Matie Sɛbɛ 26
26
A NƖ-BƐRƐ NA MANA TAA A JEEJU NYƆWFƲ
(Mar 14.1-2, Lu 22.1-2, Jã 11.45-53)
1A lɛ a *Jeeju na man a ana ƴɛrɩ̃sɩ baar, ʋ yelʼã a ʋ *par-tuurbe:
2“Nyɩ bɔ̃w ka a *Pakɩ fɛtɩ cɛ na bibie ayi, ɩ̃ a ba na nyɔw a *Nɩbɛ Bie tɩɩr, a ba kpa ʋ a nɩ-kʋ-daa juu.”
3A daar ʋlɔ pʋɔ, a Naaŋmɩn *baar-lo-nɩ-bɛrɛ nɩ a Jufisɩ ni-dierbe kpaarɩ̃ na taa a *baar-lo-nɩ-kpɛ̃ɛ Kayifi gbalɩ̃ pʋɔ. 4Ɩ̃ ba mana na taa a mɩnɛ ba na ɩrɛ ɩ̃ sɔɔlɔ nyɔwrɔ a Jeeju kʋrɔ. 5Ba yelʼã taa:
“A taa ɩ a fɛtɩ daar wa, a mɩnɛ a damfʋ kɔ̃ wa be a nɩbɛ jie wa.”
A PƆW NA KPAAR A KÃA ƳƆ̃W A JEEJU GBƐƐ PƲƆ
(Mar 14.3-9, Jã 12.1-8)
6A lɛ a *Jeeju na be a Betani-tẽw, a Sɩmɔ̃ ʋlɔ na ɩ a kɔ̃w, a ʋ yir, 7a pɔw wɩ nɩ a kã-nyu-vɩlaa na nyɩrɩ̃ kpɛmɛ a dafʋ ba na dãa ƴɔ̃w a kubir yole pʋɔ a sɛw, ʋ de kpaar ƴɔ̃w a Jeeju juumɩ, a lɛ ʋ na jɛ a dɩb par. 8A mɩnɛ a ʋ *par-tuurbe na nyɛ a lɛ, suur nyɔw ba na a ba sooro taa:
“Bõ ɩ ʋ sãwna a kãa bara a lɛ? 9Ʋ naa dãa na da pɔw a libie yaw kʋ a nãw deme.” 10Ɩ̃ a Jeeju bɔ̃w na a ala ba na ƴɛrɛ, ɩ̃ yel ba:
“Bõ ɩ a nyɩ dama a pɔw na? Ʋ maalʼã vɩlaa a ɩ̃ jie. 11A-na-ɩ nyɩ be na taa nɩ a nãw deme a daar a jaa. Ɩ̃-cɛ a maa, nyaa nyɛrɛ ma ɩ̃ beree nɩ nyɩ a daar a jaa wa. 12A pɔw na, a mɩnɛ ʋ na deer a kãa ƴɔ̃w a ɩ̃ ɩ̃gan pʋɔ, a ɩ̃ ũufʋ ɩnɛ ʋ gbɛɛrɩ̃ ma. 13Yel-mɩ̃ɛ ɩ̃ yele nyɩ, a lɛ ba nɔɔ mana a ƴɛr-son naa a jiir a jaa, ba nɔɔ mɩ mana a ala a pɔw naa na maal, a ba kɔ̃ wa hiin ʋ wa.”
A JUDASƖ BƲƆRƆ NA A JEEJU NYƆWFƲ
(Mar 14.10-11, Lu 22.3-6)
14Ɩ̃ a *Jeeju *par-tuurbe pie-nʼayi ƴen sʋbɔ na dɩ a Judasɩ Isikaryɔtɩ, cenʼã a Naaŋmɩn *baar-lo-nɩ-bɛrɛ jie 15na soor ba:
“A maa ƴɔ̃w a Jeeju a nyɩ nuumɩ, bõ nyɩ na kʋ ma?” A ba ya ʋ libi-kure lɩjɛrʼɩ̃-pie. 16Ɩ̃ wa nyɔw nɩ a ʋna bibirʼãa, ʋ nyɔw na ɩ̃ bʋɔrɔ a mɩnɛ ʋ na ɩrɛ ɩ̃ ƴɔnɔ a Jeeju a ba nuumɩ.
A JEEJU NA LÃA DƖ NƖ A Ʋ PAR-TUURBE A FƐTƖ DƖB
(Mar 14.12-21, Lu 22.7-14,21-23, Jã 13.21-30)
17A *bur-pʋɔr fɛtɩ bibir dãdãw dayen, a *Jeeju *par-tuurbe taw na ta ʋ ɩ̃ soor ʋ:
“Nyɩnɛ fʋ bʋɔrɔ sɩ gbɛɛrɩ̃ fʋ a *Pakɩ fɛtɩ dɩb?” 18A Jeeju yel ba: “Nyɩ́ cen a Jerujalɛm, a daba kãw jie na yel ʋ: ‘A Jãjaana yelʼã áa ʋ daar ta na, ʋ na dɩ a Pakɩ fɛtɩ dɩb nɩ a ʋ par-tuurbe a be a fʋ yir.’ ” 19A ʋ par-tuurbe maal a mɩnɛ a Jeeju na yel ba, na ba gbɛɛrɩ̃ a Pakɩ fɛtɩ dɩb.
20A jaanʋɔr, a Jeeju lãa na jɛ nɩ a ʋ par-tuurbe pie-nʼayi a dɩb pulẽe, 21ɩ̃ a mɩnɛ ba na dɩrɛ a dɩb, a Jeeju yel ba:
“Yel-mɩ̃ɛ ɩ̃ yele nyɩ, bõ-ƴen be na a nyɩ sɔ̃w nɔɔ diere ma a juu.” 22A ʋ par-tuurbe nii-sɔɔr nyɩrɩ̃ sɔb ba, a ba sooro ʋ bõ-ƴene-ƴene:
“Nɩ-kpɛ̃ɛ, maa ʋ mɩɩ?” 23A Jeeju yel ba:
“A ʋlɔ na tune ɓara nɩ ma a laa pʋɔ, ʋlɔ wa diere ma a juu. 24A *Nɩbɛ Bie na kpi na tu nɩ a mɩnɛ a na dãa sɛb a Naaŋmɩn Sɛbɛ pʋɔ a ʋ ɩnɛ. Ɩ̃-cɛ nabier na pɔw na a ʋna nɩrɛ na diere a Nɩbɛ Bie juu. A dãa na sa a nɩrɛ ʋlɔ jie, a ba kãa dãa dɔw ʋ wa.” 25A Judasɩ ʋlɔ na diere a Jeeju a juu soor ʋ na:
“Jãjaana, maa ʋ mɩɩ?” A Jeeju yel ʋ:
“Fʋ̃ʋ yel fʋ yẽ.”
A JEEJU NƖ A Ʋ PAR-TUURBE NA DƖRƐ A PAKƖ FƐTƖ
(Mar 14.22-26, Lu 22.15-20, 1 Kɔr 11.23-25)
26A lɛ ba na dɩrɛ a dɩb, a *Jeeju de na a buru, ɩ̃ a lɛ ʋ na puor a Naaŋmɩn ƴɔ̃w, ʋ ŋma na kʋ a ʋ *par-tuurbe, ɩ̃ yel ba:
“Nyɩ́ de ꞌwɔb. A naa ɩ na a ɩ̃ ɩ̃gan.”
27Ɩ̃ ʋ lɛ de na a dɩvɛ̃ nɩ a ŋman, puorʼɩ̃ a Naaŋmɩn, ɩ̃ cɛ kʋ ba yele nɩ:
“Nyɩ́ de nyu nyɩ jaa. 28A-na-ɩ a naa ɩ̃ ɩ a ɩ̃ jɩ̃ɩ na cɔɔrɔ a *pʋlɩ̃-taa a Naaŋmɩn na pʋlɩ̃ nɩ a nɩ-yaw, na mɩ cire a mɩnɛ a Naaŋmɩn na de a ba maal-faar bar kʋ ba. 29Ɩ̃ ɩ̃ yele nyɩ na, maa lɔɔ nyuure a bom naa fɩ̃ɩ, wa tara nɩ a lɛdaar ɩ̃ nɔɔ lãa lɛ nyuure nɩ nyɩ a dɩvɛ̃#26.29 Dɩvɛ̃: Dãa ʋ, ba na ma maalʼɩ̃ a divɛ-tɩɩr wɔmɔ. paalaa a ɩ̃ Sãa fãw pʋɔ wa.”
30Ɩ̃ a lɛ ba na cɛ a puorfʋ fɛtɩ yele baar, ba yi na cen a *Olivi-tɩɩr tãw juu.
A JEEJU NA MANA A MƖNƐ A PƖƐR NA CƖƖRƐ Ʋ
(Mar 14.27-31, Lu 22.31-34, Jã 13.36-38)
31Ɩ̃ a *Jeeju yelʼã a ʋ *par-tuurbe:
“A dɩnaa tɩsɔw, nyɩ na bɩlʼã faa nyɩ jaa ɩ̃ bar ma ɩ̃ jɔ, a-na-ɩ a sɛbʼã a Naaŋmɩn Sɛbɛ pʋɔ: ‘Ɩ̃ na ŋme na a dɔ-cɩɩnaa kʋ́, ɩ̃ a piir jɔ yaarɩ̃.’ 32Ɩ̃-cɛ a maa wa ir a kũu pʋɔ, ɩ̃ na de nyɩ na nĩe cen na gu nyɩ a Galile.” 33A Pɩɛr yel a Jeeju:
“A ala saarɩ̃ ɩ a ba jaa na bɩlʼã faa ɩ̃ bar fʋ ɩ̃ jɔ, a maa, maa bara fʋ fɩ̃ɩ wa.” 34A Jeeju yel ʋ:
“Yel-mɩ̃ɛ ɩ̃ yele fʋ, a tɩsɔw na, a nɔraa kɔ̃ kõ sɛr wa, ɩ̃ fʋ na cɩɩrɩ̃ na gbɛɛ ata, á faa bɔ̃w ma wa.” 35A Pɩɛr yel ʋ:
“A ala saarɩ̃ ɩ a sɛw na ɩ̃ na kpi nɩ fʋ, maa cɩɩrɛ fʋ fɩ̃ɩ wa.” Ɩ̃ a ʋ par-tuurbe ba jaa mɩ yelʼã a lɛ.
A JEEJU NA PUORO A JESEMANE NAKƲƆR PƲƆ
(Mar 14.32-42, Lu 22.39-46)
36Ɩ̃ a *Jeeju taw na a ʋ *par-tuurbe cenʼɩ̃ a jie ʋlɔ ba na bʋɔlɔ a Jesemane, ɩ̃ yel ba:
“Nyɩ́ jɛ a ka, ɩ̃-cɛ ɩ̃ cen beka na sʋɔr a Naaŋmɩn.”
37Ɩ̃ ʋ taw na a Pɩɛr nɩ a Jebede bi-dabsɩ ayi lãa cenʼɩ̃ a nii-sɔw, ɩ̃ a ni-sɔbaa nyɔw ʋ, lãa dama nɩ ʋ a tɩɛrɩ̃sɩ yaw, 38ʋ yel ba:
“Ni-sɔbaa nyɩrɩ̃ na kpɛ ma wɔ̃ taa nɩ ɩ̃ na kpi na. Nyɩ́ ɩraa a ka; nyɩ taa wa gure wa.” 39Ɩ̃ ʋ cenʼã a nii-sɔw fɩ̃ɩ na lo gburĩ a dume ɩ̃ kpa pɔw a ʋ nii-sɔw, ɩ̃ sʋɔrɔ a Naaŋmɩn yele nɩ:
“Ɩ̃ Sãa, a ala ɩ a na tʋɔ na ɩ a lɛ, ir ma a tuo ŋman naa bar, ɩ̃ kɔ̃ nyu nɩ ʋ wa. Ɩ̃-cɛ a taa ɩ a mɩnɛ ɩ̃ na bʋɔrɔ wa, ɩ̃ a ɩ a mɩnɛ fʋ na bʋɔrɔ.”
