M. Mattayo 12
12
1PA nsita ila Yesu epita zuŵa la sabata pakati pa minda ya mapira; naŵo asambili ŵake echimvwa njala, eyambolengula visanku vya mapira nokululila. 2Lomba Afarisayo akaŵone emnenera, Ŵonani, asambili ŵanu ochita chila chisazomereka kuchita pa sabata. 3Sembe yeve echiti kwaŵo, Kansi mkaliyopenda chamene chechichita Davide, pamene pechimvwa njala, na aŵo ŵenze naye pamo; 4chakuti eloŵa mnanda ya Mlungu elyamo mitanda yolangizyiwa yamene isazomereka kulyewa naye, kano na aŵo ŵenze naye, sembe na ansembe ŵeka? 5Kano mkaliyopenda kansi mdango kuti pa zuŵa la sabata ansembe a mchipupilo olichisya latyala sabata na kuŵa alive mlandu? 6Sembe neo numnenelani kuti wopula chipupilo ali pamene pano. 7Angati muziŵa mfundo yake ichi, Nupangwa lusungu nte nsembe, sembe muliyoŵapa mlandu aŵo ŵosaifya. 8Pakuti Mwana wa muntu ni mwine wa sabata.
9Naye akafumeko kweve eloŵamo msunagoge mwaŵo: 10nipo ŵonani, muntu wa kwanja kofota. Naŵo emkonsha echiti, Kansi ni kuzomereka kupozya zuŵa la sabata? kuti amsimikizye. 11Eŵanenera, Ni ŵani muntu wa mweo wamene ali nayo mbelele imo, kati ikapona mchisengu zuŵa la sabata, kansi ntangaikate yamene iyo noivuulamo? 12Nga kupulamo kwake nkotyani muntu na mbelele! Teti ni pachuzomereka kuchita viweme zuŵa la sabata. 13Pamene apo emuuzya uyo muntu, Tambulula kwanja kwako. Ekutambulula; nako kwiwezyewa kwa moyo nga ni kuyake. 14Lomba Afarisayo efumamo eyeruzyana kumsusya, umo mwati amchenekere. 15Naye Yesu akaziŵe efumako kwamene uko: nipo anyinji emkonka; naye eŵapozya ŵonse, 16eŵapanga asamziŵisya: 17kuti chisilizike icho chinenewa na Isaya muŵirizi chakuti,
18Ŵona, mlumbwana wangu wamene winisalula;
Wotemweka wangu moyo wangu uutemwa naye:
Mzimu wangu niike pali yeve,
Naye ni ati azaŵirizye upinguzi ku Mitundu.
19Ntati azoyambana kano kusema;
Muntu ntati azamvwe lizu lake mmiseo.
20Tete losansanta ntati azalityole,
Tonje lofuka chusi ntati azalizimye,
Mpaka pati apitisye upinguzi kopulamo.
21Soti Mitundu ize ichetekere mzina lake.
22Pamene apo eletewa kwake wokulamwa chiŵanda mpofu na baba: naye empozya, tetyo baba elaŵira noŵona. 23Naŵo maumba ŵonse ŵezizwa ŵechiti, Uyu nti mwana wa Davide kansi? 24Sembe Afarisayo akamvwe echiti, Uyu ntofumya viŵanda sembe kwa Beelzebule mfumu ya viŵanda. 25Naye poziŵa malingililo ŵaŵo eŵanenera, Ufumu uli wonse ukayaŵanikana kulisusya wine weka uchenekeka ukuŵa matongwe; nawo munzi uli wonse kano ng'anda vikayaŵanikana kulisusya vine vyeka sivitang'a. 26Kati Satana naye akafumya Satana oyaŵanikana kulisusya mwine yeka; nga ufumu wake utang'e syani? 27Nga kati neo nufumya viŵanda kwa Beelzebule, nga ŵana ŵanu ovifumya kwa ŵani? ch komo choteti ŵeve ni pati ŵaŵe ŵompingulani. 28Sembe kati neo nufumya viŵanda kwa Mzimu wa Mlungu, ninga ufumu wa Mlungu uliuze kwanu. 