ZLI VIRZI 2
2
1Buymisemuŋ mikiɗa mi ngi gi muŋ, hirwuy waɗ gwat ngi raˀahay gar na, naŋ kahana. 2A dirba Buymisemuŋ mikiɗa mi ngi slra naŋ gar na, a gi slra ar hin mitarnaˀ naŋ mata. 3A ɗuwula mi da hin nah, i hin nga naŋ. Asi angi hin nah na, a gi gwat mata. 4Ɓi ngi zli virzi ngi muŋ ati hirwuyo, ti di Bumbulvuŋ miga taŋ na, naŋ kahana so.
Buymisemuŋ migi guva ngi widis a Eden
Tapas Bumbulvuŋ Buymisemuŋ miga muŋ ati hirwuy na, 5naɓa siziɓ anta aruŋ, yo ko giziŋ mupusa a ruwuyo, anta aruŋ. Asi Bumbulvuŋ Buymisemuŋ a go vuŋ t'aruŋ, mbur titra anta ngi huva li t'aruŋ. 6Amma sey yam ada bawa vilvil ti ngi miviɗiviɗi naŋ ti ruwuyo, a hira hirwuy micay na gar. 7Bumbulvuŋ, Buymisemuŋ a hil murɓuk ngi ruwuy, a ndir di mbur titra, dar a ˀufoŋ musuwun ngi siifa nga hutuŋ, joˀ mbur tuwa, a tiri naŋ ti siifa. 8A dirba nah, Bumbulvuŋ Buymisemuŋ a ɗuv guva ngi widis a ruwuy Eden, kini tisi pas ngi mipriki, ɓa a cufa mbur naŋ mindira tuwa angaŋ. 9Bumbulvuŋ Buymisemuŋ a puso sukwi ngi widis mukuy ngi pur misi yi taŋhaya ndum ngi zum. A ngi widis mavul siifa kaˀ a hur guva waɗ widis mavul si na mezle ati malambaˀa. 10Mizaw a bo tir miviɗiviɗi naŋ angi hirwuy Eden, a ɓul ng'ar guva tuwa. A wunkawa baɗ a diga mizaw wal wal mufaɗa. 11Mizaw mudumbuŋ a zilaka Pisoŋ, a guno hirnga ngi hirwuy Havila gun, ɓiri tapasl tapasl ada haɗi a diga, 12Ɓiri tapasl tapasl ngi diga naŋ mezleŋ, waɗ mukuturɓuy mazĩˀĩ ndum ati ɗugur mupuɗaw kakayak kakayaka. 13Mizaw mucuw naŋ a zilaka Gihoŋ, muguno hirwuy Etiyopi gun i nah. 14Mizaw mimakir naŋ a zilaka Tigre, a ɓul kini tisi pas ngi miprik ngi walahay madiɗa mazilaka Asur. Mizaw mumufaɗ naŋ i Efrat. 15Bumbulvuŋ Buymisemuŋ a zuɓa mbur tuwa, a cifaŋ a hur guva ngi Eden ɓa a huvaŋ, yo ɓa a jiginaŋ. 16Bumbulvuŋ Buymisemuŋ a ɓaŋ ɗaˀ le: «Ko widis wana gar misi ar guva na, ki zuma yi naŋ kaɓa ka mawuɗo, 17amma widis ngi si na mezleŋ ati malambaˀ na, ki zumata ɓula, asi tapas ka misa zuma le na, kisa mucu.» 18Bumbulvuŋ Buymisemuŋ a ɓi a kwacay naŋ na: «Ɓa mbur a ndir pal naŋ na, kuy ta. I sa gaŋ mijini naŋ, mizlir le kaslsla ava.» 19Bumbulvuŋ Buymisemuŋ a ndira gwat misi titiri ngi ɓuhoyo gar ati ɗiyuwoy gar ti hohoy, a so taŋ da mburo, ɓa a pura, da a sa ca taŋ slimiɗe mbrike na. Gwat misãmi gar a lum slimiɗ mbur micaŋ di. 20Dar mbur a ca slimiɗ da gineweye gar, da ɗiyuwoy gar waɗ gwat misi titiri ngi ɓuhoy gar. Amma naŋ vuna, mijini naŋ, a lum ta. 21Akẽh na, Bumbulvuŋ Buymisemuŋ a ka hinje da mbur tuwa buɗisl wãˀ. A muɗ cakay ngi mbur tuwa pal, dar a tiɗa meficeke ng'ar li naŋ a muŋ. 22Bumbulvuŋ Buymisemuŋ a gi ngwas ti cakay tuwa, araŋ di. 23Mbur tuwa mupura ngwasa keɗ na, a til mi, a ɓi na: «Yawwa! Pura, hana i tesl ngi wuzla tesl ɗuwoy, yo i meficek ngi vi meficek ɗu. A sa zilaka ngwasa, asi a boko di ti vu mbur mizileŋ.» 24Vurˀe, mbur mizile a sa pula cine ati mumuŋ, ɓa a jumom ati ngwas naŋ, a sa tiram dumvu purla. 25Zil ati ngwas naŋ, taŋ cuw taŋ gulndiŋ gulndiŋ kine, ko mbur magi mesem ti cil naŋ anta.
Aktualisht i përzgjedhur:
ZLI VIRZI 2: BEGDC
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Bible en Langue Guiziga © L’Alliance Biblique du Cameroun, 2011.