40A Jeeju lɩɛbʼã wa na nyɛ a ʋ par-tuurbe ata a ba gur, ʋ yel a Pɩɛr:
“Nyaa tʋɔrɔ gala a gʋ̃ɔ ɩ̃ pɔwrɔ ma a lɛɛr-bõ-ƴen pʋɔ wa? 41Nyɩ taa gure wa. Nyɩ́ sʋɔrɔ a Naaŋmɩn, kɔ̃ wa kpɛ a bɩɩrfʋ pʋɔ wa. A nɩrɛ sɩɛ bʋɔrɔ na a son maalfʋ, ɩ̃-cɛ a ɩ̃gan balʼã.”
42A Jeeju lɛ bar ba na ɩ̃ cen a gbɛɛ ayi pʋɔ, na puoro yele nɩ:
“Ɩ̃ Sãa, a ala ɩ a tuo ŋman naa ma tʋɔrɔ diere bara ma ɩ̃ a ala ma ɩ ɩ̃ na nyu nɩ ʋ na wa, maal a mɩnɛ fʋ na bʋɔrɔ.”
43A Jeeju lɛ wa na a ʋ par-tuurbe sɛ̃ na nyɛ ba a ba gure, a-na-ɩ a gʋ̃ɔ nyɩrɩ̃ na gãw ba, 44ʋ lɛ bar ba ɩ̃ cen a gbɛɛ ata pʋɔ, lɛ puor a lɛ, 45ɩ̃ pãa lɛ wa a ʋ par-tuurbe sɛ̃ na yel ba:
“Nyɩ cãa na be ka gure? Nyɩ́ nyɛ, a daar ta na ba na ƴɔnɔ a *Nɩbɛ Bie a maal-faar deme nuumɩ. 46Nyɩ́ ir a sɩ cen. Nyɩ́ nyɛ, a ʋlɔ na diere ma a juu tara na ka.”
A JEEJU NYƆWFƲ
(Mar 14.43-50, Lu 22.47-53, Jã 18.3-12)
47A mɩnɛ a *Jeeju na cãa ƴɛrɛ, a Judasɩ na ɩ a ʋ *par-tuurbe pie-nʼayi ƴen sʋbɔ ta na. Ʋ wa nɩ na a nɩ-yaw na tɛrɛ a bãjɩnsɩ, nɩ a gʋdɛɛ, a Jufisɩ ni-dierbe nɩ a *baar-lo-nɩ-bɛrɛ na tʋ̃. 48A ʋlɔ na diere a Jeeju a juu dãa na kʋ ba a jɩbaa ɩ̃ yel: “A ʋlɔ ɩ̃ nɔɔ woro, a ʋlɔ ʋ. Nyɩ́ nyɔw ʋ.” 49A jie naan a Judasɩ taw na ta a Jeeju ɩ̃ yel ʋ:
“Jãjaana, yaanɩ!” ɩ̃ worĩ ʋ. 50A Jeeju yel ʋ:
“Ɩ̃ baraa, a ala fʋ na wa a maalfʋ, maal,” ɩ̃ ba ta na nyɔw ʋ.
