KEJADIAN 32
32
Nai Yakub naloitan he naeku nok Nai Esau
1Nai Yakub in an nao piut. Oke te ahake neno sin fauk-fauk nem ma naeku nok in. 2Leka Nai Yakub ankiso nit sin in namolok nak, “Le i Uisneno In um-ume,” es nane te in nakanab bale nane Mahanaim.
3Nalali onane te Nai Yakub anlenu atoni fauk-fauk sin nao nahunun in neu pah Edom he nati' naeku nok Nai Esau in tataf. 4Nai Yakub nak neu sin nak, “Mitonan au tataf Nai Esau mak on i, ‘Au Nai Yakub, ho ate. Anbi tabu lo le i au umaika oke Nai Laban. 5Tabu le i au mu'i bijae, bikase luke mnanu, bibi kase, bibi ma ate-ate. Au sonu hanaf neu au usi ko, nok salit he nati' au usi ko ho nekam anmalin.’ ”
6Leka ale haef sin nane anfani nem neu Nai Yakub, sin nak, “Ho tataf tabu le i es lanan in atnanan nem he naeku nok ko. In nem nok atoni sin natun ha.” 7Leka' Nai Yakub annen lasi nane in nekan an ole ma namtau. Oke te atoni-atoni le nokan in anbati sin pukan nua, onane amsa neu bibi kase, in bibi sin, bijae, ma in bikase paha snaen sin. 8In natenab nak, “Kalu Nai Esau nem ma anmaken nok pukan ahunut, pukan hae nua of napeni sona he nafetnon.”
9Nalali te Nai Yakub in onen toti nak, “Koi Uisneno, le au na'i Nai Abraham ma au ama Nai Ishak nabes neune, amnen kau! Uisneno Ho es amlenu mulali kau he nao fani neu au ama in pah ma au olif tataf sin. Ma Uisneno Ho es amanta'en he muloitan ale lasi nane nok alekot neu kau. 10Au ka tam fa ota he simo Ho manekam ma Ho lasi aki'at le Uisneno Ho muton mulali neu kau. Leka au fen ma nao ma leka au laka finin Noe Yordan, au ka eki fa sa'-sa' al au tias. Tabu le i au fani aum oke pukan nua in le i. 11Au toti Ko nok amtaus, mufetin kau na'ko au tataf Nai Esau. Au umtau kaisa-kaisa in nem hen maken ma nale'un kai oke, nok bife ma li'ana-li'ana amsa. 12Mumnau nai Uisneno Ho manta'en mulali nak of Ho muloitan ale sa' nok alekot neu kau ma amfe neu kau sanut mofut namfau. Ka tit fa es nabe'i hen so'i nani natuin in amfaun onle' snaen anbi tasi in ninen.”
13-15Leka in antup nalali anbi nane, Nai Yakub in naiti in mu'it bian he nati' anfe nani neu Nai Esau. Tnatas nane esle': bibi ainaf natun nua, bibi keso bo'nua, bibi kase ainaf natun nua, bibi kase keso bo'nua, bikase paha snaen bo'tenu le fe nasus ana', nok in ana' sin, bijae ainaf bo'ha, bijae keso bo'mese, bikase luke mnanu ainaf bo'nua ma bikase luke mnanu keso bo'mese. 16In anbati mu'it-mu'it nane anfani pukan fauk-fauk ma puknes te anfe nani neu ate mese. In nak neu in ate sin nak, “Him nao mihunun kau, ma mitetab puknes nok pukan bian.” 17Nai Yakub anfe plenat neu in ate ahunut nak, “Leka au tataf Nai Esau naeku nok ko, ma natan ko nak ‘Ho usim nane sekau? Ma ho hem nao neu me? Ma sekau in mu'it sin es hom po' sin nane?’ 18Nati' ho mutae mak, ‘Ho ate Nai Yakub ini. In ansonu sin anfani tulu neu in usin, Nai Esau. Ho ate Nai Yakub natuin kai es kotin.’ ”
19-20Neu in ate no nua, no tenu ma neu ate atoni le in anlenu hen panat mu'it pukan-pukan nane in anfe plenat le' namnes. Nai Yakub in natenab nak in of anhanoe Nai Esau in nekan neki tulu nane, talantia leka in naeku nokan, Nai Esau of ansimo in. 21Es nane in ansonu nahunun tulu nane, ma in anmes fe namaika anbi in um-ume.
Nai Yakub anmabe'u anbi Pniel
22Anbi fai le nane amsa Nai Yakub anfen ma nok in fenainu nua sin, ma in ate bife nua sin ma in anah sin 23bo'es am mese, ma anlak anfini Noe Yabok. Leka in nalakab nafinib nalali sin, in anfani nem ma ansonu ale in amu'in neu noe aon bian. 24Mes in namaika anmes. Ma atoni mese nem ma anmaban nok Nai Yakub talantia anhaumak hen meunmone. 25Leka atoni nane nahin nak in of ka nis fa anbi mabanat nane, in antepo Nai Yakub neu in pusun un, talantia Nai Yakub in nui lokif anbi in pusun un na'il'on. 26Oke te atoni nane nak, “Mufetin kau; klobes anteni of manas anpe'.” Nai Yakub natae nak, “Au ka ufetin ko fa Usi, so leka hom fe kau tetus.”
27Atoni nane natoti nak, “Ho kanam sekau?” In natae nak, “Yakub.”
28Atoni nane nak, “Ho kanam ka Nai Yakub anteni fa. Ho maban mulali mok Uisneno ma mansian, ma ho mis; es nane te ho kanam anfani Israel.”
29Nai Yakub nak, “Muton kau ho kanam Usi.” Mes atoni nane natae nak, “Ka nabe'i fa neu ho he mutan au kanak sekau!” Oke te in anfe tetus neu Nai Yakub.
30Nalali te Nai Yakub nak, “Au u'eku ulali humaf nok humaf nok Uisneno, ma au fe Amoni.” Es nane te in nakanab bale nane Pniel. 31Anbi tabu manas anpe' Nai Yakub in nao nasaitan Pniel, mes in anse'al natuin in nui lokif anbi pusun un na'il'on. 32Talantia tabu le i amsa Israel in sufan ka nah fa sisi nesa le an amu mu'it in nui lokis anbi pusun un, natuin antepo nalali Nai Yakub neu in pusun un.
Trenutno izabrano:
KEJADIAN 32: AOZ
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi