Mc 15
15
Max betic' Jesús satak Pilato
(Mt 27.1-2,11-14; Lc 23.1-5; Jn 18.28-38)
1Axa yet max sakbiajok, max wajban oc ba eb yajawil eb sacerdote yin k'umbalba yetok eb icham winak, c'al eb meẍtol yin ley Moisés, yetok masanil juntzanxa eb sat yajaw. Max lajwi tu', max c'alon eb Jesús, cax max bet yak'on eb bay Pilato, cham yajaw. 2Axa k'anlen el Pilato tu' bay:
—¿Tom ach ti' Reyal ach eb israel? ẍi bay.
—Ja', ayin toni, ẍi Jesús.
3Axa eb yajawil eb sacerdote, xiwil tzet chi yalaj eb yiban Jesús. 4Yuj tu' xan max yal Pilato tu' bay axca ti':
—¿Tom c'am chach tak'wi jabok? Ab wal jantak tzet chi yal eb en, ẍi bay.
5Palta Jesús xin, c'am jabok max tak'wi. Yuj tu' xan toxac'al chi c'ayaj c'ul Pilato yin.
Max lowxac'al camich yiban Jesús
(Mt 27.15-31; Lc 23.13-25; Jn 18.38—19.16)
6Beybalnebilc'alta' yuj Pilato tol chi bekil junok eb aj preso yet k'in junjun abil, atac'ala' mac chi k'an bekchaj conob. 7Ay jun nak anima chi yik Barrabás, preso yayji yetok jaywanxa yetbi. Yak'lejnak eb owal yetok eb yajaw. Ay juntzan anima camnak yuj eb, yet max yak'len eb owal tu'. 8Axa jayoc bulnaj anima tu', max k'anlen eb bay Pilato, ta chi bekil junok eb aj preso axcac'alta' is beybal junjun k'in. 9Axa yalon bay eb tu' axca ti':
—¿A mi Cham e Reyal ayex israel ex ti', che yochej chin bekilok? ẍi bay eb.
10Caytu' max yut yaloni, yujtol yojtakxa tol yuj chichonc'ulal eb yajawil eb sacerdote yin, xan max yitek eb satak. 11Axa yak'on eb yajaw tu' c'ul eb anima, yet watx' a Barrabás chi k'an bekchaj eb. 12Axa k'anlen Pilato tu' bay eb anima tu' junelxa:
—¿Tzet che yochej chi wut pax Cham che yaloc e Reyalok tu xin? ẍi bay eb.
13Axa yaj bulnaj eb yalon yin ipejal axca ti':
—Curusnelayokabi, ẍixac'al eb.
14—Palta, ¿tzet yetal junok yob max say yun max e yil xin? ẍi bay eb.
Tol max te' ajc'al yaw eb yaloni:
—Curusnelayokabi, ẍixac'al eb.
15Yujtol max yochej aj Pilato tol watx' chi can yul sat conob, xan a Barrabás max bekilok. Max lajwi tu', axa Jesús max yak' mak'layok. Catatu' bian, max yaon oc yul k'ab eb ok aon oc yin curus.
16Axa eb soldado max iontok Jesús bay yamak'il yatut cham yajaw. A bay tu', max wajbelaytek eb soldado masanil. 17Max yaoc eb jun moradotak pichilej yin Jesús. Max jalon seyay eb jun q'uix, axa yaon ajtok eb yin is jolom coronaok. 18Max lajwi tu', max tz'akon yal eb bay axca ti':
—Tzalojan ach Reyal eb israel, ẍixac'al eb bay.
19Chi c'oli mak'on oc eb jun aj yin is jolom. Chi tzubli oc eb yin, cax chi tz'akon ay jajan ba eb satak. 20Max lajwi yetnen eb axca tu xin, max yion el eb an moradotak pichilej tu' yin, cax max yaonc'alta' can oc eb is pichil. Catatu' bian max yiontok eb bay ok yaoc eb yin curus.
Max alay oc Jesús yin curus
(Mt 27.32-44; Lc 23.26-43; Jn 19.17-27)
21Ay jun winak aj Cirene chi yik Simón, is mam Alejandro yetok Rufo. Lananto jay bay max bet ec'jabok. Max ak'lay pural yuj eb soldado yikon bey is curusal Jesús. 22A bay jun lugar chi yik Gólgota, a tu' max yitok eb Jesús. (Gólgota chi yal elapnok: Lugaril Bakil Jolomej.) 23Max yak' eb yal uva calan yetok junxa makan chi yik mirra yuq'uej.*fn* Palta maj cha yuc' bay eb. 24Max lajwi tu', max yaon oc eb yin te curus, cax max yak'on eb soldado suerte yin is pichil Cham, yuj yilon eb tzetak yetal chi yican junjun eb.
