পত্থম 18
18
অব্রাহাম আর সারারে গোজেনর বর্ দেনা
1অব্রাহামে যেক্কে মম্রির্ এলোন ঝার কায়কুরে বজত্তি গুরিদো সেক্কে লগেপ্রভু একদিন্যে তাইধু দেগা দিলো। অব্রাহামে সেদিন্যে দিবুজ্যে রোদোত্ তা তাম্বুলো দোরানত্ বুয়োই এলঅ। 2-3এন্ সময়োত্ তে চোখ তুলিনে রিনি চেলঅ, তা মুজুঙোত্তুন্ কিজু দুরোত্ তিন্নো মানুচ্ ঠিয়্যেই আগন্। তারারে দেগানার লগে লগে তে তাম্বুলো দোরানত্তুন্ দাবা যেইনে মাদিত্ মাঢা নিগিরিনে তারারে সালাম গুরিনে কলঅ, “চঅ, যুদি লবাদোস্যে ন-অয়্ সালে দোয়্যে গুরিনে তর্ এ চাগর্বোরে পাশ্ কাবিনে আঢি ন-যেবে। 4মুই এক্কানা পানি আনি দুয়োঙর্, তুমি টেঙানি ধোই নেযঅ। সে পরেদি তুমি এ গাজ্সো তলাত্ কানক্কণ্ ঝিরো। 5তমার্ এ চাগরবো ইধু যেক্কে এচ্চো সালে মুই কিজু হানা আনংগোই, সেক্কে বল্ ভোরেইনে তুমি আরঅ যেই পারিবা।।”
জোবত্ তারা কলাক্, ঠিগ্ আঘে, তুই যিয়েন গম মনে গরচ্ সিয়েন গর্।
6অব্রাহামে সেক্কে তাম্বুলো ভিদিরে যেইনে সারারে কলঅ, “যাদিমাদি আদার কেজি গম্ মোয়দ্যে মুলিনে কিজু পিদে বানেই দে।”
7অব্রাহামে সে পরেদি ধাবা যেইনে গোরু ঝাগত্তুন্ গম্ চেইনে এক্কো কজমা গোরু ছঅ নিনেই তা চাগর্বোরে দিলো। সে চাগর্বোয়ো যাদিমাদি সিবে রানিবাত্তে নেযেল। 8পরেদি অব্রাহামে দোই, গম্ দুধ আর রান্যে য়েরা নেযেইনে তারারে ভাগ গুরি দিলো। তারা যেক্কে হাদন্ সেক্কে অব্রাহামে তারা কায়-কুরে গাজ্সো গরানত্ ঠিয়্যেই এলঅ।
9তারা অব্রাহামরে পুযোর্ গুরিলাক্, “তঅ মোক্কো সারা কুদু?”
তে কলঅ, “তাম্বুলো ভিদিরে আঘে।”
10সেক্কে তারা ভিদিরেত্তুন একজনে কলঅ, “এজেত্তে বজর্ এ সময়োত্ মুই হামাক্কায়্ তইধু আরঅ এইম্। সেক্কে তঅ মোক্কো সারা করত্ এক্কো পুয়ো থেবঅ।”
সারা অব্রাহাম পিজেন্দি তাম্বুলো দোরানত্তুন্ বেক্ কধানি শুন্যে। 11সেক্কে অব্রাহাম আর সারার বোউত্ বয়জ্ ওইয়্যে আর সারার ঝি-পুয়ো অবার বয়জ্ হোরে যেইয়্যে। 12সেনত্তে সারা মনে মনে আজিনে কলঅ, “মঅ নেগ্কো ইক্কুনি বুড়ো ওই যেইয়্যে আহ্ মুইয়ো হোরে যেইয়োং; একলগে থেবার্ ফুত্তিগান কি আরঅ মইধু ফিরি এবঅ?”
13সেক্কে লগেপ্রভু অব্রাহামরে কলঅ, “সারা কিত্তে এ কধানি কোই কোই আজিলো, এ বুড়ো বয়জত্ হামাক্কায় কি তার পুয়ো অবঅ? 14লগেপ্রভু ইধু ন-পারে পারা কি কিজু আঘে? এজেত্তে বজর্ ঠিগ্ এ সময়োত্ মুই আরঅ তমা ইধু ফিরি এইম্ আর সেক্কে সারা করত্ এক্কো পুয়ো থেবঅ।” 15সারা সেক্কে দরে আজিবার্ কধাগান্ অস্বীগের্ গুরিনে কলঅ, “না, মুই দঅ ন আজং।”
মাত্তর্ লগেপ্রভু কলঅ, “সিয়েন্ ঠিগ্ নয়্; তুই আজ্সোস্ দঅ!”
