MATIUS 12
12
Yesus manfamyan Ḇyesi sinek gandum ro ras Mananai Yahudi
12:1-8
(Mrk. 2:23-28; Luk. 6:1-5)
1 #
Ul. 23:25
Ro fafisu ani, ro ras Mananai Yahudi, Yesus imbranuk yaf gandum ono. Snar manfamyan Ḇyesi sibiser inja sinek gandum yorem ono ma san si. 2Farisi ono smam rarirya, sikofen faro I: “Mamkada, manfamyan Ḇyesi sifrur roi kopok kofrur ḇa ro ras Mananai Yahudi.”
3 #
1Sam. 21:1-6
Ḇape Yesus kyarem faro si: “Mkowasya ḇaimke rosai Daud, ifrur ro fafisu i ma ḇeso isya sibiser, 4#Im. 24:5-9 rariso syun ro Rum Allah ma rariso sikam san mamami fasasos, ono ḇese sipok san ḇa, iḇye Daud ma ḇeso isya, derer monda faro imam-imamsya? 5#Bil. 28:9-10 Roḇaido mkowasya ḇake ro Refo Yahudi, ro ras-ras Mananai Yahudi imam-imamsya seyuk sasoser ras Mananai Yahudi ro Rum Allah dori, ḇape skor si ḇeḇesasarḇa? 6Yakofen faro mko: dine oso isya iba syadi ro Rum Allah. 7#Hos. 6:6; Mat. 9:13 Rofyor mkofawi kankunes ro wos ine: Yamarisen sawarwar ya ḇoi farsarser ḇa, rarirya nari mkoḇuk samamyaiḇa faro snonkaku ḇesasar ḇa sya. 8Snar Rumkun Snonkaku ya Ikada Manseren faro ras Mananai Yahudi ya.”
Yesus byuk pararei faro snon ḇramin ḇar ḇemar oso ro ras Mananai Yahudi
12:9-15a
(Mrk. 3:1-6; Luk. 6:6-11)
9Rofyor sskobur ro dia, Yesus syun ro rum nadi sedi. 10Ro dia snon ḇramin ḇar ḇemar oso isya. Sifuken faro Yesus: “Ipyumke koḇuk pararei faro snonkaku sya ro ras Mananai Yahudi?” Knam karkara sedi insa ssḇuk sasar faro I.
11 #
Luk. 14:5
Ḇape Yesus ikofen faro si: “Rofyor oso ro mko isma domba oso ma isapi ro der ro ras mananai Yahudi, nari isasyar i bur derya ḇake? 12Mkokaraḇake snonkaku sya semaedya syadi ro domba ani? Rarirya kako kofrur roi ḇeḇye ro ras Mananai Yahudi.” 13Raimnai Yesus ikofen faro snon ani: “Fos ḇramsi!” Ma fyos ḇrasi, ma ḇrasi iprei beri. 14Raimnai Farisi ansi sisasyar fa sna awi insa smun Yesus. 15aḆape Yesus ifawi knam aw sedi inja ibur moḇ ani.
Yesus, I Allah Manfamyan Ḇyedi
12:15b-21
15bKawasa sibor siso Yesus ma ḇyuk pararei faro ḇeduf sya kam. 16Danun pakrek faro si, insa sikofen ḇayir awer mansei irya, 17insa wos Yesaya ikofen kwar ya imnis, ḇo doḇo:
18 #
Yes. 42:1-4
“Mkomam, ine Manfamyan Ayedi yakinfir kwar,
ma Yaswar I, snar kuker I rur Yedi imarisen.
Nari Yaḇuk rur Yedi faro I,
ma nari iso ḇekofen ḇair sasoser faro er-er sya.
19Ima nari dakfaḇaḇri ḇa ma sḇari fyarbaba ḇa
ma kawasa sakrower mkaren Ḇyedi ḇa ro sampakri ḇo.
20Ajumek ḇekorew ma ḇesawayom nari pyankar iba,
ma marom ḇepawya nari Fyasye i ḇa,
isof Ifrur fa sasoser ya ḇyefainda.
21Ma er-er sya nari sikyar faro I.”
Yesus ma Beelzebul
12:22-37
(Mrk. 3:20-30; Luk. 11:14-23, 6:43-45)
22Ḇarpurya sun faro Yesus snon oso rur ḇemaḇak ya iswoḇeri. Snon ani ipraf ma ḇyeawer, ma Yesus ḇyuk pararei faro i, isof awer ani dawos ma myam wer. 23Ma kawasa ḇeḇor ansi sikandor, ma sikofen: “Inenido Romawa Daudke?”
24 #
Mat. 9:34, 10:25 Ḇape rofyor kawasa Farisi ansi simnaf rarirya, sikofen, ḇo soḇo: “Kuker Beelzebul, mananir rur ḇemaḇak, Iyaw rur ḇemaḇak sya.”
25Ḇape Yesus Ifawi swaruser sena inja Ikofen faro si, ḇo doḇo: “Ḇaḇesasoser oso ḇeyunḇesisye nari ryo ma mnu oso roḇa kina ro rum ḇeyunḇesisye ipok kyain kawan ḇa. 26Rarirya kako rofyor Ibiris iyaw Ibiris, ikako irarwas ma ḇyembroḇ mankundi; rariso nari ḇaḇesasoser ḇyedi kyain nako? 27Rarirya rofyor Yayaw rur ḇemaḇak kuker papoik ro Beelzebul, kuker papoik rosai kpu mkoḇe sya ssḇuki dakyaw i? Inja siso nari ḇeḇemankara ḇemko. 28Ḇape rofyor Yayaw rur ḇemaḇak kuker papoik Allah Rur Ḇyedi, inja kaku ḇeri Ḇaḇesasoser Allah ryama kwar faro mko.
