MATIUS 17
17
Yesus isma payamyum ro bonya bori
17:1-13
(Mrk. 9:2-13; Luk. 9:28-36)
1 #
2 Ptr. 1:17-18
Ras riwonem nande Yesus dun Petrus, Yakobus ma naek ḇyedi Yohanes, skofnoḇek I ḇo skek bon ḇekaki oso. Ro bon ani bori skerer ḇaken. 2Fafisu ya Yesus fyadwer mankundi ro ḇarpon skoḇena; Ḇarpon ḇyedi isnai imnis ori ma sansun ḇyena napioper karḇas imnis isnai. 3Skomam wer Moses ma Elia suyawawos kuker I. 4Petrus ikofen faro Yesus, ḇo doḇo: “Manseren, aski ḇefnakḇa nkoisya ro moḇ ine. Inja wamarisen kada, yafrur aḇdares rikior ro dine, oso faro Au, oso faro Moses ma oso wer faro Elia.”
5 #
Kej. 22:2; Ul. 18:15; Mzm. 2:7; Yes. 42:1; Mat. 3:17, 12:18; Mrk. 1:11; Luk. 3:22 Ma rofyor Yesus dawawos kaker, kuker arḇeḇer mandif ḇesna oso isabu fa iswoḇer sko ma ro mandif ani skomnaf mkaren oso ikofen: “Ine Rumkun yaswar kakurirya, faro I sneri imarisen, iḇye mkomnaf I.”
6Manfamyan ḇyesi simnaf rarirya simkak kaku ḇo skain wepur ma sḇansuba. 7Raimnai Yesus ryama pyan ro sko ḇo ikofen: “Mkoyor mko, mkomkak awer!” 8Ma ro fafisu sko kanow skoḇrusna, skomam snonkaku oso ḇa ḇoi Yesus derer.
9Ro fafisu skado ro bon ani, Yesus danun faro sko: “Mkofarfyar awer mamam ani faro snonkaku osoḇa beri rofyor Rumkun Snonkaku ḇyeḇeḇawes ḇaim ro fandu ḇemar sya.”
10 #
Mal. 4:5 Raimnai manfamyan ḇyesi sifuken faro i, ḇo soḇo: “Rarirya ido snaro ḇefawi nananem Refo Yahudi soḇo, nari Elia ryama resari?”
11Yesus kyarem: “Kaku nari Elia ryama fa fyasos roi ḇeḇor nakam 12#Mat. 11:14 ma yakofen faro mko: Elia ryama kwar, fama snonkaku sya smambir iba, ma sifrur faro i raris marisen sena. Rarirya kako Rumkun Snonkaku nari isma kandera ro si.”
13Ro fafisu ani manfamyan ansi sifawi Yesus dawawos ro Yohanes Ḇemasi.
Yesus ḇyuk pararei faro snonkbor ḇeduf mandai
17:14-21
(Mrk. 9:14-29; Luk. 9:37-43)
14Fafisu Yesus ma manfamyan ḇyesi skaḇer faro kawasa ḇeḇor ansi, snon oso ryama faro Yesus ma ḇyansuba ḇo doḇo: 15“Manseren, waswar romawa yedi. Iduf mandai ma ḇyekandera kaku. Fafisu ono isapi ro for ono wer isapi ro war. 16Yuni kwar faro manfamyan ḇesi, ḇape sipok sifruri fa iprei ḇa.”
17Inja Yesus ikofen: “Ne, mko syos ḇekyar ḇa ma ḇeḇarḇor, fafisu rosai kaker nari yakain fandu mko? Fafisu rosai kaker nari yakḇaḇ asuser mko? Mkun romawa ani muma!” 18Yesus ḇyewef rur ḇemaḇak ani, isof isasyar buri ma romawa ani iprei beri.
19Ḇarpur ya ro fafisu Yesus derer manfamyan ḇyesi srama sifuken faro i: “Snaro rur ḇemaḇak ani nkopok nkoyawi ḇa?”
20 #
Mat. 21:21; Mrk. 11:23; 1 Kor. 13:2 Ikofen faro si: “Snar mkokyar mnis ḇa. Yakofen faro mko: Kaku ḇeri rofyor mkosmai kakyar ḇeba ḇemnis sasawi mor monda nari mkokofen faro Urek ine: Wakren bur moḇ ine ḇe diwara, – ma urek ani nari ikren, ma roi oso ipok ḇyerer au ḇa. [21Dafduf mandai ine ḇyeḇeyaw monda kuker nadi ma farfor.]”
Ḇaryas ḇeḇesuru ro kandera ma marmar Yesus
17:22-23
(Mrk. 9:30-32; Luk. 9:43-45)
22Rofyor Yesus ma manfamyan ḇyesi sisya kam ro Galilea, ikofen faro si: “Rumkun Snonkaku ya nari sḇoḇi faro snonkaku sya 23ma nari smun i ḇape ro ras ḇeḇekior nari ḇyeḇeḇawes.” Rofyor manfamyan ansi simnaf rarirya sisnesna nfafardun fafaya ḇa.
Yesus ḇyak som faro Rum Allah
17:24-27
24 #
Kel. 30:13, 38:26 Ro fafisu Yesus ma manfamyan ḇyesi srama ro mnu Kapernaum ḇeyor som faro Rum Allah sya srama faro Petrus ma sikofen: “Rariso guru bedi nari ḇyak som dirham risuru ansuyake roḇa?”
25Kyarem faro si ḇo doḇo: “Mḇoi nari ḇyake.” Ma rofyor Petrus syun ro rum ya, Yesus ifuken ḇepon i: “Simon wakkarai rariso? Faro manseisi wairek-wairek supswan ine ssun som? Faro kawasa ḇyesike roḇaido ro snon mandaman sya?”
26Petrus kyarem ḇo doḇo: “Ro mandaman sya!”
Inja Yesus ikofen faro i: “Rarirya kawasa ḇyesi ma roḇa. 27Ḇape insa koḇe karui ḇekarkar faro si awer, rwa swarera ro danosen. Ma in pos ḇepon ya wai sḇari, nari wasma pipi dirham rifiak ro i. Wun si ma buk faro si fabuk ḇakwarek aya ma au kako.”
Trenutno izabrano:
MATIUS 17: LAIBHW
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi