Baɗitari 4
4
Kayinu ka Habila
1Antə Adam ku ləmbwa adzə mwalankiɗa Hauwa, antə mwala ni ku kətə hur, ka yaɓəla Kayinu. Antə mwala ni pəla, “MTHLAKU ku dlar ra ja, I ku mzhi namtə mda tsuwa.” 2Antə tsa jaktə yaɓəla ɓzər sal damwa, ka vətə thləm alari Habila. Antə Habila ku ndzi mdər ɓəla təma, ar Kayinu tsuwa tsa ndzi mdər tsuhwa. 3Antə vir laga Kayinu hamta saɗaka ar su tə tsa wuta akwa fakərni aka MTHLAKU. 4Antə Habila tsuwa ku səntə yarakəmar mwaɓiyayeri na akwa ciɓərni, ka tsuwa vəyayeri na ka malkum. Antə MTHLAKU ku nggatə msərakur Habila ka dlu sur hamta arni, 5amma tsa aɗi nggatə msərakur Kayinu ka sur hamta arni wa. Antə ɗəffa Kayinu ku ɓzi ka duna, tə tsa ku hərtə kəmari.
6Antə MTHLAKU pəla aka Kayinu abbər, “Kamnyar mi tə ɗəffa ga ɓzəɓzari ri? Tsuwa kamnyar mi tə gə hərtə kəma gə ri? 7Ma ga an hara su na kalkalari, ai sakani kəma ga ata ndzi pwipwiyari. Amma ma ga aɗi hara su na kalkalari wa, to biku akwa səkə nga anyarmbwar nga. Tsa akwa bara ka tsa ngkəi nga, amma ku ndzi dwali ka gə nggyari ni.”
8Antə Kayinu pəla aka ɓzərma'ni Habila, “Ndzi ka mwa təra ləkwa mtaku.” Sakatə da ku mwari akwa mtaku ni, antə Kayinu lətə kəra ɓzərma'ni Habila, ka tsi ni.
9Antə MTHLAKU pəla aka Kayinu abbər, “Ama ɓzərma' nga, Habila ri?” Antə Kayinu shinau alari ka pəla, “I aɗi səndə wa. Nənga amma shang I mdər ɓəla ɓzərma'na ya?”
10Antə MTHLAKU pəla, “Man tə gə hara nə ri? Mamshir ɓzərma' nga akwa tuwa ali ata di! 11Antə kulini, ga ku ndzi shushuwari! Antə mdə ku kədləmta nga kazhar di na ku kəlar mnyari ka dlu mamshir ɓzərma' nga ata tsiya ga ni. 12Wala ga an tsuhwa apa madə ri, di ni aɗi ata jaktə hamta ala gə sur fakəu apa na hwatu wa. Ga ata ndzi mdə na kula kəi, akwa kadlə kadla kərəng kərəngnga kula kər tədəku akwa kuta duniya.”
13Antə Kayinu pəla aka MTHLAKU abbər, “Haka ngəni ku təra kərathli, I amzhi nggitari wa. 14Nggədza kulini ga ku kədləmta ra kazhar di ni, ka ɗuwamta ra tə I amzhi si akəma gə wa. Tsuwa I ku ndzi mdə na kula kəi, akwa kadlə kadla kərəng kərəngnga kula kər tədəku akwa kuta duniya. Antə apani kəlara mdə na ku wutə ra, tsa ata tsi ra!”
15Amma MTHLAKU ku pəla alari, “Awa, aɗi apani wa, kəlara mdə na ku tsi Kayinu, I ata ntə dawakur ata vəyari har ka murfa.” Apani antə MTHLAKU ku vətə seɗa ata Kayinu kamnyar tsaktə kəlara mdə na ata kəɓa ka Kayinu abbər, mda aɗiya tsi ni wa. 16Antə Kayinu ku təra kazhar kəma MTHLAKU ka ra ndzəndzi akwa tsəɗi Nod, təbwar raghəi ka Eden.
Mjir Nyarmbwar Kayinu
17Antə Kayinu ku ləmbwa adzə mwalankiɗa tə tsa ku kətə hur ka yaɓəla ɓzər sal, antə da vəta alari thləm Enok. Antə Kayinu ku həntə bərni laga, ka vətə thləmari Enok, akwa thləma ɓzərni. 18Antə Enok ku yaɓəla ɓzər sal ka vətə thləmari Irad. Antə Irad ku yaɓəla Mehuyayel, antə Mehuyayel ku yaɓəla ɓzər sal ka vəta alari thləm Methlushayel, antə Methlushayel ku yaɓəla Lamek. 19Antə Lamek ku kəl mwanki suɗa. Thləma na pal an Ada, thləma na palari tsuwa an Zilla. 20Antə Ada ku yaɓəla Yabal, na ndzi mdə na ntangkəma ar shanga mji na ana ndzi akwa tent, ka pwi mwaɓi kəi. 21Thləma ɓzərma'ni an Yubal, na ndzi mdə na ntangkəma ar shanga mjir tsa su apa yakandi, ka mjir mbur su apa təmbəl. 22Antə Zilla ku yaɓəla Tubal Kayinu, mdə na ntangkəma na baɗitə ɓdlə shanga su ka liyar əmza ka tsuwa liya mənggəl. Thləma ngkwarma Tubal Kayinu an Naama.
23Antə vir laga Lamek pəla aka mwankirni ni abbər,
“Ada ka Zilla, psi giri thləma giri ali,
giri na mwankir Lamek, psi giri thləm aka su tə I ata pəlari,
I ku tsi mda kamnyar tə tsa ku dəkəi ra,
ɓzərdakwi laga kamnyar tə tsa ku tsa ra.
24Ma mda ata ntə ɗimikur ar tsi Kayinu
ka bwa murfa,
to ma ar Lamek ata ndzi
murfə murfa vəyari murfəkumari.”
Mjir Nyarmbwar Seth
25Antə Adam jaktə ləmbwa adzə mwalankiɗa, antə mwala ni ku jaktə wutə ɓzər sal damwa tə tsa vəta alari thləm abbər Seth. Kamnyar mwala ni pəla, “Hyel ku jaktə ni ɓzər damwa ata vəya Habila, natə Kayinu ku tsi ni.” 26Antə Seth ku yaɓəla ɓzər sal ka vəta alari thləm Enosh. Tsuwa akwa zaman na ndaga antə mji baɗitə kəga thləma MTHLAKU akwa sakar vəngkər səli alari.
Trenutno izabrano:
Baɗitari 4: KNB
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.