LUKE 19
19
Jisu jang Zakaia
1Jisu, Jeriko ha thanghi bokhe baiso lang ba, 2oraha, subung saosi, bumu Zakaia thiyaba, dong ba. 3Bo Jisu khe bede laiyaba subung thihi naima bao ba; thikhabo subung bangbani ar bo hilik bani, bo Jisu khe nuha phuya, 4Odebani, bo Jisu thangmani lama ha, subung githim laiyarao ni sagang ha, khailang dada, Jisu khe naimane, bo thaikhrao phang ha gakhu ba. 5Jisu oraha sophai ba ha, bo naikhu hi, Zakaia khe thi ba, Zakaia, ning srap akhai bu lah, dini ha nini noh ha ang noh mathao ma.
6Odebani, Zakaia srap akhai buhi, bo khe jarni noh ha noh mathao ri kha. 7Bo khe nuyarao khrip bo berlai ba, Ebo subung la phaphi subung ni noh ha noh mathao ba.
8Zakaia songkhu dada, Gabra khe thi ba, Gabra, ani ha dongba si ni phrang ang gejer khe dukhisarao ne ri nang; ang sereba subung ni rang khe thokhi dada ang la kha thikhade, ang bo ne phantha bri riphin ma.
9Jisu bo khe thi ba, Dini ha ebo noh ha, goma sophai kha; bede thikhade, bo bo Abraham ni basa ning. 10Gamayarao khe smaihi sogo mane se Marsini Basa de phai ba.
Gajao ni rang botho ni daogari
(Mt. 25.14-30)
11Jisu ni grao khe subung buthu khnaba ha, Madai ni raji sophai kha thihi bonsi lonbani bonsi ne daogari masi sainthi ba. 12Bo edehe thi ba, Subung gedeba saosi, raja slamjao mane, raji gajain ha thang du, odehe yaohon ha bo phaiphin ma bao ba. 13Bo thangya sani ha, jarni leng jhi khe long dada, khrip ne gajao ni rang botho, masi masi khlai hi ri ba; ar bonsi khe thi ba, Ang phaiphinya si de, ebo rang jang bephar khlai lah. 14Thikhabo, boni rajini subung buthu bokhe naisle ba, jini raja jamane ebo subung khe jing nangjaoya thihi bo khe khna rimane, boni yaohon ha bonsi graodiyahrao khe haiha ba. 15Bo raja slamjao hi, phaiphin dada bo rang riyaba khe bonsi bislei lab mai kha thihi sing mane boni leng buthu khe longthim ba. 16Sagang thaoyaba phai hi, boniha thi ba, Gedema, ning riyaba gajaoni rang botho majhi lab mai kha. 17Bo bo khe thi ba, Ning hamba leng, ning hamba khusi dang kha, gejesi ni basao ha ning lonma dong bani, nolei majhi ni basaoha hoja ja lah. 18Giniyaba leng phai hi thi ba, Gedema, ning riyaba gajaoni rang botho masi de mabowa lab mai kha. 19Bo bo khe thi ba, Ning bo raji mabowa ni basao ha hoja jahi dong lah. 20Gibin leng bo phaihi thi ba, Gedema, ning riyaba gajaoni rang eraha dong; rihsa jang merai hi, ang phip ba. 21Ning khah raoyaba subung jabani, ning khe ang khin ba; sumjabani thikhala, jarni niyayaba khe ning la re, ar braha ning gaiya, oraha ni phrang ning ra re. 22Bo bokhe thi ba, Hamyayaba leng! Nini jarni grao jang ning, ang ning khe gajai ri du! Ang ning khah raoyaba subung, jarni niyayaba khe layaba ar gaiyayaba ha rayaba thihi ning mithi du na? 23Ode thikhala, ning sumjabani ani rang khe bephar ni noh ha dengya ba? Ang phaiphin ba ha, sut jang ang mai kha mu! 24Oraha songyarao khe bo thi ba, Boni ha dongyaba gajaoni rang botho masi khe, bo ni phrang se lang lah, ar gajao ni rang majhi dongyaba niha ri lah. 25Thikhabo, bonsi bo khe thi ba, Gedema, bo la rang botho majhi mai kha! 26Bo thiphin ba, “Ang nisi khe thi du, sere niha dong, bonthane baosing ri nang. Ar sere niha giri, boniha dongyaba khebo, bo ni phrang lang lama se. 27Thikhabo, bonsini basao ha ang khe raja jamane maniyayarao khe eraha labu hi, ani sagang ha bonsi khe sthai lah.”