29Roḇaido rariso snonkaku ḇemarisen ḇesun ma ḇefasar papus ro snon ḇesambraḇ oso, rofyor sfes ḇepon snon ani ḇaim? Sfes ḇepon i kwar insape sfasyar rum ani.
30 #
Mrk. 9:40
Mansei ḇefnoḇek Ayaḇa ikada isampum Aya ma mansei ḇeryur fnoḇek Ayaḇa, ikada fyasasye. 31Inja Yakofen faro mko: Sasar ḇeḇor kam ma anonef ro snonkaku nari nasma ḇaḇepayasyos, ḇape anonef faro Rur Ḇesren ikada isma ḇaḇepayasyos ḇaḇeri. 32#Luk. 12:10 Rofyor snonkakuya isampum Rumkun Snonkaku, ikada isma payasyos, ḇape rofyor isampum Rur Ḇesren ikada isma payasyos ḇaḇeri ro supswan ine payasyos oḇa, ma ro ras ḇepupes ya kako payasyosḇa.
33 #
Mat. 7:20; Luk. 6:44 Rofyor mkokofen ai knam oso ipyum rarirya bon ḇyena kako napyum; rarirya kako ai knam oso mkoḇo ipyumba, rarirya kako bon ḇyena nakpyum ba. Snar ai ani bon ḇyena naiso koḇuki ifawi i na. 34#Mat. 3:7, 15:18, 23:33; Luk. 3:7, 6:45 Ne, ikakḇeknampu mkun ḇyesi, rariso mkofawi mkawos roi ḇeḇye, ḇape mankun mko mkoḇarḇor? Snar roi mkap kuker sḇadon irya nek ro sne. 35Snonkaku ḇepyum sawos roi ḇepyum ro fayar ḇepyum, ma snonkaku ḇeḇyeḇa sikada sawos roi ḇeḇarḇor ro fayar ḇeḇarḇor.
36Ḇape Yakofen faro mko: wos famfnom snonkaku sya sawos na nari skarem na ro ras mankara ya. 37Kuker wos anna nari ssḇuk kaku faro au, ma kuker wos anna kako nari ssḇuk samamyai faro au.”
Aḇyair Yunus
12:38-42
(Luk. 11:29-32)
38 #
Mat. 16:1; Mrk. 8:11; Luk. 11:16 Ro fafisu ani ḇefawi nananem Refo Yahudi kuker Farisi ono sikofen faro Yesus, ḇo soḇo: “Guru nkomarisen nkomam aḇyair oso ro Au.”
39 #
Mat. 16:4; Mrk. 8:12 Ḇape kyarem faro si: “Syos ḇeḇarḇor ma ḇefrur farḇuk ine soḇo sor aḇyair oso ro Aya. Ḇape sikada nari sisma aḇyair osoḇa derer aḇyair Nabi Yunus. 40#Yun. 1:17 Snar raris Yunus kyain ro in ḇeba sasop ya dori ḇeras rikior ma roḇ rikior, rarirya kako Rumkun Snonkaku nari kyain ro mun aiḇui ḇeras rikior roḇ rikior. 41#Yun. 3:5 Ro fafisu mankara ya, kawasa Niniwe nari sikḇwawes ma sifnoḇek syos ine ma ssḇuk samamyai faro si. Snar kawasa Niniwe sikada simbror rofyor simnaf Yunus ḇaryas ḇyena ma kaku ḇeri ro dine mkakmam snon oso isya iba syadi wer ro Yunus! 42#1Raj. 10:1-10; 2Taw. 9:1-12 Ro fafisu mankara ya wairek bin ro ḇar Wambrau ani nari diḇri fnoḇek syos ine ma nari dakḇuk samamyai kako. Snar wairek bin ine ryama ker supswan pember fa dakmnaf Salomo fawinananem ḇyena, ma kaku ḇeri mkakmam snon oso isya ro dine isyadi wer ro Salomo!”
Rur ḇeḇarḇorya isiḇer wer
12:43-45
(Luk. 11:24-26)
43“Ro fafisu rur ḇemaḇak ya isasyar bur snonkaku, ikada imbran iḇor farma ro sup-sup manuren syewar moḇ mananai. Ḇape ismaḇa. 44Inja ikofen: Nari yarerḇe rum yabur ani. Ma rya kwar ro rum ani myam ma rum ani ḇyebei, sisasapu sren i ma sfasos pyum i. 45Rarirya isasyar ma dor rur ḇemaḇak rifik ḇesawo syadi wer ro i ma ssun fa sikenem ro dia. Ma ro papupes ya snonkaku ani iḇyeḇa syadi wer ro ḇepon ya. Rarirya kako kuker syos ḇeḇarḇor ine.”
Yesus kuker naek Ḇyesi
12:46-50
(Mrk. 3:31-35; Luk. 8:19-21)
46Fafisu Yesus isya dawawos kuker kawasa ḇeḇor ansi, mkakmam snari ma naek Ḇyesi sores ro ḇandi ma sesewar fa sisrow ma sawawos kukeri. 47Rarirya snonkaku oso ikofen faro I: “Mame, snami ma naek ḇesi sisya ro ḇandi ma ssewar fa sisrow Au.”
48Ḇape Yesus kyarem faro snonkaku ḇekofen wos ani faro Inya: “Manseiso sna Yedi? Ma manseiso naek Ayesi?” 49Raimnai Ikofen, ma fyos ḇraminya ḇo fyasnai faro manfamyan Ḇyesi: “Sine sna Yedi ma naek Ayesi. 50Snar mansei ryawer ḇefrur Mami marisen Ḇyena ro boiyaswa, ikada naek ma srar Ayedi ma sna Ayedi.”
Trenutno izabrano:
MATIUS 12: LAIBHW
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi