Génesis 32
32
Itsaroacaacari Jacob irirenti aisati iquenquetsatacaaqueri Tasorentsi
1Impoiji yovaanaja iriori Jacobo. Ari nianqui avotsi itonquiotavacari inampirepee Tasorentsi. 2Ineantacariri, icanti: “Iriotaque manatincari irashi Tasorentsi.” Irosati ipajitantacaro ineaquerinta Mahanaim.
3Ari itiancaque Jacobo aparopee jatatsineri quipatsiqui Seír, opajita aisati Edom inamantanteariri irenti Esaú. 4Icantavaqueri:
—Pincantapeeri iye: ‘Coraquetaji pirenti Jacobo, piveranaro.’
Irosati ijajeitantaca, icantapaaqueri: “Itiancajeitaquena pirenti Jacobo noncamantempi; icanti: ‘Peerani nosaviquimotaqueri coqui Labán. 5Oshequi catsini itimimotaquena vacapee, aashinopee, ovishapee jeri nonampirepee: shiramparipee aisati tsinanepee, meeca notianquimpiri nonampirepee incamantempi: Nocoaque niote ariorica paacameetsatavajena.’ ”
6Ipiajeitantajarori icamantapaajiri:
—Noneajeitaitiri pirenti. Coraquetaque iriori impoitaque icarajeitaqueri 400 shirampari, icoaque intonquiotavajempi.
7Iquemantavacariri Jacobo, itsaroasanotanaque catsini. Oshequi iquenqueshireanaca. Ari yapatojeitaqueri ishanincapee, inashitacaajeitacari icarati apite apatojeitainchari. Aisati iquempejeitaqueri iriori ovishapee, vacapee jeri cameyopee. 8Iro inashitacantacariri, iquenqueshireaca. Icanti: “Impocaquerica iye Esaú, ariorica irimanatapaaqueri aparoni apatojeitainchari, irioquea pashini shiajeitanaintsine.”
9Impoiji iquenquetsatacaaqueri Tasorentsi, icantiri: “Novincatsarite Tasorentsi, aviro iquemisantiri nocharineni Abrahama, aisati apa Isaac; tempa avirotaque cantajanari: ‘Pimpianaje piipatsitequi isavicajeitinta pishanincapee. Nontasoncacoventempi pareetantajeari cameetsa.’ 10Te noncameetsaveteaji narori picavintsaashitaquena. Peerani nojatantacari namitsiqui Harán, nomonteanacaro ora nija Jordán. Tecatsi naanaque, apatiro noyotiquiiro. Iro cantaincha meeca oshequi catsini timimoyetaquenari. Jeri yoca nocarajeitaqueri apite apatojeitainchari. 11¡Meeca nocoaque poavisaacotena! ¡Eiro pishinetiritsi iye iroajeitena! Oshequi notsaroacaacari impocaquerica iroapaaquero nojinapee aisati notomipee. 12Tempa picantasanotaquena peerani: ‘Nosavicacayempi cameetsa, nontasoncacoventempi. Noshequiacaasanojeiteri pishanincajeitajeari coajica. Inquempetearo ovane impanequi, eiro pimatiritsi piojeiteri jaoca incarajeite.’ ”
Itiancacantaqueneri Jacobo irirenti ivirapee
13Ari otsitenitanaji imajeitanaji. Impoiji oquitaiteamanaque icoyeayetaqueri ivirapee impashiteariri irirenti: 14-15Icarati 20 chiivo, iro tsinane ocarati 200; aisati ovisha icarati 20, iro tsinane ocarati 200; aisati ocarati 30 cameyopee iroaquera timatsi orijanipee; aisati icarati vaca 10 shirampari, iro tsinane ocarati 40; aisati aashino icarati 10, iro tsinane ocarati 20. 16Impoiji ipajeitaqueri inampirepee yora inashitacaajeitacari. Icantiri:
—Tsame pijivajeitanaque. Paamaventajeitea eiro poijatavacaajeitatsi quempeji, nijanteaji pinajeitaque. Aparo jivatacaajeitanaquerine, irio itsipapee impoitacaajeitanaquerine.
