LIRAANGA 26
26
Isaka Yamenya mu Shivala shia Gerari
1Mumatukhu kenako, inzala yali indulu mu shivala shienesho, khuvira yaliho mumatukhu ka Aburahamu yali nashili mwoyo. Isaka yasimukha natsia mu shivala shia Gerari, khulola Mwami Abimeleki wamihanga Vafilisti. 2Mwami Nyasaye yalolekha khu Isaka; namuvoolela, “Lekha khukholomokha khutsia mu shivala shia Misri. Uliitsa khumenya mu shivala shia nzitsanga khukhuvoolela. 3Khola nushimenya mu shivala shinu hatititi, khutukha lwa niitsa khuva nivi khandi khukasitsi. Nzitsanga khukhuha yivi nende vitsukhulu vovo shivala shinu. Niitsa khurweshitsa lilaaka, lia nakhola na tata wowo Aburahamu. 4Niitsa khukhola vitsukhulu vovo khwivulana mu vunyishi, khuli tsinyining'ini mu malesi; nu khuha vitsukhulu vovo shivala yishi shiosi. Vandu vi tsimbia tsiosi, valiitsa khukasitswa khuvirila mu vitsukhulu vovo. 5Niitsa khukhukasitsa, shichila Aburahamu yahulila malako kaanje, khandi nalonda mivaalo kaanje, nende mechitso kaanje.”
6Isaka yamenya Gerari. 7Lwa vasatsa vamenyayo vamureeva makhuva khulondokhana khu mukhali wewe, Isaka yavavoolela, “Ni mbotso wanje.” Isaka yaria khuvoola, “Nu mukhali wanje”; shichila Isaka yakanakana, “Vasatsa vamenyanga hanu vanyala khunziira, shichila Rebeka wakaasa likoondo.” 8Lwa Isaka yamenyayo khumatukhu manyishi, Mwami Abimeleki wa Vafilisti yaheenzelela mu litirisha, nalola khuli Isaka yali nakhumbelele mukhali wewe Rebeka. 9Khulwa yako, Abimeleki yalaanga Isaka, namuvoolela, “Ni kilikali, nu mukhali wowo! Shichila shina nuvoola, ‘Ni mbotso wanje?’ ”
Isaka yachipa Abimeleki, “Nali ninganakani nyala khwiirwa, niiva nakhavooli nu mukhali wanje.”
10Abimeleki yareeva Isaka, “Makhuva shina kukhukholi yaka? Mulala khu vandu vaanje yakhakoni nu mukhali wowo, uve ukhulerele matiinyu.” 11Nalwo lwa Abimeleki yachelihitsa vandu voosi, navoola, “Mundu wanatiili khu mundu uyu inoho mukhali wewe, aliitsa khwiirwa.”
12Isaka yaraaka viraakwa mu shivala shienesho, khandi khumuhika mulala kwenoko, yachesa viraakwa vinyishi, khuvira via yali niyaraaka; shichila Mwami Nyasaye yali wamukasitsa. 13Isaka yatsililila khuhindahala, khandi nakwa mundu wi miandu minyishi. 14Isaka yali ni shiayo shinyishi shia makondi nende tsing'ombe. Khali yali na varumishi vanyishi, khali Vafilisti nivamulolela imbotokha. 15Vafilisti vililitsa tsisieveye tsiosi na malova, tsia varumishi va Aburahamu tata wewe vali nivayeeva, lwa Aburahamu yali nashili mwoyo.
16Abimeleki yavoolela Isaka, “Rula mu shivala shieru. Uli ni tsingulu tsinyishi khuvira tsia khuli natsio.” 17Khulwa yako, Isaka yarulayo natsia khusimiikha liheemo lielie liu khumenyamu mu luhoongo lwa Gerari; khandi namenyayo. 18Isaka yayeevulula malova khurula mu tsisieveye, tsiali nitsiayevwa mumatukhu ka tata wewe Aburahamu, tsia Vafilisti vali nivililitsa lwa Aburahamu yakhutsa. Yatsikulikha mira malala mele, khuli ka tata wewe yali niyatsikulikha.
19Navutswa lwa varumishi va Isaka vayeeva isieveye mu luhoongo lwenolo, nivanyolamu matsi malahi; 20vayi vamenyanga Gerari valembana na vayi va Isaka; nivavoola, “Matsi yaka ni keru.” Khulwa yako, Isaka yakulikha isieveye yeneyo lira Eseki, nakhwo khuvoola, “Khulembana.”
21Varumishi va Isaka venavo vayeeva isieveye yindi, manivalembanilakhu khandi. Vachikulikha lira Sitina, nakhwo khuvoola, “Vutsiku.” 22Isaka yarulayo natsia khuyeeva isieveye yindi; navutswa mundu avulakhuho walembana khulondokhana khuyo. Yachikulikha lira Rehobotsi, nakhwo khuvoola, “Vuvoholole.” Isaka yavoola, “Mwami Nyasaye umali khukhuha vuvoholole nunundi vu khumenya mu shivala yishi, khandi khuliitsa khuhindahala mushio.”
23Isaka yarulaho natsia mu litaala lia Beresheba. 24Mwami Nyasaye yalolekha khu Isaka mu vutukhu vwenovo, navoola, “Ninzi Nyasaye wa tata wowo Aburahamu. Lekha khuria; shichila ndi nivi. Niitsa khukasitsa yivi khandi khukhole khwivula vitsukhulu mu vunyishi, khuli nali nalaaka murumishi wanje Aburahamu.” 25Khulwa yako, Isaka yumbakhayo vwaali; nasaala khu Mwami Nyasaye. Yasimiikhayo liheemo lielie liu khumenyamu. Varumishi veve vayeevayo isieveye yindi.
Khuli Isaka nende Abimeleki Vahulishitsana
26Abimeleki yarula mu shivala shia Gerari, natsia khulola Isaka. Yaliyo nu mulina wewe walaangwangwa Ahuzatsi nende mwimilili wu mukaanda kwa vasikali veve walaangwangwa Fikoli. 27Isaka yavareeva, “Shichila shina mwitsi khwinzi nunundi, na munyi mwandolelanga vutamanu, numukhunga khurula mu shivala shienyu?”
28Vamuvoolela, “Khwakhamanya nunundi ndi Mwami Nyasaye ali nivi; khandi khulolanga nu vulahi nukhukholi lilakano hakari hoho nende heru. Khwenyanga uve nu khusuuvilitsanga 29ndi shiutsitsanga khukhusalilitsa tawe, khuli khuvuli khukhusalilitsa. Khwakhulolela vulahi khandi nu khukhulekha khurula mu shivala shieru mu milembe. Khwakhamanya nunundi havulavu ndi Mwami Nyasaye wakhukasitsa yivi.” 30Isaka yavalombela mulukha kwi lilia, nivang'wa. 31Litukhu lialondakhu mu mavwevwe, vandu venevo visuuhitsana vene khuvene. Isaka yavaseevula, nivatsia mu milembe.
32Khulitukhu lienelo, varumishi va Isaka vitsa, nivavoolela Isaka makhuva khulondokhana khu isieveye ya vali nivayeevi. Vamuvoolela, “Khunyoli matsi.” 33Isaka yakulikha isieveye yeneyo lira Shiba. Khali nunundi litaala lienelo lilaangwangwa Beresheba.
Vakhali va Esau vi Tsimbia Tsindi
34Lwa Esau yali nali ni mihika makhomi kane, yahila vakhali vavili varulanga mu Vaahitse; mulala yalaangwangwa Yuditsi mwana wa Beheri wali Muhitse, na wundi Basematsi mwana wa Eloni wali Muhitse. 35Vachila Isaka nende Rebeka, nivakwa mu matiinyu mu limenya liavo.
Trenutno izabrano:
LIRAANGA 26: LLLPRO
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© The Bible Society of Kenya, 2013