Ipakilya 3
3
1Ôm̃amba w’avegagi n’avôṉô vyagaṉô ni nyam̃y’edu y’ôrôve y’avangyô n’Anyambyè; n’awulinyi wô ômwantô inè: Rèti Anyambyè are bulya pa inè: Anyaṉi gw’erery’edu zi ntyaga? 2N’awiṉizi ômwantô gôr’ôm̃amba inè: Azwè ko nya ilônda yi rere yi ntyaga. 3Ndô gw’ilônda y’erere zi re gô garegare yi ntyaga, Anyambyè are bulya pa inè: Anyaṉi yô, vangaṉe kôta yô, aṉwè vende juwa. 4N’awulinyi ôm̃amba ômwantô inè: Aṉwè ayuwe du; 5ndô Anyambyè avôrô inè, ntyugu yi be nya ṉwè zô, gambèṉè antyo maṉi mi be nungwa, ko ṉwè dwaṉa ga inyambyè, myagage mbya ni mbe. 6Ndô gw’ayeṉi ômwantô inè, erere zi r’eṽya gw’inya ni mèpe jeṉô gw’antyo, na zi pang’ôma gô dwaṉa n’imya, awong’ilônda ya zô anya yô, ava ke yô gôr’ôṉôm̃u wè, ko yè nya yô. 7N’aṉungw’antyo maô aṽaṉi, amyeṉi waô kè inè, wi re tele; n’arum̃i waô ijavi s’akondo, aṉwaṉa sô gw ini yaô. 8N’ayogyô waô inyôy nyi Yeôva Anyambyè kèndagèndaga gô ntyaga gw’egômbe zi nkôlô, n’azombuṉi Adam n’ômwantô wè avila g’ôzô wi Yeôva Anyambyè gô garegare yi rere yi ntyaga. 9Ndô Yeôva Anyambyè aweyi Adam inè: Ô re na gweṉi? 10Awiṉizi yè inè: My’ajogw’inyôy nyo gô ntyaga, afanga myè, konde mi re tele, azombuṉa myè. 11N’awulyi Yeôva Anyambyè inè: Mande abulinyo inè: Ô re tele? Ô re nya p’erere z’azômbyi myè wè inè, anya zô? 12N’awulyi ôṉôm̃e inè: Ômwantô w’avenyô wè gô dwaṉa na myè, apa my’erere, n’anya myè. 13Yeôva Anyambyè awuliny’ômwantô inè: Ntiṉa nde yi re wè denda pa yeṉo? N’awiṉizi ômwantô inè: Ôm̃amba w’atem̃iza myè, n’anya myè.
14Yeôva Anyambyè awuliny’ôm̃amba inè: Gôre nè, ô re denda pa yeṉo, ô be dwaṉa savô pa vyagaṉô n’evuginy’edu na vyagaṉô ni nyam̃y’edu y’iga; ô be kèndaga kaô nkogaga iwum̃u nyo gô ntye, ô be nyagag’iroy yi ntye intyugu s’em̃èṉo zo sôdu. 15Mi be fwele ndôṽa ntyo wè ntyo ômwantô, ntyo awaṉi wo ntyo awaṉi wè; wiṉo e be nyigyanyigya ewônjô zô, n’awè ô be nôm̃e ntumbu yè. 16N’awulinyi yè ômwantô inè: Mi be buṉiz’izongo y’inyem̃e nyo; ô be jaṉ’awaṉa ni nkaza; ni nakiṉi yo yi be dwaṉa gôr’ôṉôm̃u wo, ndô ayè e be pangiṉo. 17N’awulinyi yè ôṉôm̃e inè: Gô re nè, ô re jogo p’inyôy ny’ômwantô wo, ko wè ny’erere z’azômbyi myè wè inè: Anya zô! ntye yi be dwaṉa savô pa g’ômwanji wo. Ô be ny’inya sa yô n’ijanja intyugu s’em̃èṉo zo sôdu; 18yi be felya arèndè n’ifalifa gôre wè, n’awè ô be ny’agônjô mi ntyaga. 19Ô be ny’inya n’erôgôra z’ôzô wo kwanga gô be fwinyo gw’iroy y’awongyô wè; konde awè n’iroy, na gw’iroy fwinyo kè.
20N’aṽèti Adam ina ny’ômwantô wè inè: Eva, konde ayè ne ngwè y’aṉaga waôdu. 21Yeôva Anyambyè avangiṉi Adam n’ômwantô wè ingoy s’ebanda, aworya waô sô. 22Yeôva Anyambyè awulyi nè: Vôna, ôma atweṉi ga ôm̃ori gôre zwè gô mye mbya ni mbe; ndô vèṉo azwè ga lege yè gô dam̃iṉ’ôgo wè gô bong’erere z’em̃èṉo, anya zô, ko yè dwaṉa bo egômbe zôdu. 23Yeṉo Yeôva Anyambyè arômbi yè avila gô ntyaga y’Edèn gô janje ntye avila gw’awongyô yè. 24N’arômbi yè Adam; n’aweli yè gô nkôṽa yi tongwa ni nkômbe gô ntyaga y’Edèn ikerubin n’ôkwar’ôyômbwi w’awizawizagi nkôṽy’edu, gô penjavenjè mpoṉo y’erere z’em̃èṉo.
Trenutno izabrano:
Ipakilya 3: MYE
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Published by the British and Foreign Bible Society in 1927.