Mata 4
4
Nɛɛ̀n aa Sámbàŋyɛ́rə̀ də́' ɛ̀g Yéésù rú roó
(Markus 1.12-13; Luka 4.1-13)
1Bòórú gə́, Nwul Gìdń pà' àà Yéésù fɔ̀gú, bɔ̀b Sámbàŋyɛ́rə̀ də́' dá oò ɛ̀gə̀ kúnú. 2Zɔ̀ŋ aa Yéésù gíd in tígə́l laa iira kə̀ nyàámbərə̀ laa iirə yée gə́, gulùm nwu'ù yàá. 3Nɛ́d nɛ́ŋə̀ bə̀ də́'ǹ ɛgǹ gbad yaà oó sunú, bít bààù: «Ń tə́ Vɛnɛ́b Wàà vɛ́nà gə́, m̀ bàà bəŋ bəraa yée, boò bíl bə̀rɛ́d bərá.»
4Zá Yéésù kè' í' bààù: «Núúboòd Gìdń bàà: ‹Nɛ́ŋə̀ dá gɔ̀ŋsə́ oò ko'ǹ kə̀ bə̀rɛ́d ní gá, zá kə̀ nwɔŋ bəraa Vɛnɛ́b bàà rə gə́ kóólé.› »
5Kàanyée gə́, Sámbàŋyɛ́rə̀ pà' ààù Urusalima bìl Gìdńnú, dá dí'ù láŋsə́ wúl yílú, 6bít bààù: «Ń tə́ Vɛnɛ́b Wàà gə́, sə́d ǹ pí'à zɔ̀ŋə yɛ́b ba. Kàandə, Núúboòd Gìdń bàà:
‹Vɛnɛ́b dá malaika oò bəd tuùm boò láŋ n kúnú,
bít bə̀ dá n pa'ǹ boò nɛɛ̀n tɛ́mú, bɔ̀b ǹ də̀' dun bəŋ bə sí.› »
7Yéésù kè' í'ù: «Núúboòd Gìdń bàà tə́ kə̀ aakíin sɔ̀ŋ: ‹Də́' ǹ ɛ̀g Báátììkpɛ̀ŋ Vɛnɛ́b ḿ sí.› »
8Sámbàŋyɛ́rə̀ pà'ù sɔ̀ŋ, ɛ̀mə̀ kə̀ kɔ̀l bùúd gbà'á yílú. Dá ì'ù gààd yɛ́b bəraa zɔ̀ŋə yɛ́b bərə kóólé, kə̀ kaŋsɛ́l boò bəd tá, 9bít bààù: «Máá n in bəraa yée kíìn piìn kóólé, ń kùmì kə̀ dunlígə̀rá, bít ń káŋ mə́ì gə́ roó.»
10Kàanyée gə́, Yéésù bààù: «Zá' ǹ ɛ̀m zɔ̀ŋ bùúd kə̀ máára, Satan! Kə̀ aakíin də, Núúboòd Gìdń bàà: ‹Ǹ káŋ Báátììkpɛ̀ŋ Vɛnɛ́b ḿ da, bít m̀ mà' tù' oò ní.› »
11Kàanyée gə́, Sámbàŋyɛ́rə̀ zá' dààù taá. Bít malaika bəd ìì yaà Yéésù sunú, yaà bə̀ pììù taà tù' ma'ǹmbìá.
Yéésù sɔ̀d tù' oò Galili yɛ́b ba
(Markus 1.14-15; Luka 4.14-15)
12Zɔ̀ŋ aa Yéésù kìì kò' bə̀ páá Yohanaì wúltígə́l bə̀ rú gə́, zá' ɛ̀m Galili yɛ́b ba. 13Zá' Nazaratu bìlú, bít yaà kùm Kapɛrnaum bìlú. Bìl aarə, pe' tə́ kə̀ wəl nyìgə̀l aa bə̀ dɛ̀d Galili rə tá, Zabulon yɛ́b ba, kə̀ Neftali yɛ́b ba. 14Mà' kə̀ aakíin də, bɔ̀b nwɔŋ aa Vɛnɛ́b gbantumsə̀ aa bə̀ dɛ̀rə̀ Esaya, bàà dàà rə, oò wə́ə́ kúnú:
15«Zabulon yɛ́b, kə̀ Neftali yɛ́b tá,
bə̀ tə́ nwuu gbà'á kpaŋú, Urdun nwuu naà gúuú.
