Mt 9
9
Yesus asye mbombog
Mk 2,1-12; Lk 5,17-26
1Ndò angabed a mal, adaṅa e kindig fòg, akui a tisòn dzie. 2Ndò bëngasò ai nyè mbombog oboo a okëkamba. Yesus ayënë fò ṅyëbë waban, nyè ai mbombog na: bana nnëm, a mòn wam, minsëm mie mivaaban wa. 3Antëm na, bësaṅa bëkalara bëvòg bëngakòbò a nnëm ete na: E mod nyò akpëlë Zamba. 4Mbol Yesus angabë ayëmë mintsogan miaban, ndò adzo na: A dze miatsog bëbe bë mam a minnëm mian? 5Dze enë ebugbu abui, yë adzo na: «minsëm mie mivaaban wa», ngë ki na: «Kodogo a si, owulu?» 6Asu yë na miyëm na mòn mod abëlë ngul ya avaè minsëm a si, ndò azu dzo ai mbombog na: Kodogo a si, bodogo okëkamba woe, okë a nda dzoe. 7Ndò angakodo a si, adugan a nda dzie. 8Ndò minkunda mingayen, mingambara, bëngalugu Zamba ya angavë bod akyaè ngul te.
Yesus aloe Mateus
Mk 2,13-17; Lk 5,27-32
9Yesus angakë ai dulu osu, ayenë mod dzoe na Mateus#9,9-13Hë a mbëmbë foe Mateus etam ngò nnòṅò ntòlò nyò anë dzoe na Mateus. Markus ai Lukas baloe nyè na Levi. atoa a nda toya, nyè ai nyè na: toṅo ma. Ndò angakodo a si, angatoṅ nyè. 10Mbol angabë atoa na adi a nda#9,10: Eyòṅ ziṅ na nda Mateus ngë nda Yesus., abui bënòṅò bë toya ai bësëm minsëm bësòò, bëntoa ai Yesus ai bëyègè boe. 11Ayën bëfarisea bëngayen e dzam di, ndò badzo ai bëyègè boe na: Asu dze ṅyëgëlë waan adi fufulu ai bënòṅò bë toya ai bësëm minsëm? 12Mbol angawog, nyè na: E bod bënë mvoè bayaṅan ki ai mbëbala, hë e ba bakòn. 13Kaṅan yègè e dzom yatian na: Nnëm ngòl ngò mayaṅan ai wò, së ki mëtunëṅa#9,13Os 6,6. Amu mandzë ki sòṅ loe bësosoo, mëngazu loe bësëm.
Adzo eki bidi
Mk 2,18-22; Lk 5,33-38
14Ndò bëyègè bë Yohannes bëngatoban ai nyè bò na: Asu dze ai bia, ai bëfarisea biaki bidi#9,14Bëfarisea bëkarëga ki bidi a nguma sòndò biyòṅ bibè., hë da bëyègè boe tègè ki? 15Ndò Yesus adzo ai bò na: Yë bëlëdë bë ngòn bënë dzam wu zie ntye nlug angënë ai bò? Dzam da, mëmos mayi sò a bayi bò nòṅ nlugu waban, eyòṅ te hm bayi ki bidi. 16Mod wasë ki bede mkpamaṅ abaag a ntu eyie, amu mkpamaṅ afëb eyie wayi lindi eyie, enganyabi abui, alodo anë ehë bë osusua. 17Bakad ki soe mimkpamaṅ mëyòg a minnom mëndëg. Ngë tègè ai nala, ndëg yayi tole, mëyòg mëmana kubi a si, ndëg emana ndaman. Bakad soe mimkpamaṅ mëyòg a mimkpamaṅ mëndëg, së fë ya tò ndëg, tò mëyog të ndaman.
Ngòn ndzoe ai e mininga anganamba Yesus ewòman
Mk 5,21-43; Lk 8,40-56
18Angënë afalaga e bibug bi, ndzoe ziṅ asòò, alaban a si, nyè na: ngò dzama endëm wu etoa dzi. Dzam da, zaa të nyè bede mò, anyiṅ. 19Yesus akodo fò a si, angabie nyè, bëyègè boe bënë ai nyè ha. 20Mininga ziṅ ya angabë akòn ya mimbu awom ai mibè, mëki mëkui nyè abum#9,20A mvende Moses, e mininga osë ayen ngòn ngë ki na mëki makui nyè a abum, abëlë eboe a nyòl. Abëlë ki ngul ya anamba mod mfë, tò ki akë a nda-Zamba. E dzam e mininga nyò abò lalëdë ṅyëbë woe., asòò nyè namba eyie a mvus. 21Angabë adzoo a nnëm ete na: ngë mënamba ki të nyè hë eyie ana, mëbò mvoè. 22Ndò Yesus angakilan, ayënë nyè, nyè ai nyè na: Bò azombo, a ngò dzam. Ṅyëbë woe onyii wa. Mininga abòò fò mvoè etye etye te. 23Ndò Yesus angakë a nda e nyia-mod-mvia nyò, ayenë bëbomo mëzik, ai endugëlan abui bod. 24Yesus nyè na: Kuan a nsëṅ, mòngò asëki ṅwuan, akë oyò. Bëngawoe nyè. 25Akuli angakuli e bod ba a nsëṅ, ndò anganyii, abii nyè a wò, ndò mòngò angatëbë a si. 26Foe te eyaman fò a nnam te osë.
Yesus asye mindindim mibè
27Yesus akëë ai dulu osu, mindindim mibè mingatoṅ nyè, bëbama a yob na: Kudu të bia ngòl, a man David. 28Anyian anganyian a nda, ndò mindindim mingatëbë nyè osu, Yesus nyè ai bò na: Yë miayëbë na mënë dzam bò dzam te nga? Bò ai nyè na: Owe, a Nti. 29Ndò anamba mis maban, nyè na: Ayënan ai mina anë ṅyëbë waan wahan. 30Ndò mis mëngayaaban bò. Yesus atëbëlë bò na: Boan okala na të mod ayëm adzo di. 31Bëngayi kui, bëngakë babëgele fò dò ai nnam osë.
Yesus abò mvumvug mod mvoè
Lk 11,14
32Bëngayi kui a nsëṅ, ndò bazu ai nyè mvumvug obëlë mbë nsisim. 33Mvaan mbë nsisim ongavaaban, mvumvug ongakòbò. Ndò minkunda mingakam, bò na abë ya ki yënan nala a Israel. 34Mfa waban, bëfarisea bò na: Atsidan bëbe minsisim ai ngul ndzoe waban.
Yesus ayen minkunda ngòl
Mk 6,6.34; Lk 8,1. 10,2
35Yesus angakë awulu a mal maban ai bëtisòn baban, akëlë ayëgëlë a mënda-bikoan maban, abendëge mbëmbë foe ya edzoe, alëdëgë akòn asë ai mintye misë. 36Mbol angayen minkunda, angayen miè ngòl, amu bëngabë ntëgan, ai sòm esë, anë mintomba minë tègè ai nnòni. 37Ndò azu dzo ai bëyègè boe na: Mëkoe bidi mënë abui, bëbò bisye abòd. 38Kogëlan hm ai Nti mëkoe na alom bod bisye a mëkoe moe.
Trenutno izabrano:
Mt 9: NTE12
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
MKPAMAṄ AMVOE Nouveau Testament en langue Ewondo © Bible Society of Cameroon, 2012.