اِنجیلِ مَتّی 9
9
عیسی ایتا چُلاقِ شَفا دَنه
1عیسی لوتکا رِه سَوار هَبا و دَریایِ جی رَد هَبا و به خودشه شَهر بوماَ. 2اوجِه چَن نَفَر ایتا چُلاقِ مَردَای که لایِ دِلِه دِراز بَکِشییِه با رِه اونه وَرجه بیاردِن. وَختی عیسی اوشانه ایمانِ بَدییَه، اون چُلاق رِه باَگوته: «می ریکا، تی دِل قرص هَبو؛ تی گُناهان آمرزیده هَبا!» 3دَرجا، چَن نَفَر از توراتِ مُعَلِمین خودِشانِه هَمرَه باگوتَن: «این مَردَای کُفر گونه.» 4عیسی که دانِسِّه اوشانه فِکرِ میَن چی گُذَرنِه باَگوته: «چرا اینجور پلید فکر شیمی دِلِ میَن راه دَنید؟ 5کُدام یکی یه باگوتَن آسان تَره: اینکِه ”تی گُناهان آمرزیده هَبا،“ یا اینکِه ”وَرِس و راه بوشو؟“ 6ولی تا بِدانید انسانِ ریکا این قُدرَتِ دارِه زَمین سَرِ گُناهان رِه بیامرزه.» ایما اون چُلاق رِه باَگوته: «وَرِس، تیِ لا رِه جَمع هَکُن و تی سِرِه بوشو.»
7اون مَردَای ورِسَه و خودشه سِرِه بَشَه. 8مَردُم وَختی این مُعجِزِه رِه بَدییَن، بَتِرسیَن و خُدا رِه شُکر هَکُردَن که اینجور قُدرتی آدَم رِه هَدَه.
عیسی مَتّی رِه دَعوَت کانه
9وقتی عیسی اوجِه یه جی شونه با، ایتا مَردَای که اونه اسم مَتّی با رِه بَدییَه که خَراجگیر دَکِّه یه دِلِه نیشته با. عیسی اونه باَگوته: «می دُمّال بیِه!» مَتّی ورِسَه و اونه دُمّالسَر بَشَه.
10روزی عیسی مَتّی یه سِرِه یه دِلِه سُفرِه یه سَر نیشته با که خِیلی از خَراجگیران و گُناهکاران بومَن و عیسی و اونه شاگِردانِ هَمرَه ایتا سفره سَر بَنیشتَن. 11وَختی عُلَمایِ فِرقِه فَریسی اینه بَدییَن، عیسی یِه شاگِردانِ باگوتَن: «چِرا شیمی اُسّا خَراجگیران و گُناهکارانِ هَمرَه غَذا خارنِه؟» 12عیسی اوشانه گَبِ بِشنَوِسِّه و باَگوته: «مَریضانَن که طَبیب احتیاج دارَن، نه سالِمِ آدمِشان. 13بیشین و خُدایِ این کلامِ مَعنی رِه بِفَهمین ”مَن رَحمت خَنم نه قُربانی.“ چون مَن نومَم تا صالِحانِ دعوت هَکُنَم، بلکه بومَم تا گُناهکاران رِه دَعوَت هَکُنَم.»
یحییِ یه شاگِردانِ سوال
14یحییِ یه شاگِردان عیسی یه ورجه بومَن و باگوتَن: «چِرا اَما و عُلَمایِ فَریسی روزِه گیرنیم وَلی تی شاگِردان روزِه نَگیرنَن؟» 15عیسی اوشانه باَگوته: «مَگِه بونه زامایِ رَفیقان اون موقه که زاما اوشانه هَمرَه دَرِه ماتَم هَگیرَن؟ ولی زمانی رَسِنِه که زاما اوشانه جی هَگیته بونه؛ اون موقه روزِه گیرنن. 16«هیچ کَس نُو چِلوارِ کآنِه لِواسِ کَشِ پینیک نَزِنِه، اگه اینجور هَکونِه پینیک لِواسِ جی سیفا بونِه، نو چِلوار کآنِه لِواسِ جی سیفا بونه و اونه پارگی قَبلاً جی بَدتَر بونه. 17تازِه شَراب رِه هَم کآنِه پوسّی خیکِ دِلِه نَریزِنَن، اَگه بَریزِن پوسّی خیکیشان تَرکِنَن و شراب دِرگا ریزِنِه و پوسّی خیکیشان از بِین شونِن. تازِه شَراب رِه نُو پوسّی خیکِ دِلِه ریزِنِن تا هَم شراب و هَم پوسّی خیکیشان سالِم بُمانَن.»
