مَتَّى 5
5
الْفَصْلْ الْخَامْسْ
الْخُطْبَة دْيَالْ يَسُوعْ فُوقْ الجّْبَلْ
1وْمْلِّي شَافْ يَسُوعْ الجّْمَاعَاتْ دْ النَّاسْ طْلَعْ لْلجّْبَلْ، وْمْلِّي ݣْلَسْ جَاوْ لْعَنْدُه التّْلَامْدْ دْيَالُه، 2وْبْدَا كَيْعَلّْمْهُمْ وْݣَالْ:
3«سْعْدَاتْ الْفُقَرَا فْالرُّوحْ،
حِيتْ لِيهُمْ مَمْلَكَةْ السَّمَاوَاتْ.
4سْعْدَاتْ اللِّي كَيْبْكِيوْ، حِيتْ اللَّهْ غَادِي يْوَاسِيهُمْ.
5سْعْدَاتْ الْمْتْوَاضْعِينْ، حِيتْ غَادِي يْوَرْتُو الْأَرْضْ.
6سْعْدَاتْ هَادُوكْ اللِّي جِيعَانِينْ وْعْطْشَانِينْ لْطَاعْةْ اللَّهْ، حِيتْ غَادِي يْشْبْعُو.
7سْعْدَاتْ هَادُوكْ اللِّي كَيْرَحْمُو، حِيتْ اللَّهْ غَادِي يْرْحَمْهُمْ.
8سْعْدَاتْ هَادُوكْ اللِّي قَلْبْهُمْ نْقِي، حِيتْ غَادِي يْشُوفُو اللَّهْ.
9سْعْدَاتْ هَادُوكْ اللِّي كَيْعَاوْنُو النَّاسْ يْعِيشُو فْالْهْنَا، حِيتْ غَادِي يْتْسَمَّاوْ وْلَادْ اللَّهْ.
10سْعْدَاتْ هَادُوكْ اللِّي كَيْتّْعَدَّاوْ عْلِيهُمْ عْلَاحْقَّاشْ تَابْعِينْ طْرِيقْ الْحَقّْ، حِيتْ لِيهُمْ مَمْلَكَةْ السَّمَاوَاتْ.#1بطرس 3:14
11وْسْعْدَاتْكُمْ إِلَا عَايْرُوكُمْ النَّاسْ وْتّْعَدَّاوْ عْلِيكُمْ وْݣَالُو فِيكُمْ ݣَاعْ الْهَضْرَة الْخَايْبَة بْالْكْدُوبْ، عْلَى وْدِّي.#1بطرس 4:14 12فْرْحُو وْطِيرُو بْالْفَرْحَة عْلَاحْقَّاشْ أَجْرْكُمْ عْظِيمْ فْالسَّمَاوَاتْ، حِيتْ رَاهْ بْحَالْ هَكَّا تْعَدَّاوْ عْلَى الْأَنْبِيَا اللِّي قْبَلْ مْنّْكُمْ».#الاعمال 7:52
الْمْلْحَة دْ الْأَرْضْ وْنُورْ الدّْنْيَا
13«نْتُمَ الْمْلْحَة دْيَالْ الْأَرْضْ، وْإِلَا مْسَاسْتْ الْمْلْحَة أَشْنُو اللِّي غَيْرْجّْعْ لِيهَا الْمْلُوحِيَّة دْيَالْهَا؟ رَاهَا مَا بْقَاتْ صَالْحَة لْوَالُو، مْنْ غِيرْ تّْلَاحْ عْلَى بْرَّا وْيْعَفْسُو عْلِيهَا النَّاسْ.#مرقس 9:50؛ لوقا 14:34،35
14نْتُمَ نُورْ الدّْنْيَا، مَا يْمْكَنْشْ لْمْدِينَة فُوقْ جْبَلْ تّْضَرّْݣْ.#يوحنا 8:12؛ 9:5 15وْمَا كَايْنْشْ شِي وَاحْدْ كَيْشْعَلْ الْقْنْدِيلْ وْكَيْحَطُّه تَحْتْ السّْطَلْ دْ الْعْبَارْ، وَلَكِنْ كَيْتّْحَطّْ فْبْلَاصْتُه بَاشْ يْضَوِّي عْلَى كُلّْ مْنْ كَايْنْ فْالدَّارْ.#مرقس 4:21؛ لوقا 8:16؛ 11:33 16وْهَكَّا، خَلِّيوْ النُّورْ دْيَالْكُمْ يْضَوِّي قُدَّامْ النَّاسْ، بَاشْ يْشُوفُو الْأَعْمَالْ دْيَالْكُمْ الْمْزْيَانَة وْيْعْطِيوْ الْعَزّْ لْبَّاكُمْ اللِّي فْالسَّمَاوَاتْ».#1بطرس 2:12
الشّْرَعْ
17«مَا يْحْسَابْشْ لِيكُمْ بْلِّي جِيتْ بَاشْ نْحَيّْدْ الشّْرَعْ دْيَالْ مُوسَى وْلَا كْتُبْ الْأَنْبِيَا، مَا جِيتْشْ بَاشْ نْحَيّْدْهُمْ وَلَكِنْ جِيتْ بَاشْ نْكَمّْلْهُمْ. 18وْنْݣُولْ لِيكُمْ الْحَقّْ: رَاهْ تّْحَيّْدْ السّْمَا وْالْأَرْضْ وْمَا يْتّْحَيّْدْشْ حَرْفْ وَاحْدْ وَلَا نُقْطَة وَحْدَة مْنْ الشّْرَعْ حْتَّى يْتّْحَقّْقْ كُلّْشِي اللِّي فِيهْ.#لوقا 16:17 19رَاهْ اللِّي مَا دَارْشْ بْشِي وَحْدَة مْنْ هَادْ الْوْصِيَّاتْ الصّْغَارْ وْعَلّْمْ النَّاسْ يْدِيرُو بْحَالُه، غَادِي يْكُونْ هُوَ الصّْغِيرْ فْمَمْلَكَةْ السَّمَاوَاتْ. وْاللِّي دَارْ بِيهَا وْعَلّْمْهَا لْلنَّاسْ، غَادِي يْكُونْ كْبِيرْ فْمَمْلَكَةْ السَّمَاوَاتْ. 20وْكَنْݣُولْ لِيكُمْ: إِلَا مَا كَانْتْشْ الطَّاعَة دْيَالْكُمْ كْتَرْ مْنْ دْيَالْ الْعُلَمَا دْ الشّْرَعْ وْالْفْرِّيسِيِّينْ، رَاهْ عَمّْرْكُمْ مَا غَادِي تْدَخْلُو لْمَمْلَكَةْ السَّمَاوَاتْ».
التّْقْلِيقَة
21«رَاكُمْ سْمَعْتُو بْلِّي تّْݣَالْ لْلنَّاسْ اللّْوّْلِينْ: مَا تْقْتَلْشْ، وْاللِّي قْتَلْ خَاصّْ يْتّْحْكَمْ عْلِيهْ. 22وَلَكِنْ أَنَا كَنْݣُولْ لِيكُمْ: ݣَاعْ اللِّي تْقَلّْقْ عْلَى خُوهْ خَاصّْ يْتّْحْكَمْ عْلِيهْ، وْاللِّي ݣَالْ لْخُوهْ: آ اللِّي مَا فِيكْ فَايْدَة، خَاصّْ يْتّْحْكَمْ عْلِيهْ فْالْمَحْكَمَة الْكْبِيرَة. وْاللِّي ݣَالْ لْخُوهْ: آ الْحْمَقْ، يْسْتَاهْلْ نَارْ جَهْنَّمْ. 23وْإِلَا جْبْتِي هْدِيْتْكْ وْحَطِّيتِهَا عْلَى الْمَدْبَحْ وْتْمَّ تّْفَكّْرْتِي بْلِّي فِيكْ الْحَقّْ مْنْ جِهْةْ خُوكْ. 24خَلِّي هْدِيْتْكْ قُدَّامْ الْمَدْبَحْ وْسِيرْ حْتَّى تْتْصَالْحْ مْعَ خُوكْ فْاللّْوّْلْ، عَادْ أَجِي عْطِي هْدِيْتْكْ. 25تّْصَالْحْ مْعَ اللِّي مْدَاعِي مْعَاكْ مَاحَدّْكُمْ بَاقْيِينْ فْالطّْرِيقْ لْلْمَحْكَمَة، قْبَلْ مَا يْدِّيكْ لْلْقَاضِي، وْالْقَاضِي يْحَطّْكْ فْيْدّْ الْمْخَزْنِي، وْالْمْخَزْنِي يْدَخّْلَكْ لْلْحَبْسْ. 26نْݣُولْ لِيكْ الْحَقّْ: رَاكْ مَا غَتْخْرَجْ مْنْ تْمَّ حْتَّى تْخَلّْصْ الرّْيَالْ اللّْخْرْ اللِّي عْلِيكْ».
الْفْسَادْ
27«وْسْمَعْتُو بْلِّي تّْݣَالْ: مَا تْفْسَدْشْ. 28وَلَكِنْ أَنَا كَنْݣُولْ لِيكُمْ: ݣَاعْ اللِّي شَافْ شِي مْرَاة بَاشْ يْتّْشْهَّاهَا، رَاهْ هُوَ فْسَدْ مْعَاهَا فْقَلْبُه.
29وْإِلَا كَانْتْ عِينْكْ لِيمْنَى كَتْطِيّْحَكْ فْالدَّنْبْ، حَيّْدْهَا وْرْمِيهَا عْلِيكْ، عْلَاحْقَّاشْ اللَّهُمَ تْخْسَرْ طَرْفْ مْنْ دَاتْكْ وْلَا تّْرْمَى دَاتْكْ كُلّْهَا فْجَهْنَّمْ.#متى 18:9؛ مرقس 9:47 30وْإِلَا كَانْتْ يْدّْكْ لِيمْنَى كَتْطِيّْحَكْ فْالدَّنْبْ، قْطَعْهَا وْرْمِيهَا عْلِيكْ، حِيتْ اللَّهُمَ تْخْسَرْ طَرْفْ مْنْ دَاتْكْ وْلَا تّْرْمَى دَاتْكْ كُلّْهَا فْجَهْنَّمْ».#متى 18:8؛ مرقس 9:43
الطّْلَاقْ
31«وْتّْݣَالْ تَانِي: ݣَاعْ اللِّي طَلّْقْ مْرَاتُه، خَاصُّه يْعْطِيهَا بْرَاتْهَا.#متى 19:7؛ مرقس 10:4 32وَلَكِنْ أَنَا كَنْݣُولْ لِيكُمْ: اللِّي طَلّْقْ مْرَاتُه عْلَى سْبَابْ آخُرْ مْنْ غِيرْ سْبَابْ الْفْسَادْ، رَاهْ كَيْرَدّْهَا كَتْفْسَدْ. وْاللِّي تّْزَوّْجْ بْالْمْطَلّْقَة رَاهْ هُوَ كَيْفْسَدْ».#متى 19:9؛ مرقس 10:11،12؛ لوقا 16:18؛ 1كورنتوس 7:10،11
الْحْلُوفْ
33«وْسْمَعْتُو تَانِي بْلِّي تّْݣَالْ لْجْدُودْكُمْ: إِلَا حْلَفْتِي مَا تْحْنَتْشْ، وَلَكِنْ تُوفِي لْلرَّبّْ بْالْحْلُوفْ دْيَالْكْ. 34أَمَّا أَنَا كَنْݣُولْ لِيكُمْ: عَمّْرْكُمْ مَا تْحَلْفُو، لَا بْالسّْمَا حِيتْ هِيَ عَرْشْ اللَّهْ،#يعقوب 5:12؛ متى 23:22 35وَلَا بْالْأَرْضْ حِيتْ هِيَ مُوضْعْ رْجْلِيهْ، وَلَا بْأُورْشَلِيمْ حِيتْ هِيَ مْدِينْةْ الْمَلِكْ الْعْظِيمْ. 36وْمَا تْحْلَفْشْ بْرَاسْكْ حْتَّى هُوَ، حِيتْ مَا تْقْدَرْشْ تْرَدّْ شَعْرَة وَحْدَة مْنُّه كَحْلَا وْلَا بِيضَا. 37وَلَكِنْ إِلَا كَانْ كْلَامْكُمْ إِيِّهْ، ݣُولُو: إِيِّهْ. وْإِلَا كَانْ لَّا، ݣُولُو: لَّا. وْالْكْلَامْ اللِّي زَايْدْ عْلَى هَادْشِّي رَاهْ هُوَ مْنْ الشِّيطَانْ».
