LUK 4
4
Jisu mdo Pthleem
1Ungta Jisua pthla kchiir ri dim chda Jordon ki mdil kinle da, ungu pthla ngi ṭhida. 2Mleija nii som plii thung ngi kbowklaiji Dijabowlli pthleemda. Ungta ava nit lim thungva Mma ngi then khat lee chaa me, mpha ava mthlan dok thungta, Mma ava mpoi tham da. 3Dijabowlli Mhin theda, “Nah Isowr Chapa akurthutta, hava lung nga thenpen mkur owl nra pau areen.” 4Ungbi Jisu ngi mhin arthawng da, “Hava mdo kjit dok, ‘Miilai ava thenpen daatti ring nime.’” 5Ungta Dijabowlli hanṭhida, mpha mruk daat thung ngi, dultipaam ki kruwngpaam rek mkheng tdet da, 6ungu Mhin theda, “Hava rutan leh laarnee mkheng neiji Nah hin apii nik di; mleija nei kihin ni mdo tparlaan dok, neiji kdo piik nuwm mii ava hin pii nik di. 7Nang ngi nei luw atbuk bi, mkheng nga Nah adora.”
8Ungbi Jisu ngi mhin arthawng da, “Ava mdo kjit dok, ‘Nang ngi nangki Isowr Mukpu ava luw ado buk ra, ungu Mma hin daatti sok adolo ra.’ ”
9Ungta mma ngi Jisua Jerusalem tha ṭhida, luwbuk Inn thlun leen tha kalṭhida, ungu Mhin theda, “Nah Isowr Chapa akurthutta, hava thungki jung khuwng; 10mleija hava mdo kjit dok, ‘Nah akseel rang ngi Mma Waan tamsii rek arju ksiira. 11Ungu Akhu ngi lung ado thown ma nra, mmaanni mkhut rek inni akukdom pṭoi lamra.’ ”
12Ungbi Jisu ngi mhin arthawng da, “Ava theda, ‘Nang ngi nang ki Isowr Mukpu ava nang ngi ado pthleem ro nime.’ ”
13Ungta Dijabowlli mdo pthleem khim khai mṭut dok thungta, mpha kcha ava mphaak du khim khai ma da sun chda.
Galil thu Jisu ngi Mnong mdo Pṭhun
14Ungta Jisua pthla ava rutan ni Galil tha kinle da, ungu Mma ki mlei pau ava marveel ki khuwpaam mkheng thung ngi kurjou da. 15Ungta mii mkheng do punlor dokki, Mma ngi synagog rek thung ngi purchuk da.
Nasareth thu Jisua mdo Pthlei
16Ungta Jisu ngi mlin msaanna Nasareth tha arvang da; ungu sabath nitti mhai kcho nopa ngi synagog tha vada. Ungta kpa rang ngi Mma ngi rip da, 17Ungta Mhin khulpu Isaijah Laaika ava pii lamda. Mma ngi Laaika ava phel da mdo kjit na mun ava pha da,
18“Mukpu pthla ava kleenni amda,
mleija sra mii hin kṭha paumin kparyaam ra thao mdo pbul dok,
Kparyaam ra ungu paamsuwk kparthlet ra,
ungta mik ktot ti khuw mdo dee chaak nra,
mdo owr rekki kintek mdo phaak chaak nra,
19Mukpu ki talo chaak
kurhui kum kparyaam ra,
Mma ngi Neia mdo tsii.”
20Ungta Mma ngi Laaika ava pkhum dok da, ungu vaiklou hin pii pinle da, ungta ku ongda; ungbi synagog thung ki mik mkheng va Mma daat suw lam da. 21Ungta Mma ngi mhin inni kthe pṭhun da, “Snii ngi naan do aryaak naa thung ngi hava Laaika ava kurkhumma.” 22Ungu Mma ava mii mkheng ngi plung kngammi pau nlam da,ungta Mner thungki wonsat pauna rek kthuwk ava ngi ngak chlam da; ungbi mmaanni theda, “Hava Joseph Chapa pme mo?” 23Ungbi Mma ngi mhin inni theda, “Ksoi liit kma pauril ava naanni mtiker psuk naan di, ‘Kdimpa adaksaa kpardam cha; Kaparnahum thung ngi ado tlot neenni kdo aryaak in ava, hava Nah akhuwpaam thu ruk va atlo.’ ” 24Ungta Mma ngi theda, “Kinditti, Neiji ahin thaanni kthea, khulpu ku mii khat lee ava mdaksaa khuwpaam thugva ro nuwmme.
25Pdainu kindit katti Neiji ahin thaanni kthea,Elijah nit rek thungva,Isreel thu meikhunuh knem pok ka am, kum kdum thla truk thu parwaan ava arkam pthii da, paam mkheng thung ngi poi tham klin langlang khat arvang da; 26Ungbi Elijah ava ku mii khat lee hin kma, Sidon paam thungki snu meikhunuh Yeriphat hin daatti mdo sii. 27Ungta khulpu Elisha mpha thung ngi Isreel paam thu ngi raaichii kthung mii knem pok ka am; pdainu Syria ki Naban hin daat kma donle, ku khat lee pre kartleu me.” 28Mmaanni hava maryaak in thungta, synagog thung ki mii mkheng nga kdung ngi plung pthit lamda. 29Ungbi mmaanni rip lamda khuwpii ava duwn tha Mma ava ṭhi lamda, mkhuwpiin mdo sak naan lown tunni, mdo juk purlu pthii nraan hanṭhi lamda. 30Pdainu mmaan arlakki lut da sun chdok da.
Pthla Kṭha kma Doṭhi Miilai Khat
31Ungta Mma ngi Galil ki khuwpii khat, Kaparnahum tha jungda, ungu Mma ngi sabath nitti mhin inni purchuk da; 32Mma do purchu ngi mmaanna ngak chlam da, mleija Mma pauna ava rutan tu kilṭhi da. 33Ungta synagog thung ngi tarnam ktobor pthla kthloi miilai khat amda; ungbi krowl kparyaa khatti mma ngi keu da, 34“O! Nasareth ki Jisu, neenna talu mpardit chnaan da? Nah ku pti tdit neenni kdee in, Isowr ki Kchiir Khat ava pti.” 35Pdainu Jisu ngi mhin raida, theda, “Rim kdi am, ungu mma thungki arvan thuwk dok!” Ungta tarnam ava ngi mmaan arlakki var pthii thida mma thungki arvan thuwk da, sulkpurnul ava tlo me. 36Ungta mmaan mkheng nga ngak chda, khat leh khatti the lamda, “Hava talu pauna daat da? Mleija rutan leh rutan pum mi pau mreenna, pthla ktobor rekka arvan kthuwk lamma.” 37Ungta marveel ki paamkowl rek mkheng thung ngi Mma mlei ava kurjou da.
Jisu ngi Mii Knempok mdo Pdam
38Ungta Mma ngi rip da synagog ava ma thida, Simon inn thu lut da. Tunva Simon kternu ava riiphaak ki koi chda, ungbi mmaanni Mhin the pik lam da. 39Ungu Mma ngi mbe tha rip da riiphaak ava raida, ungbi ma dok da; ungta snu ava ngi kardel teng da mhin inni sok lo pik lamda.
40Tunva kniw mjuntlaak thungta, kukuh daat don msik msik omlaiji kukoi mii rek khim khai ṭhi paphaak lamda, ungu Mma ngi mkhut ava mii pum ktai leen khiin pik da, pdam chlam da. 41Ungta tarnam rek ruk mii knempok thungki thuwkda, keu lamda, “Nah Isowr Chapa pti!” Pdainu Mma ngi rai lamda, ungu mpau raanna rot pik lamme, mleija Khrista tdit mmaanni dei da.
Synagog rek thu Jisu ngi mdo Purchu
42Ungu suwn mvee thungta Mma ngi kurlouda mmun ktliing khat thung ngi vada. Ungta mii rekki thlaam da Mhin arva lamda, mmaan ma pthii da msun ra ava ro lam mda; 43Pdainu Mma ngi mhin inni theda, “Neiji khuwpii murson rek thung ruk va Isowr ki Kruwngpaam kṭha paumin kdo paryaam ma ro me; mleija Neia ava tummi mdo tsii.” 44Ungta Mma ngi Judia ki synagog rek thung ngi paryaam da.
Trenutno izabrano:
LUK 4: LAMKBSI
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.