ମାତିଉ 2
2
ବୁଦିରେମେ ଆଜିସୁଲା ଜୁଜୁ ଉଇଡେନ୍
1ଏରଦ୍ଲା ରାଜା ଏଗ୍ସେକ୍ ଡୁକୁନୁଂବେଲା ଜିଉଦା ଜିଲାନା ବେତ୍ଲିଇମ୍ ଡ'ସେକ୍ ମୁଇ ମୁନା'ଉଂଗମ୍ବକ୍ ଜିସୁଲା ଜନମ୍ ଡେଂଗା' । ତିର୍ଗି' #2:1 ବୁଦିରେମେ ଡ'ସେକ୍ସା ସୁନ୍ତଅ'ତୁର୍ସିଂକୁରୁଂନା ରେମଲେ ଏନ୍ତୁକ୍ର ଜିରୁସାଲମ୍ବକ୍ ସା'ଗା' । ମା'ଏ ମୁମର୍ତ'ଗେନା ଗୁଲାଇ ପଡ୍କୁନୁଂ ବୁଦିରେମେ । 2ସା' ମା'ଏ ସାକ୍ସେକ୍ “ଜିଉଦିରେମଲେନା ରାଜା ଜନମ୍ ଡେଂକୁନୁଂ ମୁଇ ଗୁଲା ଆମ୍ବ' ଡୁତା? ମାସା'ଡ'ନା ଅ'ତୁର୍ସିଂ କନ୍ଡେକ୍ ମୁଇ ମୁମର୍ତକ୍ ତୁର୍କୁନୁଂ ନେଇ ଜୁଲ'ନେଇ । ଗୁତୁନ୍ ମା ଡ'ନା ମାଇ ଜନମ୍ ଡେଂଗୁତା ଡ'ସେକ୍ ମୁଇ ସିନ । ସା' ଆମାଇ ସୁନ୍ଡ୍ରପୁଲେଇ ନେଇ ସା'ଗୁତୁନେଇ” ଡ'ସେକ୍ ସୁନ' ।
3ଗୁତୁନ୍ ଅଂଅଁ'ସେକ୍ ଏରଦ୍ ରାଜାଲା ମାରି ଜିରୁସାଲମ୍ ମୁନା'ଉଂଗମ୍ବକ୍ ଡୁକୁନୁଂ ଗୁଲାଇ ରେମଲେସା ଅବୁଦି ବୁତୁଂଆର୍ଉଇଗା' । 4ସା' ଏରଦ୍ ରାଜାଲା ଆଜିଉଦିରେମଲେନା ମୁନା'ପୁଜାରିଲେ ମାରି ମସାଲା ବେଡ'କୁନୁଂ ନିୟମ୍ ଅମାକ୍ରେମ୍ବକ୍ ଆଗୁଲାଇର ମାଇନ୍ବକ୍ ୱାୟ'ସେକ୍ କିରିସ୍ଟଲା ଆମ୍ବ' ଜନମ୍ ଡେନ୍ତା ଡ'ସେକ୍ ଅ'ଗଁସ୍ଲା'ଗା' । 5ସା' ମା'ଏ ଆମାଇ ସୁନ' “ଜିଉଦା ଜିଲାନା ବେତ୍ଲିଇମ୍ ଉଂଗମ୍ବକ୍ଉ ଜନମ୍ ଡେନ୍ତା, ମାସା'ଡ'ନା ଇନ୍ତେକନ୍ଡେକ୍ ବାବବାଦିଲେ ମାପ୍ରୁନା ଉଲାକ୍ବକ୍ ଡି'କେନା ଲେକ୍ଲ'ତା: ମା ଡ'ନା, 6#ମିକା 5:2–4 ‘ଅ ବେତ୍ଲିଇମ୍ ଉଂଗମ୍ନା ରେମଲେ, ଜିଉଦା ଦେସ୍ନା ଗୁଲାଇ ମୁନା'ଉଂଗମ୍କୁରୁଂ ପେନ୍ ଉଂଗମ୍ ଡାଉ ଆରାକ୍, ମାସା'ଡ'ନା ଆନିଂନା ଇସ୍ରାଏଲ୍ ରେମଲେ ଆଗୁଲାଇର ବଲ୍ ଜୁଜୁପୁଲେଇ ମୁଇନ୍ଡା ମୁନା'ରେମ୍ ପେନ୍ ଉଂଗମ୍କୁରୁଂ ସାପ୍ତା’ ଡ'ସେକ୍ ଲେକ୍ଲ'ତା” ଡ'ସେକ୍ ସୁନ' ।