الْإِنْتِقَامْ
38«وْسْمَعْتُو بْلِّي تّْݣَالْ: الْعِينْ بْالْعِينْ وْالسَّنّْ بْالسَّنّْ. 39وَلَكِنْ أَنَا كَنْݣُولْ لِيكُمْ: مَا تْرَدُّوشْ الشَّرّْ بْخُوهْ، وَلَكِنْ اللِّي صَرْفْقَكْ عْلَى حْنْكَكْ لِيمْنْ، ضَوّْرْ لِيهْ لَاخُرْ حْتَّى هُوَ. 40وْاللِّي بْغَا يْدْعِيكْ لْلْمَحْكَمَة بَاشْ يَاخُدْ لِيكْ جْلَّابْتْكْ، خَلِّي لِيهْ حْتَّى التّْشَامِيرْ دْيَالْكْ. 41وْإِلَا شِي وَاحْدْ بَزّْزْ عْلِيكْ بَاشْ تْمْشِي مْعَاهْ أَلْفْ خَطْوَة، سِيرْ مْعَاهْ أَلْفَيْنْ. 42وْاللِّي طْلَبْ مْنّْكْ شِي حَاجَة عْطِيهَا لِيهْ، وْاللِّي بْغَا يْتّْسَلّْفْ مْنّْكْ مَا تْرَدُّوشْ خَاوِي».
بْغِيوْ عْدْيَانْكُمْ
43«وْسْمَعْتُو بْلِّي تّْݣَالْ: تْبْغِي اللِّي قْرِيبْ لِيكْ وْتْكْرَهْ عْدُوكْ. 44وَلَكِنْ أَنَا كَنْݣُولْ لِيكُمْ: بْغِيوْ عْدْيَانْكُمْ، وْدْعِيوْ مْعَ هَادُوكْ اللِّي كَيْتّْعَدَّاوْ عْلِيكُمْ. 45بَاشْ تْكُونُو وْلَادْ بَّاكُمْ اللِّي فْالسَّمَاوَاتْ. حِيتْ هُوَ اللِّي كَيْشْرَقْ بْشْمْسُه عْلَى الْقْبَاحْ وْالْمْلَاحْ، وْكَيْنَزّْلْ الشّْتَا عْلَى اللِّي كَيْدِيرُو الْخِيرْ وْاللِّي كَيْدِيرُو الشَّرّْ. 46حِيتْ إِلَا كْنْتُو كَتْبْغِيوْ غِيرْ اللِّي كَيْبْغِيوْكُمْ، آشْ مْنْ أَجْرْ عَنْدْكُمْ؟ وَاشْ مَاشِي حْتَّى مَّالِينْ الضَّرِيبَة كَيْدِيرُو بْهَادْشِّي؟ 47وْإِلَا كَتْسْلّْمُو غِيرْ عْلَى خُوتْكُمْ بُوحْدْهُمْ. بْآشْ نْتُمَ حْسَنْ مْنْ لْخْرِينْ؟ وَاشْ مَاشِي حْتَّى اللِّي كَيْعَبْدُو الْأَصْنَامْ كَيْدِيرُو بْحَالْ هَكَّا؟ 48إِيوَا كُونُو كَامْلِينْ، كِمَا بَّاكُمْ اللِّي فْالسّْمَا كَامْلْ».
Aktualisht i përzgjedhur:
مَتَّى 5: MSTD
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved