Luka 12
12
Delkom kihh sarrbhall
Mat 10:27
1Kaarooh dw'uu gurum dhess mwopp ja kwakhar kihshag, mwopp kihh mokhos shag, harr mwopp y'aa treng shiiy shag, bhi Jesu shee laa'pwoo a zheppkamm keeniy mwopp le, “Wu kihh kangg kihh kaah wuh kihh pin'shaan khi Farisiiy mwopp, w'u a raanaan e'h.#Mat 16:6; Mar 8:15 2P'ee baah mee'bii w'u a w'u pihpaah, w'u dheng'pee mwopp p'ee p'ar ber'pee lhi'baa dyikihh mou; yakhal baah mee'bii a w'u zihzok w'u baah mwopp p'ee p'ar man nyi mou.#Mar 4:22; Luk 8:17 3Pee'mhinyi, bhi kapp bii w'u wu satt lakham-lakham bhi mwopp p'ee p'ar klihng nyi kihgaak. A kihhsheh zag, koohmeeh w'u wu satt shi'shau dhighin luh, bhi mwopp p'ee p'ar peet nyi satt kih daghabluh.
4“Ih kihh satt wunn, shaar na mwopp, tapp wu kihh kihkhir a mwooh kihh mak t'u dihng shoopshik se kyekk, dhangg baah mwopp kihh mak sh'in mee'bii w'u mett mihhseh dyi mou. 5Dhangg a'n p'ee satt gwooh rett tihh wu kihkhir nyi wunn. Wu kihkhir a gwooh bwoonrooh t'u dihng shoopshik bhi kihh mak vhid gurum dhighin wusbleng. Ih satt zeenn wunn, wu kihkhir a nyi. 6Mwopp kihh seett kihh chidyiid paad a kobo vel mou aa'? Weett kihhsheh bhi baah Naan kihh cham munder kooh kihmeh dhighin mwopp mou. 7Ih kihh satt wunn, kooh shoopkaah wuh kyekk maah bhi mwopp a w'u ku'kun. Pee'mhinyi bhi tapp wu kihkhir mou, p'ee wunn kihh kyeenn mett chidyiid mwopp fwaiy.
8“Ih kihh satt wunn, koohweeh w'u mihh lapp'iih kihkyeen gurum mwopp le riy a maan'nah, bhi a'n L'aa khi Gurum p'ee p'ar lapp'iih kihkyeen mhi'lop khi Naan mwopp zag le nyi a maan'nah. 9Dhangg gwooh mihh shiih kihh a'n kihkyeen gurum mwopp, bhi a'n p'ee p'ar shiih kihh gwoh ni zag kihkyeen mhi'lop khi Naan mwopp. 10Dhangg dyi zag, mihh m'ee gurum diy satt pwoo wu'bis kaah nah L'aa khi Gurum, bhi Naan p'ee fwa nyi gwoh ni. Dhangg gwooh mihh kas Riin Wu'bhangg, bhi baah Naan p'ee fwa nyi gwoh ni mou.#Mat 12:32; Mar 3:29
11“Mihh mwopp ja kihh wunn dyeell kihkyeen Luh'kang, kooh kihkyeen mhidyeell, kooh mhi'bhaar mwopp, bhi tapp wu ann shuk kaah arr w'u wunn p'ee laa'pwoo, kooh kaah bii w'u wunn p'ee satt nyi p'ee mang'am kaah shuk mou. 12P'ee Riin Wu'bhangg p'ee kamm wunn kihh bii w'u rett tihh wu satt mwoorr pee mhizeh ni.”#Mat 10:19,20; Mar 13:11; Luk 21:14,15
Gulong w'u a yo'khor
13M'ee gurum dhighin dw'uu gurum ni mwopp satt Jesu le, “Gukamm, kum'bokk, ghi orr kihh em'naa tihh pihh shapkopp maan'nah diy a'n s'ang.”
