लूका 2
2
बैतलहम च यीशु दा जन्म
1उनै धयाडें च ऐसा ओया के माराज औगुस्तुस कैसर दी त्र्फुं उक्म निकलया के रोमी कुमत दे देशें च सारे लोकें दा नां लिखे जान। 2ए पैली नां लखाई दी गल्ल ओस बेलै ओई, जदू क्विरिनियुस सीरिया लाकें दा बड़ा राजा हा। 3ते सारे लोक नां लखाने लेई अपने-अपने पूर्वजे दे शैर च गै। 4एसकरी युसूफ बी इसै लेई के ओ दाऊद दे कराने ते खानदान दा हा, गलील जिले दे नासरत शैर बिचा यहूदीया च दाऊद दे शैर बैतलहम च गीया, 5ओ उत्थें गीया कि अपनी मंगेतर मरियम दे कन्ने जेड़ी गर्भवती ही, नां लखा। 6ते ऐसा ओया के उन्दे उत्थें रौंदे ओई मरियम दे जमने दे देन पूरे ओए। 7ते ओनें अपने जेठे पुत्तर गी जन्म दिता, ते उसी कपड़े च लपेटियै चरनी च रखया, किके सरांई च उन्दे लेई कोई जगह नेई ही।
गुआलें गी सोर्गदूत दा परचार
8ते ओस देश च केछ गुआल हे, जेड़े रात गी पदरे मदान च रेईयै अपनी पिढें-बकरीयें दी राखी करदे हे। 9ते परमेसर दा एक दूत उन्दे कोल आई खडोता, ते प्रभु दी मैमा उन्दे चौनी बखी चमकी, ते ओ बड़े डरी गै। 10ओस बेलै सोर्गदूत ने उनेंगी आखया, “डरयो नेई; किके दिखो, आऊँ तुसेंगी गी बड़ी खुशी दा शोभ समाचार सनाना ऐं जेड़ा सारे लोकें दे लेई ओग, 11के अज्ज बेथलेहम जेड़ा दाऊद दा शैर ए थुआड़े लेई एक उद्धारकर्ता जमया ऐ, ते उवै मसीह प्रभु ऐ। 12ते एस दा थुआड़े लेई ए नशान ऐ के तोस एक जागत गी कपड़े च लपेटे दा ते चरनी च पेदा दिखगे।” 13पी एकदम ओस सोर्गदूत दे कन्ने सुर्गदूतें दी टोल्ली परमेसर दी स्तुति करदे ते ए आखदे ओई लबन लगया,
14“सोर्ग च परमेसर दी मैमा ते तरती उपर उनै मनुक्खें च जिंदे उपर ओ खोश ऐ, शान्ति उवै।”
गुआलें दा बैतलहम गी जाना
15जदूं सोर्गदूत उन्दे कोलां सोर्ग च चली गै, तां गुआलें अप्पुं-पिछें आख्या, “आओ, अस बैतलहम जाईयै ए गल्ल जेड़ी ओईयै, ते जिसी प्रभु ने असेंगी सनाया ऐ, दिखचै।” 16ते उनै फोरन जाईयै मरियम ते युसूफ गी, ते चरनी च ओस जागत गी पेदा दिखया। 17इनेंगी दिखियै उनै ए गल्ल जेड़ी एस जागत दे बारै च उनै गी आखी गेदी ही, परकट कित्ती, 18ते सारें सुनने आलें ओनें गल्लें कोलां जेड़ी गुआलें उन्दे कन्ने बोली ही रांनगी कित्ती। 19लेकन मरियम ए सारी गल्लां अपने मन च रखियै सोचदी रेई। 20ते गुआलें, जियां सोर्गदूतें उनेंगी आख्या हा, उयांगै सारा केछ सुनीयै ते दिखियै परमेसर दी मैमा ते स्तुति करदे ओई चली गै।
यीशु दा खतना ते नां रखना
21जेलै अट्ठ देन पूरे ओए तां ओदे खतने दा बेला आया, तां ओदा नां यीशु रखया गीया, जेड़ा ए नां सोर्गदूत थमां, ओदे पेट च औने कोलां पैलैं आख्या गीया हा।
22जेलै मूसा दे कनून दे मताबक मरियम दे शोद्ध ओनें दे देन पूरे ओए, तां युसूफ ते मरियम ने उसी यरूशलेम च लेई गै, के प्रभु दे अगें आनन। 23जियां के प्रभु दे कनून च लिखा ऐ; “अर एक जेठा प्रभु दे लेई पवित्र करियै सौम्पया जाग।” 24ते प्रभु दे कनून दे वचन दे मताबक, “चिट्टे कबूतरें दा एक जोड़ा यां जवान कबूतरें दा एक जोड़ा लेईयै बलि करें।”
शमौन दी पविख्वानी
25ओस बेलै यरूशलेम च शमौन नां दा एक बुजुर्ग मानु हा, ते ओ मानु तरमी ते पक्त हा; ते ओ इस्राएल दी शान्ति दा एन्तजार करा दा हा, ते पवित्र आत्मा ओदे कन्ने हा। 26ते पवित्र आत्मा थमां परकट ओया, के जदू तकर तू प्रभु दे मसीह गी दिखी नेई लैगा, अदूं तकर मौत गी नेई दिखी सकदा। 27यीशु पवित्र आत्मा दे गुआई कन्ने मंदर च आया; ते ओसलै मा-प्यो ने ओस बच्चे गी मंदर आंदा, के ओस लेई कनून दे मताबक रीति गी पूरा करन, 28तां ओसलै शमौन ने बच्चे येशु गी अपनी गोद च लेत्ता ते परमेसर दी स्तुति करदे ओई गलाया,
29“हे प्रभु, ऊन तू अपने दास गी अपने बायदे दे मताबक शान्ति कन्ने मरन लेई विदा करी दे,
30“किके मेरी अखीयैं तेरे ओ उद्धार गी दिखी लेत्ता ऐ जेड़ा तुं अपने लोकें आस्ते पेजेया ए।
31“जिसी तो सारे देशें दे लोकें दे सामने त्यार कित्ता ऐ।
32“कि ओ दुई जातीयें गी सचाई परकट करने लेई एक लो जेई बनग, ते तेरे अपने लोकें इस्राएल दी मैमा ओऐ।”
33ते ओसदे मां ते पिता इनें गल्लें उपर जेड़ीयां ओदे बारै च शमौन ने आखीयां, रांन ओदे हे। 34ओसबेलै शमौन ने उनेंगी अशीर्वाद देईयै, ओदी मां मरियम गी आखया, “देख्ख, ओ तां इस्राएल च मते सारें दे टौने, ते उठने लेई, ते एक ऐसा चेन ओनें लेई रख्या गीया ऐ, जेदे खलाफ गल्लां कित्तियां जागन।” 35(वरन तेरा प्राण बी तलवार कन्ने ओ आर-पार छेदया जाग) एदे कन्ने मते सारे एर्दें दे वचार परकट ओगन।
हन्नाह थमां गवाई
36ते आशेर गोत्र बिचा हन्नाह नां दी फनुएल दी कुड़ी एक पविखवाणी करने आली ही ओ बड़ी बूडी ही, ते बियाह ओनें दे बाद सत बरें तकर अपने करेआले कन्ने रेई सकी ही। 37ओ चौरासी बरें दी विधवा ही; ते मंदर गी नेई छुड़दी ही, पर उपवास ते प्रार्थना करी-करी रात-देन परमेसर दी स्तुति अराधना करदी रौंदी ही। 38ते ओ ओस कड़ी उत्थें आईयै परमेसर दा शुकर करन लगी, ते उनै सबनी कन्ने जेड़े यरूशलेम दे छटकारे दा एन्तजार करा दे हे, ओस यीशु दे बारै च गल्लां करन लगी।
युसूफ ते मरियम दा कर बापस औना
39जेलै युसूफ ते मरियम परमेसर दे कनून दे मताबक सारा केछ पूरा करी चुके तां अपने शैर गलील जिले दे नासरत च चली गै।
40ते जागत बददा, तकड़ा ओंदा, समझदारी कन्ने परोंदा गीया; ते परमेसर दी क्रपा ओदे उपर ही।
बालक यीशु मन्दिर च
41ओसदे मां-प्यो अर बरें युदियें दे फसह दे त्यार च यरूशलेम गी जंदे रौंदे हे। 42जेलै ओ बारें बरें दा ओया, ते ओ त्यार दी रीति दे मताबक यरूशलेम गी गै। 43ते जेलै त्यार दे देन पूरे ओए ते ओ बापस औन लगे, तां जागत यीशु यरूशलेम च गै रेई गीया; ते एस गल्ल थमां ओदे मां-प्यो अनजांन हे। 44ओ ए समझीयै के ओ ओर मसाफरें कन्ने आवा दा ओग, ओ एक देन दे सफर च अगें चली गे ते उसी अपने रिशतेदारें ते जांन-पछान आलें बेच तुपन लगे। 45पर जेलै ओ नेई लबया तां तुपदे-तुपदे पी यरूशलेम च चली गै। 46ते ऐसा ओया के त्रै धयाडें दे बाद उनै उसी मंदर दे बेड़े च पाशन देने आलें बेच बैठे दा, उन्दिआं गल्लां सुन्दे ते उनेंगी सुयाल करदे दिखया। 47ते जीनें बी लोक ओदी सुना दे हे, ओसदी समझ ते ओसदी गल्लें गी सुनीयै रांन हे, 48ओसलै ओ उसी दिखियै रांन ओए ते ओसदी मां ने उसी आखया, “ए पुत्तर, तो साड़े कन्ने ए जियां सलूक (कम) कि कित्ता? देख्ख, तेरा पिता ते आऊँ परेशान ओईयै तुगी तुपा दे हे।” 49ओनें उनेंगी आखया, “तोस मिगी कि तुपा दे हे? के तोस नेई जांनदे के मिगी अपने पिता दे कर च ओना जरुरी ऐ?” 50पर ओनें जेड़ी गल्ल उन्दे कन्ने बोली ओ उसी समझी नेई सके। 51पी ओ उन्दे कन्ने बापस नासरत शैर च आया, ते उन्दे ताबे च रिया; ते ओसदी मां ने ए सब गल्लां अपने मन च रखियां।
52यीशु अक्ल च ते कद च, ते परमेसर ते मनुक्खें दे सामने बददा गीया।
Trenutno izabrano:
लूका 2: DOG
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
This work is licensed under Creative Commons Attribution-ShareAlike 4.0 License.