ایتا کیجایِ زندهِ هَکُردَن و ایتا زِنا رِه شَفا هَدَن
18عیسی هَلَه دَبا گَب بَزنه که ایتا از یَهودیِانِ رَئیس اونه وَرجه بوما و زانو بَزَه و باَگوته: «می کیجا هَمین اَلآن بَمِردِه. وَلی دانَم اَگه تو بییَیی و اونه سَر دَست بَنی اون زندهِ بونه.» 19عیسی ورِسَه و خودِشِه شاگِردانِ هَمرَه اونه هَمرَه بَشَه. 20همون موقه، ایتا زِنا که دَوازدَه سال خونریزی داشتِه عیسی یه دُمّالسَر بوما و اونه قَوایِ لَمپَرِه دَس بَکِشییَه. 21چون خودشه هَمرَه گونِه با: «اَگه فقط اونه قوایِ لَمپَرِه دَس بَکِشَم، شَفا گیرنَم.» 22عیسی وَگَرِسِّه اون زِنا رِه بِیِشییِه و باَگوته: «می کیجا نَتِرس، تی ایمان تِرِه شَفا هَدَه.» همون دَم اون شَفا بِیته. 23وَختی عیسی اون رَئیسِ سِرِه بَرِسییَه و نوحِه خوانِشان و مَردُمِ شولِ شیوَنِ بَدییَه، 24باَگوته: «دِرگا بیشیِن. این کیجا نَمِردِه بلکه خاتِه.» وَلی اوشان فقط اونه سَر بَخنِسَّن. 25وَختی عیسی مَردُمِ دِرگا هَکُردِه، اُتاقِ دِلِه بَشَه کیجایِ دَسِ بِیته و کیجا وَرِسَه. 26این اِتِّفاقِ خَبِر تمام اون مَنطَقِه یه دِلِه دَپیتِه.
عیسی دُتا کورِ شَفا دَنه
27وَختی عیسی اوجِه جی دَبا بوشو، دُتا کورِ مَردای اونه دُمّال بَشَن و داد زَنه بان: «اِی داوود ریکا، اَمَرِه رَحم هَکُن!» 28وَختی عیسی سِرِه یِه دِلِه بَشَه، اون دو نَفَر اونه ورجه بومَن. عیسی اوشانه باَگوته: «ایمان دارید که مَن تانم این کارِ اَنجام هَدَم؟» اوشان باگوتَن: «آرِه ای آقا!» 29پَس عیسی اوشانه چِشِ دَس بَکِشییَه و باَگوته: «طِبقِ شیمی ایمان شِمِرِه اَنجام هَبو.» 30وَ اوشانه چِشم واز هَبا. عیسی اوشانه هُشدار هَدَه و باَگوته: «مُواظِب هَبین هیچکی این جریان جی خَبَردار نَبو.» 31وَلی هَمین که سِرِه یه جی دِرگا بَشَن، عیسی یِه آوازِه رِه تمام اون مَنطَقِه یِه دِلِه پَخش هَکُردَن.
عیسی لالِ مَردَای رِه شَفا دَنه
32وَختی که اون دو نَفَر دِرگا شونه بان، ایتا آل بَزَه مَردای رِه که لال با، عیسی یِه وَرجه بیاردِن. 33وقتی عیسی آلِ اونه جی دِرگا هَکُردِه اونه زبان واز هَبا. مَردُم این مُعجِزِه یِه جی خِیلی بُهت هَکُردَن، گونه بان: «تا اَلآن هَمچین چیزی هیچ وَخت اسرائیلِ قومِ دِلِه بِدییِه نَبا!»
34وَلی عُلَمایِ فِرقِه فَریسی باگوتَن: «اون آلِ شان رِه آلِشانِ رئیس کمک هَمرَه دِرگا کانه.»
مَحصول زیاد و کارگَر کَمِ
35عیسی تمام شَهر و دِهاتِشانِه دِلِه گَردَنه با و یَهودیِانِ عبادتگاهانِ دِلِه تعلیم دَنه با و خُدایِ پادشاهی یه مُژدِه رِه اِعلام کانِبا و هر نوع ناخُشی و مَرَضِ شَفا دَنه با. 36وَختی اون اینقَدر اِزدِحامِ بَدییِه اونه دِل اوشانه رَه بَسوته، چونکه اوشان بی گالِشِ گوسِند مِثان پَریشان و وابُمانِسِّه بان. 37پَس خودِشِه شاگِردانِ باَگوته: «مَحصول زیادِ و كارگَر کَم. 38پس، صاب مَحصولِ جی بِخوائین خودِشِ مَحصولِ جَم هَکُردَن وَسین کارگَرانی روانه هَکونه.»
Aktualisht i përzgjedhur:
اِنجیلِ مَتّی 9: GMB
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
@ 2024 Korpu Company