لُوقَا 17
17
الْفَصْلْ سْبَعْطَاشْ
يَسُوعْ كَيْعَلّْمْ كِيفَاشْ نْعِيشُو مْعَ خُوتْنَا فْالْإِيمَانْ
1وْݣَالْ يَسُوعْ لْلتّْلَامْدْ دْيَالُه: «لَابْدَّ مَا يْوَقْعُو الْأُمُورْ اللِّي غَيْتّْسَبّْبُو لْلنَّاسْ فْالدّْنُوبْ، وَلَكِنْ يَا وِيلْ هَادَاكْ اللِّي غَادِي يْكُونْ سْبَابْ فْهَادْشِّي. 2رَاهْ خْيَرْ لِيهْ تْتْعَلّْقْ فْعُنْقُه حَجْرَة دْيَالْ الرّْحَى وْيْتّْرْمَى فْالْبْحَرْ، وَلَا يْطِيّْحْ فْالدّْنُوبْ شِي وَاحْدْ مْنْ هَادْ الصّْغَارْ. 3إِيوَا كُونُو عْلَى بَالْ!#متى 18:15
إِلَا دْنَبْ خُوكْ فْحَقّْكْ، خَاصْمْ عْلِيهْ. وْإِلَا تَابْ، غْفَرْ لِيهْ. 4وْإِلَا دْنَبْ فْحَقّْكْ سْبْعَة دْ الْمَرَّاتْ فْالنّْهَارْ، وْرْجَعْ لْعَنْدْكْ كُلّْ مَرَّة وْݣَالْ لِيكْ: رَانِي تَبْتْ، غْفَرْ لِيهْ».
5وْݣَالُو الرُّسُلْ لْلرَّبّْ يَسُوعْ: «زِيدْ فْالْإِيمَانْ دْيَالْنَا»، 6وْهُوَ يْجَاوْبْهُمْ الرَّبّْ: «كُونْ كَانْ عَنْدْكُمْ إِيمَانْ وَاخَّا غِيرْ قْدّْ حَبَّةْ الْخَرْدَلْ، كُونْ ݣْلْتُو لْهَادْ الشَّجْرَة دْيَالْ التُّوتْ: تّْݣَلْعِي وْتّْغَرْسِي فْالْبْحَرْ، وْغَتْسْمَعْ لِيكُمْ».
خَاصّْنَا نْخَدْمُو بْعْضِيَّاتْنَا بْلَا كِبْرْ
7«شْكُونْ مْنّْكُمْ اللِّي عَنْدُه عَبْدْ كَيْحْرَتْ الْأَرْضْ وْلَا كَيْسْرَحْ الْغْنَمْ، وْمْلِّي كَيْرْجَعْ مْنْ الْفْدَّانْ، كَيْݣُولْ لِيهْ: ݣْلَسْ دْغْيَا بَاشْ تَاكُلْ. 8وَاشْ مَا غَادِيشْ يْݣُولْ لِيهْ: وَجّْدْ لِيَّ الْعْشَا، وْتّْحَزّْمْ بَاشْ تّْسَخّْرْ عْلِيَّ حْتَّى نَاكُلْ وْنْشْرَبْ، عَادْ كُولْ نْتَ وْشْرَبْ؟ 9وَاشْ غَادِي يْتّْشْكَرْ الْعَبْدْ حِيتْ دَارْ بْدَاكْشِّي اللِّي تّْݣَالْ لِيهْ؟ 10إِيوَا رَاهْ حْتَّى نْتُمَ بْحَالْ هَكَّا، إِلَا دْرْتُو بْكُلّْ مَا آمْرْكُمْ بِيهْ اللَّهْ ݣُولُو: رَاهْ حْنَا غِيرْ عْبِيدْ مَا صَالْحِينْ لْوَالُو، وْمَا دْرْنَا غِيرْ دَاكْشِّي اللِّي خَاصّْنَا نْدِيرُوهْ».
يَسُوعْ كَيْشَافِي عَشْرَة دْ الْمْجْدَامِينْ
11وْفْالْوَقْتْ اللِّي كَانْ يَسُوعْ غَادِي فْطْرِيقُه لْأُورْشَلِيمْ، دَازْ مْنْ السَّامِرَة وْمْنْ الْجَلِيلْ. 12وْمْلِّي كَانْ دَاخْلْ لْوَاحْدْ الدُّوَّارْ، تّْلْقَّاوْ لِيهْ عَشْرَة دْ الْمْجْدَامِينْ، وْوَقْفُو بْعَادْ مْنُّه، 13وْغَوّْتُو وْݣَالُو لِيهْ: «آ يَسُوعْ، آ سِيدِي رْحَمْنَا!». 14وْشَافْ فِيهُمْ وْݣَالْ: «سِيرُو وْرِّيوْ رَاسْكُمْ لْرْجَالْ الدِّينْ!». وْفْالْوَقْتْ فَاشْ كَانُو غَادْيِينْ فْالطّْرِيقْ وْلَّاوْ طَاهْرِينْ. 15وْمْلِّي شَافْ وَاحْدْ مْنّْهُمْ رَاسُه بْلِّي تّْشَافَى، رْجَعْ وْهُوَ كَيْعْطِي الْعَزّْ لْلَّهْ بْصُوتْ عَالِي، 16وْسْجَدْ عَنْدْ رْجْلِينْ يَسُوعْ وْشْكْرُه، وْكَانْ هَادْ الرَّاجْلْ مْنْ السَّامِرَة. 17وْجَاوْبُه يَسُوعْ وْݣَالْ: «يَاكْ عَشْرَة اللِّي وْلَّاوْ طَاهْرِينْ، فِينْ هُمَ التّْسْعُودْ اللِّي بَاقْيِينْ؟ 18وَاشْ حْتَّى وَاحْدْ فِيهُمْ مَا قْدَرْ يْرْجَعْ بَاشْ يْعْطِي الْعَزّْ لْلَّهْ مْنْ غِيرْ هَادْ الْبْرَّانِي؟». 19وْهُوَ يْݣُولْ لِيهْ: «نُوضْ سِيرْ، إِيمَانْكْ رَاهْ نْجَّاكْ».
الْمْجِي دْيَالْ مَمْلَكَةْ اللَّهْ
20وْمْلِّي سْوّْلُوهْ الْفْرِّيسِيِّينْ: «إِيمْتَى غَادِي تْجِي مَمْلَكَةْ اللَّهْ؟»، جَاوْبْهُمْ: «رَاهْ مَمْلَكَةْ اللَّهْ مَا غَتْجِيشْ بْشِي عَلَامَاتْ كَتّْشَافْ. 21وْمَا يْمْكَنْشْ يْݣُولُو: هَا هِيَ هْنَا، وْلَا رَاهْ هِيَ تْمَّ، عْلَاحْقَّاشْ مَمْلَكَةْ اللَّهْ فِيكُمْ».
22وْݣَالْ لْلتّْلَامْدْ دْيَالُه: «رَاهْ غَادِي يْجِي وَاحْدْ الْوَقْتْ غَتّْمْنَّاوْ تْشُوفُو فِيهْ غِيرْ نْهَارْ وَاحْدْ مْنْ يَّامَاتْ وَلْدْ الْإِنْسَانْ وْمَا غَادِيشْ تْشُوفُوهْ. 23وْغَيْݣُولُو لِيكُمْ النَّاسْ: هَا هُوَ هْنَا، وْلَا رَاهْ هُوَ لْهِيهْ! مَا تْدِّيوْهَاشْ فْكْلَامْهُمْ وْمَا تّْبْعُوهُمْشْ، 24حِيتْ كِيفْ كَيْضْرَبْ الْبَرْقْ فْالسّْمَا وْكَيْضَوِّي مْنْ وَاحْدْ الجِّهَة حْتَّى لْلجِّهَة لْخْرَى، هَكَّاكْ غَيْكُونْ وَلْدْ الْإِنْسَانْ فْالنّْهَارْ اللِّي غَيْجِي فِيهْ. 25وَلَكِنْ قْبَلْ مْنْ هَادْشِّي خَاصُّه يْتّْعَدّْبْ بْزَّافْ، وْمَا يْتّْقْبَلْشْ مْنْ النَّاسْ دْيَالْ هَادْ الْجِيلْ. 26وْكِمَا وْقَعْ فْيَّامَاتْ النّْبِي نُوحْ، هَكَّاكْ غَادِي يْوْقَعْ فْيَّامَاتْ وَلْدْ الْإِنْسَانْ: 27كَانُو النَّاسْ كَيَاكْلُو وْكَيْشَرْبُو، وْكَيْتّْزَوّْجُو وْكَيْزَوّْجُو، حْتَّى لْلنّْهَارْ اللِّي دْخَلْ فِيهْ نُوحْ لْلسّْفِينَة، وْجَا الطُّوفَانْ وْهْلَكْهُمْ كُلّْهُمْ. 28وْكِمَا وْقَعْ فْيَّامَاتْ لُوطْ: كَانُو النَّاسْ كَيَاكْلُو وْكَيْشَرْبُو، وْكَيْبِيعُو وْكَيْشْرِيوْ، وْكَيْزَرْعُو وْكَيْبْنِيوْ، 29وَلَكِنْ نْهَارْ خْرَجْ لُوطْ مْنْ سَدُومْ، نَزّْلْ عْلِيهُمْ اللَّهْ الْعَافْيَة وْالْكْبْرِيتْ بْحَالْ الشّْتَا مْنْ السّْمَا وْهْلَكْهُمْ كُلّْهُمْ. 30رَاهْ بْحَالْ هَكَّا غَيْوْقَعْ فْالنّْهَارْ اللِّي غَيْبَانْ فِيهْ وَلْدْ الْإِنْسَانْ. 31اللِّي كَانْ فْهَادَاكْ النّْهَارْ فُوقْ السّْطَحْ وْحْوَايْجُه فْالدَّارْ، مَا خَاصُّوشْ يْنْزَلْ بَاشْ يَاخُدْهُمْ. وْاللِّي كَانْ فْالْفْدَّانْ مَا خَاصُّوشْ يْتْلَفّْتْ وْرَاهْ.#متى 24:17،18؛ مرقس 13:15،16 32تّْفَكّْرُو أَشْنُو طْرَا لْمْرَاةْ لُوطْ! 33رَاهْ اللِّي بْغَا يْنَجِّي حْيَاتُه غَيْضَيّْعْهَا، وْاللِّي ضَيّْعْ حْيَاتُه غَيْنَجِّيهَا.#متى 10:39؛ 16:25؛ مرقس 8:35؛ لوقا 9:24؛ يوحنا 12:25 34وْنْݣُولْ لِيكُمْ: فْهَادِيكْ اللِّيلَة غَادِي يْكُونُو جُوجْ دْ النَّاسْ فْفْرَاشْ وَاحْدْ، غَيْتّْخَادْ وَاحْدْ مْنّْهُمْ وْيْبْقَى لَاخُرْ. 35وْغَادِي يْكُونُو جُوجْ عْيَالَاتْ كَيْطَحْنُو فْالرّْحَى مْعَ بْعْضِيَّاتْهُمْ، غَتّْخَادْ وَحْدَة مْنّْهُمْ وْتْبْقَى لْخْرَى. [ 36وْغَيْكُونُو جُوجْ رْجَالْ فْالْفْدَّانْ، غَيْتّْخَادْ وَاحْدْ مْنّْهُمْ وْغَيْبْقَى لَاخُرْ».]#17.36 هَادْ الْآيَة مَا كَايْنَاشْ فْبْزَّافْ دْيَالْ الْمْخْطُوطَاتْ الْقْدَامْ
37وْهُمَ يْسْوّْلُوهْ التّْلَامْدْ: «فِينْ غَيْكُونْ هَادْشِّي آ سِيدِي؟» وْجَاوْبْهُمْ: «فِينْ مَا كَتْكُونْ الجِّيفَة، تْمَّ كَيْتّْجَمْعُو النّْسُورَ».
Aktualisht i përzgjedhur:
لُوقَا 17: MSTD
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved