Takwiin 7
7
Nooh dakhal fi l-safiina
1Wa Allah gaal le Nooh : «Adkhul fi l-safiina, inta wa ahal beetak achaan ana chift inta wiheedak bas saalih giddaami fi lubb kulla l-naas al-aaychiin fi zamanak da. 2Wa dakhkhil maʼaak fi l-safiina sabʼa dukuur wa sabʼa anaati min kulla nafar hana l-haywaanaat al-halaaliin. Laakin min al-haywaanaat al-muharramiin, dakhkhil maʼaak dakar waahid wa antaay waahide bas. 3Wa dakhkhil maʼaak min tuyuur al-sama kula sabʼa dukuur wa sabʼa anaati achaan nahfad nafarhum fi l-ard. 4Wa baʼad sabʼa yoom, ana ninazzil matara fi l-ard wa hi tusubb le muddit 40 yoom, leel wa nahaar. Wa nuguchch min al-ard kulla l-makhluugiin al-ana khalagtuhum.» 5Wa Nooh sawwa kulla cheyy misil Allah amarah beyah.
6Nooh indah 600 sana wakit al-kharag nazal wa akal al-ard. 7Wa hu dakhal fi l-safiina maʼa awlaadah wa martah wa awiin awlaadah achaan yanjo min al-kharag da. 8Wa min kulla l-haywaanaat al-halaaliin wa l-muharramiin wa min al-tuyuur wa min kulla zawaahif al-ard, dakhalo. 9Itneen itneen, dakar wa antaay, dakhalo le Nooh fi l-safiina misil al-Rabb amarah beyah.
Al-matara nazalat fi l-ard
10Wa baʼad sabʼa yoom, almi al-kharag nazal fi l-ard. 11Wa da fi l-wakit al-Nooh indah 600 sana. Wa fi yoom 17 hana l-chahar al-taani hana l-sana di, uyuun almi al-kubaar al-tihit al-ard bado yatlaʼo wa biibaan al-sama anfataho. 12Wa l-matara nazalat fi l-ard leel wa nahaar le muddit 40 yoom.
13Wa fi nafs al-yoom, Nooh dakhal fi l-safiina maʼa awlaadah Saam wa Haam wa Yaafas wa martah wa awiin awlaadah. 14Wa dakhalo maʼaahum ayyi nafar min al-haywaanaat wa l-bahaayim wa zawaahif al-ard wa l-tuyuur wa min kulla cheyy al-bitiir wa l-indah janaahe. 15Wa humman dool dakhalo le Nooh fi l-safiina itneen itneen min kulla makhluug al-indah ruuh al-haya. 16Wa min ayyi nafar hana makhluugiin, dakhalo dakar wa antaay misil al-Rabb amar beyah Nooh. Wa khalaas, Allah sadda baab al-safiina fi Nooh.
17Wa l-kharag gaaʼid yiziid fi l-ard le muddit 40 yoom wa rafaʼ al-safiina min al-ard. 18Wa l-almi bigi katiir wa akal al-ard. Wa l-safiina aayme foog fi l-almi. 19Wa l-almi gaaʼid yatlaʼ be ziyaada fi l-ard lahaddi zarat kulla l-hujaar al-tuwaal. 20Wa l-almi zarat al-hujaar wa faathum lahaddi be 15 duraaʼ. 21Wa kulla l-makhluugiin al-gaaʼidiin fi l-ard maato, misil al-tuyuur wa l-haywaanaat wa l-bahaayim wa zawaahif al-ard. Wa kulla l-naas maato. 22Wa kulla makhluug al-indah nafas al-haya wa aayich fi l-ard al-yaabse, maat. 23Wa be misil da, al-Rabb gachcha kulla makhluug hayy min al-ard, min al-insaan lahaddi l-bahaayim wa zawaahif al-ard wa tuyuur al-sama. Hu gachchaahum marra waahid min al-ard. Wa faddal illa Nooh wa kulla l-makhluugiin al-maʼaayah fi l-safiina.
24Wa l-almi gaʼad fi l-ard le muddit 150 yoom.
Aktualisht i përzgjedhur:
Takwiin 7: ADT19
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Arabe tchadien (alphabet latin) Bible © Alliance Biblique du Tchad, 2019.