29Kano muntu angaloŵe tyani mnanda ya wa vizo nofunka vintu vyake, akakanoyamba kummanga uyo wa vizo? ni pati afunke vya mnanda yake. 30Uyo asali nane pamo onisusya; na uyo asaunjika nane oingomwazya. 31Teti ni panumnenelani kuti, Chiipa chiri chonse na msikila vize vilekelewe ku ŵantu; sembe msikila womsusya Mzimu nteuti wolekelewa. 32Ali wonse ati amnene Mwana wa muntu chize chilekelewe kwake; sembe ali wonse ati amnene Mzimu Mtuŵa ntechiti cholekelewa kwake, chukanga nsita ino ya lomba chukanga iyo ikuza. 33Pambine chitani chimuti chiŵe chiweme na vyotwala vya chine viweme; pambine chitani chimuti chiŵe chiipa na vyotwala vya chine viipa: pakuti chimuti chuziŵikwa na vyotwala vya chine. 34Mwaŵovyalikwa mnjoka, mngalaŵire syani viweme, mweo muluŵipe? pakuti pozula kwa mtima pakanwa ni papolaŵira. 35Muntu muweme uyo ofumya viweme mchuma chake chiweme: na muntu muŵipa uyo ofumya viipa mchuma chake chiipa. 36Nane numnenelani kuti lizu lonse latyala lati alaŵire ŵantu, azapende mlandu wa line pa siku lopingula. 37Pakuti na malizu ŵako uzochishiwe wolungama, soti na malizu ŵako uzokonweshewe.
38Pamene apo alembi ŵambi na Afarisayo emyasuka echiti, Msambizi, tupangwoŵona chiziŵikwilo kuli mweo. 39Sembe yeve eyasuka enena naŵo, Luko luŵipa na lochende lusakasaka chiziŵikwilo; lomba ntechiti chipewe kwaŵo chiziŵikwilo, sembe chiziŵikwilo cha Yona muŵirizi nicho: 40pakuti nga ni mwenzele Yona mvumo mwa chisaŵi icho masiku atatu usiku na mzuŵa, tetyo na Mwana wa muntu ni mwati azaŵere masiku atatu usiku na mzuŵa mu mtima mwa charo cha pansi. 41Ŵantu ŵala a ku Nineve azaukirane mu upinguzi ula pamo na luko ulu nolipa mlandu: pakuti eyaruka mitima poŵirizya kwa Yona; lomba ŵonani, wopula Yona ali pano. 42Mfumukazi ila ya kuli kampambe ize iukirane mu upinguzi ula pamo na luko ulu nolipa mlandu: pakuti ichiza kufumila kunsilililo kwa charo kuza kumvwa nzeru zya Solomoni; lomba ŵonani, wopula Solomoni ali pano. 43Lomba mzimu wa lunsa, ukafuma mmuntu, upita mulumwa kusakasaka mpumulo, nteufwanga. 44Pamene apo unena, Niwerere ku ng'anda kwangu kwinifuma; nawo ukaza uifwanga iliye woinkalamo, yopyerewa nowamyiwa. 45Nipo ukuya noula pamo nawo mizimu iyakwene isano na iŵiri iipa kupula weve wine, nayo yuloŵamo nonkala mwamene mula; nipo unkalo wosalilila wa muntu ula ukuŵa uŵipa kupula ula woyamba. Tetyo ni mkuti kuŵere ku luko ulu luŵipa.
46Pamene yeve akali elaŵira na maumba, ŵonani, anyina na akwaŵo enzepeneme panja enzekuti alaŵire naye. 47Chite emnenera, Ŵonani, anyina wanu na akwanu alipeneme panja akuti alaŵire namwe. 48Sembe yeve eyasuka enena naye uyo emuuzya, Ŵama ni ŵani? akwasu ni ŵani? 49Naye etambulula kwanja kwake pa asambili ŵake echiti, Ŵonani ŵama na akwasu! 50Pakuti ali wonse ati azochita chipangwilo cha Ŵata ŵangu wa kumulu, wamene uyo ni mkwasu, ni mlongosi wangu, ni ŵama.
Trenutno izabrano:
M. Mattayo 12: MA23
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Mapangano Alomba © Bible Society of Zambia, 1923.