17Yora yoijivataaqueri icantavaqueri:
—Ariorica irineavaquempi iye Esaú, irisampitavaquempirica: ‘¿Jaoca pijateri? ¿Jaanica pantaveetiniri? ¿Jaanica ashitariri virantsipeeca?’ 18Pancanaqueri, pincanteri: ‘Irio nantaveetiniri Jacobo, piveranaro. Yoca virantsipee, iriotaque itiancacantaquempiri impashitempiri; tempa ipincatsatasanotimpi. Coraquetaque iriori irimpoitapaaque.’
19Aisati iquempetaqueri iriori apitetapaintsiri jeri mavatapaintsiri aisati maaroni aajeitanaqueriri virantsipee. Icantiri:
—Irosati pincantajeitaque avirori ariorica pineajeitavaqueri Esaú. 20Aisati pincantaqueri coraquetaque Jacobo irimpoijeitapaaque.
Iro itiancacantantacanariri, iquenqueshireaca: “Aitaque noncanteriri noncatsimareacantajeariri iye, eiro iquisantavajanatsi. Ariorica irineavajena, irointi iraacameetsatavajena.” 21Aitaque ocantacari itiancaqueri inampirepee jivatacaajeitanaqueriri virantsipee impaashijeiteariri. Irintiquea timanaintsi itimajeitapaaquenta.
Ineashintsicatacari Jacobo Inampire Tasorentsi
22-23Ari nianquiiteni itinaanaca Jacobo. Yoisaaquireayetaquero ijinapee jero apitetatsiri inampire aisati itomipee caratatsiri 11. Yoimonteajeitaitiro intatiquero nijateniqui Jaboc aisati maaroni timimotiriri. 24Irintiquea piajancha apaniro imaajeivetapaacanta. Impoiji imapocaqueri aparoni Atirivetachari, ineashintsitapaacari irovetaincha inquitaiteacoteme. 25Ari ineaqueri te irimateriji iranaacoteri Jacobo, irosati iposantacari ishoritaqui; itireitaqueri itonqui ishoritaquiniri. 26Icantavetari:
—Poimpacaajenata, irotajantsi onquitaiteaje.
Icantanaqueri iriori Jacobo:
—Eiro noipacaimpitsi, eirorica picantacoventanatsi Tasorentsiqui intasoncaventena.
27Irosati isampitantacari:
—¿Jaoca pipajitari?
Yacanaqueri:
—Nopajita Jacobo.
28Irosati icantantanacari:
—Eiro meeca pipajitajatsi Jacobo. Ainti pimpajitajea Israel; tempa avirotaque neashintsicatacariri Tasorentsi aisati atiri, ari panaacotaqueri quisajeivetimpiri.
29Ari isampivetanacari iriori:
—¿Jaoca pipajitari avirori?
Iro cantaincha icantanaqueri:
—¡Paitaquea pisampitimentantanarori novajiro!
Te incamanteriji. Irointi itasoncacoventaqueri, irosati ipeantanaja. 30Ari ipajitaquero Jacobo ineashintsicatacarinta atirivetachari, Penuel. Tempa icanti: “Aitaque noneasanotaqueriri Tasorentsi aca. Iro cantaincha te noncameji, aneatsina noni.”
31Quitaiteanaji oni, contetapaaji ini catsirincaiteri, irosati ijatantaja intatiqueronta imayencanaji. Ari yovaajeitanaja jentsiquero icantanaja. 32Irotaque caari yoajeitantaro ishanincapeeni Israel imetsotonquire poshiniri ishoritaquiniri, irosati meeca icanta. Tempa iquenqueshirejeitiro, aitaque iposheetaqueriri Jacoboni.
Aktualisht i përzgjedhur:
Génesis 32: cni
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2008, 2015, Wycliffe Bible Translators, Inc. All rights reserved.