Jean 1
1
Yeesu di sá «Dinyɔɔbundi» nì «Ŋwalifi»
1Kí wàatī Unimbɔti ń náań duulinyee, ubɔ nìn bí bi yíì-u Dinyɔɔbundi ní ki bí Unimbɔti cee, ní ki sá Unimbɔti. 2Dinyɔɔbundi gbanti di nìn pée bí Unimbɔti cee doooo ŋkilkaamin#1.2 Dū B. 1-2 kí ŋmàntī nì Alaŋ 8.22-26.. 3Díǹ ní Unimbɔti dū ki náań tikɔkɔ. Tiba kaa bí fám Unimbɔti kaa dū Dinyɔɔbundee ki náań kudɔŋu#1.3 Dūú ŋmàntī nì Diny 1.3, Ilan 33.6,9, 1 Kɔra 8.6, Kool 1.16-17.. 4Di-ni ní dimaŋfal nìn bí, dimaŋfal gbanti di nìn tìì binib ŋwalifi. 5Ní ŋwalifee dɔ́miń ki ŋmíntí binib bin bí dibɔmbɔndinee, ní binibee kaa fōō-ŋu.
6Unimbɔti nìn túnní uninja ubɔ, bi yíì-u Yoowaneesi. 7U nìn dɔ́miń kí sòoǹ nì binib ŋwalifi bɔti, án nín làá ŋá pu báà ŋma ń dī u-pu kí fōō kí kííyee. 8Yoowaneesi u-ba kaa nìn sá ŋwalifi, u nìn dɔ́miń kí lēē ŋwalifee pu seera ní. 9Dinyɔɔbundi di sá ŋwalifi mmɔnti, ki dɔ́miń kitiŋ pu ki ŋmíntí báà ŋma.
10Unimbɔti dū dinyɔɔbundee ki náań taapu doo wanti kɔkɔ, ama, ŋyunti ŋun dì nìn bí taapu dooyee, baa béè-dì. 11Un sá Dinyɔɔbundee dɔ́miń u-yab cee, ní u-yab kaa fōō-u. 12Ama bin kɔkɔ fōō-u ki gbìl̄ ki tīiǹ-uee, u yāntì bidambi kpántì Unimbɔti biyaamu#1.12 Dūú ŋmàntī nì Gala 3.26, 1 Yoow 3.1-2., 13mbiyaamu mun ní unil kaa màl̄, kaa tí sá unil làtamee, ama an sá Unimbɔti di màl̄ múǹ.
14Un sá Dinyɔɔbundee kpántì unil ki kāl̀ ti-kansikin ki cáá tiŋan nì ibaamɔn tikpil, ní ti ká u-nyooti#1.14 Dūú ŋmàntī nì Yees 60.1-2. tin u nìn fōō Ubaati ceeyee, kun puee u sá Unimbɔti Jipɔmbaabil. 15U-pu ní Yoowaneesi nìn kúuǹ ki lī yii: «Un m nìn lī yii u dòoń man boon ama úǹ jítiǹ mamee, dee! Di sá yii úǹ pée bí ní bi nín màl̄ man.» 16Úǹ cee ní tiŋan kɔwoooo nyánní ní ki bāań-ti, ní timbi kɔkɔ fòol̄-tì múlmul. 17Unimbɔti nìn yāntì Mooyiisi tīī-ti marab#1.17 Kpèè Disa 31.18, 34.28., ama ní Yeesu Kriisitoo cáań-ti tiŋan nì ibaamɔn. 18Báà ubɔ kaa wál̀ Unimbɔti dalba#1.18 Dūú ŋmàntī nì Disa 33.20., ama u-Jipɔmbaabil un mun sá Unimbɔti ki bí ki nákáǹ u-Baa Unimbɔtee di yāntì ti béè-u.
Yoowaneesi unyiŋfaldi nyɔɔbundi
(Kpèè Maat 3.11-12, Maar 1.7-8, Luuki 3.15-17)
19Juuda yab kpilib bin nìn bí Jeerusaleemee nìn túnní bisaraaŋaliibi nì Leefii yab bin tūǹ Unimbɔti diiku poon ditundee biba Yoowaneesi cee bí dāá bàlifì-u yii: «Sii di sá ŋma?» Ní u kíí-bi yii: 20«Man di kaa sá Meesiya.» Waa nìn bál̀-bi, ki sòon̄ ki cántì-bi míǹ. 21Ní bi fātìi bālifì-u yii: «Kin sii di sá ŋma ní? Eeliiii?» Ní u bí yii: «Aayee, maa sá Eelii.» Ní bi tí bālifì-u yii: «Sii di sá Unimbɔti bɔnaatiliu un máaǹ kí dāan̄eeee?» Ní u tí bí yii: «Aayee#1.21 Kpèè Mala 3.23, Ditee 18.15,18..» 22Ní bi fātìi tí bālifì-u yii: «Kin, sii baasii sá ŋma ní? Di sá ti là kí tin tùkù bin túnní-tee un ní a baasii sée. Sii lì yii a sá ŋma ní?» 23Ní Yoowaneesi kíí-bi yii:
«Man di sá un báakí kuteeun yii:
<Tɔ̄maan nsan ŋun tèen̄ee kí tīī ti-Dindaan,>»
- kii Unimbɔti bɔnaatiliu Yeesaya mun nín nìn lī puee.
24 Fariisab biba nìn bí bin bi nìn túnní Yoowaneesi ceeyee kansikin, 25ní bíǹ bālifì-u yii: «A yaa kaa sá Meesiya, kaa sá Eelii, kaa tí sá Unimbɔti bɔnaatiliu un ti cée, kin ba pu ní a fùul̀ binib Unimbɔti nyim?» 26Ní Yoowaneesi kíí-bi yii: «Man fùul̀ binib nnyim ní, ama ubɔ bí ni-kansikin, naa nyí-u, 27úǹ di làá dāá dāan̄ man boon. Man kaa kpántì kí gútí u-naatakaŋ ŋmiii gba.» 28Bi nìn bí Beetanii, kitiŋ kin bí Jɔɔdan buŋgbandi lapu pu, laakin Yoowaneesi fùul̀ binib nnyimee, ní ki sòoǹ an bɔti gbanti.
Unimbɔti pibil
29Kutaa wúntèe ní Yoowaneesi ká Yeesu dòoń u-cee, ní u bí yii: «Kpèèmaan, Unimbɔti pibil din lèekī binib kɔkɔ kpitiiyee dee#1.29 Dūú ŋmàntī nì Yees 53.6-7.! 30Úǹ pu ní m fu sòon̄ yii: <Uninja ubɔ làá dāá dāan̄ man boon, ama úǹ jítiǹ man, kun puee úǹ pée bí ní bi nín màl̄ man.> 31Maa nìn nyí un ní an sée, ama an sá yii Isirayeel yab ń béé-uee pu ní man dɔ́miń ki bíi fùul̀ binib Unimbɔti nyim.»
32Ní Yoowaneesi gíti lī yii: «M ká Unimbɔti Fam lafun nyánní yilpu kii dibeenanjilee ki kpákatìń Yeesu pu#1.32 Dūú ŋmàntī nì Yees 11.2, 61.1.. 33Maa nìn nyí un ní an sée, ama Unimbɔti un túnní-mi ḿ nīn fùul̀ binib u-nyimee bí-mi yii: <A yaa láa ká man Fam kpákatìń ki kóò un puee, úǹ di làá fàl̀ binib Circir Fam.> 34M ká mimmee, ní ki sòoǹ ki tùkù-ni yii úǹ di sá Unimbɔti Jipɔɔn.»
Biboonnooliibi bin Yeesu péé péé ki yíińee
35Kutaa tí wúntèe, Yoowaneesi nì u-boonnooliibi bili tí yú. 36U ká Yeesu bíi jītée ní u kpēē-u dímmm ki bí yii: «Kpèèmaan, Unimbɔti pibil sèé!» 37Yoowaneesi boonnooliibi bilee gbìl̄ mimmee, ní ki nóó Yeesu. 38Yeesu fātìi kpēē bi nóó-uee, ní ki bí-bi yii: «Ni nyàab̀ ba?» Ní bi bí yii: «Rabii, la ní a kóò ní?» - Rabii taapu di sá yii, Udakal. - 39Ní Yeesu bí yii: «Dāam̄maan kí cùú béé laakin m kóòyee.» Ní bi nóó-u ki cūtìi béè laakin u kóòyee, ní ki kpáàa gbíntì niin yaadal wiiŋŋu. An nìn sá tikúti tinaa kujoou ní bi nìn cūtì.
40Andree un sá Siimɔn Peetroo naalee nìn sá binib bilee kansikin ubɔ bin nìn gbìl̄ Yoowaneesi nyɔɔbundi gbanti ki nóó Yeesuee, 41ní Andree péé ki cūtìi ká u-maan Siimɔn ki tùkū-u yii: «Timbi ká Meesiya!» - An dàkà yii Kriisitoo. - 42Ní u cáá Siimɔn ki cūnnì Yeesu cee. Ní Yeesu kpēē-u ní ki bí yii: «Sii di sá Siimɔn Yoowaneesi jipɔɔn. Bi làá nīn kíǹ ki yíì-si Keefaasi ní», an dàkà yii Peetroo#1.42 Peetroo taapu di sá yii ditaŋkpal..
Yeesu yíiń Fiiliipi nì Natanayeel
43Kutaa gíti tí wúntèe, Yeesu lēē yii u làá cù Galiilee, ní ki ká Fiiliipi, ní ki bí-u yii: «Nóó-mi!» 44Fiiliipi nìn sá Beetisayida tiŋkin ní. Niin ní Andree nì Peetroo mun nìn sá. 45Boonee ní Fiiliipi ká Natanayeel, ki tùkū-u yii: «Timbi ká un pu ní Mooyiisi nìn ŋmàn̄ u-marab gbɔŋkun ki kpáaǹ Unimbɔti bɔnaatiliibi mun sòon̄ u-puee#1.45 Dūú ŋmàntī nì Ditee 18.18, Yees 9.5,6, Eesee 34.23.. An sá Yeesu Jooseefi jipɔɔn un sá Naasaareetee.» 46Ní Natanayeel bālifì-u yii: «Mimmee, tiwammɔntiil ŋūǹ kí nyānní Naasaareeti mun deeee?» Ní Fiiliipi bí-u yii: «Dāan̄ kí cùú kpèè.»
47Yeesu kpēēyee, Natanayeel dòoń u-cee, ní u bíi sòoǹ u-pu yii: «Un bí nee di sá uisirayeelja páaa, kaa sá milimilidaan.» 48Ní Natanayeel bālifì-u yii: «A ŋá mana ní ki nyí-mi?» Ní Yeesu kíí-u yii: «Min a bí fiigi subu taapuee ní man ká-si ki wāatì ní Fiiliipi dāa nín yíiń-see.» 49Niinee ní Natanayeel bí-u yii: «Ukpil, a sá Unimbɔti Jipɔɔn ki sá Isirayeel yab mun bɔtiu#1.49 Dūú ŋmàntī nì Ilan 2.7, Seefa 3.15.!» 50Ní Yeesu bí-u yii: «M nín bí yii m ká-si fiigi subu taapuee pu ní a fōō ki kííii? A làá gíti ká tin jítiǹ tin bí neeyee. 51Ibaamɔn ní m tùkù-ni, ni làá dāá ká kutagbɔŋu cúu pīitì, ní Unimbɔti tuuŋyi sìntīń ki jɔ́ḿ man Kinibiki pu#1.51 Dūú ŋmàntī nì Diny 28.12..»
Trenutno izabrano:
Jean 1: BASSARDC
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
BIBLE EN N'TCHAM (Bassar) © Alliance Biblique du Togo, 2013.