Aarə, Galili yɛ́bá, zɔ̀ŋ aa nɛ́b bəraa bə̀ bàg Vɛnɛ́b síndə,
bə̀ ləə bəroó!
16Nɛ́b aa bə̀ kùm tígə́lə́ rə,
bə̀ bé' laa nyɛdkè gbà'á yàá.
Nɛ́b aa bə̀ ləə nyìsə̀ rú, val yɛ́b bərə,
laa yaà nyɛrì boò tə́ŋú.
17«Sɛŋ aarə bəní, Yéésù sɔ̀d nɛ́b bəd Vɛnɛ́b nwɔŋ udǹmbìá, bàà bə̀: ‹Ìì sɔ̀g kúnú, kàandə, sɛŋ aa Vɛnɛ́b yaà dá gààd ləə̀n dú, nɛ́b oò bəd yílə́ rə, wə́ə́ yàá!› »
Yéésù dɛ̀d nɛ́b díb bə̀ ko'ǹ bəd naara
(Markus 1.16-20; Luka 5.1-11)
18Zɔ̀ŋ aa Yéésù tə́ bagǹ Galili nwuu gbà'á kàd bə yée gə́, bé' nɛ́b díb bə̀ kodǹ bəd iira, Simon aa bə̀ dɛ̀rə̀ Piyɛr roó, kə̀ kudvɛɛ̀l oò Andre tá, bə̀ tə́ lìbə̀ gúdǹ nwuu gbà'á rú; kàandə, bə̀ nɛ́b díb bə̀ kodǹ bərá. 19Yéésù bàà bə̀: «Ìì bàg máára, má ii ma'ǹ íí dá kuùm nɛ́b nɛ́b bəd bə̀ dɛdǹ wáàlǹná.»
20Kə̀ nwɔŋ aa nuù yée kíinní, zá' bə̀ dàà lìbə̀ boò bərá, bít ìì bàgə̀ kúnú.
21Yéésù zá' wərà, ɛ̀m dáá númú zɔ̀ŋ bùúd zɔ̀gɔ̀ gə́, bé' nɛ́b kambəd iirə sɔ̀ŋ' Yakuba kə̀ kudvɛɛ̀l oò Yohana tá, Zebede yɛb bərá. Bə̀ kùm kə̀ə̀d nə́ŋ̀ú, kə̀ báá boò Zebede tá, bə̀ tə́ lìbə̀ boò bəd dúgúlàá. Yéésù dɛ̀d bə̀ kúnú. 22Kə̀ nwɔŋ aa nuù yée kíinní, zá' bə̀ dàà kə̀ə̀d kə̀ báá boò tá, bít bə̀ bàg Yéésù ra.
23Yéésù gəə̀l bɛ́' Galili yɛ́b kə̀ zɔ̀ŋtá, kə̀ nɛ́b bəd Vɛnɛ́b nwɔŋ sáànmbə̀ Yahudu bəd wúlwáàlbə̀ bərú, bàà nɛ́b bəd Nwɔŋ Puu sɔ̀ɔ̀nkè aa Vɛnɛ́b dá kə̀ gààd ləə̀n boò tɛ́mú roó, bít gáŋ nɛ́b mad bə̀ bəd kóólé sisá, kə̀ nɛ́b bəraa mad yɛ̀l bə̀ si' rə tə́ kóólé. 24Nə́gə́l oò sa' ɛ̀m Siriya yɛ́b bə kóólé, bít pú' bə̀ ààùwà nɛ́b bəraa tə́ búúd bé'ǹ kə̀ mad bəd doó, kə̀ in nwuukè luùm gɔ̀ŋ gɔ̀ŋ doó, nɛ́b nwul vaksə́ bə̀ bərá, nɛ́b laa gbíid bə̀ bərá, nɛ́b si' val bərá. Bít Yéésù gáŋ bə̀ si' boò bərá. 25Nɛ́b bəd zùúm bə̀ bàgə̀ùwà bòórú. Nɛ́b bəd də, bə̀ vúgə́là Galili yɛ́b ba, yɛ́b aa bə̀ dɛ̀d Bìl Kób də ba, Urusalima bìlú, Yahudiya yɛ́b ba, kə̀ Urdun nwuu naà gúuú.
Trenutno izabrano:
Mata 4: SLNT98
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Nouveau Testament en Samba Leko © Alliance Biblique du Cameroun, 1998.