25A las nueve mi yet k'inibalil, max yaon oc eb yin curus tu'. 26Ay jayeb letra tz'ibbil ocok. A chi aloni, tzet yuj xan max low camich yiban. A Cham Reyal eb Israel, ẍi jayeb letra tu'. 27-28Ay c'apax cawan elk'om max curusnelay yetok Cham, jun bay is watx' k'ab, junxa bay is q'uexan.
29Axa eb chi ec' cawilal tu', chi buchwajcan ajtok eb yin, cax chi aj tx'umnaj eb bay, chi yalon eb:
—A… ach ton ti' chochay templo Dios ala', cax cha watx'nen aj is q'uexel yin cabjial. 30Col a ba. Ayantek yin te curus tu', ẍi eb bay.
31Ac'ala' eb yajawil eb sacerdote, yetok eb meẍtol yin ley Moisés, max buchwaj c'apax ajtok eb yin, cax chi yalubtanen eb axca ti':
—Ay mac max colo', palta a', c'am chi je' colon pax ba tinani', ẍi eb. 32Ta chi yi aytek ba yin curus jun chi yaloc ba Cristoal, chi yaloc ba co reyalok ayon israel on ti', chi jaoc co c'ul yin, ẍi eb.
Toltax eb locan aj yin curus tu' yetok, max buchwaj c'apax eb yin.
Is camichal Jesús
(Mt 27.45-56; Lc 23.44-49; Jn 19.28-30)
33Axa yet max chumay c'u, max k'ekbi masanil yulyibank'inal, masantac'al yet a las tres. 34Yet-xac'al jun bek tu', max aj yaw Jesús yin ipejal: Eloí, Eloí, ¿lama sabactani? ẍi. (Chi yal elapnok: Ach in Diosal, ach in Diosal, ¿tzet yuj xan chin a bekcanok?)
35A eb ayic' cawilal tu', max yab eb yoc jun k'anej tu', xan max yal eb axca ti':
—Abek, a jun chekbej Dios chi yik Elías chi yawtej, ẍi eb.
36Max lajwi tu', ay jun winak yanej toji, maxc'al apni ocok, max laon aytok jun tzet chi pososi xol vinagre. Max yaon oc chon jun te', cax max yaon ajtok yin ti' Jesús, max yaloni:
—Yilxa ba, oktax jila' ta ok ul ilay aytek yuj Elías tu', ẍi.
37Axa yaj yaw Jesús junelxa yin ipejal tu'. Ti tol axa yel c'ul tu'. 38Axa yay nic'naj nan an k'ap ayoc makilok yul nan templo Dios tu'. Max chaaytek tit nic'naj chon, masantac'al max ayol tilak. 39Max yab cham yajawil eb soldado lecan oc satak Jesús yel yaw tu', max yil wal tzet max yun cami, xan max yal axca ti':
—A jun max cam ti', tita' tol yel caw C'ajol Dios, ẍi cham.
40Ay c'apax juntzan eb xal ix t'anantek najat. Ajun María aj Magdala yetok eb, c'al xal Salomé, c'al María is txutx José yetok Jacobo, nak tzunan unin. 41A juntzan eb xal ix ti', max ec'jabc'al yintak Cham yet ayic' Cham bay Galilea. Max ak'lay serbil Cham yuj eb. Xiwiltoc'al juntzan eb xal ix junej toj yetok Cham bay Jerusalén.
Oclejnaktok is mimanil Jesús yul ch'en mukbanil camnak
(Mt 27.57-61; Lc 23.50-56; Jn 19.38-42)
42A yet jun c'u tu', c'ual watx'nen eb is tzetak yetal ok k'anbalnej, yujtol yecalokxac'al c'ual xewilal. Axa yet lananxa k'ekbi xin, 43max jay jun mimek winak xol eb yet yajawilal chi yik José aj Arimatea. Echbanebil yoc Dios Yajawil yuj. C'am jabok chi xiwi, max octok satak Pilato, bet k'anon mimanil Jesús bay. 44Caw wal max c'ayaj c'ul Pilato yet max yabeni tol mayal cam Jesús. Yuj tu' xan max bet yak' tit cham yajawil eb soldado, max k'anlen el bay, ta mayal cam Cham. 45A yet max yabeni tol mayal cami, axa yalon tu' tol chi je' toj yion aytek José tu' is mimanil Cham. 46A José tu', max man jun sábana caw wal watx'. Catatu' max bet yion aytek is mimanil Cham. Max chulon oc jun sábana tu' yin, max bet yaoncan octok yul jun ch'en ch'en olbilxa, cax max makchencan yetok jun ch'en. 47A María aj Magdala yetok María txutx José, max yil eb bay max occantok is mimanil Cham.
Aktualisht i përzgjedhur:
Mc 15: ATBYK89
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Kanjobal (Q’anjob’al) © Sociedad Bíblica de Guatemala 1989