Jisu Jerusalem ha hapsing ba
(Mt. 21.1-11; Mk. 11.1-11; Jn. 12.12-19)
28Bo grao khe sainthi blaihi Jisu saganghi Jerusalem gede thang ba. 29Bethphage jang Bethani nolei rogong ni Oliv hading ha, bonsi sohi dada, bo jarni rikphayarao ni bising ha, subung gini khe haiha ba. 30Bo bonsi khe thi ba, Nisi ni sagang phrang song nolei ha, thang lah, nisi sohi kha ning, mihleng basa, boni basao ha saosi bo gaba giriyaba, masi khe nisi nu nang; bo khe khru dada eraha labu lah. 31Asaba bo, sumjabani bo khe nisi khru ba thihi nisi khe sing re thikhade, slingriya bo khe nang du thihi bo ni ha thi lah.
32Ode, haihayarao thang la kha. Bonsi niha sainthiba lai ning khrip khe bo bonsi nuhi kha. 33Mihleng basa khe khrusaiba ha, bubra bonsi khe thi ba, Sumjabani nisi bo khe khru ba?
34Bonsi bo khe thiphin ba, Gabra bo khe nangjao du. 35Ode, mihleng khe Jisu niha sikbu hi labu dada, bonsini rih khe mih ni basao ha yen hi Jisu khe ga ri ba. 36Bo gahi thangba ha, subung buthu bonsi ni rih khe lama ha yen phalang ba.
37Jerusalem ha sophai ma ja ba ha, Oliv hading ha thangmani, lama sohiba ha boni rikphayarao khrip bo, boni khusi gmang thaosisi khe nuhi, bonsi khrip bo khaja ba, ar khrip bo jirik khao hi, Madai khe bakhan khlai ba. 38Gabra ni bumu jang phaiyaba Raja bakhan ja thing. Sorgo ha shanti dong thing, basaothao ni muima ja thing!
39Subung buthu githim laiyarao ni bising ha, Pharisairao gejesi Jisu khe thi ba, Slingriyah, nini rikphayarao khe phirik phirik dongma sani lah.
40Jisu thiphin ba, Nisi khe ang thi du, bonsi phirik phirik dong re thikhade, longthai buthu bo jirik khao ma se.
Jisu Jerusalem ni basao ha gra ba
41Bo sampha phaihi nolei khe nuba jang, bo gra ba. 42O! Ning bo shanti ni grao khe tharmai kha de ham nang mu dou! Thikhabo, duha la ning bo khe nuphuya kha. 43Nini sotrurao, nini basaoha sersi giding gading hi khrip gede ni phrang ning khe gaso mane basain sophai nang. 44Nini bising ha dongyaba ansarao ar ning bo dangkhlai jaohi dong nang; ar nini khorong ni longthai thaisi bo gurungya hi dong nang niya, sumjabani thikhala, ning khe sogo mane Madai phai bani bubli khe ning mithiya.
Jisu Madaikhoh gathar khlai ba
(Mt. 21.12-17; Mk. 11.15-19; Jn. 2.13-22)
45Odehe, Jisu Madaikhoh ha hap hi, oraha bephar khlaiyarao khe rikhlai thar ba. 46Bo bonsi khe thi ba, Ani noh de bimani noh se thihi reb du. Thikhabo, nisi la bo khe makhaorao ni thimkhoh slam kha.
47Sain midi bo Madaikhoh ha slingri ba. Jonthairao ar Dara khe slingriyarao ar Pharisairao bo khe sthai ma bao ba. 48Thikhabo, subung buthu khah jang muh jang bo sainthiyaba grao khe khnabani, bo khe bonsi musi khlai phuya.
Trenutno izabrano:
LUKE 19: DIMASBSI
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.