7ସା' ଏରଦ୍ ରାଜାଲା ଅ'ତୁର୍ସିଂକୁରୁଂ ସା'କୁନୁଂ ଆତୁନ୍ ବୁଦିରେମେ କଲେ ୱାୟ'ସେକ୍ ଗୁତୁନ୍ ମୁମର୍ତକ୍ ଆ'ଇବେଲା ତୁର୍କୁ ଡ' ଗୁଲାଇ ଅ'ଗଁସ୍ଲାଗ୍ସେକ୍ ମାଗ' । 8ମାଗ'ସେକ୍ ମାଇ ଆମା'ଏ ବେତ୍ଲିଇମ୍ ଉଂଗମ୍ବକ୍ ବେନ୍ଟାୟ'ସେକ୍ ସୁନ', “ପେ ଉଇସେକ୍ ଗୁତୁନ୍ ଗୁଲା ଆମ୍ବ' ଡୁତା ଡ'ସେକ୍ ବଲ୍ ତୁର' ଜୁ । ପେ ଆମାଇ ଜୁଲ'ନା ଆଇ'କୁ ଆନିଂସା ସୁଁ, ମାସା'ଡ'ନା ନିଂସା ଉଇସେକ୍ ଆମାଇ ସୁନ୍ଡ୍ରତିଂ” ଡ'ସେକ୍ ସୁନ' ।
9-10ରାଜାଲା ସୁନ'କୁନୁଂ ଅଂଅଁ'ସେକ୍ ଗୁତୁନୁଂଏଁ ଉନ୍ତ୍କୁରୁଂ ତୁର୍ସେକ୍ ଉଇଡେଂକୁନୁଂବେଲା ମା'ଏ ଅ'ତୁର୍ସିଂକୁରୁଂ ସିଁସେଇଁଉ ଜୁଲ'କୁନୁଂ ଗୁତୁନ୍ ମୁମର୍ତକ୍ ମା'ଏନ୍ ସିଁସେଇଁ ସିଁସେଇଁ ଉଇଡେଂକୁ । ସା' ଆତୁନ୍ ମୁମର୍ତକ୍ ମାରି ଜୁଜୁ ଗଂଗା'ସା' ମା'ଏ ଅବୁଦି ସାର୍ଦା ଡେଂଗା' । ଡୁ'ତୁନ୍ଉ ଗୁତୁନ୍ ମୁମର୍ତକ୍ ଉଇ ଉଇସେକ୍ ଗୁତୁନ୍ ଗୁଲା ଆମ୍ବ' ଜନମ୍ ଡେଂଗା' ଗୁତୁନ୍ ଡିଂଅଁ ବାଗ୍ବକ୍ ତୁନ୍ତପନ୍ତେକ୍ ମା'ଏନ୍ ସିଁସେଇଁ ସିଁସେଇଁ ଉଇକୁ । 11ସା' ମା'ଏ ଗୁତୁନ୍ ଡିଂଅଁ ବିତ୍ରେ ଗାଇଗା'ସା' ଗୁତୁନ୍ ଗୁଲା ମାଇନା ୟଂ ମରିୟମାବୁରଂ ଡୁକୁନୁଂ ଜୁଲ' । ସା' ମା'ଏ ଆତୁନ୍ ଗୁଲା ଏନ୍ଡିକ୍ସେକ୍ ସୁନ୍ଡ୍ରଗା' । ସୁନ୍ଡ୍ରକ୍ସେକ୍ ଆମାଇ ବିବେ'ପୁଲେଇ ରିଂଅଁ'କୁନୁଂ ଗୁତୁନ୍ ସୁନା, ଅବୁଦି ବାସନାବାଇ'ନା କୁନ୍ଦୁରୁ ମାରି ଗନ୍ଦରସସା ଗୁତୁନ୍ ଅବୁଦି ଦାମ୍ବାଇ'ନା ଗୁଲାଇ ବୁଂବୁଂନା ପେଡିକୁରୁଂ ଜୁଗ'ସେକ୍ ଆମାଇ ବେଡ' । 12ଗୁଲାଇ କାମ୍ ଅ'ଡମ'ସେକ୍ ମା'ଏ ଉନ୍ତ୍କୁରୁଂ ଇ'ଡେଂକୁନୁଂବେଲା ଏରଦ୍ ରାଜାନ୍ବକ୍ ଆଗାଇଗା' ଡ'ସେକ୍ ମାପ୍ରୁ ଆମା'ଏ ମୁସୁକ୍ଡିମ୍ବକ୍ସୁଗ ସୁନ'ସା' ମା'ଏ ତିନ୍ଲକ୍ ପାଲ୍କୁରୁଂକୁରୁଂ ନିଜର୍ନା ଦେସ୍ବକ୍ ଉଇଗା' ।
