JOHN 10
10
Naisoyaba ar boni melma
1Jisu thi ba, Gibi jang ang nisi khe thi du, sere subung melma khoh ni derga gede hapsingya, thikhabo gibin lama gede gaphu re, bo de makhao ar dakhat se. 2Sere subung derga gede jahi bising ha hapsing re, bo de naisoyaba se. 3Naisoyaba boni khlai hi derga khru ri du, ode melma boni khurang khe khna du. Bo jarni melma khe bumu thihi se longhun ba, ode bonsi khe baji ha lang smai du. 4Ode, bo khrip melma khe baji ha labu thar re thikhade, bonsini sagang sagang bo thang re. Ode, boni melma bokhe rikpha re, bede thikhala boni khurang khe bonsi tharmai du. 5Thikhabo, gibin subung niha bonsi thangphuya, bo ni phrang se bonsi khai ma, bede thikhala, gibin subung ni khurang khe bonsi tharmaiya.
6Ebo khe bonsi niha Jisu thiphin ri ba, thikhabo, snadi khe bonsi niha bo thiba, bonsi bujiya.
Jisu hamba naisoyaba
7Odebani, Jisu thiphin ba, “Ang nisi khe gibi gibi khe thi riba, melma ni khlai hi derga de ang ning. 8Ani sagang ha phaiyarao si, bonsi makhao ar dakhat se, thikhabo melma bonsi khe gainsongya. 9Derga de ang se. Sere ani gede jahi phai du, bo golam mai nang. Sere bising ha, bajiha thang re phai re, bo jimu mai ma se. 10Makhao de sthaima ar khaolangma ode sjam thar lang mane se ning phai re. Nisi hayu mai mane ode gabang mai mane se ang phai ba.”
11“Hamba naisoyaba ang se. Melma ni khlai hi jarni hang khe riphuyaba se hamba naisoyah. 12Yaowai ha raokhi dangyasa de naisoyasa bo niya, bubrabo niya. Odehe, jekhali bo rasa phaiba nu kha de, melma khe dangkhlai hi khai re, odese rasa melma khe waiphlung re ar melma khaiphlung thar re. 13Bo melma ni khlai hi de waimu nangya, odebani se bo khai ba; bede thikhade, bokhe yaowai ha se raokhi da ri ba. 14Hamba melma naisoyaba de ang se. Ang ani melma khe tharmai du, ar ani melma ang khe tharmai du. 15Abai ang khe tharmaiba lai ar ang Abai khe tharmaiba lai jasosi, odebani melma ni khlai hi ang jarni hang khe riphu du. 16Ani melma gibinbo dong, thikhabo ebo melma khoh ha de giri. Bonsi khebo ang labu ma. Bonsibo ani khurang khe bo khna ma, odese melma buthu dol si jama ar naisoya bo saosi ja ma.”
17Odebani se, Abai ani basao ha hamjaoba je ang jarni hang khe ri du, ode bokhe phin laphin la ma. 18Ani phrang bokhe saosibo lang phuya, thikhabo ang jar ning bokhe ri du; bokhe ri manibo ani hok dong, ode bokhe phin laphin lamanibo hok dong. Ani Bupha ni phrang se bo hukhum khe ang mai ba.
19Judarao ebo grao ni khlai hi thalaiya phin hi bonsi degao ba. 20Bonsi ni bising ha gabang subung thi ba, Boni ha de sgain madai se dong ba, ode bode gibir se, snadi jabani boni grao khe nisi khna ba?
21Thikhabo, gibin subung buthu thi ba, Eleiyaba grao buthu khe sgain bese dopha hi grao thi ba niya. Sgain madai la muthai gana khe muthai nu ri phu nang?
Jisu khe Judarao lonya
22Maising ha, Jerusalem ni Bikhoh Tharba ni Mel ja ba. 23Jisu Madaikhoh ha Solomon ni ronda ha himbai hi dong ba. 24Judarao bokhe gading hi sing ba, Bislei laohi jing khe baophrang phuriya hi deng ma kho? Ning Krista se thikhade jinthane ragao sisi thi ri lah.
25Jisu thiphin ba, Ang nisi niha thi ri kha, thikhabo nisi lonya. Ani Abai ni bumu jang snadi khusi khe ang dang ba, ani khlai hi de bo ning sakhi se, 26thikhabo, nisi de lonya, bede thikhala nisi ani melma niya. 27Ani melma ani khurang khe khna du; ode, bonsi ani yaohon rikpha du. 28Thaoglao ni hayu khe ang bonsi ne ri re, ode bonsi ar jamthaoya. Bonsi khe saosi bo ani yao ni phrang se phu nang niya. 29Ani Abai, sere bonsi khe anthane ri ri ba, khrip thane dedaothao, odebani saosi bo bonsi khe Abai ni yao phrang se phu nang niya. 30Ang jang Abai de saomang masi se.
31Bokhe lem mane Judarao longthai khonphin ba; 32odebani Jisu bonsi khe thi ba, Nisi niha gabang ning hamba khusi gedeba khusi khe Abai ni phrang ang dang phnu ba. Boni bising ha snadi khusi dang bani khlai hi nisi ang khe longthai lem ma bao ba?
33Bo buthu hamba khusi dang bani de jing longthai lem ma baoya, thihi Judarao thiphin ba, bede thikhala, ning Madai khe siji du, odehe ning subung jahibo jar khe Madai thihi thi la du.
34Jisu bonsi khe thiphin ba, Ang thiba nisibo Madai se thihi nisi ni Dara ni laisi ha rebyaba giri? 35Jodi bo bonsi khe Madai thihi long re, sere niha Madai ni graothai sophai ba, odebani sastro ni graothai jamthaoya. 36Sere khe Abai gathar saikhu hi phirthi ha haihayaba khe ning Madai khe se sijiba thihi nisi bokhe thima kho, odebani se Ang Madai ni Basa se thihi ang thiba? 37Ani Abai ni khusi khe ang dangya thikhade ang khe da lon. 38Thikhabo jodi ang se dang la ba thikhade ang khe lonma nangya, thikhabo bo khusi buthu khe de lon lah. Odebani nisi tharmai lah ode buji lah, Abai ani ha dongpha du ode angbo Abai niha dongpha du.
39Odebani, bonsi bokhe remphin ma bao ba, thikhabo bonsini yao ni phrang gosram lang ba.
40Odehe, Jisu Jordan nar ha, braha Johan sagang ha baptisma ri re, bo hathan ha thangla ba, ode oraha ning dong ba. 41Gabang subung boniha phai hi bonsi thi ba, Johan gmang thaosisiyaba sin musi khebo dang phnuya, thikhabo Johan snadi khe eboni balam ha thi lang ba, bo khrip gibi se. 42Odebani, oraha gabang subung bokhe lon kha.
Trenutno izabrano:
JOHN 10: DIMASBSI
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.