লূক 12
12
শিচ্চ্যগুনোরে শিক্ষ্যে দেনা
(মথি ১০:২৬-৩৩)
1এ ভিদিরে আজার্ আজার্ মানুচ্ এমন্ গুরি থুবেলাক্ যে, তারা ঠেলাঠেলি গুরি একজন অন্যজন উগুরে পত্তন্। সেক্কে যীশু পত্তমে তা শিচ্চ্যগুনোরে কলঅ, ফরীশীগুনোর্ সদাগানিত্তুন্ উজিয়ার্ অ। সেই সদাগান্ অলঅ তারার্ ভন্ডামী। 2লুগেইয়্যে বেক্কানি ফগদাং অবঅ আর গুমরর্ বেক্কানি জানা অবঅ। 3তুমি আন্ধারত্ যিয়েনি কোইয়ো, সিয়েনি মান্জ্যে পহ্রত শুনিবাক্। ভিদিরে ঘরত্ যিয়েনি কানে কানে কোইয়ো সিয়েনি ছাল উগুরেত্তুন্ ফগদাং গরা অবঅ।
4মঅ সমাজ্যেগুন্, মুই তমারে কঙর্, যিগুনে কিয়্যেগান্ ভস্ত গরানার্ পরেদি আর কিচ্চু গুরি ন-পারন্ সিগুনোরে ন-দোরেইয়ো। 5কারে দোরেবা মুই তমারে সিয়েন্ কোই দোঙর্। তমারে মারে ফেলেবার্ পরেদি নরগত্ ফেলে দিবার্ খেমতা যার্ আঘে তারেই দোরেয়ো। অয়, মুই তমারে কঙর্, তারেই দোরেয়ো।
6পাচ্চো চড়ই পেক্ কি কম্ দামে বেজা ন-যায়? তো গোজেনে সিগুনোত্তুন্ এক্কোরেয়ো পুরি ন-ফেলায়। 7এমন্ কি, তোমা মাঢাগুনোর্ চুলানিয়ো তার্ গণা আঘে। ন-দোরেয়ো; আজার্ আজার্ চড়ই পেগত্তুন্অ তমার দাম্ বোউৎ বেচ্।
8“মুই তমারে ঘেচ্চ্যেকগুরি কঙর্, যে কেঅ মান্জ্য মুজুঙোত্ মরে স্বীগের্ গরে মান্জ্য পুয়োবোয়ো তারে গোজেন দুত্তুনো মুজুঙোত্ স্বীগের্ গুরিবো। 9মাত্তর্ যে কেঅ মরে মান্জ্য মুজুঙোত্ অস্বীগের্ গরে তারে গোজেন দূত্তুনো মুজুঙোত্ অস্বীগের্ গরা অবঅ। 10মান্জ্যপুয়োবোর্ বিরুদ্ধে কেঅ কনঅ কধা কলে তারে ক্ষেমা গরা অবঅ, মাত্তর্ যুনি কেঅ পবিত্র আত্মার্ বিরুদ্ধে অগমানর্ কধা কয় তারে ক্ষেমা গরা ন-অবঅ। 11মান্জ্যে তমারে যেক্কে সমাজ ঘরত, শাসনগুরিয়্যে আর খেমতাবলা মানুচ্চুনো ইধু নেযেবাক্, সেক্কে কিবাবোত্যেগুরি নিজো পক্ষে কধা কবা বা কি জোব্ দিবা সে পৌইদ্যেনে চিদে ন-গোজ্য। 12কি কুয়ো পরিবো পবিত্র আত্মাগানে সেলক্কে সিয়েনি তমারে শিগেই দিবো।”
ভূল্-বেদমা থাগোইয়্যে মান্জ্যর কধা
13ভিড়ো ভিদিরেত্তুন্ এক্কো মান্জ্যে যীশুরে কলঅ, “মাষ্টরবাবু, আমা বাব্পো যে সম্বোত্তিগানি আমাত্যে থোই যেইয়্যে, মঅ ভেইবোরে সিয়েনি মঅ সমারে ভাগ্ গুরি লবাত্তে কঅ।” 14যীশু তারে কলঅ, “বিচের্ গুরিবার্ বা তমা ভিদিরে সম্বোত্তি ভাগ্ গুরি দিবার্ অধিকার মরে কন্না দিয়্যে?”