ଜସେପ୍ଲା ମାରି ମରିୟମା ଆଜିସୁଲା ମିସର୍ ଦେସ୍ବକ୍ ରିଂଅଁ' ଉଇଡେନ୍
13ପନ୍ଡିତ୍ଲେ ଉଇଗା'ସା' ତିର୍ଗି', ପ୍ରବୁନା ଦୁତ ଆଜସେପ୍ଲା ମୁସୁକ୍ଡିମ୍ବକ୍ସୁଗ ଅ'ତୁନାକ୍ସେକ୍ ସୁନ' “ନ ମୁରାକ୍ସେକ୍ ଅାତୁନ୍ ଉଁ'ଉଁଗୁ ମାରି ଆମାଇନା ୟଂ ମିସର୍ ଦେସ୍ବକ୍ ରିଂଅଁ' ଉୟା । ନିଂ ଆନ ସୁଁସୁପନ୍ତେକ୍ ଆତାଉ ଡୁକୁଲା । ମାସା'ଡ'ନା ଏରଦ୍ଲା ଆତୁନ୍ ଉଁ'ଉଁଗୁ ତୁର'ସେକ୍ ଅଗୁଇ'ପୁଲେଇ ଏତ୍ଗୁତା” ଡ'ସେକ୍ ସୁନ' । 14ସା' ମାଇ ତଗ୍ଡାକ୍ସେକ୍ ଉନ୍ତ୍ ତୁମୁଂଗ ଆତୁନ୍ ଉଁ'ଉଁଗୁ ମାରି ଆୟଂଡେଇଁ ମିସର୍ ଦେସ୍ବକ୍ ରିଂଅଁ' ଉଇଗା' । 15ରିଂଅଁ' ଉଇସେକ୍ ଏରଦ୍ଲା ଗୁଗୁଇ'ପନ୍ତେକ୍ ମା'ଏ ଆତାଉ ଡୁକୁ । ସା' “ମିସର୍ ଦେସ୍କୁରୁଂ ଆନିଂନା ଉଁ'ଉଁ ନିଂ ୱାୟ'ରିଂଅଁ'ନିଂ” ଡ'ସେକ୍ ପ୍ରବୁ ଆବାବବାଦିଲା ଇନ୍ତେକନ୍ଡେକ୍ ସୁନ'କୁନୁଂ ଆ'ନା ସତ୍ ଡେଂଗା' ।
ଏରଦ୍ ରାଜାଲା ଡାଉଡାଉ ଇଂଗେର୍ ଗୁବୁଲେବକ୍ ଅଗୁଇ'ଡେନ୍
16ବୁଦିରେମେ ଆନିଂ ନାଡାୟ' ଡୁଂଗା' ଡ'ସେକ୍ ଏରଦ୍ଲା ମାଗ'ସେକ୍ ଅବୁଦି ଗିସେ'ଗା' । ସା' ପେ ଇନ୍ଡ'ୟା ଆମୁମର୍ତକ୍ ଜୁଲ'କୁପେ ଡ'ସେକ୍ ଆବୁଦିରେମେ ମାଇ ସିଁସେଇଁଉ ଅ'ଗଁସ୍ଲାକ୍ସେକ୍ ମାଗ'କୁ । ସା' ଗୁତୁନ୍ ବେଲା ଜୁଲ'ସେକ୍ ଦୁଇବରସ୍କୁରୁଂ ଆଲୁଂ ଡୁକୁନୁଂ ଇଂଗେ'ର୍ଗୁବୁଲେବକ୍ ଆଗୁଲାଇ ଗୁବୁଲେ ଅଗୁଇ'ପୁଲେଇ ମାଇ ବେତ୍ଲିଇମ୍ ଉଂଗମ୍ବକ୍ ମାରି ଉନ୍ତୁ'ତ'ନାଂ ଡୁକୁନୁଂ ଉଂଗମ୍ବକ୍ସା ଆରେମଲେ ବେନ୍ଟାୟ' । 17ସା' ମା'ଏ ଉଇସେକ୍ ଆଗୁଲାଇ ଇଂଗେର୍ ଗୁବୁଲେ ଅଗୁୟ'ସା' ଇନ୍ତେକନ୍ଡେକ୍ ବାବବାଦି ଜିରିମିୟଲା ସୁନ'କୁନୁଂ ମାପ୍ରୁନା ତୁମ' ଉନ୍ତା ସତ୍ ଡେଂଗା' ।