51A ƴen sʋbɔ na lãa be nɩ a Jeeju vʋ̃ɔ na a ʋ bãjɩnɛ, cɛ nɩ a *baar-lo-nɩ-kpɛ̃ɛ tʋ̃tʋnɔ toor ŋmaa. 52A Jeeju yel ʋ:
“Su a fʋ bãjɩnɛ a sɔkpa pʋɔ, a-na-ɩ a bala na jɛbɛ nɩ a bãjɩnsɩ, a bãjɩnsɩ ɩ̃ nɔɔ mɩ kú ba. 53Faa bɔ̃w ka ɩ̃ na tʋɔ na sʋɔr a ɩ̃ Sãa, ʋ tɩɩr a ʋ sɩ-tʋnɩsɩ a jie naan, a ba ta ture ture ɩ̃ dɔɔl, naa ba wa sũo ma wa? 54Ɩ̃-cɛ, a ala ɩ a lɛ ʋ, mɩnɛ a Naaŋmɩn Sɛbɛ na yel áa sɛw na a na ta a lɛ, na tʋɔ maal wa baar?”
55A lɛdaar a Jeeju yelʼã a nɩbɛ:
“Nyanyuur ɩ̃ ɩ a nyɩ wa nɩ a bãjɩnsɩ nɩ a gʋdɛɛ na nyɔwrɔ nɩ ma mɩɩ? A bibie a jaa ɩ̃ ma dãa na jɛ a Naaŋmɩn puor-yir kpɛ̃ɛ pʋɔ mana nyɩ a Naaŋmɩn ƴɛrɩ̃, ɩ̃ nyaa dãa nyɔw ma wa. 56Ɩ̃-cɛ a ala a jaa ta na a mɩnɛ a Naaŋmɩn ƴɛr-hierbe ƴɛrɩ̃sɩ na tʋɔ maal baar.” Ɩ̃ a ʋ par-tuurbe ba jaa bar ʋ na ɩ̃ jɔ.
A JEEJU BA NA NYƆW CENʼƖ̃ A NƖ-BƐRƐ NII-SƆW
(Mar 14.53-65, Lu 22.54-55,63-71, Jã 18.13-14,19-24)
57A bala na nyɔw a *Jeeju, ba taw ʋ na cenʼɩ̃ a *baar-lo-nɩ-kpɛ̃ɛ Kayifi yir, a jie ʋlɔ a *ƴɛr-kpɛn-bɔɔnbɔ nɩ a ni-dierbe na kpaarɩ̃ taa. 58Ɩ̃ a Pɩɛr bɩɛrʼã tu a Jeeju cen na ta a baar-lo-nɩ-kpɛ̃ɛ yir, na kpɛ a gbalɩ̃ pʋɔ lãa jɛ nɩ a ʋ tʋ̃tʋnbɔ, bʋɔrɔ ʋ nyɛ a ala na tara.
59A *baar-lo-nɩ-bɛrɛ nɩ a *ƴɛr-guor-nɩ-bɛrɛ ba jaa bʋɔrɔ na a jiri ba na ŋmaara ƴɔnɔ a Jeeju, a mɩnɛ ba na ɩrɛɛ ɩ̃ nyɛrɛ a sɔr ɩ̃ kúrɔ ʋ. 60Ɩ̃-cɛ a ala saarɩ̃ ɩ a nɩ-yaw na wɩ ŋmara a jiri ƴɔnɔ ʋ, baa nyɛ a jiri ʋlɔ na tʋɔrɔ ƴɔnɔ ʋ a kũu pʋɔ wa. Ɩ̃ a nɩbɛ ayi pãa na wɩ ɩraa, 61ɩ̃ yel:
“A daba na yelʼã á ʋ na tʋɔ na wɛl a Naaŋmɩn puor-yir kpɛ̃ɛ, ɩ̃ lɛ mɛ ʋ bibie ata pʋɔ.” 62A baar-lo-nɩ-kpɛ̃ɛ irʼã soor a Jeeju:
“Faa yele bom wa? Boolo nɩ a ala a nɩbɛ na ƴɛrɛ ƴɔnɔ fʋ?” 63Ɩ̃-cɛ a Jeeju sine. A baar-lo-nɩ-kpɛ̃ɛ yel ʋ:
