Luka 2
2
Okuzaalibwa kwa Yesu
(Mat 1:18-25)
1Agho olwatuuka mu nnaku edho, ekiragiro kyava ewa Kaisari Agusito nga kikoba abantu okubalibwa. 2Okubalibwa kuno okwasooka, kwaligho nga Kwirinio n'afuga Siria. 3Abantu boonaboona baaja okughandiikibwa, buli muntu ku kyalo eky'ewaibwe. 4Yosefu yeena yaava mu kyalo Nazarethi eky'e Galilaaya yaaniinaniina okuja mu kyalo kya Daudi mu Buyudaaya, ekyetebwa Bethelehemu kuba yali wa kika kya Daudi, era wa ku nda ye. 5Yaaja okweghandiisa ni Maria eyali amaze okumwandhula, era ng'ali nda. 6Agho olwatuuka nga bakaali eyo, enaku dhe edh'okuzaala dhaatuuka. 7Yaazaala omwana we omuberi nga mulenzi, yaamuzingirira mu bugozi, yaamuta mu kiibo ensolo mwe dhiriira kuba tibaafuna kifo mu ndhu ey'abageni.
Abaayi ni bamalaika
8Mu kiketezo ekyo mwalimu abaayi abaabanga eyo mu byayiro obwire nga bakuuma ebyayo byaibwe. 9Agho malaika wa Musengwa yaidha ghe baali, ekitiisa kya Musengwa kyayaka okubeezungulula era baatya inho. 10Aye malaika yaabakoba ati: “Mutatya, mubone eno, mbaleeteire Amawulire Amalungi era agasangaaza eri abantu boonaboona 11kuba olwaleero, mu kibuga kya Daudi, omununuzi Kurisito Musengwa, abazaaliirwa. 12Kano akamanhiso kwe munaamanhira: Mwidha kwagaana omwana omughere nga bamuzingiriire mu bugozi nga bamulambaaziiza mu kitabo.”
13Tibwalwa nga ghabaagho ogukuukuubira ogw'eigye eikologho ery'omu igulu ghalala ni malaika ole, baasaaka Katonda nga bakoba bati:
14“Ekitiisa kibe ye Katonda eyo ghaigulu yeene,
n'emiraala gibe ku nsi ku bantu be b'agonza.”
15Bamalaika bwe baamala okuva abaayi ghe baali ni baja mu igulu, abaayi baakoba bati: “Tuje e Bethelehemu tubone kino ekibaireyo, Musengwa ky'atumanhiisa.” 16Baaja nga bangugha, baayagaana Maria ni Yosefu n'omwana omughere nga bamulambaaziiza agho mu kitabo. 17Bwe baabona omwana, baaghaya ku bintu malaika bye yabakobera ku mwana oyo 18era boonaboona abaabiwulira, beewuunhia inho ebintu bino abaayi bye baabakobera. 19Maria ebibono ebyo byonabyona yaabita ku mwoyo era yaabirowoozangaku inho. 20Abaayi baagolola nga bagulumiza Katonda era nga bwe bamusaaka, olwa byonabyona bye baabona ni bye baawulira nga bwe byabakoberwa.
21Bwe dhaatuuka enaku omunaana omwana okukeketebwa, baamutuuma eriina Yesu, eriina malaika lye yamweta nga n'enda ye ekaali kutoolebwa.#Lev 12:3; Luk 1:31
Yesu bamughaayo mu isinzizo
22Enaku edh'okutukuzibwa kwaibwe bwe dhaatuuka nga bwekiri mu Mateeka ga Musa, baamutwala e Yerusalemu okumughaayo ye Musengwa.#Lev 12:6-8 23Nga bwe kyaghandiikibwa mu mateeka ga Musengwa kiti: “Buli mwigulanda ow'obulenzi anaabanga mulonde wa Musengwa.”#Kuv 13:2, 12 24Era baaja n'okughaayo omusengo nga bwe kyalagirwa mu iteeka lya Musengwa amayemba abiri oba enjiibwa ento ibiri.