14Bhi Jesu pring nyi satt le, “Gwoh m'aan, a wuyeh dhen a'n a gudyeell kooh gu'shapkopp wunn ayeh?” 15A nyi seh, bhi Jesu satt dw'uu gurum ni mwopp le, “Wu kihh tapp kihh shuk, yakhal wu kihh kangg kihh kaah wuh kihh yid, p'ee baah seen gurum kihh dharr a kaah dw'uu bii w'u nyi kihh mwopp mou.”
16Bhi Jesu satt shumpwoo mhize gurum ni mwopp le, “Bhokk khi m'ee gulong shi gyet putshiin pwetd. 17Bhi gwoh ni shwan en niy le, ‘Kooh kyed a'n p'ee sh'in a rangg oyukk? Baah a'n kihh pee w'u p'ee mak lapp dhebhenn keena ni mwopp weett mou.’
18“Bhi gwoh ni satt shin le, ‘An p'ee rumm dyaarr keena ni mwopp weett tihh ih dyak rooh nan mett mihhseh diy. Bhi a'n p'ee l'e dhebhenn keena kihh kakhar bii keena mwopp weett lhidyarrang dhighin. 19A kihhsheh bhi a'n p'ee satt san ih le, “Tong gha kihhsheh sihng, l'aa wu'rett! Gha kihh long dhess a w'u dhidhen p'ee yiiy dhess. Ghi lapp sak ser'seh, ghi so yakhal ghi shwaa ghi shenn sak, ghi sh'in rettyit.” ’
20“Dhanggbhi Naan satt gwoh ni le, ‘Gag m'ee nakk! Khipar w'u shishinn se bhi a'n p'ee lapp seen gha, dheeh kyed v'ur bii w'u ghi chakk ghi l'e seh p'ee dheeh a weeh oyukk?’ ”
21Jesu kyess pwoo mihhse sh'i satt le, “Nyi p'ee kwed a kihhsheh zag kihh koohweeh w'u kihh chakk long l'e shin, dhangg baah nyi a gulong kihkyeen Naan mou.”
Wu nook ann shuk
Mat 6:25-34
22Jesu waa'baa dyi laa'pwoo kihh zheppkamm keeniy mwopp bhi satt le, “Pee'mhinyi bhi ih kihh satt wunn ih le, tapp wu kihh ann shuk p'ee seen wu, p'ee orr soh w'u wunn p'ee so nyi tong diy mou; kooh p'ee dihng shoopshik wu, p'ee orr looh w'u wunn p'ee rwan nyi. 23Ai seen mett biisoh, yakhal shoopshik mett looh'lop. 24Wu naah goo'roo mwopp sihng: baah mwopp kihh kopp dhebhenn kooh mwopp dyiip mou; baah mwopp kihh kuudgihb kooh dyaarr mou. Weett kihhsheh, bhi Naan kihh so kihh mwopp, dhangg dheeh diy a wu'wunn w'u wu mett bul mwopp fwaiy a'ng! 25Uwou, a meeh muh wu'rangg kihh mak gyess t'eer mhi seen niy sh'in mwan diy pee'rooh kihh ann shin p'ee nyi seh? 26Dheeh kad kan mihh wu kihh mak sh'in reb bii mihhse mou, dheeh kakkrooh wu kihh ann shuk p'ee kakharr a p'ee mihyeh?
27“Wu naah kihpee pel'pee mwopp kihh nan diy sihng! Baah mwopp kihh nyak m'ee twan looh shut mou. Weett kihhsheh ih kihh satt wunn, kooh Miskakhamm Solomon maah dhighin men'fwaann keeniy weett, bhi baah gyet kihh mak sh'in zhwatt wull m'ee pel'pee ni mwopp mou.#1Das 10:4-7; 2ZhY 9:3-6 28Dheeh kad kan mihh Naan kihh sh'in zhwatt v'ur shit w'u dh'em a kihhsheh; shit w'u mihh nyi se shinn, bhi dhaarr mwopp kihh meng a tihghirhing, dhangg dheeh diy a wunn a'ng, Ooh wunn mhishiin-pihhzeenn mwopp!
29“Pee'mhinyi, bhi tapp wu kihh tong shwan a bii w'u wunn p'ee so nyi, kihh bii w'u wunn p'ee shwaa nyi mou; tapp wu ann shuk p'ee mwopp mou. 30P'ee mwooh a mhi yill ni mwopp kihh dy'iin lyap a bii wu'kihhsheh ni mwopp weett, dhangg Puup wu Naan w'u tihngg kih dhengg man le rett tihh wu'wunn zag wu kad bii mihhse ni mwopp. 31Kop kihhsheh, bhi wu lyap a Dhenglong khi Naan, bhi Naan p'ee pihh bii mihhseh ni mwopp wunn zag.
32“Tapp wu kihkhir mou, wunn tihm w'u mwopp phib mou; p'ee rettyit Puup wu tihh pihh dhenglong keeniy diy wunn. 33Wu seett kihh bii w'u wunn kihh mwopp wu sh'in zhukhum mhipyaah mwopp dyishig. Mihh wuh sh'in kihhsheh, bhi wunn phi twan a daam'shaghal w'u baa kihh mak kus mou shuk. Daam'shaghal w'u a long w'u baah kihh cham kyess mou tihngg kih dhengNaan; pee w'u baah m'ee watt kihh mak wull diy, kooh dih'gub kihh mak t'u bii nhighin mou. 34P'ee pee w'u long khi gurum diy, bhi en nyi p'ee kihh dhen a nhighin twass.
Wu tong sh'i gonggpee
35“Wu rwan loohdhakk shuk, yakhal yet tihh dlengwus keewu dhen a w'u bhibyill.#Mat 25:1-13 36Wu tong a kaa kromm w'u mwopp kaah gongg baa'ji khi guluh keeru kihpee bhal'dyik se. Tihh mihh ji bwappee diy, bhi mwopp wangg pwooluh nyi abet.#Mar 13:34-36 37Nyi a bii rettyit p'ee kromm w'u guluh khimwopp ji kad mwopp kaah gonggpee. Ih kihh satt a zeenn wunn, guluh ni p'ee zhwal loohdhakk shin, bhi satt kromm ni mwopp le nw'aa kwangg yill p'ee so soh, bhi nyi p'ee shap soh mwopp.
38“T'o, nyi p'ee dhen a bii rettyit p'ee kromm ni mwopp kadmihh guluh ni ji kad mwopp kaah gonggpee: kooh ji a naar khipar aa'h, h'aa kooh a tarrbyitt oh. 39Dhangg wu man, kaddyinn guluh kihh man puus ji khi watt, bhi baah dyinn nyi p'ee yetpee watt ni ji teepee dhel riy luh mou. 40Pee'mhinyi bhi wu'wunn zag wu tong sh'i dhakkshuk, p'ee L'aa khi Gurum p'ee baa'ji a puus w'u baah wu le'pan baa'ji khinyi mou.”#Mat 24:43,44
41Bhi Bitrus nang phi nyi le, “Daah, gha phi satt shumpwoo mhize a munn kyekk aa'h, h'aa nyi a p'ee koohweeh ayeh?”
42Bhi Daah Jesu lapp nyi satt le: “A wuyeh a gu'naahdhakk w'u a guzeenn, w'u soon-soon, w'u guluh khinyi dhen nyi kaah kakhar kromm keeniy mwopp tihh kihh pihh shap soh khimwopp diy mwopp shi'puus, shi'puus? 43Nyi p'ee dhen a bii rettyit kromm mhizeh ni kadmihh guluh khinyi ji kad nyi phi sh'in kihhsheh. 44Ih kihh satt a zeenn wunn, guluh ni p'ee dhen nyi kaah bii w'u a miin'niy mwopp weett. 45Dhangg mihh kromm ni kihh ryeeh le, ‘Hy'e! guluh keena p'ee klihng baa'ji mihngg,’ bhi harr y'aa sram kromm wu'daass kihh wu'shwarab ni mwopp, yakhal y'aa sopee kihh rakk-mwoz, 46bhi guluh khi kromm ni p'ee p'ar baa'ji puus w'u baah kromm ni le'pan baa'ji khinyi mou, kooh dhighin gonggpee w'u man mou. Bhi guluh ni p'ee m'ang nyi dwur'ruk pwetd, yakhal m'ang nyi dum meng naar mhishiin-zeenn mwopp.
