KEJADIAN 21
21
Nahonis Nai Ishak
1 Uisneno anfe tetus neu bi Sara, onle In anba'an nalali. 2Anbi tabu le Uisneno anlek nalali, leka Nai Abraham in namnasi nalali, bi Sara naapu ma nahonis li'anmone mese. 3Nai Abraham nakanab li'ana nane Nai Ishak; 4ma leka Nai Ishak in nan neno fanu, Nai Abraham anhapi ma anheli in, matom nok Uisneno In plenat. 5Nai Abraham in nan ton natun mese leka nahonis Nai Ishak. 6Bi Sara namolok nak, “Uisneno anhalin kau es nane te au mani ulali. Atoni mese-mese le sin nen lasi le i of sin anmani natuin sin namlil nok kau.” 7Nalali te in namolok anteni nak, “Sekau es nabe'i namolok neu au mone nakof au ususu li'ana? Mes au uhoni ulalien amsa, maski nak au mone namnasi nalali.”
8Li'ana nane antu'an ma nanae piut, ma anbi tabu ansole in, Nai Abraham anmo'e fesat a'naek.
Anli'u bi Hagar ma Nai Ismael
9Anbi neno mese, Nai Ismael, Nai Abraham ma bi Hagar bife na'ko Mesir nane sin anah, in na'bae nok Nai Ishak bi Sara in anah. 10Bi Sara in nit lasi nane oke te in nak neu Nai Abraham nak, “Amli'u ate bife nane nok in anah. Ka nabe'i fa he nati' ate bife nane in anah ansimo ho mu'im le of ho musanut mani neu Nai Ishak.” 11Nai Abraham in kan malin fa nok han totis le nane, natuin Nai Ismael nane in anah amsa. 12Mes Uisneno namolok neu Nai Abraham nak, “Kaisa ho muoelbom natuin ho ate bi Hagar ma in anah le nane. Mutuin bi Sara in lomin, fun anao natuin Nai Ishak of Au umfauba ho sufam le Au ta'en ulali nane. 13Onane amsa neu bi Hagar in anah, of Au sato in anah ma in upuf sin he nati' sin anfani uf mese. Natuin in le nane ho anah amsa.”
14Anbi neno nokfa fe nok-noka, Nai Abraham anfe neu bi Hagar mnahat ma boit pasu le natua nani neki oe anfani bukae anbi lanan. In antutnaiba li'ana nane neu bi Hagar in kotin, ma anlenu bife nane anao. Oke te bi Hagar in fen ma nao ma in namaika anbi mnela snaen Bersyeba. 15Leka in bukae ma in oe oke, bi Hagar natupa li'ana nane anbi nasi in nanan, 16oke te in nao ma antok oni meter natun mese na'lo na'ko bale nane. In namolok anbi in nekan nanan nak, “Au ka ube'i fa he kiso li'ana nane hen mate.” Oke te in ankae.
17Uisneno In anen Nai Ismael in hanan, ma ahake neno tunan namolok neu bi Hagar nak, “Ho mususbom neu sa' ka, Hagar? Kaisa ho mumtau. Uisneno In anen nalali ho anah in hanan. 18Amnao nai neu ho anah, maiti in ma mumelak in. Of Au umfauba in sufan nane anfani uf naek mese.” 19Oke te Uisneno anfai bi Hagar in matan, talantia in ankiso nit oe nopu mese. In nao oke te in nalai oe neu in boit pasu nane, ma nalali te in nainut in anah.
20Uisneno nokan Nai Ismael. Li'ana nane anfonat ma nanae piut, ma in namaika anbi mnela snaen Paran, ma anfani atoni ali'ut mu'it ahinet. 21In ainaf anmafeba in nok bife Mesir mese.
Lais manta'en Nai Abraham ma Nai Abimelekh
22Anbi tabu nane Kesel Nai Abimelekh ma Nai Pikhol, in mo'e pa'e, nem neu Nai Abraham ma namolok nak, “Uisneno antuntaku ko anbi ale sa' le ho mo'e. 23Es nane te, anmo'e nai supat anbi bale i anbi Uisneno In matan, nak of ho ka mo'e fa amle'ut neu kau, ma neu au anah-anah sin, ai neu au sufak. Onle au mo'e ulali alekot neu ko, anmo'e nai onane amsa neu kau ma neu pah le ho mumaika ambine le i.”
24Nai Abraham namolok nak, “Au mo'e ani supat.”
25Mes namuni onane Nai Abraham in antofon natuin Nai Abimelekh in ate sin nasik nan oe nopu mese. 26Nai Abimelekh namolok nak, “Au ka uhin fa neu sekau es anmo'e nani. Ho fe ka muton mit kau fa, ma es fe au nen lasi nane.” 27Oke te Nai Abraham anfe bibi kase, ma bijae puknes neu Nai Abimelekh, ma atoni nua in nane sin anmo'e lasi manta'en. 28Nai Abraham anbeti nan bibi kase hiut na'ko bibi kase pukan sin, 29ma Nai Abimelekh natoti neune nak, “Nansa' es ho mo'e mani lasi nane?”
30Nai Abraham natae nak, “Amsimo nai bibi kase hitu sin le i hen fani takaf nak Usi ho amsa amtebes neu au es a'hani oe nopu le i.” 31So leko bale nane nakanab nak Bersyeba, natuin anbi bale nane atoni nane nua sin naiti supat.
32Leka sin anmo'e nalali lasi manta'en anbi Bersyeba, Nai Abimelekh ma Nai Pikhol sin anfani neu atoni Filistin sin pah. 33Oke te Nai Abraham ansenan hau tamariska anbi Bersyeba ma naubon na'ko tabu nane bale nane anfani bale luli-besa neu Uisneno, Uisneno talantia nabal-bal. 34Nalali onane te Nai Abraham in namaika klobes anbi atoni Filistin sin pah.
Trenutno izabrano:
KEJADIAN 21: AOZ
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi