Evvan 18
18
Isõõzz vääʹldet ǩidd
1Ko nääiʹt Isõs leäi moʹlidvâsttam, son mõõni mättʼtõspäärneesvuiʹm Kidran vuäj rââst. Vuäj nuuʹbb peäʹlnn leäi muõrršâddpäiʹǩǩ, koozz Isõs da mättʼtõspäärna mõʹnne. 2Leša Juudas, suu ploottjeeja, toobdi pääiʹǩ, tõn diõtt ko Isõs leäi täujja noorõõttâm tåk mättʼtõspäärneesvuiʹm. 3Juudas pueʹđi muõrršâddpäikka, da suʹst leʹjje mieʹldd sääldatviõkk da jõnnpaappi ceerkavstaarâst da farisõõzzi päkldõõzz feânrivuiʹm da tuõssʼsivuiʹm da säiʹttsueʹbbivuiʹm.
4Isõs tiõʹđi tärkka, mii suʹnne šõõddči. Son mõõni åummai vuâstta da kõõjji: «Ǩeän tij ooccveʹted?» 5«Isõs Nasaretneeʹǩǩ», sij vaʹsttee. Isõs cieʹlǩi: «Mon-i leäm tõt.» Åummaivuiʹm leäi Juudas še, Isõõzz ploottjeeja.
6Ko Isõs cieʹlǩi: «Mon-i leäm», åumma cõõjõʹtte põõđlõs da rõʹvve jânnma. 7Son kõõjji oʹđđest: «Ǩeän tij ooccveʹted?» Sij cieʹlǩǩe: «Isõs Nasaretneeʹǩǩ.» 8Isõs cieʹlǩi: «Ama mon sarnnum, što mon-i leäm. Jõs tij tâʹl muu ooccveʹted, lueʹštted täiʹd mõõnnâd.» 9Nääiʹt tuõđštõõvi suu jiijjâs sääʹnnes: «Jiõm leäkku läppam ni õõut tõin, koiʹd leäk åskkam huâđđsan.»
10Semman Pietarest leäi mieʹǩǩ. Son roʹttji tõn tooppâst da västtli meädda pââimõs paapp kääzzǩest vuäʹljes peeʹllj. Kääzzaǩ nõmm leäi Malkus. 11Leša Isõs cieʹlǩi Pietara: «Piij meâkkad toʹppe. Joordak-a, što jiõm juuǥǥče tõn mueʹǩǩcieʹrǩ, koon Eʹčč lij muʹnne ouddam?»
Isõõzz viiǥǥât Hannaazz årra kuullâm diõtt
12Sääldatviõkk, mõõn vueiʹvvååuman leäi väinntribuun, da juudlažniiʹǩǩi ceerkavstaarâst vaʹldde Isõõzz ǩidd da čõʹnne suu 13da viʹǩǩe vuõššân Hannaazz årra. Son leäi Kaifaazz vuõpp. Kaifas leäi tõn eeʹjj pââimõs pappân. 14Kaifas-i leäi ouddam juudlažniiʹǩǩid vueʹjj: «Lij pueʹrab što õhtt ooumaž jäämm obb narood ooudâst.»
Pietar ǩeâldd Isõõzz
15Semman Pietar da måtam nuʹbb mättʼtõspäärnaž puõʹtte Isõõzz mieʹldd. Tõt nuʹbb päʹrnn leäi pââimõs paapp toobdâs da piâzzi tõn diõtt pââimõs paapp kuårnâc šillju. 16Pietar kuâđđji čueǯǯad čuâl uʹhsse. Tõt nuʹbb mättʼtõspäʹrnn, pââimõspaapp toobdâs, mõõni särnnad uhssvaʹrddjeejaniõđin da puuʹti mâŋŋa Pietar šillju.
17Tõʹst nijdd, kååʹtt vaʹrddji uus, kõõččli Pietarest: «Jiõk tâma ton še leäkku tõn oummu mättʼtõspäärnaž?» Pietar vaʹsttii: «Jiõm leäkku.» 18Leäi kõõlmâs. Kääzzaǩ da päkldõõzz leʹjje puâlltam tool, da paakkõʹtte tollpeällsest. Pietar še čueǯǯai sij seʹst da paakkõõđi.
Pââimõs papp kõõjjad Isõõzzâst
19Pââimõs papp kõõjji Isõõzzâst suu mättʼtõspäärnai da mättʼtõõzz pirr. 20Isõs vaʹsttii: «Mon leäm särnnam maaiʹlme vuõiʹǧǧest da leäm pâi mättʼtam synagogast da teʹmpplest, koozz puk juudlažneeʹǩǩ noorâʹtte. Jiõm leäkku särnnam peittast ni mâiʹd. 21Mõõzz kõõjjak muʹst? Kõõjj tõin, kook liâ kuullâm, mâiʹd leäm särnnam. Sij teäʹtte, mâiʹd leäm ceälkkam.»
22Isõs ko leäi nääiʹt vaʹsttääm, õhtt ceerkavstarastin, kååʹtt čueǯǯai suu paaldâst, tääkkli suu peʹlljmaddja da cieʹlǩi: «Nuʹt-ǥo ton vaʹsttääk pââimõs paʹppe?» 23Isõs cieʹlǩi: «Ko mâka cieʹlǩǩem ǩeähnald, čuäʹjet, mii tõt ǩeähn leäi. Leša jõs mon mainstem vuõiʹǧǧest, mõõzz muu tääǥǥak?» 24Hannas vuõlttii suu čõnnum pââimõs paapp Kaifaazz årra.
Pietar eʹpet ǩeâldd Isõõzz
25Semman Pietar čueǯǯai âinn tollpeällsest paakkõõttmen. Måtam kõõjji suʹst: «Jiõk tõma ton še leäkku suu mättʼtõspäärnaž?» «Jiõm-ǥa leäkku», ǩiõʹldi Pietar. 26Måtam pââimõs paapp kääzzaǩ, tõn oummu ruått, ǩeäʹst Pietar leäi peeʹllj västtlam, kõõjji: «Jiõm-ǥõs vuäinnam tuu še suin tåʹben muõrršâddpääiʹǩest?» 27Pietar reenai âinn vuâstta. Samai tâʹl ååʹreskääʹnn lääulai.
Isõõzz viiǥǥât Pilatõõzz årra kuullâm diõtt
28Kaifaazz åʹrnn Isõõzz viʹǩǩeš mäddšuur kuårnca. Leäi ääiʹjeld tueʹlääž. Tõn diõtt što vuäitče poorrâd eʹjjpeeiʹv veär juudlažneeʹǩǩ jiâ mõõnnâm tåk sizz, što jiâ tårkkjeʹčče. 29Na Pilatõs pueʹđi åålǥas sij årra da kõõjji: «Mâʹst tij viârteʹped tän oummu?»
30Sij vaʹsttee: «Ko son iʹlleʹčče veärlaž, jeäʹp leʹčče pohttam suu tiiʹǩ.» 31Pilatõs cieʹlǩi: «Viikkâd suu meädda da suudâd jiijj lääʹjjed mieʹldd.» Juudlažneeʹǩǩ vaʹsttee: «Meeʹst iʹlla lååʹpp ni ǩeän kåʹdded.» 32Tõt šõõddi, što Isõõzz sääʹnn jiijjâs jääʹmmemnääʹlest šõõddči tuõttân.
33Pilatõs mõõni mååusat kuårncasas, kååččai Isõõzz årrses da kõõjji: «Leäk-a ton juudlažniiʹǩǩi koonǥõs?» 34Isõs vaʹsttii: «Kõõjjak-a tän jiõčč, avi liâ-a jeärraz mainstam muʹst?» 35Pilatõs vaʹsttii: «Jiõm tâma mon juudlažneʹǩ leäkku! Jiijjad narod da paapp liâ ouddam tuu muʹnne. Mâiʹd leäk tuejjääm?»
36Isõs vaʹsttii: «Muu koonǥõsvuõtt ij leäkku tän maaiʹlmest. Jõs tõt leʹčči, muu kääzzaǩ leʹčče peälštam muu jiâ-ǥa leʹčče kuâđđam muu juudlažniiʹǩǩi ǩiõʹtte. Leša muu koonǥõsvuõtt iʹlla tän maaiʹlmest.» 37Tâʹl Pilatõs kõõjji: «Ton šât tâʹl leäk kâʹl koonǥõs?» Isõs vaʹsttii: «Jiõčč âiʹdde cieʹlǩǩiǩ muu koonǥõssân. Mon šõʹddem da puõʹttem maaiʹlme tuõđšvuõđ peäʹlest mainstem diõtt. Jueʹǩǩkaž, kååʹtt lij tuõđšvuõđâst, kooll muu jiõnnan.» 38«Mii lij tuõđšvuõtt?», Pilatõs kõõjji.
Isõõzz suudât jääʹmmed
Ko tõn leäi ceälkkam, mõõni Pilatõs juudlažniiʹǩǩi årra da cieʹlǩi: «Mon jiõm kaaun suʹst ni mõõn vââʹjj, mõõn diõtt suu vuäitči suudâd. 39Leša mall tâma lij leämmaž, što mon luâštam tiʹjjid pâi eʹjjpeivva koon-ne vaaŋg. Haaʹleʹped-a tij, što luâštam luõvâs juudlažniiʹǩǩi koonǥõõzz?» 40Narod čuârvai: «Ij suu! Lueʹšt Barabbaazz!» Barabbas leäi jeʹmmlaž.
Trenutno izabrano:
Evvan 18: SKOLT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Lää´dd Pipliaseä´rvv; Suomen Pipliaseura; Finnish Bible Society 1988