Zenezi 12
12
'Re ihâimana u'âsi mono, Abrã te te ipisutuzé wasu'u
1Tawamhã nimahã bâtâ na te Uburé Danhib'apito hã, Abrãhã ma tinha ãne:
— Asipti'ai hawimhã te za aiwato, asisãnawã norĩ hawimhã, duré aimama nhorõwa hawimhã, ro hã za te aima ihâi'rézéb u aimorĩ da. 2Tawamhã asihudu sidâpâsi ahâ uptabi na 're hâimana za'ra mono da hã, wa hã wa za pisutu, a'uwẽ misi ãma isitom na dama siptete na 're hâimana za'ra mono da. Duré iwẽ uptabi hã wa za te aima 're anhomri u'âsi. Duré uburé dama hã asisi wasu'u za'ẽtẽ di za. Tawamhã iwẽ hã te aima 're i'apisutu mono zéb u'âbâ, te za duré a hã iwẽ na hã 're ida'apawapto mo. 3Duré iwẽ te te aima 're i'manharĩ za'ra mono norĩ ma, wa hã wa za duré iwẽ hã te tãma 're 'manharĩ u'âsi za'ra, isimi'manharĩ za'ra zé wa'rãmimhã aima. Duré te te aima 're irob'manharĩ wasété za'ra mono norĩ ma, wa za duré iwẽ'õ hã te tãma 're pisutu za'ra, isimi'manharĩ wasété za'ra zé wa'rãmi, aima hã. Tawamhã duré ai'u'âbâmhã, wa hã wa za ti'ai ãma uburé a'uwẽ mono bâ 're idahâimana za'ra mono norĩ ma, iwẽ hã te dama 're anhomri u'âsi.
4Tawamhã Abrãhã ãma 75 na iwahub ãma, ma tô Harã hawimhã oto mo, Uburé Danhib'apito te te tãma iwaihu'uzéb zarina. Taha wamhã, Lo ma tô isiré hã mo. 5Tawamhã timro te siré saprõ, Sara'i hã. Tizamarĩ'wai 'ra, ti'ra wapté te duré siré saprõ, Lo hã. Duré uburé Harã ãma isimarĩ tãma 're ihâimana mono norĩ hã, te siré tidu. Duré uburé pawa'âbâ ãna tãma iromhuri'wa norĩ zama hã te duré siré te te simro. Tawamhã oto Cana'ã u sihutu wamhã, 6Abrã ma tô ti'ai wa'õtõ nho'u hã 'razâri waré, Siquẽ na 'ri nho'õmo nhisi u wisi da, ro iwazéb zahi, Moré na romnhisi ãma rowede iwazéb zahi 're isa mono zéb u. Taha wamhã, cananeu norĩ te tame ti'ai 'remhã 're hâimana za'ra. 7Tawamhã tame Uburé Danhib'apito, Abrãhã u wisi wamhã, ma tô ãne tãma tinha:
— Asihudu norĩ ma, wa za ã ti'a hã tãma sõmri za'ra.
Tawamhã tame Abrã ma tô ẽtẽ za'ra hã 'manha, tinhimizama te te tãma ãma zata da, Uburé Danhib'apito ma. E marĩ wa. Tame hâimana ré, itẽmemhã wisi wa.
8Taha pari Abrã, Bétéu na 'ri nho'õmo nhisi ãma bâtâ pusizém niwĩ, ẽtẽ ahâ na 're iromhâimana mono u hã, te duré oto mo. Tawamhã tame ma tô te te sima 'ri nhoré. Bétéu hã te bâtâ zasizém niwĩmhã 're hâimana, duré Ai na 'ri wa'õtõ nhisi te bâtâ pusizém niwĩmhã 're hâimana. Ta norĩ wa'wa te te sima i'ri nhoré mono hã ma tô simasa. Tawamhã tameb zama ẽtẽ za'ra te te 'manharĩ wamhã, ma tô duré Uburé Danhib'apito ãma hã tiwata. 9Tawamhã ta hawi watobro wamhã, ma tô Cana'ã ti'a nho'õmoi baba si õne u'âsi nasi te te rowaimrami.
Abrã, Ezitu u imorĩzé wasu'u
10Tawamhã Cana'ã ãma mra hã te oto da te 're sépata za'ẽtẽ za'ra. Tahawa Abrã hã ma tô Ezitu u hã mo, a'â tame hâimana hutu da, mrab 'rata. 11Tawamhã Ezitu u oto simasisi wana ré, ma tô Abrã hã, timro Sara'ihi ma tinha ãne:
— Te za ĩwapa! Tô sena a hã pi'õ i'aiwẽ uptabi. 12Tahawa, ezipsiu norĩ te te siwi ai'madâ'â wamhã, te za sima aiwasu'u za'ra ãne: “Ãhã pi'õ hã õhõ mro. E niha iwẽ uptabi.” Ãhã wamhã, te za siwi ĩwĩ. Tawamhã aiwétési hã te te siwi aiwĩrĩ õ di za. Aihâiba ré te za aihâiba. 13Tahawa, te za ĩhidiba na hã dama asiwasu'u. Tawamhã ãne na dama asiwasu'u wamhã, da te dasiwi ĩwĩrĩ õ di za. Te za duré dasiwi hã ĩ'âri wẽ ni.
14Tawamhã Abrã, Ezitu u oto wisi wamhã, ma tô ezipsiu norĩ, Sara'i sena pi'õ iwẽ uptabi na hã siwi 'madâ. 15Tawamhã duré ni'wam norĩ, Ezitu ãma apito ma, da'madâ'â'wa norĩ ipire, pi'õ iwẽ uptabi na te te siwi 'madâ'â za'ra wa, ma tô duré tãma wasu'u za'ra. Tahawa, apito nhimiromhurizé 'ri u hã, ma tô tãma siwi saprõ.
16Tawamhã duré taha hâiba u'âbâmhã ma tô apito, Abrãhã ma, marĩ hã tãma 'manharĩ wẽ. Tahawa pone'ẽrebâ norĩ hã, duré powawẽ norĩ hã, duré awaru po're pore si'aibâ norĩ isipi'õ norĩ me, duré pawa'âbâ ãna romhuri'wa si'aibâ norĩ pi'õ norĩ me hã, duré awaru ba'õmore norĩ hã ma tô tãma sõmri za'ra. 17Tane nherẽ, Sara'ihi hâiba u'âbâ, ma tô Uburé Danhib'apito, apito, duré isõrõwa 're, 're ihâimana za'ra mono norĩ me, ihâzé pire na hã hâ za'ra. 18Tahawa, te apito, Abrã itẽme morĩ da hã sô hâ. Tawamhã te ãne tãma tinha:
— E marĩ da, ma ãne hã ĩma i'manha. E marĩ wa, aimro na hã ĩma wasu'u õ di bété. 19Aihidiba na hã ma tô ĩma iwasu'u. Tahawa, wa hã wa tô aré ãma ĩmro. Ã ãhãta aimro. Ã hawimhã te za oto aipusi 'wa.
20Tawamhã apito tite rob'madâ'â'wa norĩ ma hã, ma tô tãma waihu'u za'ra, Abrã, imro ré, duré marĩ tãma ihâimana za'ra ré, apâ Ezitu hawimhã te te siwi satõrĩ da.
Aktualisht i përzgjedhur:
Zenezi 12: xavBP
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2011, Wycliffe Bible Translators, Inc.All rights reserved.