ମାଥିଉ 18
18
ସ୍ବ୍କାର୍ ସେବାକ୍ର୍ତା ଲକ୍ ସ୍ବ୍କାର୍ ତ୍ଇହ୍ଣି ବ୍ଡ୍
(ମାର୍କ ୯:୩୩-୩୭; ଲୁକ ୯:୪୬-୪୮)
1ସେଡେବ୍ଳ୍ ଚେଲାମ୍ନ୍ ଯୀଶୁର୍ ଲ୍ଗେ ଆସି ହ୍ଚାର୍ଲାଇ, “ତ୍ବେ ସ୍ର୍ଗ୍ ରାଇଜେ କେ ବେସିବ୍ଡ୍?” 2ସେତାକ୍ ଯୀଶୁ ଗଟେକ୍ ସାନ୍ ହିଲାକେ ଲ୍ଗେ କୁଦି ସେମ୍ନ୍କାର୍ ମ୍ଜାଇ ଟିଆ କ୍ଲା ଆର୍ ତାକେ ହ୍ଟଳିକ୍ରି ସେମ୍ନ୍କେ କଇଲା, 3“ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ତୁମିମ୍ନ୍ ମ୍ନ୍ ବାଦ୍ଲାଇ ସାନ୍ ହିଲାହର୍ ନଇଲେକ୍ କ୍ନ୍କ୍ରି ହେଁ ସ୍ର୍ଗ୍ ରାଇଜେ ହୁରୁ ନ୍ହାରାସ୍।
4ତ୍ବେ ଯେ କେ ଇ ସାନ୍ ହିଲା ହ୍ର୍ ନିଜ୍କେ ଦ୍ର୍ମ୍ କ୍ରେଦ୍, ସେ ସ୍ର୍ଗ୍ ରାଇଜେ ବେସିବ୍ଡ୍। 5ଆର୍ ଯେ କେ ମର୍ ନାଉଁଏ ଅନ୍କ୍ରି ଗଟେକ୍ ସାନ୍ ହିଲାକେ ନିଜାର୍ କ୍ରେଦ୍, ସେ ମକେ ନିଜାର୍ କ୍ରେଦ୍।”
ବିଶ୍ବାସ୍ କ୍ର୍ତା ଲକାର୍ ବାଦା କ୍ର୍ତା ଲକାର୍ ଡ୍ଣ୍ତ୍
(ମାର୍କ ୯:୪୨-୪୮; ଲୁକ ୧୭:୧,୨)
6“ମ୍ତର୍ ଯେ କେ ମର୍ତ୍ଇ ବିଶ୍ବାସ୍ କ୍ର୍ତିରିଲାଇ ସାନ୍ ଲକ୍ମ୍ନ୍କାର୍ ବିତ୍ରେହ୍ଣି ଏକ୍ଲାର୍ ବିଶ୍ବାସ୍କେ ବାଦା ଦ୍ଇ ତାର୍ ବିଶ୍ବାସ୍କେ ବାଙ୍ଗେଦ୍, ତାର୍ ଟଟିଏ ବ୍ଡ୍ ଜ୍ତା ଟେଡା ଅଳାଇ କ୍ରି ତାକେ ସ୍ମ୍ଦୁରାର୍ ଡେଙ୍ଗ୍ ହାଣିଏ ବୁଡାଇ ରିଲେକ୍ ତାର୍ ଗିନେ ବ୍ଲ୍ ଅଇଲିହ୍ଣି।
7ଇ ହୁର୍ତିବିର୍ କ୍ତେକ୍ ଲକ୍ମ୍ନ୍କେ ପାପ୍କାମ୍ କ୍ରୁକେ ଉସ୍କାଉତି, ହାୟ୍ ସେ ଅବିଶାପ୍ ହାଇଲା ଲକ୍। ବାଦା ତ ଜ୍ନ୍କ୍ଲେକ୍ ହେ ଗଟେଦ୍, ମ୍ତର୍ ହାୟ୍, ଜୁଇଲକାର୍ ଗିନେ ବାଦା ଗ୍ଟେଦ୍, ସେ ଅବିଶାପ୍ ହାଇଲା ଲକ୍। 8ତୁମାର୍ ଆତ୍ ଆର୍ ହାଦ୍ ଯଦି ତୁମୁକେ ପାପ୍ କ୍ରାମ୍ଲି ବ୍ଲେକ୍, ସେତାକ୍ ସେରି କାଟି ହ୍କାଇ ଦିଆସ୍। ଜଳେକ୍ ଆତ୍ ଆର୍ ଜଳେକ୍ ହାଦ୍ ର୍ଇକ୍ରି ନ୍ଲିବ୍ତା ଜୟେ ହଡ୍ତା ଲ୍ଗେ ହ୍ଣି, ଟୁଟା କି ମେଟା ଅଇ ନ୍ସେର୍ତା ଜୀବନେ ହୁର୍ତାର୍ ତୁମାର୍ ଗିନେ ବ୍ଲ୍।
9ଆର୍, ତୁମାର୍ ଆକି ଯଦି ତୁମୁକେ ପାପ୍ କ୍ରାଇଦ୍, ତ୍ବେ ତାକେ ବେଟି ହିଙ୍ଗି ଦିଆସ୍। ଜଳେକ୍ ଆକି ରେଇକ୍ରି ନ୍ର୍କାର୍ ନ୍ଲିବ୍ତା ଜୟେ ହଡ୍ତା ଲ୍ଗେ ହ୍ଣି, ଗଟେକ୍ ଆକି ରେଇ ଜୀବନେ ହୁର୍ତାର୍ ତୁମାର୍ ଗିନେ ବ୍ଲ୍।”
ଆଜ୍ଲା ମେଣ୍ଢାର୍ ଦ୍କାଇକ୍ରି କ୍ଉତା କ୍ତା
(ଲୁକ ୧୫:୩-୭)
10“ସାବ୍ଦାନ୍, ଇ ସାନ୍ ଲକାର୍ ତ୍ଇହ୍ଣି ଏକ୍ଲାକେ ଇନସ୍ତା କ୍ରାନାଇ, କାଇତାକ୍ ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ସ୍ର୍ଗେ ସେମ୍ନ୍କାର୍ ଦୂତ୍ମ୍ନ୍ ସ୍ବୁବ୍ଳ୍ ମର୍ ସ୍ର୍ଗାର୍ ଉବାର୍ ଲ୍ଗେ ରେତି। 11କାଇତାକ୍ ଜୁଇରି ଆଜି ଆଚେ, ସେରି କଜି ଉଦାର୍ କ୍ର୍ତାର୍ ଗିନେ ମୁଇ ମାନାଇ ହିଲା ଆସିଆଚି।
12ତୁମିମ୍ନ୍ କାଇରି ବାବାସ୍? କୁଇ ଲକାର୍ ଯଦି ଶଏଗଟ୍ ମେଣ୍ଢା ରେତି, ଆର୍ ସେମ୍ନ୍କାର୍ ତ୍ଇହ୍ଣି ଗଟେକ୍ ଆଜେଦ୍, ତ୍ବେ କାଇରି ସେ ଲକ୍ ନବେ ନଅ ଗଟ୍ ମେଣ୍ଢାକେ ହ୍ଦାଇ ଚାଡିକ୍ରି ସେ ଗଟେକ୍ ମେଣ୍ଢାକେ କଜି ନ୍କେର୍ତି? 13ଆରେକ୍ ଯଦି ସେ ମେଣ୍ଢାକେ ମିଳାଇଦ୍, ସେରି ଅଇଲେକ୍ ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ଜୁଇ ନବେ ନଅ ଗଟ୍ ମେଣ୍ଢାମ୍ନ୍ ଆଜି ନ୍ରିଲାଇ ତାକାର୍ ତ୍ଇହ୍ଣି ଇ ଗଟେକ୍ ମେଣ୍ଢାର୍ ଗିନେ ସେ ବେସି ସ୍ର୍ଦା କ୍ରେଦ୍। 14ସେନ୍କ୍ରି ଇ ସାନ୍ ଲକାର୍ ତ୍ଇହ୍ଣି ଯେ ଗଟେଲକ୍ ନ୍ଷ୍ଟ ଅଇଦ୍, ଇରି ତୁମାର୍ମ୍ନ୍କାର୍ ସ୍ର୍ଗାର୍ ଉବାର୍ ଇଚା ନଇ।”
ପାପ୍ କ୍ରିରିଲା ବାଇର୍ କ୍ତା
(ଲୁକ ୧୭:୩; ଗାଲା. ୬:୧; ଯାକୁ. ୫:୧୯,୨୦)
15“ଯଦି ତୁମାର୍ ବାଇ ତୁମାର୍ ବିରୁଦେ ପାପ୍ କ୍ରେଦ୍, ତ୍ବେ ତୁମି ତାର୍ ଲ୍ଗେ ଏକ୍ଲା ଯାଇ ତାର୍ ଦସ୍କେ ଦ୍କାଉଆ। ଯଦି ସେ ତୁମାର୍ କ୍ତା ଶୁଣେଦ୍ ଆର୍ ମ୍ନ୍ ବାଦ୍ଲାଇଦେ, ତ୍ବେ ତୁମି ନିଜାର୍ ବାଇକେ ହାଇଲାସ୍। 16ମ୍ତର୍ ଯଦି ସେ ତୁମାର୍ କ୍ତା ନ୍ଶୁଣେଦ୍, ତ୍ବେ ତୁମାର୍ ସ୍ଙ୍ଗ୍ ଆରେକ୍ ଗଟେକ୍ କି ଜଳେକ୍ ଲକ୍କେ ନ୍ଇ ତାର୍ ଲ୍ଗେ ଯାହା, ଜ୍ନ୍କ୍ରି ଜଳେକ୍ କି ତିନ୍ଗଟ୍ ସାକିର୍ ମୁଏ ସ୍ବୁକ୍ତା ସମାଦାନ୍ କ୍ରା ଅଇଦ୍।
17ଇରି ଅଇଲେକ୍ ହେଁ ଯଦି ସେ ସେମ୍ନ୍କାର୍ କ୍ତା ନ୍ମାନେ, ତ୍ବେ ମ୍ଣ୍ତଳିକେ କ୍ଉଆ, ଆର୍ ସେ ମ୍ଣ୍ତଳିର୍ କ୍ତା ହେଁ ନ୍ମାନେ, ତ୍ବେ ତାକେ ଯିହୁଦି ଚାଡି ବିନ୍ଜାତିର୍ ଲକ୍ କି ସିସ୍ତୁ ନେତାଲକ୍ ମ୍ନ୍କାର୍ ହର୍ ତୁମାର୍ ଲ୍ଗେହ୍ଣି ବିନେ କ୍ରା।
18ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ତୁମିମ୍ନ୍ ହୁର୍ତିବି ତ୍ଇ ଯାଇରି ହେଁ ବ୍ନ୍ଦ୍ କ୍ରାସ୍, ସେରି ସ୍ବୁ ସ୍ର୍ଗେ ବ୍ନ୍ଦ୍ ଅଇଦ୍, ଆରେକ୍, ହୁର୍ତିବି ତ୍ଇ ଜୁଇସ୍ବୁ ଉଗାଡାସ୍, ସେରି ସ୍ବୁ ସ୍ର୍ଗେ ଉଗାଡି ଅଇଦ୍। 19ଆର୍ ତରେକ୍, ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ଇ ହୁର୍ତିବିରେ ତୁମାର୍ ବିତ୍ରେ ଦୁଇ ଲକ୍ ଜୁଇ ବିଷୟ୍ ହେଁ ଗଟେକ୍ ମ୍ନ୍ ଅଇ ମାଗ୍ତି, ସେରି ସ୍ବୁ ବିଷୟ୍ ମର୍ ସ୍ର୍ଗାର୍ ଉବା ସେମ୍ନ୍କାର୍ ଗିନେ ଦେଇଦ୍। 20କାଇତାକ୍ ଜୁଇ ଜାଗାଇ ଜଳେକ୍ ଲକ୍ କି ତିନିଲକ୍ ମର୍ ନାଉଁଏ ଗଟେତ୍ଇ ଅଉତି, ସେ ଜାଗାଇ ମୁଇ ସେମ୍ନ୍କାର୍ ବିତ୍ରେ ଆଚି।”
କେମା ନ୍ଦେତା ଚାକରାର୍ ଦ୍କାଇକ୍ରି କ୍ଉତା କ୍ତା
(ଲୁକ ୧୭:୩,୪)
21ସେଡେବ୍ଳ୍ ପିତର୍ ଯୀଶୁ ଲ୍ଗେ ଆସି ହ୍ଚାର୍ଲା, “ଏ ମାପ୍ରୁ, କ୍ତିତର୍ ମର୍ ବାଇ ମର୍ ବିରୁଦେ ପାପ୍ କ୍ଲେକ୍ ହେଁ ମୁଇ ତାକେ କେମା କ୍ରିନ୍ଦ୍? କାଇରି ସାତ୍ ତର୍ ହ୍ତେକ୍?” 22ଯୀଶୁ ତାକେ କଇଲା, “ମୁଇ ତୁମୁକେ ସାତ୍ ତର୍ ହ୍ତେକ୍ ହ୍କା କ୍ଇ ନ୍କେରି, ମ୍ତର୍ ସତୁରି ଗୁଣ୍ ସାତ୍ ତର୍ ହ୍ତେକ୍ ତୁମି ତାକେ କେମା କ୍ରା।
23କାଇତାକ୍ ସ୍ରଗ୍ ରାଇଜ୍, ନିଜାର୍ ଚାକର୍ ମ୍ନ୍କାର୍ ସ୍ଙ୍ଗ୍ ଇସାବ୍ କ୍ରୁକେ ଇଚା କ୍ର୍ତା ଗଟେକ୍ ର୍ଜାର୍ ହର୍। 24ଯେଡେବ୍ଳ୍ ସେ ଇସାବ୍ ଆରମ୍ କ୍ଲା, ଗଟେକ୍ ତିନି କଟି ଟ୍କାର୍ ରୁଣ୍ କ୍ରିରିଲା ଚାକର୍କେ ତାର୍ ଲ୍ଗେ ଆଣା ଅଇଲି। 25ମ୍ତର୍ ରୁଣ୍ ସୁଜୁକେ ତାର୍ ଲ୍ଗେ କାଇରି ହେଁ ନ୍ରିଲି ଗିନେ, ତାର୍ ମାପ୍ରୁ ତାକେ ଆର୍ ତାର୍ ମାଇଜି ଆର୍ ହିଲା ହୁଲିକେ ଆର୍ ତାର୍ ସ୍ବୁ ପର୍କାର୍ ଜିନିଷ୍କେ ବିକିକ୍ରି ସେରି ସୁଜୁକେ ଆଦେଶ୍ ଦିଲା।
26ସେତାକ୍ ସେ ଦାସ୍ ତାକେ ହାଦ୍ତ୍ଳେ ଅଦ୍ରି ଜୁଆର୍ କ୍ରି ଗ୍ଉଆରୁକେ ଲାଗ୍ଲା, ‘ତୁଇ ମର୍ ବିଷୟେ ଅଳକ୍ ସାସ୍ଦ୍ରି, ମୁଇ ତର୍ ସ୍ବୁ ରୁଣ୍ ସୁଜି ଦେଇନ୍ଦ୍।’ 27ସେତାର୍ଗିନେ ସେ ଚାକରାର୍ ମାପ୍ରୁ ଦୟାକ୍ରି ତାକେ ଚାଡିଦିଲା ଆର୍ ତାର୍ ରୁଣ୍ କେମା କ୍ଲା।
28ମ୍ତର୍ ସେ ଦାସ୍ ବାରିଜାଇ ତାର୍ ତ୍ଇହ୍ଣି ଶହେ ଗଟ୍ ରୁହାଟ୍କା ରୁଣ୍ ନେଇରିଲା ଏକ୍ଲା ତାର୍ ସ୍ଙ୍ଗାର୍ ଚାକର୍କେ ଦ୍କି, ତାକେ ଦ୍ରି ତାର୍ ଟଟି ହିଚି କ୍ମ୍କେ ଲାଗ୍ଲା, ‘ତୁଇ ଜାଇରି ଉଦାର୍ ନିଲିସ୍ ଆଚିସି, ସେରି ସୁଜିଦେ।’ 29ସେତାକ୍ ତାର୍ ସ୍ଙ୍ଗାର୍ ଚାକର୍ ତାର୍ ହାଦ୍ତ୍ଳେ ଅଦ୍ରି ଗ୍ଉଆରିକ୍ରି କ୍ମ୍କେ ଲାଗ୍ଲା, ‘ତୁଇ ମର୍ ବିଷୟେ ଅଳକ୍ ସାସ୍ଦ୍ରି, ମୁଇ ତର୍ ରୁଣ୍ ସ୍ବୁ ସୁଜି ଦେଇନ୍ଦ୍।’
30ମ୍ତର୍ ସେ ରାଜି ନ୍ଅଇଲା, ଆର୍ ଜାଇ ରୁଣ୍ ନ୍ସୁଜ୍ତା ହ୍ତେକ୍ ତାକେ ଜେଲ୍ ଗ୍ରେ ହୁରାଇଦିଲା। 31ସେତାକ୍ ତାର୍ ସ୍ଙ୍ଗାର୍ ଚାକର୍ମ୍ନ୍ ଇରି ଗଟ୍ଣା ଦ୍କି ଅଦିକ୍ ଦୁକ୍ ଅଇଲାଇ, ଆର୍ ସେମ୍ନ୍ ଜାଇ ସେମ୍ନ୍କାର୍ ମାପ୍ରୁକେ ଇ ସ୍ବୁ ଗ୍ଟ୍ଲାର୍ ଗଟ୍ଣା ଜାଣାଇ ଦିଲାଇ।
32ସେଡେବ୍ଳ୍ ତାର୍ ମାପ୍ରୁ ତାକେ ଲ୍ଗେ କୁଦାଇକ୍ରି କଇଲା, ‘ରେ ମୁର୍କ ଚାକର୍, ତୁଇମକେ ଗ୍ଉଆର୍ଲାକ୍, ମୁଇ ତର୍ ସେ ସ୍ବୁ ରୁଣ୍କେ କେମା କ୍ଲେ। 33ମୁଇ ଜ୍ନ୍କ୍ରି ତକେ ଦୟା କ୍ଲେ, ସେନ୍କ୍ରି ତର୍ ସ୍ଙ୍ଗାର୍ ଚାକରାର୍ ରୁଣ୍ କେମା କ୍ରୁକେ ତର୍ କାଇରି କାମ୍ ନ୍ରିଲି?’
34ଆରେକ୍, ତାର୍ ମାପ୍ରୁ ରିସାଅଇ ସ୍ବୁ ରୁଣ୍ ପରିଷଦ୍ ନ୍କେର୍ତା ହ୍ତେକ୍ ତାକେ କ୍ଷ୍ଟ ଦେତା ଲକ୍ମ୍ନ୍କାର୍ ଆତେ ସ୍ହ୍ରିଦିଲା। 35ତୁମି ସ୍ବୁ ଲକ୍ ଯଦି ମ୍ନ୍ ବିତ୍ରେ ନିଜାର୍ ନିଜାର୍ ବାଇର୍ କ୍ରାପ୍ କାମ୍ କେମା ନ୍କେରାସ୍, ସେରି ଅଇଲେକ୍ ମର୍ ସ୍ର୍ଗାର୍ ଉବା ହେଁ ତୁମାର୍ ସ୍ଙ୍ଗ୍ ସେନ୍କାର୍ କ୍ରେଦ୍।”
Aktualisht i përzgjedhur:
ମାଥିଉ 18: BDVNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.