Kumsada 18
18
Tris Visitanti
1Dipus, SIÑOR bin pa Abraon, lungu di pes di karvaju di Manre. Abraon sintaba na porta di tenda; ki ora sol kintiba wit. 2I yalsa uju, i oja tris omi ku firmaba pertu del. I jubi elis, i kuri di porta di tenda pa bai kontra#Kap 19.1-3; Ŝef 13.15; Jo 31.32; Mat 25.35-40; Rom 12.13; 1 Tim 5.10; Eb 13.2; 1 Ped 4.9 ku elis, i mpina pa con, i fala: 3“Siñor, si N oja fabur na bu uju, ka bu pasa ña kau. Ami i bu servu. 4Algin ta tisi un bokadu di yagu, bo ta laba pe; bo ta ngosta bas de arvuri. 5N ta tisi un bokadu di pon, pa bo pudi ngaña forsa; dipus bo ta bai pa dianti. I pabia di kila ku bo ciga li, pa N pudi sirbi bos.” E falal: “Fasi suma ku bu fala.”
6Abraon bai dipresa nunde Sara na tenda, i falal: “Masa dipresa tris midida di foriña finu, bu fasi bulu.” 7Dipus i kuri pa bakas, i toma fiju di baka bon, nobu inda, i da si kriadu. Kila purparal kinti-kinti. 8I toma mantega ku liti, ku ki fiju di baka ku purparaduba, i pui dianti delis. Oca ke na kume, i firma lungu delis, bas di arvuri.
9E puntal: “Nunde Sara, bu minjer?” I fala elis: “Alal la na tenda.”
10SIÑOR falal: “Di sertesa, N na riba pa bo ne tempu na anu ku na bin. Bu minjer Sara na padi#17.21; 21.2; Rom 9.9; Gal 4.23 un fiju.” Sara staba tras del, na porta di tenda, i na sukuta. 11Abraon ku Sara e beju ba#Rom 4.18-21; Eb 11.11-12 ja. Sara pasaba ja idadi di padi. 12Asin Sara ri#Kap 17.17 dentru del, i fala na si sintidu: “Suma kurpu kaba ku mi gosi, ña siñor tambi i beju, kuma ku N pudi sinti gustu di sta ku el?”
13SIÑOR punta Abraon: “Pabia di ke ku Sara ri, i punta: ‘Na bardadi, N na padi inda, kontra N beju?’ 14Nta i ten un kusa ku SIÑOR ka pudi#Num 11.23; 1 Sam 14.6; Jo 42.2; Jer 32.17; Mat 19.26; Luk 1.37 fasi? Ne tempu na anu ku na bin, N na riba pa bo; Sara na tene un fiju.”
15Sara sintiba medu, i nega i fala: “N ka ri.” Ma el i falal: “Ka bu fala asin pabia bu ri.”
16Ki omis lanta di la, e jubi pa ladu di Sodoma. Abraon bai kumpaña elis.
Abraon roga pa Sodoma
17SIÑOR punta: “Nta N na sukundi#Sal 25.14; Am 3.7; Jon 15.15 di Abraon ke ku N na fasi? 18Di sertesa, Abraon na bin sedu un nason garandi ku ten puder. Tudu nasons#Kap 12.2-3 na mundu na sedu sortiadu pabia del. 19N kujil pa i pudi da ordi pa si fijus#Lei 4.9-10; 6.6-7; 11.19-21; 32.46; 1 Kron 28.9; Sal 78.2-8; Dit 19.18; 22.6; Ef 6.4 ku si familia dipus del, pa e yanda na kamiñu di SIÑOR, e fasi kil ki diritu i bon, pa SIÑOR pudi fasi pa Abraon kil ki fala i na fasi.”
20SIÑOR torna fala: “Suma gritu kontra Sodoma ku Gomora i na buri kada bias mas, se pekadu meduñu dimas, 21N na bai jubi si kusa ke fasi i mau suma e keŝa ku ciga ja ña dianti. Si i ka asin, N ta sibi.”
22Ki omis rabida e bai pa Sodoma, ma Abraon firmaba inda la dianti di SIÑOR. 23Abraon ciga i punta: “Bu na kaba ku justus juntu ku jinti#Num 16.22; 2 Sam 24.17 mau? 24Si kontra i ten sinkuenta jinti justu#Jer 5.1; Ez 22.30 la, bu na kaba ku ki prasa? Bu ka na salbal pabia di ki sinkuenta justus ku sta nel? 25I ka pudi sedu pa bu fasi kusa suma es, bu mata justus juntu ku jinti mau! Nta algin justu i ta tratadu suma algin mau? I ka pudi sedu! Nta Juis#Jo 8.3; Sal 94.2 di tudu mundu i ka ta fasi kusa diritu?”
26SIÑOR falal: “Si N oja sinkuenta jinti justu na prasa di Sodoma, N na salba ki kau tudu pa amor delis.”
27Abraon ruspundi i falal: “Suma ku N mara koraẑen pa papia ku Siñor, nin ku N sedu suma puera ku#Jo 4.19; Ekl 12.7 sinsa, 28si kontra na sinkuenta justus i falta sinku, bu na kaba ku prasa tudu pabia di ki sinku ku na falta?” I falal: “Si kontra N oja korenta i sinku la, N ka na kaba ku el.”
29Abraon torna papia mas, i puntal: “Si kontra i ojadu la korenta?” I falal: “N ka na fasil pa amor di ki korenta.”
30Abraon torna falal mas: “Ka bu paña raiba, Siñor; disan N papia. Si kontra i ojadu la trinta?” I ruspundi i falal: “N ka na fasil si N oja la trinta.”
31Abraon falal: “Suma ku N mara koraẑen pa papia ku Siñor, si kontra i ojadu la vinti?” I falal: “N ka na kaba ku el pa amor di ki vinti.”
32I torna falal: “Ka bu paña raiba, Siñor; es un bias son#Ŝef 6.39 ku N na papia. Si kontra i ojadu la des?” I ruspundi i falal: “N ka na kaba ku el pa amor di ki des.”
33Oca ku SIÑOR kaba papia ku Abraon, i bai. Abraon riba pa si kau.
Trenutno izabrano:
Kumsada 18: povB
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1993-2020, Instituto de Tradução e Alfabetização