M. Mattayo 8
8
1NIPO yeve akaseluke ku lupiri imkonka mipingo ikuru. 2Nipo, ŵonani, echiza kuli yeve wa manzonzo enzomlambila kuti, Asikuru, kati mkapangwa mnganisuke. 3Naye etambikizya kwanja kwake emkumya echiti, Nupangwa; usukiwe. Lomba pano apa esukiwa manzonzo ŵake. 4Naye Yesu emnenera, Ŵona usauzya muntu; lomba nkoya ukalilangizye ku wansembe, nopupa nsembe ila yechisuzula Musa iŵe untoni kuli ŵeve.
5Akaloŵe yeve mKapernaumi emzila kenturiyo empapatira 6kuti, Asikuru, mlumbwana wangu alilele mnanda olwala manjenje, ozuzika koyofya. 7Yeve emnenera, Ninize neo nize nimpozye. 8Naye kenturiyo eyasuka echiti, Asikuru, sinuwamila neo kuti mkaloŵe kunyansi kwa mtenje wangu yai: sembe munene lizu leka na mlumbwana wangu apole. 9Pakuti nane kumo numvwila nsaka, nina manjolinjoli ŵonimvwila neo: nunena kuli ili, Nkoya, nipo likuya; ku liyake, Iza, nipo likuza; kwa kapolo wangu, Chita ichi, naye ochichita. 10Naye Yesu pakumvwa ezizwa, eŵanenera ŵala ŵokonka, Lezee numuuzyani, Chukanga pa Israeli niliyofwanga mvwano ukuru woteti. 11Numnenelani kuti anyinji a ku matulilo a zuŵa na a ku maloŵero azafwike nonkala pansi pamo na Abrahamu na Isake na Yakobo mu ufumu wa kumulu: 12sembe ŵana a ufumu azataiwe ku mfinzi ya kunja: kulakwa kukaŵe kulila nokukuta menu. 13Naye Yesu echiti kwa kenturiyo, Nkoya; umo muwazomelera nakuchitiwe kwako. Nipo mlumbwana uyo epozyewa kamfunda kamene ako.
14Nipo akaloŵe Yesu mng'anda ya Petro eŵona anyavyalawake alilele olwala chinyong'onyong'o. 15Emkumya ku kwanja kwake, nipo chinyong'onyong'o chimleka, naye euka nomtumikila. 16Nipo chikaze chingulo emuulila anyinji ŵokulamwiwa na viŵanda, naye eifumya mizimu na lizu, epozya ŵonse enzolwala; 17kuti chisilizike icho chinenewa na Isaya muŵirizi chakuti, Yeve yeka eula vyolenda vyasu, na ntenda zyasu ezitwala.
18Lomba Yesu akaŵone maumba anyinji amzinga esuzula kuya kusilya. 19Nipo echiza mlembi emnenera, Msambizi, nimkonkeni konse kumti mwakuya. 20Naye Yesu echiti kwake, Ankandwe ana michembo, na tuni twa mlulezi tuna vivumbo, sembe Mwana wa muntu aliye posamila mutu wake. 21Muyake wa asambili enena naye, Asikuru, munizomezye neo tanganikaike ŵata ku msitu. 22Sembe Yesu emnenera, Nikonke neo; ŵaleke akufwa aikane akufwa ŵeka.
23Nipo yeve akaloŵe mu wato asambili ŵake emkonka. 24Nipo ŵonani, chiuka chinkuka chikuru pa chimana, na wato ni pewivwinikiliwa na magapigapi, sembe yeve enze mtulo. 25Ŵeve ŵechiza kuli yeve nomuusya kuti, Asikuru, puzumusyani; tutaika seo. 26Naye eŵanenera, Muchitiranji mwezo, mwatonto mvwano? Pamene apo euka evifyangila mpepo na chimana, nipo penze kachetechete kakuru. 27Nipo aŵo ŵantu ezuzuka echiti, Ni wotyani uyu muntu akuti chukanga mpepo na chimana vummvwila?
28Lomba yeve akaze kusilya limbi ku charo cha Agadara ekumana naye aŵiri ŵokulamwiwa na viŵanda, enzofumila ku msitu akali ngako, ni pekwenzokanopita na muntu ku njira ila. 29Nipo ŵonani, ekuwa echiti, Tiri namwe na chinji, mweo Mwana wa Mlungu? kansi mwaza kuno kutizuzya ikaliyofwika nsita yake? 30Lomba patali na ŵeve penze mkusi wa nkumba zinyinji zikulya. 31Navyo viŵanda vimtetelela vichiti, Kati mutifumye mtisuzulire tikaloŵe mu mkusi wa nkumba. 32Naye evinenera, Nkoyani. Navyo vifumamo vichiyoloŵa mnkumba izyo: nipo ŵonani, mkusi wonse wiutuka luŵilo poturumukila mchimana wichifwa na manzi. 33Naŵo oziŵetera eutuka echiya ku munzi, ekundulula vyonse na ivyo vyaŵaponera ŵala enzokulamwiwa na viŵanda. 34Nipo ŵonani, munzi wonse wifuma kumchinguzya Yesu; akamuŵone emtetelela kuti afumeko ku mpaka waŵo.
Trenutno izabrano:
M. Mattayo 8: MA23
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Mapangano Alomba © Bible Society of Zambia, 1923.