47“Kromm w'u man bii w'u guluh keeniy kihh dh'om, dhangg baah le'pan kaah, dhangg dheeh diy a sh'in khinyi mou, bhi mwopp p'ee fwa kam nyi pwetd. 48Dhangg kromm w'u man mou, dhangg sh'in yid bii w'u wall kam, bhi mwopp p'ee pann shwarrat nyi lee. P'ee gwooh mwopp pihh bii dhess nyi, bhi mwopp p'ee lyap bii dhess sarr nyi zag; yakhal gwooh mwopp dhen bii dhess sarr nyi, bhi mwopp p'ee nang bii dhess sarr nyi zag.
Jesu ji a kihh tongkakhamm mou ji a kihh shapkaah
Mat 10:34-36
49“Ih ji a p'ee meng wus kih yill ni, ai ih kihh chaa ih le dyinn baa wus ni y'aa a lapp o'h! 50Dhangg a'n kudyi kihh m'ee baptisma w'u mwopp p'ee sh'in nyi a'n, dhangg bii ni tekhenn a'n phitukhup na pwetd, harr p'ar puus w'u bii ni p'ee gam diy.#Mar 10:38 51Naah mug'wuh bhi ih sam a kihh tongkakhamm yill ni 'y? Kooh lee, ih kihh satt nah wunn; ih sam a kihh shapkaah. 52P'ee yakhal mwasseh kihhshe, bhi mihh gurum paad tuluh wu'khimhi, bhi kunn mwopp p'ee dyarrang shag kihh vel, yakhal vel mwopp p'ee dyarrang shag kihh kunn. 53Puup p'ee dharr em niy; yakhal em p'ee dharr pukhun. Nhikhin p'ee dharr reep ra, yakhal reep p'ee dharr nekhenn zag. Nhikhin p'ee dharr naa'chik ra, w'u a mat khi em ra; yakhal mat khi em p'ee dharr nekhennkaam, w'u nhikhin khi mis ra zag.”#Mik 7:6
Yakshiiy mhi mihhseh mhi pee
Mat 16:2,3
54Bhi Jesu satt dyi dw'uu khi gurum ni mwopp le, “Mihh wu naah pee ap koghob Puus'ru, bhi abet wu kihh satt wu le, ‘Fwan p'ee ji,’ bhi fwan ni ji. 55Yakhal mihh kutt diy bwappee koghob Wu'bhakk k'aa, bhi wu kihh satt wu le, ‘Pee p'ee sak,’ bhi kihh kwed a kihhsheh. 56Mhi-raanaan wu'baan! Shitt a rangg wu man dyeeshiiy mihhseh mhi pee mhi yill kihh rooh sh'i phikihtihngg diy, dhangg baah wu man dyeeshiiy pee mhi gangg mhize mou ayeh?”
57A mihyeh l'e bhi wunn sh'i kaah wuh wu kihh shwan bii wu'dihhreh mou ayeh? 58Mihh menguh diy dum kihh waamatt gha luhdyeell, bhi shep ghi tu'dwakk gwoh ni tihh wu bheettpwoo ni diy bhi wu kudyi kih arr. Kihhsheh mou bhi nyi p'ee dres gha dum pihh gudyeell, bhi gudyeell wu'nyi p'ee pihh gha sarr laa'zang, laa'zang wu'nyi p'ee lapp gha dum shakhat luh'shakhat. 59Ih kihh satt gha, baah gha p'ee cham put luh'shakhat ni mou, seeh ghi kwat kaatt ni kyes kwett, baah nini w'u p'ee taah dheeh noott kwatt.
Trenutno izabrano:
Luka 12: Chakfem
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©️2022 Luke Initiative for Scripture Translation