সদোমত্তে অব্রাহামর কোজোলী
16ইয়ান পরেদি সে তিনজনে সিয়েনত্তুন্ উদিলাক্ আর তলে সদোম ইন্দি রিনি চেলাক্। অব্রাহামে তারারে উজেই দিবাত্তে তারা সমারে কিজু দূরোত্ গেলঅ। 17পরেদি লগেপ্রভু কলঅ, “মুই যিয়েনি গুরিবাত্তে যাঙর্ সিয়েনি কি অব্রাহামত্তুন্ লুগেম্? 18অব্রাহাম আর তা বংশর্ মানুচ্চুনো ভিদিরেত্তুন দঅ এক্কো দাঙর্ খেমতাবলা জাদ অবঅ আর সে জাদ ভিদিরেন্দি দঅ পিত্থিমীর্ বেক্ জাদতুনে বর্ পেবাক্। 19মুই লগেপ্রভু এ আশালোই তারে বেঈ নেযেয়োং যেনে তে তার পুয়ো আর ঘরর্ অন্য বেক্কুনোরে গম্ আহ্ দোল্ কাম্ গুরিনে মর্ আওজ্ মজিম মানি চুলিবার্ উবদেজ্ দে। যুদি তারা অব্রাহাম কধা শুনিনে সেধোক্ক্যেন গুরি চলন্, সালে মুই লগেপ্রভু অব্রাহাম পৌইদ্যেনে যিয়েনি কোইয়োং সিয়েনি বেক্কানি গুরিম্।”
20সে পরেদি লগেপ্রভু কলঅ, “সদোম আর ঘমোরা বিরুদ্ধে অমকদ গন্দগুল্ চলের্, আর তারার্ পাপঅ বেশ্ ওইয়্যে। 21সেনত্তে মুই ইক্কিনে তলেদি যেইনে চেবাত্তে চাং, তারা যিয়েনি গোজ্যন্ বিলি শুন্যং সিয়েনি হামাক্কায় এদক্ ভান্ন্যেই নাকি। আর যুদি সিয়েনি ন অয়্ সিয়েনঅ মুই জানি পারিম্।”
22সেক্কে অন্য দ্বিজনে ঘুরিনে সদোম ইন্দি আঢি যাদন্ আর অব্রাহামে লগেপ্রভু মুজুঙোত্ ঠিয়েই রলঅ। 23পরেদি অব্রাহামে লগেপ্রভু ইন্দি এক্কেনা আগ্বারে যেইনে কলঅ, “মাত্তর্ তুই কি ভান্ন্যেই মানুচ্চুনোর লগে গম্ মানুচ্চুনোরেয়ো শেজ্ গুরিবে? 24শঅর ভিদিরে যুদি পঞ্চাজ্জন গম্ মানুচ্ থান্ সালে সে পঞ্চাশ জনত্ত্যে গোদা শঅরান্ রেহাই ন-দিইনে কি হামাক্কায় তুই সিয়েন্ শেজ্ গুরি ফেলেবে? 25ইয়েন্ তর্ পক্ষে সম্ভব নয়। গম্ আর ভান্ন্যেয় উগুরে এক বাবোত্যে বেবহার গুরিনে তারারে একলগে মারে ফেলানা তর্ পক্ষে এক্কুবারে সম্ভব নয়। গোদা পিত্থিমীয়ানর্ যিবে বিচেরর্ মালিক্ তে কি দোল্বিচের্ গুরি ন পারে?”
26সেক্কে লগেপ্রভু কলঅ, “যুদি সদোম শঅরত্ পঞ্চাশ জন্ গম্ মানুচ্অ পাহ্ যায়, সালে তারাত্ত্যে গোদা শঅরান্ মুই রেহাই দিম্।”
27অব্রাহামে কলঅ, “চাহ্, মুই ধূল্যে আহ্ ছেই ছাড়া আর কিচ্ছু নয়, তো মুই ন-দোরেনে মঅ প্রভুর্ লগে কধা কঙর্। 28ধুরিচ্, যুদি পঞ্চাশ জন্ ন-ওইনে পাচ্জন্ কম্ অয়্ সালে কি পাচ্জন্ কম্ ওইনেয়ো তুই গোদা শঅরান্ ভস্ত গুরি ফেলেবে?”
তে কলঅ, “মুই যুদি সিয়েনত্ পাচচোল্লিশ্ জনরেয়ো পাং সালে মুই সিয়েন্ ভস্ত ন-গুরিম্।”
29অব্রাহামে তারে আরঅ কলঅ, “ধুরিচ্, যুদি সিয়েনত্ বানা চোল্লিশ্জন্ গম্ মানুচ্ পাহ্ যায়?”
তে কলঅ, “সে চোল্লিশ্ জনত্তে মুই সিয়েন্ ভস্ত ন-গুরিম্।”
30অব্রাহামে কলঅ, “মর্ প্রভু যেনে মঅ কধালোই বেজার্ ন-অয়। আচ্চা, যুদি সিয়েনত্ ত্রিশজনরে পাহ্ যায়?”
তে কলঅ, “যুদি মুই ত্রিশ জনরেয়ো সিয়েনত্ পাং সালে মুই সিয়েন্ ভস্ত ন-গুরিম্।”
31অব্রাহামে কলঅ, “মুই যেক্কে সাহস গুরিনে প্রভুর লগে কধা কঙর্ সেক্কে আরঅ কঙর্, যুদি সিয়েনত্ কুড়ি জনরে পাহ্ যায়?”
তে কলঅ, “সে কুড়িজনত্তে মুই সিয়েন্ ভস্ত ন-গুরিম্।”
32সেক্কে অব্রাহামে কলঅ, “মর্ প্রভু যেনে বেজার্ ন-অয়্, মুই আর বানা একবার্ কঙর্, যুদি সিয়েনত্ দশ্ জনরেয়ো পাহ্ যায়?”
তে কলঅ, “সে দশ্জনত্তে মুই সিয়েন্ ভস্ত ন-গুরিম্।”
33অব্রাহাম লগে কধা কনা থুম্ গুরিনে লগেপ্রভু সিয়েনত্তুন্ আঢি গেলগোই আর অব্রাহামেয়ো তা ঘরত্ ফিরি গেলঅ।
Trenutno izabrano:
পত্থম 18: CBT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Copyright © 2021 Bangladesh Bible Society