15সে পরেদি যীশু মানুচ্চুনোরে কলঅ, উজিয়ার্! নানান্ বাবোত্যে লুভোত্তুন্ নিজোরে রোক্ষ্যে গরঅ, কিয়া সয়-সাগর্ সম্বোত্তি থানা মান্জ্য জিংকানিত্ বেক্কুনত্তুন্ দরকারী বেপার নয়।
16ইয়েন পরেদি যীশু মানুচ্চুনোরে শিক্ষ্যে দিবাত্যে এ উদাহরনান্ দিলো: “কন এক্কো থাগোইয়্যে মান্জ্য ভূইয়োত্ সয়-সাগোজ্যে শোজ্য ওইয়্যে। 17ইয়েনত্যে তে মনে মনে কুয়ো ধল্ল, এদক্ শোজ্য থবার্ জাগা দঅ মর্ নেই; ইক্কিনে মুই কি গুরিম্? 18থিগ্ আঘে, মুই এক্কান কাম্ গুরিম্। মর্ গলাঘরানি ভাঙিনে দাঙর্ দাঙর্ গলাঘর্ বানেম্ আর মর্ বেক্ শোজ্যগুন আর ধনুন্ সিধু থোম্। 19যেরেদি মুই নিজোরে কোম্, ভালোক্ বজরত্তে সয়-সাগোজ্যে গম্ গম্ জিনিচ্ থুবেইয়্যে আঘে। আরাম্ গরঅ, হানা-দানা গরঅ, রঙ্গ-ফুত্তিয়ে দিন কাদঅ। 20মাত্তর্ গোজেনে তারে কলঅ, ‘ও ভুলো, এইচ্চ্যে রেদোত্ তত্তুন্ মরা পুরিবো। সালে যেদক্কানি জিনিস্ তুমি থুবেইয়ো সিয়েনি কন্না ভোগ্ গুরিবো?’ ”
21যেরেদি যীশু কলঅ, “যে মানুচ্চো নিজোত্যে ধন-সোম্বোত্তি থুবোয় অদচ গোজেন চোগেদি তাগোয়্যে নয়, তা অবস্থা সেবাবোত্যে অয়।”
জিংকানির্ বেগত্তুন্ দরকারী পৌইদ্যেনে শিক্ষ্যে
(মথি ৬:১৯-২১,২৫-৩৪)
22ইয়েন পরেদি যীশু তা শিচ্চ্যগুনোরে কলঅ, ইয়েনত্যে মুই তমারে কঙর্, কি হেবা বিলি বাঁজি থানা পৌইদ্যেনে বা কি উরিবা বিলি কিয়্যেগান পৌইদ্যেনে চিদে ন-গোজ্য। 23জিংকানিয়ান্ বানা হানা-দানার্ বেপার নয়, আর কিয়্যেগান্ বানা কাবর-চুগরর্ বেপার নয়। 24কবাগুনো ইন্দি রিনি চঅ, তারা বীজ্-অ ন-ফেলান্ শোজ্যয়ো ন-কাবন্। তারার গুদোম্-ঘর্ বা গলাঘর্অ নেই; তো গোজেনে তারারে খাবায়। তুমি দঅ এ পেক্কুনোত্তুন্ আরঅ বেচ্ দামী। 25তমাত্তুন্ কন্না চিদে-চজ্জা গুরিনে নিজো আয়ুগান এক ঘন্টা বাড়েই পারঅ? 26সালে এ চিগোন্ কামান-অ যুনি তুমি গুরি ন-পারঅ সালে অন্য বেপারত্যেই কিত্ত্যে চিদে গরঅ?
27চিদে গুরি চঅ, ফুলুন্ কিবাবোত্যে গুরি দাঙর্ অন্। সিগুনে কাম্অ ন-গরন্ সূদোয়ো ন-কাবন্। মাত্তর্ মুই তমারে কঙর্, শলোমন রাজা এদক্ সয়-সাগোজ্যে ভিদিরে থেইনেয়ো ইগুনোর্ এক্কানর্অ নিজোরে সাজেই ন-পারে। 28মাধত্ যে ঘাচ্চানি এইচ্চ্যে আঘে আর কেল্ল্যে চুলোত্ ফেলেই দিয়্যে অবঅ, গোজেনে সিয়েন যেক্কে এবাবোত্যেগুরি সাজায় সেক্কে ও কম্ বিশ্বেজিগুন, তে যে তমারে সাজেব সিয়েন্ দঅ কত্তমান্ নিশ্চয়তা! 29কি হানা-দানা গুরিবা চিদে-চজ্জা গুরিনে বেস্ত ন-ওয়ো বা থির্ নেইয়্যে ন-ওইয়ো। 30এ জগদর্ অন্য জাদ্তুনে সে বেক্ বেপারানিলোই বেস্ত অন্; ইয়েনি বাদে তমা বাপ্পো দঅ কোই পারে, তমার্ ইয়েনি দরকার্ আঘে। 31সিয়েনিত্তুন্ বরং তাঁর রেজ্যর্ পৌইদ্যেনে বেস্ত অ, সালে ইয়েনিয়ো তুমি পেবা।
32ও মর্ ভেড়া ছাগল চিগোন্ পাল্লো, ন-দোরেয়ো, কিয়া তমা বাপ্পোর্ আওজ্চান ইয়েন, তা রেজ্যগান্ তে তমারে দিবো। 33তমা বিষয়-সম্বোত্তি বেজিনে ভিক্ষ্যে ইজেবে দান্ গরঅ। যে দীনার্ থোইল্ল্যাবো কনদিনঅ পুরো ন-অয় সিবেয়ই নিজোত্যে বানঅ; অত্তাৎ যে ধন জিংকানিবর্ থিগি থেবঅ সিয়েনি স্বর্গত্ থুবঅ। সিধু চুর্ অ ন-এজে আর পুগেয়ো বর্বাদ্ ন-গরন্। 34তমার্ ধন যিধু থেবঅ তমা মনানিয়ো সিধু থেবঅ।
জুগেলেই থানা পৌইদ্যেনে উপদেজ্
35ফারত্ কাবর বেড়েইনে আর তমা চেরাগ্কুন জ্বালেইনে যুক্কোল্ থাগঅ। 36তুমি এমন্ মান্জ্য ধোক্ক্যেন্ অ যিগুনে তারার্ গিরোজত্তে বাজ্জেই থান্, যেন তে মেলা খানাত্তুন্ ফিরি এইনে দুয়োরত্ বাজ্জেলে তারা দুয়োরান্ খুলি দি-পারন্। 37গিরোজে যে চাগরুনোরে জাগি থাগদে দেগিবো, সিগুনে বর্পেইয়্যে। মুই তমারে ঘেচ্চ্যেক্গুরি কঙর্, সেই গিরোজ্সো ফারত্ কাবর বেড়েইনে তারারে বোজেব আর এইনে নিজে তারারে খাবেব। 38বর্পেইয়্যে সেই বেক্ চাগর্বো, যিগুনোরে তে এইনে জাগি থাগদে দেগিবো, সিবে রেত্ সংভাগত্ ওক্ বা শেচ্-রেদোত্ ওক্।
39“তুমি ঘেচ্চেকগুরি ইয়েন গুরি পারিদা যে, চুর্ কন্ সময় এবঅ সিয়েন্ যুনি ঘর গিরোজ্সো হবর্ পেদঅ সালে জাগি থেদঅ আর সেই চুর্বোরে তা ঘরত্ সুমিবাত্তে ন-দিদো। 40সেবাবোত্যেগুরি তুমিয়ো হামাক্কায় যুক্কোল্ থাগঅ, কিয়া যে সময়ানর্ কধা তুমি আজায়ো ন-গরঅ সেই সময়ানত্ মান্জ্য পুয়োবো এবঅ।”
41সেক্কে পিতরে কলঅ, “প্রভু, তুই এ শিক্ষ্যেগান্ কি আমারে দুয়োর্, না বেক্কুনোরে দুয়োর্?”
42জোবত্ প্রভু যীশু কলঅ, সেই বিশ্বেজি আর বুদ্ধিবলা চাগর্বো কন্না, যিবেরে তা গিরোজ্সো তার্ অন্য চাগরুনোরে ঠিগ্ সময়োত্ হানা ভাগ্ গুরি দিবার ভারান্ দিবো? 43সেই চাগর্বো বর্পেইয়্যে, যিবেরে তা গিরোজ্সো তোগেইনে পেইয়্যে আর ঘরত্ এইনে কাম্ গত্তে দেগিবো। 44মুই তমারে ঘেচ্চেক্গুরি কঙর্, তে সেই চাগর্বোরে তার বেক্ সোম্বোত্তিগানির্ কামর্ ভারান্ দিবো। 45মাত্তর্ যুনি সেই চাগর্বো নিজে মনে মনে কয় যে, মঅ গিরোজ্সো এত্তে দেরি গরের্। সেই সুযোগত্ যুনি তে অন্য চাগরুনোরে, মিলে আর মরদরে মার্পিট্ গরে, আর হানা-দানা গরানার্ পরেদি মাত্তল্ অলঅ। 46সালে যেদিন্নো আর যে অক্তবোর্ কধা তে আজায়ো ন-গরে, সেদিন্নো আর সে অক্তত্ তা গিরোজ্সো এইনে আজির্ অবঅ। তে তারে কাবিনে দি কট্টা গুরি অবিশ্বেজিগুনো ভিদিরে তা জাগায়ান্ ঠিগ্ গুরিবো।
47যে চাগর্বো তা গিরোজ্সোর আওজ্চান কোই পারিনেয়ো যুক্কোল্ ন-থায় বা গিরোজ্সো যিয়েন্ চায় সিয়েন্ ন-গরে তাত্তুন্ যদবদে সাজা পাহ্ পড়িবো। 48মাত্তর্ কোই ন-পারিনে যে সাজা-পেবার্ কাম্ গোজ্যে তার কম্ সাজা অবঅ। যিবেরে বেশ্ দিয়্যে অয় তাত্তুন্ বেশ্ দাবি গরা অবঅ; আর মান্জ্যে যিবে ইধু বেশ্ থোইয়োন তাত্তুন্ তারা বেশ্ মাগিবাক্।
49“মুই পিত্থিমীত আগুন জ্বালেবাত্যে এচ্চ্যং; যুনি সিয়েন আগেদি জুলি উদিদো সালে ভারী গম্ অদঅ! 50মত্তুন্ এক্কো বাপ্তিস্ম লুয়ো পুরিবো, আর যেদক্ দিন সং সিয়েন ন-অয় সেদক্ দিন সং মর্ দুঘোর্ শেজ্ নেই। 51তমার্ কি মনে অয় যে, মুই পিত্থিমীত্ শান্তি-দিবাত্যে এচ্চ্যং? না, সিয়েন নয়। মুই শান্তি-দিবাত্যে ন-এজং বরং ভাগ গুরিবাত্যে এচ্চ্যং। 52ইক্কেত্তুন্ ধুরি এক ঘরত্তুন্ পাচজন ভাগ্ ওই যেবাক্, তিনজন দ্বিজন বিরুদ্ধে আর দ্বিজন তিনজন বিরুদ্ধে। 53তারা এবাবোত্যেগুরি ভাগ্ ওই যেবাক্-বাবে পুয়ো বিরুদ্ধে আর পুয়ো বাব বিরুদ্ধে মা ঝিবো বিরুদ্ধে আর ঝিবো মা বিরুদ্ধে, শুড়িবো বৌ বিরুদ্ধে আর বৌরে শুড়ি বিরুদ্ধে।”
54যীশু আরঅ মানুচ্চুনোরে কলঅ, যেক্কেনে তুমি পোজিমেদি মেগ্ অদে দেগিলে কঅ, ঝড়্ এজের্, আর সিয়েনই অয়। 55আরঅ যেক্কেনে তুমি অনুভব গরঅ দোগিণো বৈয়্যের্ বার্, তুমি কঅ, গরম্ পড়ের্, আর সিয়েনই অয়। 56ফক্করুন্! তুমি পিত্থিমী আর আগাজ চেঙারানর্ অত্ত বুঝি পারঅ, অদচ ইয়েন কেধোক্ক্যেন, তুমি বত্তমান সময়োর্ অত্তগান্ ন-বুঝোর্?
57“যিয়েন ঠিগ্ সিয়েন তুমি নিজে চিদে গুরিনে কিত্ত্যেই থির্ ন-গরঅ? 58তুমি বিপক্ষ সমারে বিচেরগ ইধু যেবার্ অক্তত্ পধত্ তা সমারে এক্কান মিটমাটর্ চেট্ট্যা গুরিবা। সিয়েন ন-গুরিলে তে তরে বিচেরগ ইধু টানি নেযেব। সেক্কে বিচেরগে তমারে পুলিশো আঢত্ দিবো আর পুলিশে তরে জেলোত্ দিবো। 59মুই তরে ঘেচ্চেকগুরি কঙর্, শেজ্ পৌইজেবো ন-দেনা সং তুই কনঅ বাবদে জেলোত্তুন্ ছড়ান্ ন-পেবে।”
Trenutno izabrano:
লূক 12: CBT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Copyright © 2021 Bangladesh Bible Society