25Mu Yerusalemu mwalimu omuntu, eriina lye nga ni Simeoni, nga muntu akola ebituufu, atya Katonda ng'alindirira okununulwa kwa Isiraeli, era Mwoyo Mutukuvu ng'amuliku. 26Mwoyo Mutukuvu yali amaze okumumanhisaaku ati talifa ng'akaali kubona ku Kurisito, omusiige wa Musengwa. 27Oyo ni yaidha mu isinzizo, Mwoyo Mutukuvu nga n'amukobye. Era abazaire ab'omwana Yesu bwe baamuleeta okumukolaku ebimugemaku ng'empisa y'eiteeka bwe yali, 28yaamugema mu mikono gye, yaasaaka Katonda ng'akoba ati:
29“Mperaano Musengwa,
siibula omugheereza wo mu idembe nga bwe wakoba.
30Kuba amaiso gange gaboine okulokola kwo,
31kwe wategekera mu maiso ag'amaghanga goonagoona:
32Ekimulika eky'okumulisa amaghanga ekitiisa,#Isa 42:6; 49:6; 52:10
eky'abantu bo Abaisiraeli.”
33Ise n'inhina beewuunhia inho ebibono bino ebyamwogerwaku. 34Simeoni yaabasabira enkabi, ate yaakoba Maria inhina ati: “Ono omwana ateereibwagho olw'okuzikirira n'okuzuukira okw'abangi mu Isiraeli, era abe akamanhiso ak'okutakania. 35N'iwe mwene weena omwoyo gwo empiima erigufumita, olwo ebidhuubo ebiri mu myoyo egy'abangi byeyerula.”
36Era ghaaligho ni Anna omulanzi mughala wa Fanueli, ow'ekika kya Asheri, eyali omukazi omukaire. Okuva ku myaka gye egy'obwegha yamala n'iba emyaka musanvu. 37Yaaba namwandu okutuusa emyaka kinaana n'ena. Yali nga tava mu isinzizo, omusana n'obwire ng'ali ku kugheereza Katonda, kusaba na kusiiba. 38Mu kiseera kyene ekyo yaatuuka yeebaza Katonda, era yaayogera ku mwana oyo eri boonaboona abaali balindirira okununulwa kwa Yerusalemu.
Okwirayo e Nazarethi
39Bwe baamala byonabyona eiteeka lya Musengwa bye liragira, bairayo e Galilaaya, mu kyalo eky'ewaibwe e Nazarethi.#Mat 2:23 40Omwana yaakula yaaba wa maani, ng'aidhwire amagezi era n'enkabi dha Katonda ng'ali nadho.
Omwana Yesu mu isinzizo
41Buli mwaka, abazaire ba Yesu baajanga e Yerusalemu ku Kibinuko eky'Okubitizibwa.#Kuv 12:1-27; Ma 16:1-8 42Bwe yagheza emyaka eikumi n'ebiri egy'obukulu, baniinaniina okuja ku kibinuko, ng'empisa bwe yali. 43Enaku bwe dhaawaaku, nga bali kwirayo, omwana Yesu yaasigala mu Yerusalemu. Aye abazaire be tibaamanha, 44baali badhuuba bati bali naye mu bantu, be baali bali kutambula nabo. Era baatambula olugendo lwa lunaku lulamba, nga bali kumwagala mu b'ekika ni mu bamanhe. 45Bwe bataamubona, bairayo e Yerusalemu nga bali kumwagala.
46Nga ghabiseegho enaku isatu, baamwagaana mu isinzizo ng'atyaime ghagati mu beegeresa ng'abawulirisa, ate nga bw'ababuuza ebibuuzo. 47Era boonaboona abaamuwulirisa beewuunhia inho amagezi ge, ni bye yairangamu.
48Abazaire be bwe baamubona, baayasaamirira, era inhina yaamukoba ati: “Mwana wange, lwaki otukoze otyo? Bona, lata wo ninze obweira tuli kukwagala nga tuli beeraliikirivu inho.” 49Aye yaabakoba ati: “Mubaire mundhagalira ki? Mubaire timwidhi nga nteekwa okuba ku gwa Lata wange?” 50Aye ekibono kye yabakoba tibaakitegeera.
51Agho Yesu yaaserengeta nabo, yaatuuka e Nazarethi, era yaabawuliranga. Inhina ebintu ebyo byonabyona yaabita ku mwoyo. 52Yesu yeeyongera mu magezi n'okukula era n'okugonzebwa Katonda n'abantu.#1 Sam 2:26; Nsa 3:4
Trenutno izabrano:
Luka 2: Sog
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Baibuli Ekibono kya Katonda © The Bible Society of Uganda, 2014