Evvan 20
20
Isõs kåccai jieʹlled
1Ääiʹjeld pâʹsspeeiʹv tueʹlää, ko leäi veâl seuʹnnjed, Magdaala Mäʹrjj pueʹđi ääuʹd årra da vuâmmši, što ǩeäʹdǧǧ, kååʹtt leäi ääuʹd uus ooudâst, leäi sirddum nuuʹbb sâjja. 2Son uurči Semman Pietar årra da tõn nuuʹbb mättʼtõspäärna, koon Isõs räʹǩsti, årra. Son cieʹlǩi: «Šurr lij vikkum meädda ääuʹdest, jeäʹp-ǥa tieʹđ, koozz son lij pijjum.»
3Pietar da tõt nuʹbb mättʼtõspäärnaž vuõʹlǧǧe tâʹlles ääuʹd ǩiččâd. 4Suäna uʹrčče palddlõõžži, leša tät nuʹbb leäi jåʹttlab ko Pietar da ǩiõrggni ooudbeäʹlnn ääuʹd årra. 5Son kuâbsti sizz da vuõiʹni leeiʹnid, leša ij mõõnnâm sizz. 6Suu mââibeäʹlnn pueʹđi Semman Pietar da mõõni äudda. Tåʹben son vuõiʹni kaarrâmleeiʹnid. 7Piustõkleiʹnn, mii leäi leämmaš Isõõzz vueiʹvest, iʹlleämmaž kaarrâmleeiʹni seʹst, tõt leäi šnååppast jeeʹres sââʹjest. 8Tâʹl tõt nuʹbb mättʼtõspäärnaž, kååʹtt leäi puättam ooudbeäʹlnn ääuʹd luzz, mõõni še sizz da vuõiʹni puk da ååskai. 9Tâʹl ij suännast ni kuäbbaž fiʹttjam Pââʹss ǩeeʹrj sääʹn tõʹst, što son kåccjeʹčči jaaʹmmjest. 10Mättʼtõspäärna mõʹnne väʹst põrttseez.
Isõs čuäʹjtââtt Magdaala Märjja
11Mäʹrjj čueǯǯai ääuʹd uus ooudâst da reäǥǥai. Reäǥǥeeʹl son kuâbsti äudda, 12leša son vuõiʹni kuõʹhtt viõʹlǧǧespiiutâsaʹŋǧǧel išttâd åårrmen tõʹst, koʹst Isõõzz råʹpp leäi leämmaž, nuʹbb vueiʹvvrõõžžâst, nuʹbb jueʹlǧǧrõõžžâst. Aʹŋǧǧel cieʹlǩǩe Märjja: 13«Mâiʹd reäǥǥak, kaav?» Son vaʹsttii: «Šurr lij vikkum meädda, jiõm-ǥa tieʹđ, koozz.»
14Tõn-a ko cieʹlǩi, son jåårǥli da vuõiʹni Isõõzz čueǯǯam sieʹljstes, leša ij tobddâm tän. 15Isõs cieʹlǩi suʹnne: «Mâiʹd reäǥǥak, kaav? Ǩeän ooʒʒak?» Mäʹrjj juuʹrdi suu šâddhåiddjeejan da cieʹlǩi: «Šurr, jõs ton leäk viikkâm suu meädda, de säärn, koozz leäk suu piijjâm. Mon viiǯǯam suu meädda.» 16Isõs cieʹlǩi: «Mäʹrjj!» Mäʹrjj jåårǥli da cieʹlǩi: «Rabbuuni!». Hebreaǩiõʹlle tõt šâdd: uʹčteeʹl.
17Isõs cieʹlǩi: «Lueʹšt muu. Jiõm leäkku veâl mõõnnâm Eččan årra. Mõõn särnnad viilljään, što mõõnam Eččan da Vuâsppåådan, tij Eeʹjjed da tij Vuâsppååʹded årra.» 18Magdaala Mäʹrjj mõõni da mainsti mättʼtõspäärnaid, što son leäi vuäinnam Šuur, da mâiʹd Šurr leäi suʹnne mainstam.
Isõs čuäʹjtââtt mättʼtõspäärnees
19Mâʹŋŋeld seämma pâʹsspeeiʹv jeäʹǩǩää mättʼtõspäärna leʹjje noorõõttâm õõutsâjja lokkuusi tuâkka, tõn diõtt ko sij põʹlle juudlažniiʹǩǩin. Isõs pueʹđi, čueǯǯai sij kõõskâst da cieʹlǩi: «Rääuh tiʹjjid.» 20De son čuäʹjti ǩiõđees da jieʹrtes. Mättʼtõspäärna räʹmmvuõʹtte, ko vuõiʹnne Šuurâz. 21Isõs cieʹlǩi oʹđđest: «Rääuh tiʹjjid! Nuʹt še mäʹhtt Eʹčč lij vuõlttääm muu, vuõlttääm mon še tiʹjjid.» 22Tän ko cieʹlǩi, son pååzzai sij ool da jueʹtǩi: «Väʹldded Pââʹss Jiõgg. 23Ǩeän rieʹǩǩid tij uʹvddveʹted proʹsttjõõzz, vuäǯǯ tõiʹd proʹsttjõõzz. Ǩeäʹst tij proʹsttjõõzz ǩieʹlddveʹted, ij vuäǯǯ rieʹǩǩees proʹsttjõõzz.»
Fooma pannåskk
24Fooma, koon cieʹlǩǩeš Juuʹmǩen da kååʹtt leäi õhtt tõn kuâtmlåkksest, iʹlleämmaž tõʹst, ko Isõs pueʹđi. 25Jeeʹres mättʼtõspäärna mainste suʹnne: «Mij vuõiʹnim Šuur.» Fooma vaʹsttii: «Jiõm kâʹl ååsk, ouʹddelgo vuäinam näuʹllsõõʹjid suu ǩiõđin da piijam suõrmman tõiʹd sõõʹjid da vuäǯǯam piijjâd ǩiõttan suu jeärtta.»
26Nieʹttel ǩeeʹjjest mättʼtõspäärna leʹjje eʹpet õõutsââʹjest, da ååʹn leäi Fooma še. Uus leʹjje lookkâst, leša Isõs pueʹđi sizz, čueǯǯai sij kõõskâst da cieʹlǩi siʹjjid: «Rääuh tiʹjjid!» 27Da son cieʹlǩi Fooma: «Piij ååʹn suõrmad tääzz da ǩiõčč ǩiõđään da piij ǩiõđad jeärttsan. Jeäʹl leäkku pannååskast, naǥa ååsk.» 28Fooma vaʹsttii: «Šurram, Vuâsppåådam!» 29Isõs cieʹlǩi: «Ton ååskak tõn diõtt, ko vuõiʹnniǩ. Leklva liâ tõk, kook åskka, håʹt-i jiâ vueiʹn!»
Mõõzz Ǩeʹrjj lij ǩeeʹrjtum
30Isõs tuejjii mättʼtõspäärnees poodd määŋgaid jeeʹresnallšem õõmâstuâjaid, leša tõk jiâ leäkku ǩeeʹrjtum tän ǩeârjja. 31Tät puk lij ǩeeʹrjtum tõn diõtt, što tij ååskčid, što Isõs lij Messias, Vuâsppååʹd Päʹrnn, da teeʹst leʹčči jieʹllem, ko åskkveʹted suu.
Trenutno izabrano:
Evvan 20: SKOLT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Lää´dd Pipliaseä´rvv; Suomen Pipliaseura; Finnish Bible Society 1988