18ମାଇ ମା ଡ' ସୁନ'କୁ ଡ'ନା:
“ରାମା ଡ'ସେକ୍ ମୁଇ ଉଂଗମ୍ବକ୍ ଅବୁଦି ଉକ୍ସେ'ୱାଇସେ'କୁନୁଂ ଅଂଅଁ'
ମାସା'ଡ'ନା ରାଏଲ୍ଲା ଆଉଁ'ଉଁନ୍ଡେଇଁଏଁ ଏତ୍ସେ'ଗା ଅବୁଦି ଉକ୍ସେ'କୁ ।
ମାରି ମାଇନା ଉଁ'ଉଁନେ ଗୁଇ'ଗା'ସା'
ଆମାଇ ଆ'ଇ ସୁତ୍ରାୟ'ନାସା ମାଇ ଆସୁତର୍ତା ଡେଂକୁ” ଡ'ସେକ୍ ସୁନ'କୁ ।
ଜସେପ୍ଲେ ମିସର୍ ଦେସ୍କୁରୁଂ ନାଜରିତ୍ ଉଂଗମ୍ବକ୍ ଆନ୍ଡେଇଁଡେନ୍
19ଏରଦ୍ଲା ଗୁଇ'ଗା'ସା' ତିର୍ଗି' ପ୍ରବୁନା ଦୁତ ମିସର୍ ଦେସ୍ବକ୍ ଆଜସେପ୍ଲା ମୁସୁକ୍ଡିମ୍ବକ୍ସୁଗ ମାରି ଅ'ତୁନାକ୍ସେକ୍ ସୁନ', 20“ନ ଇଂକେକୁରଂ ତୁର୍ସେକ୍ ଆତୁନ୍ ଉଁ'ଉଁଗୁ ମାରି ଆୟଂଡେଇଁ ଇସ୍ରାଏଲ୍ ଦେସ୍ବକ୍ ରିଂଅଁ' ଉୟା । ମାସା'ଡ'ନା ଜାଜା ଆମାଇ ଅଗୁଇ'ପୁଲେଇ ଏତ୍କୁଗା' ମା'ଏ ଗୁଇ'ଗା' ” ଡ'ସେକ୍ ସୁନ' ।
21ସା' ଉନ୍ତ୍କୁରୁଂ ମାଇ ତୁର୍ସେକ୍ ଆତୁନ୍ ଉଁ'ଉଁଗୁ ମାରି ଆୟଂଡେଇଁ ଇସ୍ରାଏଲ୍ ଦେସ୍ବକ୍ ରିଂଅଁ' ଉଇଗା' । 22ମାତର୍ ଏରଦ୍ଲା ଗୁଇ'ଗା'ସା' ମାଇନା ଉଁ'ଉଁ ଆର୍କିଲାୟଲା ଜିଉଦା ଦେସ୍ବକ୍ ରାଜା ଏଗୁତା ଡ'ସେକ୍ ଜସେପ୍ଲା ଅଂଅଁ'ସେକ୍ ଆତା ଉଇପୁଲେଇ ଅବୁଦି ବୁତୁଂଉଇଗା' । ସା' ମାପ୍ରୁ ଆମାଇ ମୁସୁକ୍ଡିମ୍ବକ୍ସୁଗ ସୁନ'ସା' ମାଇ ଗାଲିଲି ଜିଲାବକ୍ ଉଇଗା' । 23#ମାର୍କ 1:24; ଲୁକ 2:39; ଜଅନ୍ 1:45ମାରି ମାଇ ନାଜରିତ୍ ଡ'ସେକ୍ ମୁଇ ମୁନା'ଉଂଗମ୍ବକ୍ ଉଇସେକ୍ ଡୁକୁ । ସା' “ମାଇ ନାଜରିତ୍ନା ରେମ ଡ'ସେକ୍ ଉନୁଂତା” ଡ'ସେକ୍ ଜିସୁନା ବିସୟ ଇନ୍ତେକନ୍ଡେକ୍ ବାବବାଦିଲେ ସୁନ'କୁନୁଂ ତୁମ' ଆ'ନା ସତ୍ ଡେଂଗା' ।
Aktualisht i përzgjedhur:
ମାତିଉ 2: BFW
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
CC BY-NC-ND 4.0