Ura për te MarkuShembull

Përdore mirë ose do ta humbasësh

Vini re pyetjet e vargut 21. Mund t’u përgjigjesh fare lehtë! Natyrisht, një qiri duhet ta vësh në shandan. Të vësh një dritë nën një kovë ose nën krevat është gjë e pavlerë. Përkundrazi, qëllimi i dritës është të shndritë, pra që të përzërë errësirën. Mendoni për mësimet e Zotit Jezus, si drita. Ai nuk i fshehu, por i predikoi hapur. Shumë njerëz i dëgjuan mësimet e Tij, por nuk i përdorën siç duhet. Ne lehtësisht mund të bëjmë të njëjtën gjë; ne i duam mësimet e Zotit, por shpesh i shpërfillim. Kjo është sikur të vësh një kovë mbi qiriun!

Prandaj Zoti Jezus na paralajmëron: nëse kemi veshë, më mirë t’i përdorim si duhet. Duhet të bëjmë diçka me mësimet e Tij. Mijëra të rinj kanë mësuar shumë gjëra nga Fjala e Zotit, por nuk i janë bindur asaj. Nëse nuk e dëgjojmë Zotin, atëherë nuk duhet të mendojmë që Ai do të vazhdojë të na dëgjojë. Për këtë e kishte fjalën Jezusi kur tha: “Me atë masë që ju matni, do t’ju matet juve”. Ai na jep atë që meritojmë. Prandaj, nëse nuk e marrim seriozisht Fjalën e Tij, nëse nuk e studiojmë atë në mënyrë që ta kemi si udhërrëfyes jete, mund të humbasim gjithçka. Ai mund të na e heqë Fjalën e Tij, ose t’i mbyllë veshët tanë ndaj saj.

Por, në të njëjtën kohë, Jezusi u premton dëgjuesve të Tij më shumë kuptim të të vërtetës së Tij, nëse ata e dëgjojnë dhe e besojnë Fjalën Tij. Dishepujt që ndoqën Zotin Jezus shpesh nuk e kuptonin atë që Ai po thoshte, e pavarësisht prej kësaj ata e besuan si të vërtetë atë që u thoshte Mësuesi i tyre. Ndaj Zoti u dha edhe më shumë aftësi për të kuptuar, ndërsa po i mësonte.

A po mëson Zoti, që mund ta fitojmë shpëtimin nëse e dëgjojmë Atë me kujdes? Jo, por Ai po mëson për pasojat që kanë veprimet që bëjmë. Ai e shpërblen të zellshmin, por ndëshkon përtacin. Ai jep shpërblimin e Tij, jo për shkak të zellit, por vetëm për shkak të hirit të Tij.

Le të jetë kjo lutja juaj e vazhdueshme: “Zot më ndihmo, jo vetëm të mësoj, por gjithashtu të bëj atë që më mëson. Më mbro nga lënia pas dore dhe nga refuzimi i gjërave që më ke mësuar. Më ndihmo t’i besoj ato, edhe kur nuk i kuptoj”.