मत्ती 7
7
दोष नी लगाहा
1“दोष नी लगाआ कि तुमचो उपरे बले दोष नी लगा ओत। 2कसनबल्लोने जसन परकार तुमी दोष लगाऊ आहास, असने परकार तुमचो उपरे बले दोष लगाया जायदे; आउर जोन नाप ले तुमी नापु आहास, हुनी नाप ले तुमचो काजे बले नापा जायदे।
3“तुय केंव आपलो भाई चो आँईक चो कचरा के दक सीस, आउर आपलो आँईक चो चिपड़ा तुके नी जान पड़े? 4जिदलदाय तुचो ची आँईक ने चिपड़ा आसे, तो तुय आपलो भाई ले कसन बोलुक सकीस, ‘आव मय तुचो आँईक ले कचरा निकराऊन देयेंदे?’ 5हे कपटी, पयले आपलो आँईक थानले चिपड़ा निकराव, तेबे तुय आपलो भाई चो आँईक चो कचरा अच्छा ले दकुन भाती निकराऊक सकसे।
6“पवितर तीज कुकूरमन के नी दिआस, आउर आपलो मोती बराहांमन चो पुरे नी पकाहा; असन नी होओ कि हुनमन हुनके पाँयमन खाले रोमदोत आउर पलटून भाती तुमके चिरून देयदे।”
माहापुरू ले मांगतोर आउर पावतोर
7“मांगा तेबे तुमके दिया जायदे; डगराहा तेबे तुमी पाहासे; ठक-ठकाहा, तेबे तुमचो काजे उगाढ़ा जायदे। 8कसनबल्लोने जोन कोनी मांगु आय, हुनके मिरू आय; आउर जोन डगराऊ आय, हुन पाऊ आय; आउर जोन ठक-ठकाऊ आय, हुनचो काजे उगाढ़ा जायदे।
9“तुमचो ने असन कोन माने आसे, कि अगर हुनचो बेटा हुनचो ले रोटी मांगो, तेबे हुन हुनके पकना देयदे? 10नाहले मछरी मांगलो ने, तेबे हुनके सांप देयदे? 11आउर जिदलदाय तुमी खराप होऊन भाती, आपलो पिलामन के अच्छा तीजमन देऊक जानास, तेबे तुमचो सरग चो बुआ आपलो मांगतो बितामन के अच्छा तीजमन केंव नी देये? 12ऐई लागुन जोन काई बले तुमी मन करसास कि माने तुमचो संगे करोत, तुमी बले हुनमन संगे असने ची करा; कसनबल्लोने माहापुरू चो नियम आउर अगम गिआनीमन चो सिक्या ऐई आय।
सर-सरा आउर मशकिल बाट
13“साकुड़ कपाट ले ओला, कसनबल्लोने ओसार आय हुन कपाट आउर सर-सरा आय हुन बाट जोन बिनाश ने पोंचाऊ आय; आउर खुबे असन आसोत जोन हुनचो ले ओलु आत। 14कसनबल्लोने साकुड़ आय हुन कपाट आउर मशकिल आय हुन बाट जोन जीवना ने पोंचाऊ आय; आउर खिन्डिक असन आसोत जोन हुनके पाऊ आत।
फरमन ले रूक के चितातोर
15“फंदी अगम गिआनीमन ले खबड़दार राआ, जोन मेंडामन चो भेष ने तुमचो लगे ऐऊ आत, मान्तर भीतर ने हुनमन चिरतो बिता बिगवामन आत। 16हुनमन चो काममन ले तुमी हुनमन के चिताहासे। काय लोग बुटामन ले अंगुर, नाहले काटा बुटामन ले अंजीर टुटाऊ आत? 17ऐई परकार हरकोनी अच्छा रूक अच्छा फर फरू आय आउर बेकार रूक खराप फर फरू आय। 18अच्छा रूक खराप फर नी फरूक सके, आउर ना बेकार रूक अच्छा फर फरूक सके। 19जोन-जोन रूक अच्छा फर नी फरे, हुन काटा आउर आईग ने जराया जाऊ आत। 20असन परकार हुनमन चो फरमन ले तुमी हुनमन के चिताहासे।
21“जोन मोचो ले, ‘हे परबु! हे परबु!’ बले से, हुनमन ले हरकोनी सरग चो राज ने नी जादे, मान्तर हुनी जोन मोचो सरग चो बुआ चो इच्छा थाने चलेसे। 22हुन दिने खुबे असन लोग मोचो ले बलदे, ‘हे परबु, हे परबु, काय आमीमन तुचो नाव ले अगम गोठ नी करलु, आउर तुचो नाव ले दुष्टआत्मामन के नी निकरालु, आउर तुचो नाव ले खुबे असन अकचकित काम नी करलु?’ 23तेबे मय हुनमन ले खुलम खुला बोलुन देयेंदे, ‘मय तुमके केबीई नी जानले। हे कुकरम करतो बितामन, मोचो लगले जाहा।’”
अकल बिता आउर बेअकल माने
24“ऐईकाजे जोन कोनी मोचो ऐ गोठमन सुनुन भाती हुनमन के मानु आय, हुन-हुन अकल बिता मनुक चो असन ठेबेदे जोन आपलो घर पकना थाने बनालो। 25आउर पानी घसरली, आउर पुर ईली, आउर लेहरा धुकामन बहली, आउर हुन घर ले ठठाय होली, फेर बले हुन नी घसरली कसनबल्लोने हुनचो पाया; पकना उपरे डाला जाऊ रली। 26मान्तर जोन कोनी मोचो ऐ गोठमन सुनु आय आउर हुन थाने नी चले, हुन-हुन मुरूक माने चो असन ठेबेदे जोन आपलो घर बारू थाने बनालो। 27आउर पानी ईली, आउर पुरमन ईली, आउर लेहरा धुकामन बहली, आउर हुन घर ने ठठाय होली आउर हुन घसरुन भाती सत्यानाश होऊन गेली।”
28जिदलदाय ईशु ऐ गोठमन बोलुन चुकलो, तेबे असन होली कि भीड़ हुनचो उपदेश ले अकचकित होली, 29कसनबल्लोने हुन हुनमन के शास्तरीमन चो असन नाई मान्तर अधिकारी चो असन हुनमन के उपदेश देते रये।
Trenutno izabrano:
मत्ती 7: HLBNT
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Halbi Bible by The Love Fellowship is licensed under Creative Commons Attribution-ShareAlike 4.0 License.