“Pɔl a fʋ puor ɩ̃ yel sɩ nɩ a baafʋ Naaŋmɩn yuor a ala ɩ fʋ ɩ na a *Kirisi na ɩ a Naaŋmɩn Bie.” 64A Jeeju yel ʋ:
“Fʋ̃ʋ yel. Ɩ̃-cɛ ɩ̃ yele nyɩ na, ka nɩ fɩ̃ɩ pʋɔ nyɩ nɔɔ wa nyɛ na a *Nɩbɛ Bie ʋ jɛ a Fãw Sʋbɔ dʋrɩ̃ loor, ɩ̃ waara a saꞌlon a dɔ̃dɔrɩ̃sɩ pʋɔ.” 65A baar-lo-nɩ-kpɛ̃ɛ ɓer a ʋ cẽcene ɩ̃ yel:
“A Naaŋmɩn ʋ kpɛrɛ! Sɩ lɛ bʋɔrɔ na ƴɛr-bɔ̃w-manba go? Nyɩ nyɛ na a ƴɛ̃ƴɛrɩ̃ a mɩnɛ ʋ na kpɛ a Naaŋmɩn. 66Mɩnɛ nyɩ tɩɛr?” A ba yel:
“Ʋ sɛw nɩ na a kũu.” 67Ɩ̃ ba pʋʋrɔ na a natɛɛr ƴɔnɔ ʋ a nii-sɔw, pɔbɔ nɩ ʋ, ɓara ɓara ʋ 68yele nɩ:
“A fʋna Kirisi naa! Bɔ̃w a ʋlɔ na ŋme fʋ!”
A PƖƐR NA CƖƖRƐ A JEEJU
(Mar 14.66-72, Lu 22.56-62, Jã 18.15-18,25-27)
69A Pɩɛr cãa na jɛ a be a yẽw a gbalɩ̃ pʋɔ, ɩ̃ a tʋ̃tʋ̃-poole wɩ na na yel ʋ:
“A fʋ̃ʋ mɩ, fʋ mɩ dãa na be nɩ a *Jeeju, a Galile nɩrɛ ʋlɔ.” 70Ɩ̃-cɛ ʋ cɩɩrɛ na a nɩbɛ ba jaa nii-sɔw yele nɩ:
“Maa bɔ̃w a ala fʋ na ɩraa ƴɛrɛ wa.”
71Ɩ̃ ʋ irʼã cen a gbalɩ̃ dɔ̃dɔr nʋɔr, a tʋ̃tʋ̃-poole ƴen sʋbɔ nyɛ ʋ, ɩ̃ yel a bala na be a be:
“A daba na mɩ dãa na be nɩ a Najarɛtɩ Jeeju.” 72A Pɩɛr lɛ cɩɩrɛ, pɔrɔ nɩ yele nɩ:
“Maa bɔ̃w a daba na wa.”
73A ɩ na fɩ̃ɩ, ɩ̃ a bala na ɩraa a be ta na yel a Pɩɛr: “Sɩrɛ jaa ʋ. Fʋ ɩ na a ba nɩrɛ kãw, a-na-ɩ fʋ ƴɛrɛ na a ba kaarɩ̃.” 74Ɩ̃ ʋ nyɔw na ɩ̃ pɔrɔ ƴɔnɔ a ʋ mɩ̃ɛ bʋɔlɔ nɩ a Naaŋmɩn yuor yele nɩ:
“Maa bɔ̃w a daba na wa.”
Ɩ̃ a jie naan a nɔraa kõ na, 75a Pɩɛr tɩɛr yuo a ala a Jeeju na dãa yel ʋ: “A nɔraa kɔ̃ kõ sɛr, ɩ̃ fʋ na cɩɩrɩ̃ ma na gbɛɛ ata.” Ɩ̃ ʋ yi na tɩɛrɛ kono nɩ.
Trenutno izabrano:
Matie Sɛbɛ 26: BNT93
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Le Nouveau Testament en langue birifor © Alliance Biblique au Burkina Faso, 1993.