा काम
(लुका ६:१७-१९)
23येसुङा याहुदि छुम्पाङ्चिबे ख्याहोङ् याॽमिचि चिन्साङ्, निङ्वाफुमागा राज्यागा उतुम्बे नुसाला खेम्मेतुचि॥ ङ्खिङ्बेला घाक खाले तुखाबाङ्चि नुमेसाङ् गालिल लिङ्खाम भोरि कोता॥#मात्ति ९:३५; मार्कुस १:३९ 24ङ्खोङ्माङ् येसुगा उनिङ् गालिलगा उयुम्बेॽना सिरिया खाम्युक भोरि हिसा, न्हाङ् याॽमिचिङा तुखाबाङ्चि, प्याक खाले रोग नुङ् बेथाङा तुखि न्जायाहा, इसिॽहा मुइङा याक्सुचिहा, खिरिरिबाङा याक्सुचिहा, उङ्चि लाङ्मुक मेन्दाखुबाचि येसु वायानाबे न्दाचि॥ न्हाङा येसुङा ङ्खा घाक तुखाबाङ्चि नुमेतुचि॥ 25न्हाङ् गालिल लिङ्खाम, डेकापोलिस लिङ्खाम, यारुसालेम साहार, याहुदिया लिङ्खाम नुङ् यार्दान होङ्मागा योप्पारिक्हा लिङ्खामचिभाङ् न्दायाहा प्याक याॽमिचि उका हेक्साङ् लान्जोगा॥
Aktualisht i përzgjedhur:
मात्ति 4: YAKH
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2023, Wycliffe Bible Translators, Inc. and Nepal Bible Society